໔. ມຄ຺ຄສຈ຺ຈນິທ຺ເທສວຓ຺ຓນາ

໒໐໕. ອຎ຺ຎມຄ຺ຄປຏິກ຺ເຂປນຕ຺ຖນ຺ຕິ ຕິຕ຺ຖິເຍຫິ ກປ຺ປິຕສ຺ສ ມຄ຺ຄສ຺ສ ທຸກ຺ຂນິໂຣຘຄາມິນິປຏິປທາຠາວໍ ປຏິກ຺ເຂເປຕຸນ຺ຕິ ອຕ຺ໂຖ, ອຎ຺ຎສ຺ສ ວາ ມຄ຺ຄຠາວປຏິກ຺ເຂໂປ ອຎ຺ຎມຄ຺ຄປຏິກ຺ເຂໂປ. ປຸຄ຺ຄລສ຺ສ ອຣິຍຠາວກຣຕ຺ຕາ ອຣິຍໍ ກໂຣຕີຕິ ອຣິໂຍ, ອຣິຍຜລປຏິລາຠກຣຕ຺ຕາ ອຣິຍໍ ລຠາເປຕິ ຊເນຕີຕິ ອຣິໂຍ. ອຕ຺ຕໂນ ກິຈ຺ຈວເສນ ຜລວເສນ ຈ ອຣິຍນາມລາໂຠ ເອວ ວຸຕ຺ໂຕຕິ ທຏ຺ຐພ຺ໂພ. ອຏ຺ຐ ອງ຺ຄານິ ອສ຺ສາຕິ ອຎ຺ຎປທຕ຺ຖສມາສໍ ອກຕ຺ວາ ‘‘ອຏ຺ຐງ຺ຄານິ ອສ຺ສ ສນ຺ຕີຕິ ອຏ຺ຐງ຺ຄິໂກ’’ຕິ ປທສິທ຺ຘິ ທຏ຺ຐພ຺ພາ.

ຈຕຸຣງ຺ຄສມນ຺ນາຄຕາ ວາຈາ ຊນໍ ສງ຺ຄຓ຺ຫາຕີຕິ ຕພ຺ພິປກ຺ຂວິຣຕິສຠາວາ ສມ຺ມາວາຈາ ເຠທກຣມິຈ຺ຉາວາຈາປຫາເນນ ຊເນ ສມ຺ປຍຸຕ຺ເຕ ຈ ປຣິຄ຺ຄຓ຺ຫນກິຈ຺ຈວຕີ ໂຫຕີຕິ ‘‘ປຣິຄ຺ຄຫລກ຺ຂຓາ’’ຕິ ວຸຕ຺ຕາ. ຍຖາ ຈີວຣກມ຺ມາທິໂກ ກມ຺ມນ຺ໂຕ ເອກໍ ກາຕພ຺ພໍ ສມຸຏ຺ຐາເປຕິ ນິປ຺ຜາເທຕິ, ຕໍຕໍກິຣິຍານິປ຺ຜາທໂກ ວາ ເຈຕນາສງ຺ຂາໂຕ ກມ຺ມນ຺ໂຕ ຫຕ຺ຖປາທຈລນາທິກໍ ກິຣິຍໍ ສມຸຏ຺ຐາເປຕິ, ເອວໍ ສາວຊ຺ຊກຕ຺ຕພ຺ພກິຣິຍາສມຸຏ຺ຐາປກມິຈ຺ຉາກມ຺ມນ຺ຕປ຺ປຫາເນນ ສມ຺ມາກມ຺ມນ຺ໂຕ ນິຣວຊ຺ຊສມຸຏ຺ຐາປນກິຈ຺ຈວາ ໂຫຕິ, ສມ຺ປຍຸຕ຺ຕຘມ຺ເມ ຈ ສມຸຏ຺ຐາເປນ຺ໂຕ ເອວ ປວຕ຺ຕຕີຕິ ‘‘ສມຸຏ຺ຐາປນລກ຺ຂໂຓ’’ຕິ ວຸຕ຺ໂຕ. ກາຍວາຈານໍ ຂນ຺ຘສນ຺ຕານສ຺ສ ຈ ສໍກິເລສຠູຕມິຈ຺ຉາອາຊີວປ຺ປຫາເນນ ສມ຺ມາອາຊີໂວ ‘‘ໂວທາປນລກ຺ຂໂຓ’’ຕິ ວຸຕ຺ໂຕ.

