ຠວຈກ຺ກກຖາວຓ຺ຓນາ

໒໔໒. ສມິຕນ຺ຕິ ສງ຺ຄຕໍ, ອພ຺ໂພຈ຺ຉິນ຺ນນ຺ຕິ ອຕ຺ໂຖ. ກາມຍານສ຺ສາຕິ ກາມຍມານສ຺ສ, ກາໂມ ຍານໍ ເອຕສ຺ສາຕິ ວາ ກາມຍາໂນ, ຕສ຺ສ ກາມຍານສ຺ສ. ຣຸປ຺ປຕີຕິ ໂສເກນ ຣຸປ຺ປຕິ.

ປຣິຍຸຏ຺ຐານຕາຍ ຕິຏ຺ຐນສີໂລ ປຣິຍຸຏ຺ຐານຏ຺ຐາຍີ. ‘‘ປຣິຍຸຏ຺ຐຏ຺ຐາຍິໂນ’’ຕິ ວາ ປາໂຐ, ຕຕ຺ຖ ປຣິຍຸຏ຺ຐາຕີຕິ ປຣິຍຸຏ຺ຐໍ, ທິຏ຺ຐິປຣິຍຸຏ຺ຐໍ, ເຕນ ຕິຏ຺ຐຕີຕິ ປຣິຍຸຏ຺ຐຏ຺ຐາຍີຕິ ອຕ຺ໂຖ ທຏ຺ຐພ຺ໂພ. ປຎ຺ຈ ປຸພ຺ພນິມິຕ຺ຕານີຕິ ‘‘ມາລາ ມິລາຍນ຺ຕິ, ວຕ຺ຖານິ ກິລິສ຺ສນ຺ຕິ, ກຈ຺ເຉຫິ ເສທາ ມຸຈ຺ຈນ຺ຕິ, ກາເຍ ເວວຓ຺ຓິຍໍ ໂອກ຺ກມຕິ, ເທໂວ ເທວາສເນ ນາຠິຣມຕີ’’ຕິ (ອິຕິວຸ. ໘໓) ວຸຕ຺ຕານິ ປຎ຺ຈ ມຣຓປຸພ຺ພນິມິຕ຺ຕານີຕິ ອຕ຺ໂຖ. ຕານິ ຫິ ທິສ຺ວາ ກມ຺ມນິພ຺ພຕ຺ຕກ຺ຂນ຺ຘສງ຺ຂາເຕ ອຸປປຕ຺ຕິຠເວ ຠວຉນ຺ທພເລນ ເທວານໍ ພລວໂສໂກ ອຸປ຺ປຊ຺ຊຕີຕິ. ພາໂລຕິ ອວິທ຺ວາ. ເຕນ ອວິຊ຺ຊາຍ ກາຣຓຠາວໍ ທສ຺ເສຕິ. ຕິວິຘນ຺ຕິ ຕສ຺ສາຣຸປ຺ປກຖາສວນກມ຺ມກາຣຓາທສ຺ສນມຣຓກາລກມ຺ໂມປຏ຺ຐານນິທານໍ ໂສກາທິທຸກ຺ຂໍ. ອາສເວ ສາເຘນ຺ຕີຕິ ອາສເວ ຄເມນ຺ຕິ ໂພເຘນ຺ຕີຕິ ອຕ຺ໂຖ.

ເອວໍ ສຕີຕິ ອວິທິຕາທິຕາຍ ອນາທິຠາເວ ສຕິ. ອາທິມຕ຺ຕກຖນນ຺ຕິອາທິ ເອຕສ຺ສ ອຕ຺ຖີຕິ ອາທິມໍ, ຠວຈກ຺ກໍ. ຕສ຺ສ ຠາໂວ ອາທິມຕ຺ຕໍ, ຕສ຺ສ ກຖນໍ ອາທິມຕ຺ຕກຖນໍ. ວິເສສນິວຕ຺ຕິອຕ຺ໂຖ ວາ ມຕ຺ຕ-ສທ຺ໂທ, ສຕິ ອນາທິຠາເວ ອວິຊ຺ຊາ ອາທິມ຺ຫິ ມຊ຺ເຌ ປຣິໂຍສາເນ ຈ ສພ຺ພຕ຺ຖ ສິຍາຕິ ອາທິມຕ຺ຕາຍ ອວິຊ຺ຊາຍ ກຖນໍ ວິຣຸຊ຺ຌຕີຕິ ອຕ຺ໂຖ. ອວິຊ຺ຊາຄ຺ຄຫເຓນາຕິ ອວິຊ຺ຊາຍ ອຸປ຺ປາທເນນ ກຖເນນ, ອປ຺ປຫາເນນ ວາ, ອຕ຺ຕໂນ ສນ຺ຕາເນ ສນ຺ນິຫິຕຠາວກຣເຓນາຕິ ອຕ຺ໂຖ. ກມ຺ມາທີນີຕິ ກມ຺ມວິປາກວຏ຺ຏານິ. ວຏ຺ຏກາຣຓຠາເວນ ປຘານຕ຺ຕາ ‘‘ປຘານຘມ຺ໂມ’’ຕິ ອວິຊ຺ຊາ ກຖິຕາ. ວທຕີຕິ ວໂທ. ເວເທຕິ, ເວທິຍຕີຕິ ວາ ເວເທຍ຺ໂຍ, ສຸຂາທິໍ ອນຸຠວຕິ, ສພ຺ພວິສເຍ ວາ ຊານາຕິ, ‘‘ສຸຂິໂຕ’’ຕິອາທິນາ ອຕ຺ຕນາ ປເຣຫິ ຈ ຊານາຕິ ຎາຍຕິ ຈາຕິ ອຕ຺ໂຖ. ພ຺ຣຫ຺ມາທິນາ ວາ ອຕ຺ຕນາ ວາຕິ ວາ-ສທ຺ໂທ ຈ-ສທ຺ທຕ຺ໂຖ. ເຕນາຫ ‘‘ກາຣກເວທກຣຫິຕ’’ນ຺ຕິ ຈ-ສທ຺ທຕ຺ຖສມາສໍ.

ທ຺ວາທສວິຘສຸຎ຺ຎຕາສຸຎ຺ຎນ຺ຕິ ອວິຊ຺ຊາທີນໍ ທ຺ວາທສວິຘານໍ ສຸຎ຺ຎຕາຍ ສຸຎ຺ຎໍ, ຈຕຸພ຺ພິຘມ຺ປິ ວາ ສຸຎ຺ຎຕໍ ເອກໍ ກຕ຺ວາ ທ຺ວາທສງ຺ຄຕາຍ ທ຺ວາທສວິຘາຕິ ຕາຍ ທ຺ວາທສວິຘາຍ ສຸຎ຺ຎຕາຍ ສຸຎ຺ຎນ຺ຕິ ອຕ຺ໂຖ.

