໑໔. ສງ຺ຆເຠທກາທິສິກ຺ຂາປທວຓ຺ຓນາ

ສງ຺ຆເຠທາທີສຸ ຈຕູສຸ ວຸຕ຺ຕນເຍເນວ ວິນິຈ຺ຉໂຍ ເວທິຕພ຺ໂພ. ເກວລຎ຺ຫິ ຠິກ຺ຂຸນີ ສງ຺ຆໍ ນ ຠິນ຺ທຕິ, ເຠທາຍ ປນ ປຣກ຺ກມຕິ ເຈວ ອນຸວຕ຺ຕຕິ ຈ. ອຸທ຺ທິຏ຺ຐາ ໂຂ ອຍ຺ຍາໂຍ ສຕ຺ຕຣສ ສງ຺ຆາທິເສສາ ຘມ຺ມາຕິ ຠິກ຺ຂູ ອາຣພ຺ຠ ປຎ຺ຎຕ຺ຕາ ສາຘາຣຓາ ສຕ຺ຕ, ອສາຘາຣຓາ ທສາຕິ ເອວໍ ສຕ຺ຕຣສ. ອຸຠໂຕສງ຺ເຆ ປກ຺ຂມານຕ຺ຕໍ ຈຣິຕພ຺ພນ຺ຕິ ຠິກ຺ຂຸນິຍາ ຫິ ອາປຕ຺ຕິໍ ຉາເທນ຺ຕິຍາປິ ປຣິວາໂສ ນາມ ນຕ຺ຖິ, ຉາທນປຈ຺ຈຍາປິ ນ ທຸກ຺ກຏໍ ອາປຊ຺ຊຕິ, ຕສ຺ມາ ຉາເທຕ຺ວາປິ ອຉາເທຕ຺ວາປິ ເອກໍ ປກ຺ຂມານຕ຺ຕເມວ ຈຣິຕພ຺ພໍ. ຕໍ ຠິກ຺ຂຸນີຫິ ອຕ຺ຕໂນ ສີມໍ ໂສເຘຕ຺ວາ ວິຫາຣສີມາຍ ວາ, ໂສເຘຕຸໍ ອສກ຺ໂກນ຺ຕີຫິ ຂຓ຺ຑສີມາຍ ວາ ສພ຺ພນ຺ຕິເມນ ປຣິຈ຺ເຉເທນ ຈຕຸວຄ຺ຄໍ ຄຓໍ ສນ຺ນິປາຕາເປຕ຺ວາ ທາຕພ຺ພໍ. ສເຈ ເອກາ ອາປຕ຺ຕິ ໂຫຕິ, ເອກິສ຺ສາ ວເສນ, ສເຈ ທ຺ເວ ວາ ຕິສ຺ໂສ ວາ ສມ຺ພຫຸລາ ວາ ເອກວຕ຺ຖຸກາ ວາ ນານາວຕ຺ຖຸກາ ວາ, ຕາສໍ ຕາສໍ ວເສນ ຠິກ຺ຂຸປາຕິໂມກ຺ຂວຓ຺ຓນາຍໍ ວຸຕ຺ຕວຕ຺ຖຸໂຄຕ຺ຕນາມອາປຕ຺ຕິເຠເທສຸ ຍໍ ຍໍ ອິຈ຺ຉຕິ, ຕໍ ຕໍ ອາທາຍ ໂຍຊນາ ກາຕພ຺ພາ.