ອຕ຺ຕໂນ ປຈ຺ຈນີກກິເລສາ ທິຏ຺ເຐກຏ຺ຐາ ອວິຊ຺ຊາທໂຍ. ປສ຺ສຕີຕິ ປກາເສຕີຕິ ອຕ຺ໂຖ. ເຕເນວ ຫິ ອງ຺ເຄນ ຕຕ຺ຖ ປຈ຺ຈເວກ຺ຂຓາ ປວຕ຺ຕຕີຕິ. ຕເຖວາຕິ ອຕ຺ຕໂນ ປຈ຺ຈນີກກິເລເສຫິ ສທ຺ຘິນ຺ຕິ ອຕ຺ໂຖ.

ກິຈ຺ຈໂຕຕິ ປຸພ຺ພຠາເຄຫິ ທຸກ຺ຂາທິຎາເຓຫິ ກຕ຺ຕພ຺ພກິຈ຺ຈສ຺ສ ອິຘ ນິປ຺ຜຕ຺ຕິໂຕ, ອິມສ຺ເສວ ວາ ຎາຓສ຺ສ ທຸກ຺ຂາທິປ຺ປກາສນກິຈ຺ຈໂຕ. ຕີຓິ ນາມານິ ລຠຕິ ກາມສງ຺ກປ຺ປາທິປ຺ປຫານກິຈ຺ຈນິປ຺ຜຕ຺ຕິໂຕ. ສິກ຺ຂາປທວິຠງ຺ເຄ (ວິຠ. ໗໐໓ ອາທໂຍ) ‘‘ວິຣຕິເຈຕນາ ສພ຺ເພ ສມ຺ປຍຸຕ຺ຕຘມ຺ມາ ຈ ສິກ຺ຂາປທານີ’’ຕິ ວຸຕ຺ຕາຕິ ຕຕ຺ຖ ປຘານານໍ ວິຣຕິເຈຕນານໍ ວເສນ ‘‘ວິຣຕິໂຍປິ ໂຫນ຺ຕິ ເຈຕນາໂຍປີ’’ຕິ ອາຫ. ມຸສາວາທາທີຫິ ວິຣມຓກາເລ ວາ ວິຣຕິໂຍ ສຸຠາສິຕາທິວາຈາຠາສນາທິກາເລ ຈ ເຈຕນາໂຍ ໂຍເຊຕພ຺ພາ, ມຄ຺ຄກ຺ຂເຓ ວິຣຕິໂຍວ ເຈຕນານໍ ອມຄ຺ຄງ຺ຄຕ຺ຕາ ເອກສ຺ສ ຎາຓສ຺ສ ທຸກ຺ຂາທິຎາຓຕາ ວິຍ ເອກາຍ ວິຣຕິຍາ ມຸສາວາທາທິວິຣຕິຠາໂວ ວິຍ ຈ ເອກາຍ ເຈຕນາຍ ສມ຺ມາວາຈາທິກິຈ຺ຈຕ຺ຕຍສາຘນສຠາວາຠາວາ ສມ຺ມາວາຈາທິຠາວາສິທ຺ຘິໂຕ, ຕໍສິທ຺ຘິຍຎ຺ຈ ອງ຺ຄຕ຺ຕຍຕ຺ຕາສິທ຺ຘິໂຕ ຈ.