ປຸພ຺ພນ຺ຕາຫຣຓໂຕຕິ ປຸພ຺ພນ຺ຕໂຕ ປຈ຺ຈຸປ຺ປນ຺ນວິປາກສ຺ສ ອາຫຣຓໂຕ ປຣິຈ຺ຉິນ຺ນເວທນາວສານໍ ເອຕໍ ຠວຈກ຺ກນ຺ຕິ ອຕ຺ໂຖ. ຠວຈກ຺ເກກເທໂສປິ ຫິ ຠວຈກ຺ກນ຺ຕິ ວຸຈ຺ຈຕິ. ເວທນາ ວາ ຕຓ຺ຫາສຫາຍາຍ ອວິຊ຺ຊາຍ ປຈ຺ຈໂຍ ໂຫຕີຕິ ເວທນາໂຕ ອວິຊ຺ຊາ, ຕໂຕ ສງ຺ຂາຣາຕິ ສມ຺ພຊ຺ຌນໂຕ ເວທນາວສານໍ ຠວຈກ຺ກນ຺ຕິ ຍຸຕ຺ຕເມຕໍ, ເອວໍ ຕຓ຺ຫາມູລເກ ຈ ໂຍເຊຕພ຺ພໍ. ທ຺ວິນ຺ນມ຺ປິ ຫິ ອຎ຺ຎມຎ຺ຎໍ ອນຸປ຺ປເວໂສ ໂຫຕີຕິ. ອວິຊ຺ຊາ ຘມ຺ມສຠາວໍ ປຏິຈ຺ຉາເທຕ຺ວາ ວິປຣີຕາຠິນິເວສໍ ກໂຣນ຺ຕີ ທິຏ຺ຐິຈຣິເຕ ສໍສາເຣ ນຍຕິ, ເຕສໍ ວາ ສໍສາຣໍ ສງ຺ຂາຣາທິປວຕ຺ຕິໍ ນຍຕິ ປວຕ຺ເຕຕີຕິ ‘‘ສໍສາຣນາຍິກາ’’ຕິ ວຸຕ຺ຕາ. ຜລຸປ຺ປຕ຺ຕິຍາຕິ ກຕ຺ຕຸນິທ຺ເທໂສ. ວິຎ຺ຎາຓາທິປຈ຺ຈຸປ຺ປນ຺ນຜລຸປ຺ປຕ຺ຕິ ຫິ ອິຘ ທິຏ຺ຐາ, ອທິຏ຺ຐານຎ຺ຈ ປຸຣິມຠເວ ອຕ຺ຕໂນ ເຫຕູນໍ ອວິຊ຺ຊາສງ຺ຂາຣານໍ ຜລໍ ອຊເນຕ຺ວາ ອນຸປຈ຺ຉິຊ຺ຊນໍ ປກາເສຕິ. ອຖ ວາ ປຸຣິມຠວຈກ຺ກໍ ທຸຕິເຍນ ສມ຺ພນ຺ຘໍ ວຸຕ຺ຕນ຺ຕິ ເວທນາສງ຺ຂາຕສ຺ສ ຜລສ຺ສ ອຸປ຺ປຕ຺ຕິຍາ ຕຓ຺ຫາທີນໍ ເຫຕູນໍ ອນຸປຈ຺ເຉທໍ ປກາເສຕິ, ຕສ຺ມາ ຜລຸປ຺ປຕ຺ຕິຍາ ກາຣຓຠູຕາຍ ປຐມສ຺ສ ຠວຈກ຺ກສ຺ສ ເຫຕູນໍ ອນຸປຈ຺ເຉທປ຺ປກາສນໂຕຕິ ອຕ຺ໂຖ. ສງ຺ຂາຣາທີນເມວ ວາ ຜລານໍ ອຸປ຺ປຕ຺ຕິຍາ ອວິຊ຺ຊາທີນໍ ເຫຕູນໍ ຜລໍ ອຊເນຕ຺ວາ ອນຸປຈ຺ເຉທເມວ, ວິຎ຺ຎາຓາທິເຫຕູນໍ ວາ ສງ຺ຂາຣາທີນໍ ອນຸພນ຺ຘນເມວ ປກາເສຕິ ປຐມໍ ຠວຈກ຺ກໍ, ນ ທຸຕິຍໍ ວິຍ ປຣິໂຍສານມ຺ປີຕິ ‘‘ຜລຸປ຺ປຕ຺ຕິຍາ ເຫຕູນໍ ອນຸປຈ຺ເຉທປ຺ປກາສນໂຕ’’ຕິ ວຸຕ຺ຕໍ. ‘‘ວິຎ຺ຎາຓປຈ຺ຈຍາ ນາມຣູປ’’ນ຺ຕິ ເອຕ຺ຖ ອປຣິປຸຓ຺ຓາຍຕນກລລຣູປໍ ວຕ຺ວາ ຕໂຕ ອຸທ຺ຘໍ ‘‘ນາມຣູປປຈ຺ຈຍາ ສຬາຍຕນ’’ນ຺ຕິ ສຬາຍຕນປ຺ປວຕ຺ຕິ ວຸຕ຺ຕາຕິ ອາຫ ‘‘ອນຸປຸພ຺ພປວຕ຺ຕິທີປນໂຕ’’ຕິ. ‘‘ຠວປຈ຺ຈຍາ ຊາຕີ’’ຕິ ເອຕ຺ຖ ນ ອາຍຕນານໍ ກເມນ ອຸປ຺ປຕ຺ຕິ ວຸຕ຺ຕາຕິ ອາຫ ‘‘ສຫຸປ຺ປຕ຺ຕິທີປນໂຕ’’ຕິ.

ເຫຕຸອາທິປຸພ຺ພກາ ຕໂຍ ສນ຺ຘີ ເອຕສ຺ສາຕິ ເຫຕຸຜລເຫຕຸປຸພ຺ພກຕິສນ຺ຘິ, ຠວຈກ຺ກໍ. ເຫຕຸຜລເຫຕຸຜລວເສນ ຈຕຸປ຺ປເຠໂທ ອງ຺ຄານໍ ສງ຺ຄໂຫ ເອຕສ຺ສາຕິ ຈຕຸເຠທສງ຺ຄຫໍ. ສຣູປໂຕ ອວຸຕ຺ຕາປິ ຕສ຺ມິໍ ຕສ຺ມິໍ ສງ຺ຄເຫ ອາກິຣີຍນ຺ຕິ ອວິຊ຺ຊາສງ຺ຂາຣາທິຄ຺ຄຫເຓຫິ ປກາສີຍນ຺ຕີຕິ ອາກາຣາ, ອຕີຕເຫຕຸອາທີນໍ ວາ ປກາຣາ ອາກາຣາ. ກິເລສກມ຺ມວິປາກາ ວິປາກກິເລສກມ຺ເມຫິ ສມ຺ພນ຺ຘາ ຫຸຕ຺ວາ ປຸນປ຺ປຸນໍ ປຣິວຕ຺ຕນ຺ຕີຕິ ເຕສຸ ວຏ຺ຏນາມໍ ອາໂຣເປຕ຺ວາ ‘‘ຕິວຏ຺ຏ’’ນ຺ຕິ ວຸຕ຺ຕໍ, ວຏ຺ເຏກເທສຕ຺ຕາ ວາ ‘‘ວຏ຺ຏານີ’’ຕິ ວຸຕ຺ຕານິ.

