ຠວປທນິທ຺ເທສວຓ຺ຓນາ

໒໓໔. ຜລໂວຫາເຣນ ກມ຺ມຠໂວ ຠໂວຕິ ວຸຕ຺ໂຕຕິ ອຸປປຕ຺ຕິຠວນິພ຺ພຈນເມວ ທ຺ວຍສ຺ສປິ ສາຘາຣຓໍ ກຕ຺ວາ ວທນ຺ໂຕ ອາຫ ‘‘ຠວຕີຕິ ຠໂວ’’ຕິ. ຠວໍ ຄຈ຺ຉຕີຕິ ນິປ຺ຜາທນຜລວເສນ ອຕ຺ຕໂນ ປວຕ຺ຕິກາເລ ຠວາຠິມຸຂໍ ຫຸຕ຺ວາ ປວຕ຺ຕຕີຕິ ອຕ຺ໂຖ, ນິພ຺ພຕ຺ຕນເມວ ວາ ເອຕ຺ຖ ຄມນໍ ອຘິປ຺ເປຕໍ.

ສຎ຺ຎາວຕໍ ຠໂວ ສຎ຺ຎາຠໂວຕິ ເອຕ຺ຖ ວນ຺ຕຸ-ສທ຺ທສ຺ສ ໂລໂປ ທຏ຺ຐພ຺ໂພ, ຕສ຺ສ ວາ ອຕ຺ເຖ ອກາຣໍ ກຕ຺ວາ ‘‘ສຎ຺ຎຠໂວ’’ຕິປິ ປາໂຐ. ໂວກິຣີຍຕິ ປສາຣີຍຕິ ວິຕ຺ຖາຣີຍຕີຕິ ໂວກາໂຣ, ໂວກິຣຓໍ ວາ ໂວກາໂຣ, ໂສ ເອກສ຺ມິໍ ປວຕ຺ຕຕ຺ຕາ ເອໂກ ໂວກາໂຣຕິ ວຸຕ຺ໂຕ, ປເທສປສຏຸປ຺ປຕ຺ຕີຕິ ອຕ຺ໂຖ.

ເຈຕນາສມ຺ປຍຸຕ຺ຕາ ວາ…ເປ… ສງ຺ຄຫິຕາຕິ ອາຈຍຄາມິຕາຍ ກມ຺ມສງ຺ຂາຕຕໍ ທສ຺ເສຕ຺ວາ ກມ຺ມຠເວ ສງ຺ຄຫິຕຠາວໍ ປຣິຍາເຍນ ວທຕິ, ນິປ຺ປຣິຍາເຍນ ປນ ເຈຕນາວ ກມ຺ມຠໂວ. ວຸຕ຺ຕຎ຺ຫິ ‘‘ກມ຺ມຠໂວ ຕີຫິ ຂນ຺ເຘຫິ ເອເກນາຍຕເນນ ເອກາຍ ຘາຕຸຍາ ສມ຺ປຍຸຕ຺ໂຕ, ເອເກນ ຂນ຺ເຘນ ເອເກນາຍຕເນນ ເອກາຍ ຘາຕຸຍາ ເກຫິຈິ ສມ຺ປຍຸຕ຺ໂຕ’’ຕິ (ຘາຕຸ. ໒໔໔). ອຸປປຕ຺ຕິຠໂວ ຕີຫິປິ ຕິເກຫິ ວຸຕ຺ຕາ ອຸປປຕ຺ຕິກ຺ຂນ຺ຘາວ. ຍຖາຫ ‘‘ອຸປປຕ຺ຕິຠໂວ ກາມຠໂວ ສຎ຺ຎາຠໂວ ປຎ຺ຈໂວກາຣຠໂວ ປຎ຺ຈຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ສງ຺ຄຫິໂຕ’’ຕິອາທິ (ຘາຕຸ. ໖໗). ຍທິ ຫິ ອນຸປາທິນ຺ນການມ຺ປິ ຄຫຓໍ ສິຍາ, ‘‘ທ຺ວາທສຫາຍຕເນຫິ ອຏ຺ຐາຣສຫິ ຘາຕູຫີ’’ຕິ ວຕ຺ຕພ຺ພໍ ສິຍາຕິ.

ສງ຺ຂາຣຠວານໍ ຘມ຺ມເຠທໂຕ ນ ສງ຺ຂາຣາ ເອວ ປຸນ ວຸຕ຺ຕາຕິ ‘‘ສາຕ຺ຖກເມວິທໍ ປຸນວຈນ’’ນ຺ຕິ ເອຕໍ ນ ຍຸຕ຺ຕນ຺ຕິ ເຈ? ນ, ຠເວກເທສຠາເວນ ສງ຺ຂາຣານໍ ຠໂວຕິ ປຸນ ວຸຕ຺ຕຕ຺ຕາ. ປເຣນ ວາ ຘມ຺ມວິເສສໍ ອຄເຓຕ຺ວາ ປຸນວຈນໍ ໂຈທິຕນ຺ຕິ ໂຈທກາຠິລາສວເສນ ‘‘ສາຕ຺ຖກເມວິທໍ ປຸນວຈນ’’ນ຺ຕິ ວຸຕ຺ຕໍ.

