໓. ປຎ຺ຫປຸຈ຺ຉກວຓ຺ຓນາ

ສຍໍ ເຊຏ຺ຐກຠາເວນ ປວຕ຺ຕນໂຕ ຈຕ຺ຕາໂຣ ອຘິປຕໂຍ ອຎ຺ຎມຎ຺ຎໍ ຄຣຸໍ ນ ກໂຣນ຺ຕິ. ຕສ຺ມາ ‘‘ຈຕ຺ຕາໂຣ ອິທ຺ຘິປາທາ ນ ມຄ຺ຄາຘິປຕິໂນ’’ຕິ ວຸຕ຺ຕາ. ເຕນາຫ ‘‘ອຎ຺ຎມຎ຺ຎສ຺ສ ປນ ອຘິປຕໂຍ ນ ຠວນ຺ຕີ’’ຕິ. ເອຕມຕ຺ຖນ຺ຕິ ‘‘ອຘິປຕໂຍ ອຎ຺ຎມຎ຺ຎສ຺ສ ອຘິປຕີ ນ ຠວນ຺ຕີ’’ຕິ ເອຕມຕ຺ຖໍ. ອຘິປຕິໂນຕິ ອຘິປຕິ ຠວິຕຸໍ ສມຕ຺ຖສ຺ສ. ອຘິປຕິໍ ນ ກໂຣນ຺ຕີຕິ ອຘິປຕິໍ ກຕ຺ວາ ຄຣຸໍ ກຕ຺ວາ ນປ຺ປວຕ຺ຕນ຺ຕິ. ອຘິປຕີນໍ ສຫຠາເວຕິ ອຘິປຕິກິຈ຺ຈກຣເຓນ ສຫປວຕ຺ຕິຍໍ. ‘‘ອວີມໍສາຘິປຕິກສ຺ສ ມຄ຺ຄສ຺ສ ອຠາວາ’’ຕິ ອິທໍ ‘‘ອຘິປຕິຕາສມຕ຺ຖາ ຘມ຺ມາ ອຘິປຕິຠາເວເນວ ປວຕ຺ເຕຍ຺ຍຸ’’ນ຺ຕິ ໂທສາໂຣປນວເສນາຫ, ນ ຍຖາຘິຄຕວເສນ. ອຘິປຕິຘມ຺ມານຎ຺ຫິ ປຸພ຺ພາຠິສງ຺ຂາເຣ ສຕິ ອຘິປຕິຠາເວນ ປວຕ຺ຕິ, ນ ອຎ຺ຎຖາຕິ ສຫຠາເວປິ ຕທຠາວໍ ສນ຺ຘາຍ ວິເສສນໍ ນ ກຕ຺ຕພ຺ພໍ ສິຍາຕິ ສກ຺ກາ ວຕ຺ຕຸໍ. ອຎ຺ຎມຎ຺ຎາຘິປຕິກຣຓຠາເວຕິ ອຎ຺ຎມຎ຺ຎໍ ອຘິປຕິໍ ກຕ຺ວາ ປວຕ຺ຕິຍໍ. ວີມໍສາຘິປຕິກຕ຺ຕວຈນນ຺ຕິ ວີມໍສາຘິປຕິກຠາວສ຺ສ ວຈນໍ. ນ ວຕ຺ຕພ຺ພໍ ສິຍາ ສພ຺ເພສມ຺ປິ ອຘິປຕີນໍ ສາຘິປຕິກຕ຺ຕາຕິ ອຘິປ຺ປາໂຍ. ສຫຠາໂວ ປຏິກ຺ຂິຕ຺ໂຕ ເອວ ສາຘິປຕິຠາວສ຺ສ ອເນກໍສິກຕາວຈນໂຕ.

ປຎ຺ຫປຸຈ຺ຉກວຓ຺ຓນາ ນິຏ຺ຐິຕາ.

ອິທ຺ຘິປາທວິຠງ຺ຄວຓ຺ຓນາ ນິຏ຺ຐິຕາ.