ສນ຺ຘີນໍ ອາທິປຣິໂຍສານວວຕ຺ຖິຕາຕິ ສນ຺ຘີນໍ ປຸພ຺ພາປຣວວຕ຺ຖິຕາຕິ ອຕ຺ໂຖ.

‘‘ຍາ ກາຈິ ວາ ປນ ເຈຕນາ ຠໂວ, ເຈຕນາສມ຺ປຍຸຕ຺ຕາ ອາຍູຫນສງ຺ຂາຣາ’’ຕິ ອິທໍ ອິມິສ຺ສາ ຘມ຺ມຏ຺ຐິຕິຎາຓຠາຊນີເຍ ວຸຕ຺ຕາຍ ປຏິສມ຺ຠິທາປາຬິຍາ (ປຏິ. ມ. ໑.໔໗) ວເສນ ວຸຕ຺ຕໍ. ເອຕ຺ຖ ຫິ ‘‘ເຈຕນາ ຠໂວ’’ຕິ ອາຄຕາຕິ. ຠວນິທ຺ເທເສ ປນ ‘‘ສາຕ຺ຖໂຕ’’ຕິ ເອຕ຺ຖ ‘‘ເຈຕນາວ ສງ຺ຂາຣາ, ຠໂວ ປນ ເຈຕນາສມ຺ປຍຸຕ຺ຕາປີ’’ຕິ ວິຠງ຺ຄປາຬິຍາ ວເສນ ທສ຺ສິຕໍ. ‘‘ຕຕ຺ຖ ກຕໂມ ປຸຎ຺ຎາຠິສງ຺ຂາໂຣ? ກຸສລາ ເຈຕນາ ກາມາວຈຣາ’’ຕິອາທິນາ ຫິ ສງ຺ຂາຣານໍ ເຈຕນາຠາໂວ ວິຠງ຺ຄປາຬິຍໍ (ວິຠ. ໒໒໖) ວຸຕ຺ໂຕຕິ. ຕຕ຺ຖ ປຏິສມ຺ຠິທາປາຬິຍໍ ‘‘ເຈຕນາສມ຺ປຍຸຕ຺ຕາ ວິປາກຘມ຺ມຕ຺ຕາ ສວິປາເກນ ອາຍູຫນສງ຺ຂາເຕນ ສງ຺ຂຕາຠິສງ຺ຂຣຓກິຈ຺ເຈນ ສງ຺ຂາຣາ’’ຕິ ວຸຕ຺ຕາ. ວິຠງ຺ຄປາຬິຍໍ (ວິຠ. ໒໓໔) ‘‘ສພ຺ພມ຺ປິ ຠວຄາມິກມ຺ມໍ ກມ຺ມຠໂວ’’ຕິ ຠວສ຺ສ ປຈ຺ຈຍຠາເວນ ຠວຄາມິຠາວໂຕ ກມ຺ມສໍສຏ຺ຐສຫາຍຕາຍ ກມ຺ມຠາວໂຕ ຈ ອຸປປຕ຺ຕິຠວໍ ຠາເວນ຺ຕີຕິ ຠໂວຕິ ວຸຕ຺ຕາ, ອຸປປຕ຺ຕິຠວຠາວນກິຈ຺ຈໍ ປນ ເຈຕນາຍ ສາຕິສຍນ຺ຕິ ປຏິສມ຺ຠິທາປາຬິຍໍ ເຈຕນາ ‘‘ຠໂວ’’ຕິ ວຸຕ຺ຕາ, ຠວາຠິສງ຺ຂຣຓກິຈ຺ຈໍ ເຈຕນາຍ ສາຕິສຍນ຺ຕິ ວິຠງ຺ຄປາຬິຍໍ ‘‘ກຸສລາ ເຈຕນາ’’ຕິອາທິນາ ເຈຕນາ ‘‘ສງ຺ຂາຣາ’’ຕິ ວຸຕ຺ຕາ, ຕສ຺ມາ ເຕນ ເຕນ ປຣິຍາເຍນ ອຸຠຍໍ ອຸຠຍຕ຺ຖ ວຕ຺ຕຸໍ ຍຸຕ຺ຕນ຺ຕິ ນຕ຺ເຖຕ຺ຖ ວິໂຣໂຘ. ຄຫຓນ຺ຕິ ກາມຸປາທານໍ ກິຈ຺ເຈນາຫ. ປຣາມສນນ຺ຕິ ອິຕຣານິ. ອາຍູຫນາວສາເນຕິ ຕີສຸປິ ອຕ຺ຖວິກປ຺ເປສຸ ວຸຕ຺ຕສ຺ສ ອາຍູຫນສ຺ສ ອວສາເນ.

ທ຺ວີສຸ ອຕ຺ຖວິກປ຺ເປສຸ ວຸຕ຺ເຕ ອາຍູຫນສງ຺ຂາເຣ ‘‘ຕສ຺ສ ປຸພ຺ພຠາຄາ’’ຕິ ອາຫ, ຕຕິເຍ ວຸຕ຺ເຕ ‘‘ຕໍສມ຺ປຍຸຕ຺ຕາ’’ຕິ. ທຫຣສ຺ສ ຈິຕ຺ຕປ຺ປວຕ຺ຕິ ຠວງ຺ຄພຫຸລາ ເຍຠຸຍ຺ເຍນ ຠວນ຺ຕຣຊນກກມ຺ມາຍູຫນສມຕ຺ຖາ ນ ໂຫຕີຕິ ‘‘ອິຘ ປຣິປກ຺ກຕ຺ຕາ ອາຍຕນານ’’ນ຺ຕິ ວຸຕ຺ຕໍ. ກມ຺ມກຣຓກາເລ ສມ຺ໂມໂຫຕິ ເອເຕນ ກມ຺ມສ຺ສ ປຈ຺ຈຍຠູຕໍ ສມ຺ໂມຫໍ ທສ຺ເສຕິ, ນ ກມ຺ມສມ຺ປຍຸຕ຺ຕເມວ.