ປຸພ຺ພຠາເຄປິ ມຄ຺ຄກ຺ຂເຓປິ ສມ຺ມາສມາຘິ ເອວາຕິ ຍທິປິ ສມາຘິອຸປກາຣການໍ ອຠິນິໂຣປນານຸມຊ຺ຊນສມ຺ປິຍາຍນພ຺ຣູຫນສນ຺ຕສຸຂານໍ ວິຕກ຺ກາທີນໍ ວເສນ ຈຕູຫິ ຌາເນຫິ ສມ຺ມາສມາຘິ ວິຠຕ຺ໂຕ, ຕຖາປິ ວາຍາໂມ ວິຍ ອນຸປ຺ປນ຺ນາກຸສລານຸປ຺ປາທນາທິຈຕຸວາຍາມກິຈ຺ຈໍ, ສຕິ ວິຍ ຈ ອສຸຠາສຸຂານິຈ຺ຈານຕ຺ເຕສຸ ກາຍາທີສຸ ສຸຠາທິສຎ຺ຎາປຫານຈຕຸສຕິກິຈ຺ຈໍ, ເອໂກ ສມາຘິ ຈຕຸກ຺ກຊ຺ຌານສມາຘິກິຈ຺ຈໍ ນ ສາເຘຕີຕິ ປຸພ຺ພຠາເຄປິ ປຐມຊ຺ຌານສມາຘິຈິຕ຺ເຕ ຌານສມາຘິ ປຐມຊ຺ຌານສມາຘິ ເອວ ມຄ຺ຄກ຺ຂເຓປິ, ຕຖາ ປຸພ຺ພຠາເຄປິ ຈຕຸຕ຺ຖຊ຺ຌານສມາຘິຈິຕ຺ເຕ ຌານສມາຘິ ຈຕຸຕ຺ຖຊ຺ຌານສມາຘິ ເອວ ມຄ຺ຄກ຺ຂເຓປີຕິ ອຕ຺ໂຖ.

ວຈີເຠທສ຺ສ ອຸປກາຣໂກ ວິຕກ຺ໂກ ສາວຊ຺ຊານວຊ຺ຊວຈີເຠທນິວຕ຺ຕນປວຕ຺ຕນກຣາຍ ສມ຺ມາວາຈາຍປິ ອຸປກາຣໂກ ເອວາຕິ ‘‘ສ຺ວາຍ’’ນ຺ຕິອາທິມາຫ. ວຈີເຠທນິຍາມິກາ ວາຈາ ກາຍິກກິຣິຍານິຍາມກສ຺ສ ສມ຺ມາກມ຺ມນ຺ຕສ຺ສ ອຸປກາຣິກາ. ອິທໍ ວີຣິຍນ຺ຕິ ຈຕຸສມ຺ມປ຺ປຘານວີຣິຍໍ. ຄຕິໂຍຕິ ນິປ຺ຜຕ຺ຕິໂຍ, ກິຈ຺ຈາທິສຠາເວ ວາ. ສມນ຺ເວສິຕ຺ວາຕິ ອຸປຘາເຣຕ຺ວາ.

ປຸຣິມານິ ທ຺ເວ ສຈ຺ຈານິ ອຸຄ຺ຄຓ຺ຫິຕ຺ວາຕິ ສມ຺ພນ຺ໂຘ. ອິຏ຺ຐໍ ກນ຺ຕນ຺ຕິ ນິໂຣຘມຄ຺ເຄສຸ ນິນ຺ນຠາວໍ ທສ຺ເສຕິ, ນ ອຠິນນ຺ທນໍ, ຕນ຺ນິນ຺ນຠາໂວເຍວ ຈ ຕຕ຺ຖ ກມ຺ມກຣຓໍ ທຏ຺ຐພ຺ພໍ.