ຕຕ຺ຣິທໍ ປຐມາປຕ຺ຕິວເສນ ມຸຂມຕ຺ຕນິທສ຺ສນໍ – ຕາຍ ອາປນ຺ນາຍ ຠິກ຺ຂຸນິຍາ ຠິກ຺ຂຸນິສງ຺ຆໍ ອຸປສງ຺ກມິຕ຺ວາ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ວຸຑ຺ຒານໍ ຠິກ຺ຂຸນີນໍ ປາເທ ວນ຺ທິຕ຺ວາ ອຸກ຺ກຸຏິກໍ ນິສີທິຕ຺ວາ ອຎ຺ຊລິໍ ປຄ຺ຄເຫຕ຺ວາ ເອວມສ຺ສວຈນີໂຍ ‘‘ອຫໍ, ອຍ຺ເຍ, ເອກໍ ອາປຕ຺ຕິໍ ອາປຊ຺ຊິໍ ອຸສ຺ສຍວາທໍ, ສາຫໍ, ອຍ຺ເຍ, ສງ຺ຆໍ ເອກິສ຺ສາ ອາປຕ຺ຕິຍາ ອຸສ຺ສຍວາທາຍ ປກ຺ຂມານຕ຺ຕໍ ຍາຈາມີ’’ຕິ, ເອວໍ ຕິກ຺ຂຕ຺ຕຸໍ ຍາຈາເປຕ຺ວາ ພ຺ຍຕ຺ຕາຍ ຠິກ຺ຂຸນິຍາ ປຏິພລາຍ ສງ຺ໂຆ ຎາເປຕພ຺ໂພ –

‘‘ສຸຓາຕຸ ເມ, ອຍ຺ເຍ, ສງ຺ໂຆ, ອຍໍ ອິຕ຺ຖນ຺ນາມາ ຠິກ຺ຂຸນີ ເອກໍ ອາປຕ຺ຕິໍ ອາປຊ຺ຊິໍ ອຸສ຺ສຍວາທໍ, ສາ ສງ຺ຆໍ ເອກິສ຺ສາ ອາປຕ຺ຕິຍາ ອຸສ຺ສຍວາທາຍ ປກ຺ຂມານຕ຺ຕໍ ຍາຈຕິ, ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ອິຕ຺ຖນ຺ນາມາຍ ຠິກ຺ຂຸນິຍາ ເອກິສ຺ສາ ອາປຕ຺ຕິຍາ ອຸສ຺ສຍວາທາຍ ປກ຺ຂມານຕ຺ຕໍ ທເທຍ຺ຍ, ເອສາ ຎຕ຺ຕິ.

‘‘ສຸຓາຕຸ ເມ, ອຍ຺ເຍ, ສງ຺ໂຆ, ອຍໍ ອິຕ຺ຖນ຺ນາມາ ຠິກ຺ຂຸນີ…ເປ… ທຸຕິຍມ຺ປິ…ເປ… ຕຕິຍມ຺ປິ ເອຕມຕ຺ຖໍ ວທາມິ, ສຸຓາຕຸ ເມ, ອຍ຺ເຍ, ສງ຺ໂຆ…ເປ… ສາ ຠາເສຍ຺ຍ. ທິນ຺ນໍ ສງ຺ເຆນ ອິຕ຺ຖນ຺ນາມາຍ ຠິກ຺ຂຸນິຍາ ເອກິສ຺ສາ ອາປຕ຺ຕິຍາ ອຸສ຺ສຍວາທາຍ ປກ຺ຂມານຕ຺ຕໍ. ຂມຕິ ສງ຺ຆສ຺ສ, ຕສ຺ມາ ຕຸຓ຺ຫີ, ເອວເມຕໍ ຘາຣຍາມີ’’ຕິ.

