ກຸສລກມ຺ມປຖທສກວຓ຺ຓນາ

ປາຓາຕິປາຕາ …ເປ… ເວທິຕພ຺ພານິ ໂລກິຍໂລກຸຕ຺ຕຣມິສ຺ສກວເສເນຕ຺ຖ ກຸສລກມ຺ມປຖານໍ ເທສິຕຕ຺ຕາ. ເວຣເຫຕຸຕາຍ ເວຣສຎ຺ຎິຕໍ ປາຓາຕິປາຕາທິປາປຘມ຺ມໍ ມຓຕິ ‘‘ມຍິ ອິຘ ຐິຕາຍ ກຖໍ ອາຄຈ຺ຉສີ’’ຕິ ຕຊ຺ຊນ຺ຕີ ວິຍ ນີຫຣຕີຕິ ເວຣມຓີ, ວິຣມຕິ ເອຕາຍາຕິ ວາ ‘‘ວິຣມຓີ’’ຕິ ວຕ຺ຕພ຺ເພ ນິຣຸຕ຺ຕິນເຍນ ‘‘ເວຣມຓີ’’ຕິ ວຸຕ຺ຕໍ. ສມາທານວເສນ ອຸປ຺ປນ຺ນາ ວິຣຕິ ສມາທານວິຣຕິ. ອສມາທິນ຺ນສີລສ຺ສ ສມ຺ປຕ຺ຕໂຕ ຍຖາອຸປຏ຺ຐິຕວີຕິກ຺ກມິຕພ຺ພວຕ຺ຖຸໂຕ ວິຣຕິ ສມ຺ປຕ຺ຕວິຣຕິ. ກິເລສານໍ ສມຸຈ຺ຉິນ຺ທນວເສນ ປວຕ຺ຕາ ມຄ຺ຄສມ຺ປຍຸຕ຺ຕາ ວິຣຕິ ສມຸຈ຺ເຉທວິຣຕິ. ກາມຎ຺ເຈຕ຺ຖ ປາຬິຍໍ ວິຣຕິເຍວ ອາຄຕາ, ສິກ຺ຂາປທວິຠງ຺ເຄ (ວິຠ. ໗໐໓) ປນ ເຈຕນາປິ ອາຫຣິຕ຺ວາ ທສ຺ສິຕາຕິ ຕທຸຠຍມ຺ປິ ຄຓ຺ຫນ຺ໂຕ ‘‘ເຈຕນາປິ ວຕ຺ຕນ຺ຕິ ວິຣຕິໂຍປີ’’ຕິ ອາຫ. ອນຠິຊ຺ຌາ ຫິ ມູລໍ ປຕ຺ວາຕິ ກມ຺ມປຖໂກຏ຺ຐາເສ ‘‘ອນຠິຊ຺ຌາ’’ຕິ ວຸຕ຺ຕຘມ຺ໂມ ມູລໂຕ ອໂລໂຠ ກຸສລມູລໍ ໂຫຕີຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ. ເສສປທທ຺ວເຍປິ ເອເສວ ນໂຍ.

ທຸສ຺ສີລ຺ຍາຣມ຺ມຓາ ຕທາຣມ຺ມຓຊີວິຕິນ຺ທ຺ຣິຍາທິອາຣມ຺ມຓາ ກຖໍ ທຸສ຺ສີລ຺ຍານິ ປຊຫນ຺ຕີຕິ ຕໍ ທສ຺ເສຕຸໍ ‘‘ຍຖາ ປນາ’’ຕິອາທິ ວຸຕ຺ຕໍ. ປຊຫນ຺ຕີຕິ ເວທິຕພ຺ພາ ປາຓາຕິປາຕາທີຫິ ວິຣມຓວເສເນວ ປວຕ຺ຕນໂຕ. ອຖ ຕທາຣມ຺ມຓຠາເວ, ນ ໂສ ຕານິ ປຊຫຕິ. ນ ຫິ ຕເທວ ອາຣພ຺ຠ ຕໍ ປຊຫິຕຸໍ ສກ຺ກາ ຕໂຕ ອວິນິສ຺ສຏຠາວໂຕ.

ອນຠິຊ຺ຌາ…ເປ… ວິຣມນ຺ຕສ຺ສາຕິ ອຠິຊ຺ຌໍ ປຊຫນ຺ຕສ຺ສາຕິ ອຕ຺ໂຖ. ນ ຫິ ມໂນທຸຈ຺ຈຣິຕໂຕ ວິຣຕິ ອຕ຺ຖິ ອນຠິຊ຺ຌາທີເຫວ ຕປ຺ປຫານສິທ຺ຘິໂຕ.