໓. ຈີວຣປຣິວຕ຺ຕນສິກ຺ຂາປທວຓ຺ຓນາ

ຕຕິເຍ ຫນ຺ທາຕິ ຄຓ຺ຫ. ອຈ຺ຉິນ຺ເທຍ຺ຍາຕິ ສຍໍ ອຈ຺ຉິນ຺ທນ຺ຕິຍາ ພນ຺ຘິຕ຺ວາ ຐປິເຕສຸ ພຫູສຸປິ ເອກາປຕ຺ຕິ, ອິຕເຣສຸ ວຕ຺ຖຸຄຓນາຍ ອາປຕ຺ຕິໂຍ. ອຈ຺ຉິນ຺ທາປເນ ປນ ເອກາຍ ອາຓຕ຺ຕິຍາ ພຫູສຸ ອຈ຺ຉິນ຺ເນສຸປິ ເອກາວາປຕ຺ຕິ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ຈີວຣໍ ປຣິວຕ຺ເຕຕ຺ວາ ອຈ຺ຉິນ຺ທນວຕ຺ຖຸສ຺ມິໍ ປຎ຺ຎຕ຺ຕໍ, ສາຓຕ຺ຕິກໍ, ຕິກປາຈິຕ຺ຕິຍໍ, ອຎ຺ຎສ຺ມິໍ ປຣິກ຺ຂາເຣ ຕິກທຸກ຺ກຏໍ, ອນຸປສມ຺ປນ຺ນາຍ ຈີວເຣປິ ຕິກທຸກ຺ກຏເມວ. ຍາ ປນ ຕາຍ ວາ ທິຍ຺ຍມານໍ, ຕສ຺ສາ ວາ ວິສ຺ສາສໍ ຄຓ຺ຫາຕິ, ຕສ຺ສາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອຸປສມ຺ປນ຺ນຕາ, ປຣິວຕ຺ຕິຕຈີວຣສ຺ສ ວິກປ຺ປນຸປຄຕາ, ສກສຎ຺ຎາຍ ອຈ຺ຉິນ຺ທນໍ ວາ ອຈ຺ຉິນ຺ທາປນໍ ວາຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ອທິນ຺ນາທານສທິສານິ, ອິທໍ ປນ ທຸກ຺ຂເວທນນ຺ຕິ.

ຈີວຣປຣິວຕ຺ຕນສິກ຺ຂາປທວຓ຺ຓນາ ນິຏ຺ຐິຕາ.