ກິຈ຺ຈໂຕຕິ ປຣິຎ຺ຎາທິໂຕ. ອາຣມ຺ມຓປຏິເວໂຘຕິ ສຈ຺ຉິກິຣິຍາປຏິເວຘມາຫ. ສພ຺ພມ຺ປິ ປຏິເວຘຎາຓໍ ໂລກຸຕ຺ຕຣນ຺ຕິ ກສ຺ມາ ວຸຕ຺ຕໍ, ນນຸ ອຸຄ຺ຄຫາທິປຏິເວໂຘ ຈ ປຏິເວໂຘວ, ນ ຈ ໂສ ໂລກຸຕ຺ຕໂຣຕິ? ນ, ເກວເລນ ປຏິເວຘ-ສທ຺ເທນ ອຸຄ຺ຄຫາທິປຏິເວຘານໍ ອວຈນີຍຕ຺ຕາ, ປຏິເວຘນິມິຕ຺ຕຕ຺ຕາ ວາ ອຸຄ຺ຄຫາທິວເສນ ປວຕ຺ຕໍ ທຸກ຺ຂາທີສຸ ປຸພ຺ພຠາເຄ ຎາຓໍ ‘‘ປຏິເວໂຘ’’ຕິ ວຸຕ຺ຕໍ, ນ ປຏິເວຘຕ຺ຕາ, ປຏິເວຘຠູຕເມວ ປນ ຎາຓໍ ສນ຺ຘາຍາຫ ‘‘ສພ຺ພມ຺ປິ ປຏິເວຘຎາຓໍ ໂລກຸຕ຺ຕຣ’’ນ຺ຕິ. ອຸຄ຺ຄຫປຣິປຸຈ຺ຉາຎາຓານິປິ ສວນຎາເຓ ເອວ ອວໂຣຘໍ ຄຈ຺ຉນ຺ຕີຕິ ‘‘ສວນຘາຣຓສມ຺ມສນຎາຓໍ ໂລກິຍ’’ນ຺ຕິ ຕິວິຘເມວ ຎາຓມາຫ. ອຸຄ຺ຄຫາທີຫິ ສຈ຺ຈປຣິຄ຺ຄຓ຺ຫນໍ ປຣິຄ຺ຄໂຫ.

ປໂຍໂຄຕິ ກິຣິຍາ, ວາຍາໂມ ວາ. ຕສ຺ສ ມຫນ຺ຕຕຣສ຺ສ ອິຈ຺ຉິຕພ຺ພຕໍ ທຸກ຺ກຣຕຣຕຎ຺ຈ ອຸປມາຫິ ທສ຺ເສຕິ ‘‘ຠວຄ຺ຄຄຫຓຕ຺ຖ’’ນ຺ຕິອາທິນາ.

ປທຆາຕນ຺ຕິ ເອຕ຺ຖ ຄຕມຄ຺ໂຄ ‘‘ປທ’’ນ຺ຕິ ວຸຈ຺ຈຕິ. ເຍນ ຈຸປາເຍນ ກາຣເຓນ ກາມວິຕກ຺ໂກ ອຸປ຺ປຊ຺ຊຕິ, ໂສ ຕສ຺ສ ຄຕມຄ຺ໂຄຕິ ຕສ຺ສ ຆາໂຕ ປທຆາໂຕ. ອຸສ຺ສຸກ຺ກາເປຕ຺ວາຕິ ອຸທ຺ຘໍ ອຸທ຺ຘໍ ສນ຺ຕິວິເສສຍຸຕ຺ຕໍ ກຕ຺ວາ, ວຑ຺ເຒຕ຺ວາຕິ ອຕ຺ໂຖ.

ປາຬິຍໍ ວິຠຕ຺ເຕສູຕິ ກຕຣປາຬິຍໍ? ຘມ຺ມສງ຺ຄເຫ ຕາວ ອຏ຺ຐ ກສິຓານິ ທສ ອສຸຠາ ຈຕ຺ຕາໂຣ ພ຺ຣຫ຺ມວິຫາຣາ ຈຕ຺ຕາຣິ ອາຣຸປ຺ປານິ ວິຠຕ຺ຕານິ, ອາຄເມສຸ ທສ ອນຸສ຺ສຕິໂຍ ອາຫາເຣ ປຏິກູລສຎ຺ຎາ ຈຕຸຘາຕຸວວຕ຺ຖານນ຺ຕິ ອິມານິ ຈາຕິ ຕຕ຺ຖ ຕຕ຺ຖ ວິຠຕ຺ຕໍ. ອິເມສຸ ຕີສູຕິ ກາມາທີສຸ ຕີສຸ ຐາເນສຸ.