ກມ຺ມວາຈາປຣິໂຍສາເນ ‘‘ວຕ຺ຕໍ ສມາທິຍາມິ, ມານຕ຺ຕໍ ສມາທິຍາມີ’’ຕິ ສມາທິຍິຕ຺ວາ ສງ຺ຆສ຺ສ ອາໂຣເຈຕ຺ວາ ນິກ຺ຂິຕ຺ຕວຕ຺ເຕນ ຕາວ ວສິຕຸກາມາຍ ຕຕ຺ເຖວ ສງ຺ຆມຊ຺ເຌ ວາ ປກ຺ກນ຺ຕາສຸ ຠິກ຺ຂຸນີສຸ ເອກຠິກ຺ຂຸນິຍາ ວາ ທຸຕິຍິກາຍ ວາ ສນ຺ຕິເກ ‘‘ວຕ຺ຕໍ ນິກ຺ຂິປາມິ, ມານຕ຺ຕໍ ນິກ຺ຂິປາມີ’’ຕິ ນິກ຺ຂິປິຕພ຺ພໍ. ອຎ຺ຎິສ຺ສາ ປນ ອາຄນ຺ຕຸກາຍ ສນ຺ຕິເກ ອາໂຣເຈຕ຺ວາ ນິກ຺ຂິປິຕພ຺ພໍ, ນິກ຺ຂິຕ຺ຕກາລໂຕ ປຏ຺ຐາຍ ປກຕຕ຺ຕຏ຺ຐາເນ ຕິຏ຺ຐຕິ, ຕໂຕ ປຸເຣອຣຸເຓເຍວ ຈຕູຫິ ຠິກ຺ຂຸນີຫິ ຕໍ ຠິກ຺ຂຸນິໍ ຄເຫຕ຺ວາ ຄາມູປຈາຣໂຕ ຈ ຠິກ຺ຂູນໍ ວິຫາຣູປຈາຣໂຕ ຈ ທ຺ເວ ເລຑ຺ຑຸປາເຕ ອຕິກ຺ກມິຕ຺ວາ ມຫາມຄ຺ຄາ ໂອກ຺ກມ຺ມ ຄຸມ຺ພວຕິອາທີຫິ ປຏິຈ຺ຉນ຺ເນ ໂອກາເສ ນິສີທິຕພ຺ພໍ. ຈຕູຫິ ຠິກ຺ຂູຫິປິ ຕຕ຺ຖ ຄນ຺ຕພ຺ພໍ, ຄນ຺ຕ຺ວາ ຠິກ຺ຂຸນີນໍ ອວິທູເຣ ວິສຸໍ ນິສີທິຕພ຺ພໍ. ອຖ ຕາຍ ຠິກ຺ຂຸນິຍາ ວຸຕ຺ຕນເຍເນວ ວຕ຺ຕໍ ສມາທິຍິຕ຺ວາ ຠິກ຺ຂຸນິສງ຺ຆສ຺ສ ຕາວ ເອວໍ ອາໂຣເຈຕພ຺ພໍ –

‘‘ອຫໍ, ອຍ຺ເຍ, ເອກໍ ອາປຕ຺ຕິໍ ອາປຊ຺ຊິໍ ອຸສ຺ສຍວາທໍ, ສາຫໍ ສງ຺ຆໍ ເອກິສ຺ສາ ອາປຕ຺ຕິຍາ ອຸສ຺ສຍວາທາຍ ປກ຺ຂມານຕ຺ຕໍ ຍາຈິໍ, ຕສ຺ສາ ເມ ສງ຺ໂຆ ເອກິສ຺ສາ ອາປຕ຺ຕິຍາ ອຸສ຺ສຍວາທາຍ ປກ຺ຂມານຕ຺ຕໍ ອທາສິ, ສາຫໍ ມານຕ຺ຕໍ ຈຣາມິ, ເວທຍາມຫໍ, ອຍ຺ເຍ, ‘ເວທຍຕີ’ຕິ ມໍ ສງ຺ໂຆ ຘາເຣຕູ’’ຕິ.