ກມ຺ມາເນວ ວິປາກໍ ສມ຺ຠຣນ຺ຕິ ວຑ຺ເຒນ຺ຕີຕິ ກມ຺ມສມ຺ຠາຣາ, ກມ຺ມໍ ວາ ສງ຺ຂາຣຠວາ, ຕທຸປກາຣການິ ອວິຊ຺ຊາຕຓ຺ຫຸປາທານານິ ກມ຺ມສມ຺ຠາຣາ, ປຏິສນ຺ຘິທາຍໂກ ວາ ຠໂວ ກມ຺ມໍ, ຕທຸປກາຣກາ ຍຖາວຸຕ຺ຕອາຍູຫນສງ຺ຂາຣາ ອວິຊ຺ຊາທໂຍ ຈ ກມ຺ມສມ຺ຠາຣາຕິ ກມ຺ມຎ຺ຈ ກມ຺ມສມ຺ຠາຣາ ຈ ກມ຺ມສມ຺ຠາຣາຕິ ເອກເສສໍ ກຕ຺ວາ ‘‘ກມ຺ມສມ຺ຠາຣາ’’ຕິ ອາຫ. ທສ ຘມ຺ມາ ກມ຺ມນ຺ຕິ ອວິຊ຺ຊາທໂຍປິ ກມ຺ມສຫາຍຕາຍ ກມ຺ມສຣິກ຺ຂກາ ຕທຸປກາຣກາ ຈາຕິ ‘‘ກມ຺ມ’’ນ຺ຕິ ວຸຕ຺ຕາ.

ສງ຺ຂິປ຺ປນ຺ຕິ ເອຕ຺ຖ ອວິຊ຺ຊາທໂຍ ວິຎ຺ຎາຓາທໂຍ ຈາຕິ ສງ຺ເຂໂປ, ກມ຺ມໍ ວິປາໂກ ຈ. ກມ຺ມໍ ວິປາໂກຕິ ເອວໍ ສງ຺ຂິປີຍຕີຕິ ວາ ສງ຺ເຂໂປ, ອວິຊ຺ຊາທໂຍ ວິຎ຺ຎາຓາທໂຍ ຈ. ສງ຺ເຂປຠາວສາມຎ຺ເຎນ ປນ ເອກວຈນໍ ກຕນ຺ຕິ ທຏ຺ຐພ຺ພໍ. ສງ຺ເຂປສທ຺ໂທ ວາ ຠາຄາຘິວຈນນ຺ຕິ ກມ຺ມຠາໂຄ ກມ຺ມສງ຺ເຂໂປ.

ເອວໍ ສມຸປ຺ປນ຺ນນ຺ຕິ ກມ຺ມໂຕ ວິປາໂກ. ຕຕ຺ຖາປິ ອວິຊ຺ຊາໂຕ ສງ຺ຂາຣາຕິ ເອວໍ ສມຸປ຺ປນ຺ນໍ, ຕິສນ຺ຘິອາທິວເສນ ວາ ສມຸປ຺ປນ຺ນໍ ອິທໍ ຠວຈກ຺ກນ຺ຕິ ອຕ຺ໂຖ. ອິຕ຺ຕຣນ຺ຕິ ຄມນຘມ຺ມໍ, ວິນສ຺ສຘມ຺ມນ຺ຕິ ອຕ຺ໂຖ. ເຕນ ອຸປ຺ປາທວຍວນ຺ຕຕາທີປເກນ ອນິຈ຺ຈ-ສທ຺ເທນ ວິກາຣາປຕ຺ຕິທີປເກນ ຈລ-ສທ຺ເທນ ຈ ອທີປິຕໍ ກາລນ຺ຕຣຏ຺ຐາຍິຕາປຏິກ຺ເຂປໍ ທີເປຕິ, ອຘຸວນ຺ຕິ ເອເຕນ ຖິຣຠາວປຏິກ຺ເຂປໍ ນິສ຺ສາຣຕໍ. ເຫຕູ ເອວ ສມ຺ຠາຣາ ເຫຕຸສມ຺ຠາຣາ. ‘‘ຐານໂສ ເຫຕຸໂສ’’ຕິ ເອຕ຺ຖ ເອວໍ ວຸຕ຺ຕໍ ວາ ຐານໍ, ອຎ຺ຎມ຺ປິ ຕສ຺ສ ຕສ຺ສ ສາຘາຣຓໍ ກາຣຓໍ ສມ຺ຠາໂຣ, ອສາຘາຣຓໍ ເຫຕຸ. ເອວນ຺ຕິ ເອວໍ ເຫຕຸໂຕ ຘມ຺ມມຕ຺ຕສມ຺ຠເວ ເຫຕຸນິໂຣຘາ ຈ ວຏ຺ຏຸປຈ຺ເຉເທ ຘມ຺ເມ ຈ ຕໍນິໂຣຘາຍ ເທສິເຕ ສຕີຕິ ອຕ຺ໂຖ. ພ຺ຣຫ຺ມຈຣິຍໍ ອິຘ ພ຺ຣຫ຺ມຈຣິຍິຘ. ສຕ຺ເຕ ຈາຕິ ເອຕ຺ຖ ຈ-ສທ຺ໂທ ເອວໍ ພ຺ຣຫ຺ມຈຣິຍຎ຺ຈ ວິຊ຺ຊຕິ, ສສ຺ສຕຸຈ຺ເຉທາ ຈ ນ ໂຫນ຺ຕີຕິ ສມຸຈ຺ຈຍຕ຺ໂຖ. ເອວຎ຺ຫິ ເຫຕຸອາຍຕ຺ເຕ ຘມ຺ມມຕ຺ຕສມ຺ຠເວ ສຕ຺ໂຕ ນຸປລພ຺ຠຕິ, ຕສ຺ມິຎ຺ຈ ອຸປລພ຺ຠນ຺ເຕ ສສ຺ສໂຕ ອຸຈ຺ເຉໂທ ວາ ສິຍາ, ນຸປລພ຺ຠນ຺ເຕ ຕສ຺ມິໍ ເນວຸຈ຺ເຉໂທ ນ ສສ຺ສຕນ຺ຕິ ວຸຕ຺ຕໍ ໂຫຕິ.

ສຈ຺ຈປ຺ປຠວໂຕຕິ ສຈ຺ຈໂຕ, ສຈ຺ຈານໍ ວາ ປຠວໂຕ. ກຸສລາກຸສລໍ ກມ຺ມນ຺ຕິ ວຏ຺ຏກຖາຍ ວຕ຺ຕມານຕ຺ຕາ ສາສວນ຺ຕິ ວິຎ຺ຎາຍຕິ. ອວິເສເສນາຕິ ເຈຕນາ ເຈຕນາສມ຺ປຍຸຕ຺ຕກາຕິ ວິເສສໍ ອກຕ຺ວາ ສພ຺ພມ຺ປິ ຕໍ ກຸສລາກຸສລໍ ກມ຺ມໍ ‘‘ສມຸທຍສຈ຺ຈ’’ນ຺ຕິ ວຸຕ຺ຕນ຺ຕິ ອຕ຺ໂຖ. ‘‘ຕຓ຺ຫາ ຈ…ເປ… ອວເສສາ ຈ ສາສວາ ກຸສລາ ຘມ຺ມາ’’ຕິ ຫິ ເຈຕນາເຈຕນາສມ຺ປຍຸຕ຺ຕວິເສສໍ ອກຕ຺ວາ ວຸຕ຺ຕນ຺ຕິ, ອຣິຍສຈ຺ຈວິເສສໍ ວາ ອກຕ຺ວາ ສມຸທຍສຈ຺ຈນ຺ຕິ ວຸຕ຺ຕນ຺ຕິ ອຕ຺ໂຖ.