ມິຈ຺ຉາວາຈາສງ຺ຂາຕາຍາຕິ ເອເຕນ ເອກາຍ ເຈຕນາຍ ປຫາຕພ຺ພເອກຕ຺ຕໍ ທສ຺ເສຕິ. ອິຘ ອຣິຍສາວໂກ ສກລ຺ຍາຓປຸຖຸຊ຺ຊນໂກ ເສກ຺ໂຂ. ກາຍທ຺ວາຣວີຕິກ຺ກມາຕິ ອາຊີວເຫຕຸກໂຕ ປາຓາຕິປາຕາທິໂຕ ວິສຸໍ ວິສຸໍ ວິຣມຓໍ ໂຍເຊຕພ຺ພໍ.

ອຍໍ ປນສ຺ສາຕິ ມຄ຺ຄຠາເວນ ຈຕຸພ຺ພິຘມ຺ປິ ເອກຕ຺ເຕນ ຄເຫຕ຺ວາ ອສ຺ສ ມຄ຺ຄສ຺ສ ອຍໍ ຌານວເສນ ສພ຺ພສທິສສພ຺ພາສທິສເອກຈ຺ຈສທິສຕາ ວິເສໂສ. ປາທກຊ຺ຌານນິຍາເມນ ໂຫຕີຕິ ອິຘ ປາທກຊ຺ຌານນິຍາມໍ ຘຸຣໍ ກຕ຺ວາ ອາຫ, ອຏ຺ຐສາລິນິຍໍ ປນ ວິປສ຺ສນານິຍາມໍ ຕຕ຺ຖ ສພ຺ພວາທາວິໂຣຘໂຕ, ອິຘ ປນ ສມ຺ມສິຕຊ຺ຌານປຸຄ຺ຄລຊ຺ຌາສຍວາທນິວຕ຺ຕນໂຕ ປາທກຊ຺ຌານນິຍາມໍ. ວິປສ຺ສນານິຍາໂມ ປນ ສາຘາຣຓຕ຺ຕາ ອິຘາປິ ນ ປຏິກ຺ຂິຕ຺ໂຕຕິ ທຏ຺ຐພ຺ໂພ. ອຎ຺ເຎ ຈາຈຣິຍວາທາ ວກ຺ຂມານາ ວິຠຊິຕພ຺ພາຕິ ຍຖາວຸຕ຺ຕເມວ ຕາວ ປາທກຊ຺ຌານນິຍາມໍ ວິຠຊນ຺ໂຕ ອາຫ ‘‘ປາທກຊ຺ຌານນິຍາເມນ ຕາວາ’’ຕິ.