ຕໂຕ ຠິກ຺ຂຸສງ຺ຆສ຺ສ ສນ຺ຕິກໍ ຄນ຺ຕ຺ວາ ເອວໍ ອາໂຣເຈຕພ຺ພໍ ‘‘ອຫໍ, ອຍ຺ຍາ, ເອກໍ ອາປຕ຺ຕິໍ ອາປຊ຺ຊິໍ…ເປ… ເວທຍາມຫໍ, ອຍ຺ຍາ, ‘ເວທຍຕີ’ຕິ ມໍ ສງ຺ໂຆ ຘາເຣຕູ’’ຕິ. ອາໂຣເຈຕ຺ວາ ຠິກ຺ຂຸນິສງ຺ຆສ຺ເສວ ສນ຺ຕິເກ ນິສີທິຕພ຺ພໍ, ຕໂຕ ປຏ຺ຐາຍ ຠິກ຺ຂູສຸ ວາ, ທຸຕິຍິກໍ ຐເປຕ຺ວາ ຠິກ຺ຂຸນີສຸ ວາ ປກ຺ກນ຺ຕາສຸປິ ອຸຠໂຕສງ຺ເຆ ມານຕ຺ຕໍ ຈິຓ຺ຓເມວ ໂຫຕິ. ຍາວ ອຣຸຓໍ ນ ອຸຏ຺ຐຫຕິ, ຕາວ ຍໍ ປຐມໍ ປສ຺ສຕິ ຠິກ຺ຂຸໍ ວາ ຠິກ຺ຂຸນິໍ ວາ, ຕສ຺ສາ ອາໂຣເຈຕພ຺ພໍ. ອຸຏ຺ຐິເຕ ອຣຸເຓ ວຕ຺ຕໍ ນິກ຺ຂິປິຕ຺ວາ ອຸປສ຺ສຍໍ ຄນ຺ຕພ຺ພໍ, ເອວໍ ປຎ຺ຈທສ ອຣຸຓາ ຄເຫຕພ຺ພາ.

ອນິກ຺ຂິຕ຺ຕວຕ຺ຕາຍ ປນ ອາຄນ຺ຕຸເກສຸ ອສຕິ ຈຕຸນ຺ນໍ ຠິກ຺ຂູນຎ຺ຈ ຠິກ຺ຂຸນີນຎ຺ຈ ເທວສິກໍ ອາໂຣເຈຕ຺ວາ, ອາຄນ຺ຕຸເກສຸ ສຕິ ສພ຺ເພສມ຺ປິ ອາຄນ຺ຕຸການໍ ອາໂຣເຈນ຺ຕິຍາ ປຎ຺ຈທສ ທິວສານິ ປາຣິວາສິກກ຺ຂນ຺ຘເກ (ຈູຬວ. ໗໕ ອາທໂຍ) ວຸຕ຺ຕນເຍເນວ ສມ຺ມາ ວຕ຺ຕິຕພ຺ພນ຺ຕິ ອຍເມຕ຺ຖ ສງ຺ເຂໂປ, ວິຕ຺ຖາໂຣ ປນ ສມນ຺ຕປາສາທິກາຍໍ (ຈູຬວ. ອຏ຺ຐ. ໗໕ ອາທໂຍ) ວຸຕ຺ໂຕ, ຈິຓ຺ຓມານຕ຺ຕາຍ ຠິກ຺ຂຸນິຍາຕິ ຍທາ ເອວໍ ຈິຓ຺ຓມານຕ຺ຕາ ຠິກ຺ຂຸນີ ໂຫຕິ, ອຖສ຺ສາ ຍຕ຺ຖ ສິຍາ ວີສຕິຄໂຓ ຠິກ຺ຂຸນິສງ຺ໂຆຕິ ວຸຕ຺ຕນເຍເນວ ອພ຺ຠານກມ຺ມໍ ກາຕພ຺ພໍ, ເສສໍ ອຸຕ຺ຕານເມວາຕິ.

ກງ຺ຂາວິຕຣຓິຍາ ປາຕິໂມກ຺ຂວຓ຺ຓນາຍ

ຠິກ຺ຂຸນິປາຕິໂມກ຺ເຂ

ສງ຺ຆາທິເສສວຓ຺ຓນາ ນິຏ຺ຐິຕາ.