ວຕ຺ຖູສູຕິ ອາຣມ຺ມເຓສຸ, ຈກ຺ຂາທີສຸ ວາ ປຏິຈ຺ຉາເທຕພ຺ເພສຸ ວຕ຺ຖູສຸ. ໂສກາທີນໍ ອຘິຏ຺ຐານຕ຺ຕາຕິ ເຕສໍ ກາຣຓຕ຺ຕາ, ເຕຫິ ສິທ຺ຘາຍ ອວິຊ຺ຊາຍ ສຫິເຕຫິ ສງ຺ຂາເຣຫິ ປຈ຺ຈໂຍ ຈ ໂຫຕິ ຠວນ຺ຕຣປາຕຸຠາວາຍາຕິ ອຘິປ຺ປາໂຍ. ຈຸຕິຈິຕ຺ຕໍ ວາ ປຏິສນ຺ຘິວິຎ຺ຎາຓສ຺ສ ອນນ຺ຕຣປຈ຺ຈໂຍ ໂຫຕີຕິ ‘‘ປຈ຺ຈໂຍ ຈ ໂຫຕິ ຠວນ຺ຕຣປາຕຸຠາວາຍາ’’ຕິ ວຸຕ຺ຕໍ. ຕໍ ປນ ຈຸຕິຈິຕ຺ຕໍ ອວິຊ຺ຊາສງ຺ຂາຣຣຫິຕໍ ຠວນ຺ຕຣສ຺ສ ປຈ຺ຈໂຍ ນ ໂຫຕີຕິ ຕສ຺ສ ສຫາຍທສ຺ສນຕ຺ຖມາຫ ‘‘ໂສກາທີນໍ ອຘິຏ຺ຐານຕ຺ຕາ’’ຕິ. ທ຺ວິຘາຕິ ອຕ຺ຕໂນເຍວ ສຣເສນ ຘມ຺ມນ຺ຕຣປຈ຺ຈຍຠາເວນ ຈາຕິ ທ຺ວິຘາ.

ອວິຊ຺ຊາປຈ຺ຈຍາ ສງ຺ຂາຣາຕິ ເອເຕນ ສງ຺ຂາຣານໍ ປຈ຺ຈຍຸປ຺ປນ຺ນຕາທສ຺ສເນນ ‘‘ໂກ ນຸ ໂຂ ອຠິສງ຺ຂໂຣຕີຕິ ເອສ ໂນ ກລ຺ໂລ ປຎ຺ໂຫ’’ຕິ ທສ຺ເສຕິ. ເຕເນຕໍ ກາຣກທສ຺ສນນິວາຣຓນ຺ຕິ. ເອວມາທິທສ຺ສນນິວາຣຓນ຺ຕິ ເອເຕນ ‘‘ໂສຈຕິ ປຣິເທວຕິ ທຸກ຺ຂິໂຕ’’ຕິອາທິທສ຺ສນນິວາຣຓມາຫ. ໂສກາທໂຍປິ ຫິ ປຈ຺ຈຍາຍຕ຺ຕາ ອວສວຕ຺ຕິໂນຕິ ‘‘ຊາຕິປຈ຺ຈຍາ ຊຣາມຣຓໍ ໂສກ…ເປ… ສມ຺ຠວນ຺ຕີ’’ຕິ ເອເຕນ ວຸຕ຺ຕນ຺ຕິ.

ຄຓ຺ຑເຠທປີຬກາ ວິຍາຕິ ຄຓ຺ຑເຠທນຕ຺ຖໍ ປຈ຺ຈມາເນ ຄຓ຺ເຑ ຕສ຺ສປິ ອຸປຣິ ຊາຍມານຂຸທ຺ທກປີຬກາ ວິຍ, ຄຓ຺ຑສ຺ສ ວາ ອເນກຘາເຠເທ ປີຬກາ ວິຍ. ຄຓ຺ຑວິກາຣາ ສູນຕາສຣາຄປຸພ຺ພຄຫຓາທໂຍ.

ປຏລາຠິຠູຕຈກ຺ຂຸໂກ ຣູປານິ ນ ປສ຺ສຕິ, ກິຎ຺ຈິປິ ປສ຺ສນ຺ໂຕ ຈ ວິປຣີຕໍ ປສ຺ສຕິ, ເອວໍ ອວິຊ຺ຊາຠິຠູໂຕ ທຸກ຺ຂາທີນິ ນ ປຏິປຊ຺ຊຕິ ນ ປສ຺ສຕິ, ມິຈ຺ຉາ ວາ ປຏິປຊ຺ຊຕີຕິ ປຏລໍ ວິຍ ອວິຊ຺ຊາ, ກິມິນາ ວິຍ ອຕ຺ຕນາ ກຕຕ຺ຕາ ວຏ຺ຏສ຺ສ ອຕ຺ຕໂນເຍວ ປຣິພ຺ຠມນກາຣຓຕ຺ຕາ ຈ ໂກສປ຺ປເທສາ ວິຍ ສງ຺ຂາຣາ, ສງ຺ຂາຣປຣິຄ຺ຄຫໍ ວິນາ ປຕິຏ຺ຐໍ ອລຠມານໍ ວິຎ຺ຎາຓໍ ປຣິຓາຍກປຣິຄ຺ຄຫໍ ວິນາ ປຕິຏ຺ຐໍ ອລຠມາໂນ ຣາຊກຸມາໂຣ ວິຍາຕິ ປຣິຄ຺ຄເຫນ ວິນາ ປຕິຏ຺ຐາລາໂຠ ເອຕ຺ຖ ສາມຎ຺ຎໍ. ອຸປປຕ຺ຕິນິມິຕ຺ຕນ຺ຕິ ກມ຺ມາທິອາຣມ຺ມຓມາຫ. ປຣິກປ຺ປນໂຕຕິ ອາຣມ຺ມຓກຣຓໂຕ, ສມ຺ປຍຸຕ຺ເຕນ ວາ ວິຕກ຺ເກນ ວິຕກ຺ກນໂຕ. ເທວມນຸສ຺ສມິຄວິຫງ຺ຄາທິວິວິຘປ຺ປກາຣຕາຍ ມາຍາ ວິຍ ນາມຣູປໍ, ປຕິຏ຺ຐາວິເສເສນ ວຸຑ຺ຒິວິເສສາປຕ຺ຕິໂຕ ວນປ຺ປຄຸມ຺ໂພ ວິຍ ສຬາຍຕນໍ. ອາຍຕນານໍ ວິສຍິວິສຍຠູຕານໍ ອຎ຺ຎມຎ຺ຎາຠິມຸຂຠາວໂຕ ອາຍຕນຆຏ຺ຏນໂຕ. ເອຕ຺ຖ ຈ ສງ຺ຂາຣາທີນໍ ໂກສປ຺ປເທສປຣິຓາຍກາທີຫິ ທ຺ວີຫິ ທ຺ວີຫິ ສທິສຕາຍ ທ຺ເວ ທ຺ເວ ອຸປມາ ວຸຕ຺ຕາຕິ ທຏ຺ຐພ຺ພາ.