ອາຣຸປ຺ເປ ຈຕຸກ຺ກປຎ຺ຈກ…ເປ… ວຸຕ຺ຕໍ ອຏ຺ຐສາລິນິຍນ຺ຕິ ອຘິປ຺ປາໂຍ. ນນຸ ຕຕ຺ຖ ‘‘ອາຣຸປ຺ເປ ຕິກຈຕຸກ຺ກຊ຺ຌານໍ ອຸປ຺ປຊ຺ຊຕີ’’ຕິ ວຸຕ຺ຕໍ, ນ ‘‘ຈຕຸກ຺ກປຎ຺ຈກຊ຺ຌານ’’ນ຺ຕິ? ສຈ຺ຈໍ, ເຍສຸ ປນ ສໍສໂຍ ອຕ຺ຖິ, ເຕສໍ ອຸປ຺ປຕ຺ຕິທສ຺ສເນນ, ເຕນຕ຺ຖໂຕ ຈຕຸກ຺ກປຎ຺ຈກຊ຺ຌານໍ ອຸປ຺ປຊ຺ຊຕີຕິ ວຸຕ຺ຕເມວ ໂຫຕີຕິ ເອວມາຫາຕິ ເວທິຕພ຺ພໍ. ສມຸທາຍຎ຺ຈ ອເປກ຺ຂິຕ຺ວາ ‘‘ຕຎ຺ຈ ໂລກຸຕ຺ຕຣໍ, ນ ໂລກິຍ’’ນ຺ຕິ ອາຫ. ຈຕຸຕ຺ຖຊ຺ຌານເມວ ຫິ ໂລກິຍໍ ຕຕ຺ຖ ອຸປ຺ປຊ຺ຊຕິ, ນ ຈຕຸກ຺ກໍ ປຎ຺ຈກຎ຺ຈາຕິ. ເອຕ຺ຖ ກຖນ຺ຕິ ປາທກຊ຺ຌານສ຺ສ ອຠາວາ ກຖໍ ທຏ຺ຐພ຺ພນ຺ຕິ ອຕ຺ໂຖ. ຕໍຌານິກາວ ຕສ຺ສ ຕຕ຺ຖ ຕໂຍ ມຄ຺ຄາ ອຸປ຺ປຊ຺ຊນ຺ຕິ ຕຊ຺ຌານິກໍ ປຐມຜລາທິໍ ປາທກໍ ກຕ຺ວາ ອຸປຣິມຄ຺ຄຠາວນາຍາຕິ ອຘິປ຺ປາໂຍ, ຕິກຈຕຸກ຺ກຊ຺ຌານິກໍ ປນ ມຄ຺ຄໍ ຠາເວຕ຺ວາ ຕຕ຺ຖຸປ຺ປນ຺ນສ຺ສ ອຣູປຊ຺ຌານໍ ຕຊ຺ຌານິກໍ ຜລຎ຺ຈ ປາທກໍ ກຕ຺ວາ ອຸປຣິມຄ຺ຄຠາວນາຍ ອຎ຺ຎຌານິກາປິ ອຸປ຺ປຊ຺ຊນ຺ຕີຕິ ຌານງ຺ຄາທິນິຍາມິກາ ປຸພ຺ພາຠິສງ຺ຂາຣສມາປຕ຺ຕິ ປາທກໍ, ນ ສມ຺ມສິຕພ຺ພາຕິ ຜລສ຺ສປິ ປາທກຕາ ທຏ຺ຐພ຺ພາ.

ທຸກ຺ຂຎາຓາທີນໍ ຣູປາທິຉຬາຣມ຺ມຓຕ຺ຕາ ເນກ຺ຂມ຺ມສງ຺ກປ຺ປາທີນໍ ກສິຓາທິຕໍຕໍກຸສລາຣມ຺ມຓາຣມ຺ມຓຕ຺ຕາ ສມ຺ມາວາຈາທີນໍ ອງ຺ຄານໍ ຕໍຕໍວິຣມິຕພ຺ພາທິອາຣມ຺ມຓຕ຺ຕາ ‘‘ຍຖານຸຣູປ’’ນ຺ຕິ ອາຫ. ຕທນຸຣູໂປຕິ ອວິປ຺ປຏິສາຣກຣສີລໍ ວາຍາມສ຺ສ ວິເສສປຈ຺ຈໂຍຕິ ສີລານຸຣູປຕາ ວາຍາມສ຺ສ ວຸຕ຺ຕາ ສມ຺ປຍຸຕ຺ຕສ຺ສປິ, ສມ຺ປຍຸຕ຺ຕສ຺ເສວ ຈ ວຈນໂຕ ‘‘ສີລຠູມິຍໍ ປຕິຏ຺ຐິຕສ຺ສາ’’ຕິ ອວຕ຺ວາ ‘‘ປຕິຏ຺ຐມານສ຺ສາ’’ຕິ ວຸຕ຺ຕໍ. ເຈຕໂສ ອສມ຺ໂມໂສຕິ ‘‘ເອກາຣກ຺ໂຂ’’ຕິ ເອຕ຺ຖ ວຸຕ຺ເຕນ ສຕາຣກ຺ເຂນ ເຈຕໂສ ຣກ຺ຂິຕຕາ. ເຕນາຫ ‘‘ອິຕິ…ເປ… ສຸວິຫິຕຈິຕ຺ຕາຣກ຺ຂສ຺ສາ’’ຕິ.

