ອຸປາທານປທນິທ຺ເທສວຓ຺ຓນາ

໒໓໓. ສສ຺ສໂຕ ອຕ຺ຕາຕິ ອິທໍ ປຸຣິມທິຏ຺ຐິໍ ອຸປາທິຍມານໍ ອຸຕ຺ຕຣທິຏ຺ຐິໍ ນິທສ຺ເສຕຸໍ ວຸຕ຺ຕໍ. ຍຖາ ຫິ ເອສາ ທິຏ຺ຐິ ທຬ຺ຫີກຣຓວເສນ ປຸຣິມໍ ອຸຕ຺ຕຣາ ອຸປາທິຍຕິ, ເອວໍ ‘‘ນຕ຺ຖິ ທິນ຺ນ’’ນ຺ຕິອາທິກາປີຕິ. ອຕ຺ຕຄ຺ຄຫຓໍ ປນ ອຕ຺ຕວາທຸປາທານນ຺ຕິ ນ ອິທໍ ທິຏ຺ຐຸປາທານທສ຺ສນນ຺ຕິ ທຏ຺ຐພ຺ພໍ. ໂລໂກ ຈາຕິ ວາ ອຕ຺ຕຄ຺ຄຫຓວິນິມຸຕ຺ຕໍ ຄຫຓໍ ທິຏ຺ຐຸປາທານຠູຕໍ ອິຘ ປຸຣິມທິຏ຺ຐິອຸຕ຺ຕຣທິຏ຺ຐິວຈເນຫິ ວຸຕ຺ຕນ຺ຕິ ເວທິຕພ຺ພໍ. ‘‘ຘມ຺ມສງ຺ເຂປວິຕ຺ຖາເຣ ປນ ສງ຺ເຂປໂຕ ຕຓ຺ຫາທຬ຺ຫຕ຺ຕໍ, ສງ຺ເຂປໂຕ ທິຏ຺ຐິມຕ຺ຕເມວ, ວິຕ຺ຖາຣໂຕ ປນາ’’ຕິ ເອວໍ ຘມ຺ມສງ຺ເຂປວິຕ຺ຖາຣໂຕ ສງ຺ເຂປໍ ວິຕ຺ຖາຣຎ຺ຈ ນິທ຺ຘາເຣຕີຕິ. ຘມ຺ມສງ຺ເຂປວິຕ຺ຖາເຣຕິ ນິທ຺ຘາຣເຓ ຠຸມ຺ມໍ ທຏ຺ຐພ຺ພໍ.

ປກຕິອຓຸອາທີນໍ ສສ຺ສຕຄາຫປຸພ຺ພງ຺ຄໂມ, ສຣີຣສ຺ສ ອຸຈ຺ເຉທຄ຺ຄາຫປຸພ຺ພງ຺ຄໂມ ຈ ເຕສໍ ສາມິຠູໂຕ ໂກຈິ ສສ຺ສໂຕ ອຸຈ຺ຉິຊ຺ຊມາໂນ ວາ ອຕ຺ຕາ ອຕ຺ຖີຕິ ອຕ຺ຕຄ຺ຄາໂຫ ກທາຈິ ໂຫຕີຕິ ‘‘ເຍຠຸຍ຺ເຍນາ’’ຕິ ວຸຕ຺ຕໍ. ເຍຠຸຍ຺ເຍນ ປຐມໍ ອຕ຺ຕວາທຸປາທານນ຺ຕິອາທິນາ ວາ ສມ຺ພນ຺ໂຘ.

ຍທິປິ ຠວຣາຄຊວນວີຖິ ສພ຺ພປຐມໍ ປວຕ຺ຕຕິ ຄຫິຕປ຺ປຏິສນ຺ຘິກສ຺ສ ຠວນິກນ຺ຕິຍາ ປວຕ຺ຕິຕພ຺ພຕ຺ຕາ, ໂສ ປນ ຠວຣາໂຄ ຕຓ຺ຫາທຬ຺ຫຕ຺ຕໍ ນ ໂຫຕີຕິ ມຎ຺ຎມາໂນ ນ ກາມຸປາທານສ຺ສ ປຐມຸປ຺ປຕ຺ຕິມາຫ. ຕຓ຺ຫາ ກາມຸປາທານນ຺ຕິ ປນ ວິຠາຄສ຺ສ ອກຣເຓ ສພ຺ພາປິ ຕຓ຺ຫາ ກາມຸປາທານນ຺ຕິ, ກຣເຓປິ ກາມຣາຄໂຕ ອຎ຺ຎາປິ ຕຓ຺ຫາ ທຬ຺ຫຠາວໍ ປຕ຺ຕາ ກາມຸປາທານນ຺ຕິ ຕສ຺ສ ອຣຫຕ຺ຕມຄ຺ຄວຊ຺ຌຕາ ວຸຕ຺ຕາ.

ອຸປ຺ປຕ຺ຕິຏ຺ຐານຠູຕາ ຈິຕ຺ຕຸປ຺ປາທາ ວິສໂຍ. ປຎ຺ຈຸປາທານກ຺ຂນ຺ຘາ ອາລໂຍ, ຕຕ຺ຖ ຣມຕີຕິ ອາລຍຣາມາ, ປຊາ. ເຕເນວ ສາ ອາລຍຣາມຕາ ຈ ສກສນ຺ຕາເນ ປຣສນ຺ຕາເນ ຈ ປາກຏາ ໂຫຕີຕິ. ອຸປນິສ຺ສຍວຈເນນ ອາຣມ຺ມຓານນ຺ຕຣປກຕູປນິສ຺ສຍາ ວຸຕ຺ຕາຕິ ອນນ຺ຕຣປຈ຺ຈຍາທີນມ຺ປິ ສງ຺ຄໂຫ ກໂຕ ໂຫຕິ.

ອຸປາທານປທນິທ຺ເທສວຓ຺ຓນາ ນິຏ຺ຐິຕາ.