ຄມ຺ຠີໂຣ ເອວ ຫຸຕ຺ວາ ໂອຠາສຕິ ປກາສຕິ ທິສ຺ສຕີຕິ ຄມ຺ຠີຣາວຠາໂສ. ຊາຕິປຈ຺ຈຍສມ຺ຠູຕສມຸທາຄຕຏ຺ໂຐຕິ ຊາຕິປຈ຺ຈຍາ ສມ຺ຠູຕໍ ຫຸຕ຺ວາ ສຫິຕສ຺ສ ອຕ຺ຕໂນ ປຈ຺ຈຍານຸຣູປສ຺ສ ອຸທ຺ຘໍ ອຸທ຺ຘໍ ອາຄຕຠາໂວ, ອນຸປ຺ປພນ຺ໂຘຕິ ອຕ຺ໂຖ. ອຖ ວາ ສມ຺ຠູຕຏ຺ໂຐ ຈ ສມຸທາຄຕຏ຺ໂຐ ຈ ສມ຺ຠູຕສມຸທາຄຕຏ຺ໂຐ. ‘‘ນ ຊາຕິໂຕ ຊຣາມຣຓໍ ນ ໂຫຕິ, ນ ຈ ຊາຕິໍ ວິນາ ອຎ຺ຎໂຕ ໂຫຕີ’’ຕິ ຫິ ຊາຕິປຈ຺ຈຍສມ຺ຠູຕຏ຺ໂຐ ວຸຕ຺ໂຕ. ອິຕ຺ຖຎ຺ຈ ຊາຕິໂຕ ສມຸທາຄຈ຺ຉຕີຕິ ປຈ຺ຈຍສມຸທາຄຕຏ຺ໂຐ, ຍາ ຍາ ຊາຕິ ຍຖາ ຍຖາ ປຈ຺ຈໂຍ ໂຫຕິ, ຕທນຸຣູປປາຕຸຠາໂວຕິ ອຕ຺ໂຖ.

ອນຸໂລມປຏິໂລມໂຕຕິ ອິຘ ປນ ປຈ຺ຈຍຸປ຺ປາທາ ປຈ຺ຈຍຸປ຺ປນ຺ນຸປ຺ປາທສງ຺ຂາຕໍ ອນຸໂລມໍ, ນິໂຣຘາ ນິໂຣຘສງ຺ຂາຕໍ ປຏິໂລມຎ຺ຈາຫ. ອາທິໂຕ ປນ ອນ຺ຕຄມນໍ ອນຸໂລມໍ, ອນ຺ຕໂຕ ຈ ອາທິຄມນໍ ປຏິໂລມມາຫາຕິ. ‘‘ອິເມ ຈຕ຺ຕາໂຣ ອາຫາຣາ ກິໍນິທານາ’’ຕິອາທິກາຍ (ສໍ. ນິ. ໒.໑໑) ເວມຊ຺ຌໂຕ ປຏ຺ຐາຍ ປຏິໂລມເທສນາຍ, ‘‘ຈກ຺ຂຸໍ ປຏິຈ຺ຈ ຣູເປ ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓໍ, ຕິຓ຺ຓໍ ສງ຺ຄຕິ ຜສ຺ໂສ, ຜສ຺ສປຈ຺ຈຍາ ເວທນາ’’ຕິອາທິກາຍ (ສໍ. ນິ. ໒.໔໓-໔໔; ໒.໔.໖໐) ອນຸໂລມເທສນາຍ ຈ ທ຺ວິສນ຺ຘິຕິສງ຺ເຂປໍ, ‘‘ສໍໂຍຊນີເຍສຸ, ຠິກ຺ຂເວ, ຘມ຺ເມສຸ ອສ຺ສາທານຸປສ຺ສິໂນ ວິຫຣໂຕ ຕຓ຺ຫາ ປວຑ຺ຒຕິ, ຕຓ຺ຫາປຈ຺ຈຍາ ອຸປາທານ’’ນ຺ຕິອາທີສຸ (ສໍ. ນິ. ໒.໕໓-໕໔) ເອກສນ຺ຘິທ຺ວິສງ຺ເຂປໍ.

ອວິຊ຺ຊາທີນໍ ສຠາໂວ ປຏິວິຊ຺ຌີຍຕີຕິ ປຏິເວໂຘ. ວຸຕ຺ຕຎ຺ຫິ ‘‘ເຕສໍ ເຕສໍ ວາ ຕຕ຺ຖ ຕຕ຺ຖ ວຸຕ຺ຕຘມ຺ມານໍ ປຏິວິຊ຺ຌິຕພ຺ໂພ ສລກ຺ຂຓສງ຺ຂາໂຕ ອວິປຣີຕສຠາໂວ ປຏິເວໂຘ’’ຕິ (ຘ. ສ. ອຏ຺ຐ. ນິທານກຖາ). ອປຸຎ຺ຎາຠິສງ຺ຂາເຣກເທໂສ ສຣາໂຄ, ອຎ຺ໂຎ ວິຣາໂຄ, ຣາຄສ຺ສ ວາ ອປຏິປກ຺ຂຠາວໂຕ ຣາຄປ຺ປວຑ຺ຒໂກ ສພ຺ໂພປິ ອປຸຎ຺ຎາຠິສງ຺ຂາໂຣ ສຣາໂຄ, ອິຕໂຣ ປຏິປກ຺ຂຠາວໂຕ ວິຣາໂຄ. ‘‘ທີຆຣຕ຺ຕຎ຺ເຫຕໍ, ຠິກ຺ຂເວ, ອສ຺ສຸຕວໂຕ ປຸຖຸຊ຺ຊນສ຺ສ ອຊ຺ໂຌສິຕໍ ມມາຍິຕໍ ປຣາມຏ຺ຐໍ ‘ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາ’’ຕິ (ສໍ. ນິ. ໒.໖໒) ອຕ຺ຕປຣາມາສສ຺ສ ວິຎ຺ຎາຓໍ ວິສິຏ຺ຐໍ ວຕ຺ຖຸ ວຸຕ຺ຕນ຺ຕິ ວິຎ຺ຎາຓສ຺ສ ສຸຎ຺ຎຕຏ຺ໂຐ ຄມ຺ຠີໂຣ, ອຕ຺ຕາ ວິຊານາຕິ ສໍສຣຕີຕິ ສພ຺ຍາປາຣຕາສງ຺ກນ຺ຕິອຠິນິເວສພລວຕາຍ ອພ຺ຍາປາຣຏ຺ຐອສງ຺ກນ຺ຕິປຏິສນ຺ຘິປາຕຸຠາວຏ຺ຐາ ຈ ຄມ຺ຠີຣາ, ນາມສ຺ສ ຣູເປນ, ຣູປສ຺ສ ຈ ນາເມນ ອສມ຺ປໂຍຄໂຕ ວິນິພ຺ໂຠໂຄ, ນາມສ຺ສ ນາເມນ ອວິນິພ຺ໂຠໂຄ ໂຍເຊຕພ຺ໂພ. ເອກຸປ຺ປາເທກນິໂຣເຘຫິ ອວິນິພ຺ໂຠເຄ ອຘິປ຺ເປເຕ ຣູປສ຺ສ ຈ ຣູເປນ ລພ຺ຠຕິ. ອຖ ວາ ເອກຈຕຸໂວກາຣຠເວສຸ ນາມຣູປານໍ ອສຫວຕ຺ຕນໂຕ ອຎ຺ຎມຎ຺ຎວິນິພ຺ໂຠໂຄ, ປຎ຺ຈໂວກາຣຠເວ ສຫວຕ຺ຕນໂຕ ອວິນິພ຺ໂຠໂຄ ຈ ເວທິຕພ຺ໂພ.