ກາມຠວາທິນິພ຺ພຕ຺ຕນກສ຺ສ ກມ຺ມສ຺ສ ກາມຠວາທິຠາໂວ ຜລໂວຫາເຣນ ອຏ຺ຐກຖາຍໍ ວຸຕ຺ໂຕ. ອນ຺ໂຕຄເຘ ວິສຸໍ ອຄເຓຕ຺ວາ ອພ຺ຠນ຺ຕຣຄເຕ ເອວ ກຕ຺ວາ ກາມຠວາທິເກ ກມ຺ມຸປປຕ຺ຕິຠວວເສນ ທຸຄຸເຓ ກຕ຺ວາ ອາຫ ‘‘ຉ ຠວາ’’ຕິ.

ອວິເສເສນາຕິ ອຸປາທານເຠທໍ ອກຕ຺ວາຕິ ອຕ຺ໂຖ. ອຸປາທານເຠທາກຣເຓເນວ ຈ ທ຺ວາທສປ຺ປເຠທສ຺ສ ສງ຺ຄຫວເສນ ສງ຺ຄຫໂຕ ‘‘ຉ ຠວາ’’ຕິ ວຸຕ຺ຕໍ.

ໂຄສີເລນ ກຸກ຺ກຸຣສີເລນ ຈ ສມຕ຺ເຕນ ສມາທິນ຺ເນນ ຄຸນ຺ນໍ ກຸກ຺ກຸຣານຎ຺ຈ ສຫພ຺ຍຕາ ວຸຕ຺ຕາຕິ ສີລພ຺ພຕຸປາທານວໂຕ ຌານຠາວນາ ນ ອິຊ຺ຌຕີຕິ ມຎ຺ຎມານາ ເຕນ ຣູປາຣູປຠວາ ນ ໂຫນ຺ຕີຕິ ເກຈິ ວທນ຺ຕິ, ວກ຺ຂມາເນນ ປນ ປກາເຣນ ປຈ຺ຈຍຠາວໂຕ ‘‘ຕໍ ນ ຄເຫຕພ຺ພ’’ນ຺ຕິ ອາຫ. ອສຸທ຺ຘິມຄ຺ເຄ ຈ ສຸທ຺ຘິມຄ຺ຄປຣາມສນໍ ສີລພ຺ພຕຸປາທານນ຺ຕິ ສຸທ຺ຘິມຄ຺ຄປຣາມສເນນ ຣູປາຣູປາວຈຣຊ຺ຌານານໍ ນິພ຺ພຕ຺ຕນໍ ນ ຍຸຊ຺ຊຕີຕິ. ປຸຣາຓຠາຣຕສີຕາຫຣຓປສຸພນ຺ຘວິຘິອາທິສວນໍ ອສທ຺ຘມ຺ມສວນໍ. ອາທິ-ສທ຺ເທນ ອສປ຺ປຸຣິສູປນິສ຺ສຍໍ ປຸພ຺ເພ ຈ ອກຕປຸຎ຺ຎຕໍ ອຕ຺ຕມິຈ຺ຉາປຓິຘິຕຎ຺ຈ ສງ຺ຄຓ຺ຫາຕິ. ຕທນ຺ໂຕຄຘາ ເອວາຕິ ຕສ຺ມິໍ ທຸຈ຺ຈຣິຕນິພ຺ພຕ຺ເຕ ສຸຈຣິຕນິພ຺ພຕ຺ເຕ ຈ ກາມຠເວ ອນ຺ໂຕຄຘາ ເອວາຕິ ອຕ຺ໂຖ.

ອນ຺ໂຕຄຘາຕິ ຈ ສຎ຺ຎາຠວປຎ຺ຈໂວກາຣຠວານໍ ເອກເທເສນ ອນ຺ໂຕຄຘຕ຺ຕາ ວຸຕ຺ຕໍ. ນ ຫິ ເຕ ນິຣວເສສາ ກາມຠເວ ອນ຺ໂຕຄຘາຕິ. ສປ຺ປເຠທສ຺ສາຕິ ສຸຄຕິທຸຄ຺ຄຕິມນຸສ຺ສາທິປ຺ປເຠທວໂຕ. ກເມນ ຈ ອວຕ຺ວາ ສີລພ຺ພຕຸປາທານສ຺ສ ອນ຺ເຕ ຠວປຈ຺ຈຍຠາວວຈນໍ ອຕ຺ຕວາທຸປາທານໍ ວິຍ ອຠິຓ຺ຫໍ ອສມຸທາຈຣຓໂຕ ອຕ຺ຕວາທຸປາທານນິມິຕ຺ຕຕ຺ຕາ ຈ.

ເຫຕຸປຈ຺ຈຍປ຺ປເຠເທຫີຕິ ເອຕ຺ຖ ມຄ຺ຄປຈ຺ຈໂຍ ຈ ວຕ຺ຕພ຺ໂພ. ທິຏ຺ຐຸປາທານາທີນິ ຫິ ມຄ຺ຄປຈ຺ຈຍາ ໂຫນ຺ຕີຕິ.

ຠວປທນິທ຺ເທສວຓ຺ຓນາ ນິຏ຺ຐິຕາ.