ອາສວກ຺ຂຍຎາຓສ຺ສ ວິຊ຺ຊາຠາໂວ ວຸຕ຺ໂຕຕິ ອາສວກ຺ຂຍສງ຺ຂາເຕ ມຄ຺ເຄ ຕີຫິ ຂນ຺ເຘຫິ ສງ຺ຄຫິເຕ ປຎ຺ຎາກ຺ຂນ຺ໂຘ ວິຊ຺ຊາ, ສີລສ຺ສ ຈຕຸນ຺ນຎ຺ຈ ຌານານໍ ຈຣຓຠາໂວ ວຸຕ຺ໂຕຕິ ອິຕເຣ ທ຺ເວ ຂນ຺ຘາ ຈຣຓໍ. ຍນ຺ຕິ ເອເຕນ ນິພ຺ພານໍ ຄຈ຺ຉນ຺ຕີຕິ ຍານໍ, ວິປສ຺ສນາວ ຍານໍ ວິປສ຺ສນາຍານໍ. ສີລໍ ສມາຘິສ຺ສ ວິເສສປຈ຺ຈໂຍ, ສມາຘິ ວິປສ຺ສນາຍາຕິ ສມຖສ຺ສ ອຸປກາຣຕ຺ຕາ ສີລກ຺ຂນ຺ໂຘ ຈ ສມຖຍາເນນ ສງ຺ຄຫິໂຕ. ວິປສ຺ສນາຍາເນນ ກາເມສຸ ອາທີນວໍ ວິຠາເວນ຺ໂຕ ສມຖຍາເນນ ນິຣາມິສໍ ຌານສຸຂໍ ອປຣິຈ຺ຈຊນ຺ໂຕ ອນ຺ຕທ຺ວຍກຸມ຺ມຄ຺ຄໍ ວິວຊ຺ເຊຕິ. ປຎ຺ຎາ ວິຍ ໂມຫສ຺ສ, ສີລສມາຘໂຍ ຈ ໂທສໂລຠານໍ ອຸຊຸວິປຈ຺ຈນີກາ ອໂທສາໂລເຠຫິ ສາເຘຕພ຺ພຕ຺ຕາ. ສີລສມາຘິປຎ຺ຎາໂຍຄໂຕ ອາທິມຊ຺ຌປຣິໂຍສານກລ຺ຍາຓໍ. ສີລາທີນິ ຫິ ສາສນສ຺ສ ອາທິມຊ຺ຌປຣິໂຍສານນ຺ຕິ. ຍສ຺ມິໍ ຐິໂຕ ມຄ຺ຄຏ຺ໂຐ ຜລຏ຺ໂຐ ຈ ອຣິໂຍ ໂຫຕິ, ຕໍ ມຄ຺ຄຜລສງ຺ຂາຕໍ ຂນ຺ຘຕ຺ຕຍສງ຺ຄຫິຕໍ ສາສນໍ ອຣິຍຠູມິ.

ມຄ຺ຄສຈ຺ຈນິທ຺ເທສວຓ຺ຓນາ ນິຏ຺ຐິຕາ.

ສຸຕ຺ຕນ຺ຕຠາຊນີຍວຓ຺ຓນາ ນິຏ຺ຐິຕາ.