ອຘິປຕິຍຏ຺ໂຐ ນາມ ອິນ຺ທ຺ຣິຍປຈ຺ຈຍຠາໂວ. ‘‘ໂລໂກເປໂສ ທ຺ວາຣາເປສາ ເຂຕ຺ຕມ຺ເປຕ’’ນ຺ຕິ (ຘ. ສ. ໕໙໘-໕໙໙) ວຸຕ຺ຕາ ໂລກາທິອຕ຺ຖາ ຈກ຺ຂາທີສຸ ປຎ຺ຈສຸ ໂຍເຊຕພ຺ພາ. ມນາຍຕນສ຺ສປິ ລຸຊ຺ຊນໂຕ ມໂນສມ຺ຜສ຺ສາທີນໍ ທ຺ວາຣເຂຕ຺ຕຠາວໂຕ ຈ ເອເຕ ອຕ຺ຖາ ສມ຺ຠວນ຺ເຕວ. ອາປາຖຄຕານໍ ຣູປາທີນໍ ປກາສນໂຍຄ຺ຍຕາລກ຺ຂຓໍ ໂອຠາສນໍ ຈກ຺ຂາທີນໍ ວິສຍິຠາໂວ, ມນາຍຕນສ຺ສ ວິຊານນໍ. ສງ຺ຆຏ຺ຏນຏ຺ໂຐ ວິເສເສນ ຈກ຺ຂຸສມ຺ຜສ຺ສາທີນໍ ປຎ຺ຈນ຺ນໍ, ອິຕເຣ ຉນ຺ນມ຺ປິ ໂຍເຊຕພ຺ພາ. ຜຸສນຎ຺ຈ ຜສ຺ສສ຺ສ ສຠາໂວ, ສງ຺ຆຏ຺ຏນໍ ຣໂສ, ອິຕເຣ ອຸປຏ຺ຐານາກາຣາ. ອາຣມ຺ມຓຣສານຸຠວນຏ຺ໂຐ ຣສວເສນ ວຸຕ຺ໂຕ, ເວທຍິຕຏ຺ໂຐ ລກ຺ຂຓວເສນ. ອຕ຺ຕາ ເວທຍຕີຕິ ອຠິນິເວສສ຺ສ ພລວຕາຍ ນິຊ຺ຊີວຏ຺ໂຐ ເວທນາຍ ຄມ຺ຠີໂຣ. ນິຊ຺ຊີວາຍ ເວທນາຍ ເວທຍິຕໍ ນິຊ຺ຊີວເວທຍິຕໍ, ນິຊ຺ຊີວເວທຍິຕເມວ ອຕ຺ໂຖ ນິຊ຺ຊີວເວທຍິຕຏ຺ໂຐ.

ອາທານຏ຺ໂຐ ຈຕຸນ຺ນມ຺ປິ ອຸປາທານານໍ ສມາໂນ, ຄຫຓຏ຺ໂຐ ກາມຸປາທານສ຺ສ, ອິຕເຣສໍ ຕິຓ຺ຓໍ ອຠິນິເວສາທິອຕ຺ໂຖ. ‘‘ທິຏ຺ຐິກນ຺ຕາໂຣ’’ຕິ ຫິ ວຈນໂຕ ທິຏ຺ຐີນໍ ທຸຣຕິກ຺ກມນຏ຺ໂຐປີຕິ. ທຬ຺ຫຄຫຓຕ຺ຕາ ວາ ຈຕຸນ຺ນມ຺ປິ ທຸຣຕິກ຺ກມນຏ຺ໂຐ ໂຍເຊຕພ຺ໂພ. ໂຍນິຄຕິຐິຕິນິວາເສສຸຂິປນນ຺ຕິ ສມາເສ ຠຸມ຺ມວຈນສ຺ສ ອໂລໂປ ທຏ຺ຐພ຺ໂພ, ຕສ຺ມາ ເຕນ ອາຍູຫນາຠິສງ຺ຂຣຓປທານໍ ສມາໂສ ໂຫຕິ. ຊຣາມຣຓງ຺ຄໍ ມຣຓປ຺ປຘານນ຺ຕິ ມຣຓຏ຺ຐາ ເອວ ຂຍາທໂຍ ຄມ຺ຠີຣາ ທສ຺ສິຕາ. ນວນວານຎ຺ຫິ ປຣິກ຺ຂເຍນ ຂຓ຺ຑິຈ຺ຈາທິປຣິປກ຺ກປ຺ປວຕ຺ຕິ ຊຣາຕິ, ຂຍຏ຺ໂຐ ວາ ຊຣາຍ ວຸຕ຺ໂຕຕິ ທຏ຺ຐພ຺ໂພ. ນວຠາວາປຄໂມ ຫິ ຂໂຍຕິ ວຕ຺ຕຸໍ ຍຸຕ຺ໂຕຕິ. ວິປຣິຓາມຏ຺ໂຐ ທ຺ວິນ຺ນມ຺ປິ. ສນ຺ຕຕິວເສນ ວາ ຊຣາຍ ຂຍວຍຠາໂວ, ສມ຺ມຸຕິຂຓິກວເສນ ມຣຓສ຺ສ ເຠທວິປຣິຓາມຕາ ໂຍເຊຕພ຺ພາ.

ອຕ຺ຖນຍາຕິ ອຕ຺ຖານໍ ນຍາ. ອວິຊ຺ຊາທິອຕ຺ເຖຫິ ເອກຕ຺ຕາທີ ເສນ ຠາເວນ ນີຍນ຺ຕິ ຄມ຺ເມນ຺ຕີຕິ ເອກຕ຺ຕາທໂຍ ເຕສໍ ນຍາຕິ ວຸຕ຺ຕາ. ນີຍນ຺ຕີຕິ ຫິ ນຍາຕິ. ອຕ຺ຖາ ເອວ ວາ ເອກຕ຺ຕາທິຠາເວນ ນີຍມານາ ຎາຍມານາ ‘‘ອຕ຺ຖນຍາ’’ຕິ ວຸຕ຺ຕາ. ນີຍນ຺ຕິ ເອເຕຫີຕິ ວາ ນຍາ, ເອກຕ຺ຕາທີຫິ ຈ ອຕ຺ຖາ ‘‘ເອກ’’ນ຺ຕິອາທິນາ ນີຍນ຺ຕິ, ຕສ຺ມາ ເອກຕ຺ຕາທໂຍ ອຕ຺ຖານໍ ນຍາຕິ ອຕ຺ຖນຍາ. ສນ຺ຕານານຸປຈ຺ເຉເທນ ພີຊໍ ຣຸກ຺ຂຠາວໍ ປຕ຺ຕໍ ຣຸກ຺ຂຠາເວນ ປວຕ຺ຕນ຺ຕິ ເອກຕ຺ເຕນ ວຸຈ຺ຈຕີຕິ ສນ຺ຕານານຸປຈ຺ເຉໂທ ເອກຕ຺ຕໍ, ເອວມິຘາປິ ອວິຊ຺ຊາທີນໍ ສນ຺ຕານານຸປຈ຺ເຉໂທ ເອກຕ຺ຕນ຺ຕິ ທສ຺ເສຕິ.

ຠິນ຺ນສນ຺ຕານສ຺ເສວາຕິ ສມ຺ພນ຺ຘຣຫິຕສ຺ສ ນານຕ຺ຕສ຺ສ ຄຫຓໂຕ ສຕ຺ຕນ຺ຕໂຣ ອຸຈ຺ຉິນ຺ໂນ ສຕ຺ຕນ຺ຕໂຣ ອຸປ຺ປນ຺ໂນຕິ ຄຓ຺ຫນ຺ໂຕ ອຸຈ຺ເຉທທິຏ຺ຐິມຸປາທິຍຕິ.

ຍໂຕ ກຸໂຕຈີຕິ ຍທິ ອຎ຺ຎສ຺ມາ ອຎ຺ຎສ຺ສຸປ຺ປຕ຺ຕິ ສິຍາ, ວາລິກໂຕ ເຕລສ຺ສ, ອຸຈ຺ຉຸໂຕ ຂີຣສ຺ສ ກສ຺ມາ ອຸປ຺ປຕ຺ຕິ ນ ສິຍາ, ຕສ຺ມາ ນ ໂກຈິ ກສ຺ສຈິ ເຫຕຸ ອຕ຺ຖີຕິ ອເຫຕຸກທິຏ຺ຐິໍ, ອວິຊ຺ຊມາເນປິ ເຫຕຸມ຺ຫິ ນິຍຕຕາຍ ຕິລຄາວີສຸກ຺ກໂສຓິຕາທີຫິ ເຕລຂີຣສຣີຣາທີນິ ປວຕ຺ຕນ຺ຕີຕິ ນິຍຕິວາທຎ຺ຈ ອຸປາທິຍຕີຕິ ວິຎ຺ຎາຕພ຺ພໍ ຍຖາຣຫໍ.

ກສ຺ມາ? ຍສ຺ມາ ອິທຎ຺ຫິ ຠວຈກ຺ກໍ ອປທາເລຕ຺ວາ ສໍສາຣຠຍມຕີໂຕ ນ ໂກຈິ ສຸປິນນ຺ຕເຣປິ ອຕ຺ຖີຕິ ສມ຺ພນ຺ໂຘ. ທຸຣຠິຍານນ຺ຕິ ທຸຣຕິກ຺ກມໍ. ອສນິວິຈກ຺ກມິວາຕິ ອສນິມຓ຺ຑລມິວ. ຕຎ຺ຫິ ນິມ຺ມຖນເມວ, ນານິມ຺ມຖນໍ ປວຕ຺ຕມານໍ ອຕ຺ຖິ, ເອວໍ ຠວຈກ຺ກມ຺ປິ ເອກນ຺ຕໍ ທຸກ຺ຂຸປ຺ປາທນໂຕ ‘‘ນິຈ຺ຈນິມ຺ມຖນ’’ນ຺ຕິ ວຸຕ຺ຕໍ.

ຎາຓາສິນາ ອປທາເລຕ຺ວາ ສໍສາຣຠຍໍ ອຕີໂຕ ນຕ຺ຖີຕິ ເອຕສ຺ສ ສາຘກໍ ທສ຺ເສນ຺ໂຕ ອາຫ ‘‘ວຸຕ຺ຕມ຺ປິ ເຈຕ’’ນ຺ຕິອາທິ. ຕນ຺ຕູນໍ ອາກຸລກໍ ຕນ຺ຕາກຸລກໍ, ຕນ຺ຕາກຸລກມິວ ຊາຕາ ຕນ຺ຕາກຸລກຊາຕາ, ກິເລສກມ຺ມວິປາເກຫິ ອຕີວ ຊຏິຕາຕິ ອຕ຺ໂຖ. ຄຸຓາຍ ສກຸຓິຍາ ນີຑໍ ຄຸຓາຄຸຓ຺ຑິກໍ. ວຑ຺ຒິອຠາວໂຕ ອປາຍໍ ທຸກ຺ຂຄຕິຠາວໂຕ ທຸຄ຺ຄຕິໍ ສຸຂສມຸສ຺ສຍໂຕ ວິນິປາຕຕ຺ຕາ ວິນິປາຕຎ຺ຈ ຈຕຸພ຺ພິຘໍ ອປາຍໍ, ‘‘ຂນ຺ຘານຎ຺ຈ ປຏິປາຏີ’’ຕິອາທິນາ ວຸຕ຺ຕໍ ສໍສາຣຎ຺ຈ ນາຕິວຕ຺ຕຕິ. ສໍສາໂຣ ເອວ ວາ ສພ຺ໂພ ອິຘ ວຑ຺ຒິອປຄມາທີຫິ ອຕ຺ເຖຫິ ອປາຍາທິນາມໂກ ວຸຕ຺ໂຕ ເກວລໍ ທຸກ຺ຂກ຺ຂນ຺ຘຠາວໂຕ.

ຠວຈກ຺ກກຖາວຓ຺ຓນາ ນິຏ຺ຐິຕາ.

ສຸຕ຺ຕນ຺ຕຠາຊນີຍວຓ຺ຓນາ ນິຏ຺ຐິຕາ.