໒. ສມຸທຍສຈ຺ຈນິທ຺ເທສວຓ຺ຓນາ

໒໐໓. ມໂນ ວິຍາຕິ ມໂນ-ສທ຺ທສ຺ສ ວິຍ. ອິກ-ສທ຺ເທນາຕິ ‘‘ໂປໂນຠວິກາ’’ຕິ ເອຕ຺ຖ ອິກ-ສທ຺ເທນ. ຄມິຍຕ຺ຖຕ຺ຕາຕິ ຎາປິຕຕ຺ຖຕ຺ຕາ. ກຣຓສີລຕາ ຫິ ອິຘ ສີລຕ຺ໂຖ, ໂສ ຈ ອິກ-ສທ຺ເທນ ວຸຈ຺ຈຕີຕິ ກິຣິຍາວາຈກສ຺ສ ກຣຓສທ຺ທສ຺ສ ອທສ຺ສນໍ ອປ຺ປໂຍໂຄ. ວຸຕ຺ຕຕ຺ຖານຎ຺ຫິ ອປ຺ປໂຍໂຄ. ສຕິ ປຈ຺ຈຍນ຺ຕຣສມວາເຍ ປຸນພ຺ຠວສ຺ສ ທາຍິກາ, ຕທຠາເວ ອທາຍິກາຕິ ວຸຕ຺ຕາຕິ ອາຫ ‘‘ອທາຍິກາປິ ປຸນພ຺ຠວໍ ເທຕິຈ຺ເຈວາ’’ຕິ ຕໍສຠາວານຕິວຕ຺ຕນໂຕ. ເຕເນວາຫ ‘‘ສມານສຠາວຕ຺ຕາ, ຕທານຸຠາວຕ຺ຕາ ຈາ’’ຕິ. ຕຕ຺ຖ ສຠາໂວ ຕຓ຺ຫາຍນໍ. ອານຸຠາໂວ ປຈ຺ຈຍສມວາເຍ ຜລນິປ຺ຜາທນສມຕ຺ຖຕາ. ອິຕເຣສູຕິ ອວສິຏ຺ຐກິເລສາທີສຸ. ປວຕ຺ຕິວິປາກທາຍິໂນ ກມ຺ມສ຺ສ ສຫາຍຠູຕາ ຕຓ຺ຫາ ‘‘ອຸປຘິເວປກ຺ກາ’’ຕິ ອຘິປ຺ເປຕາຕິ ອາຫ ‘‘ອຸປຘິມ຺ຫິ ຍຖານິພ຺ພຕ຺ເຕ’’ຕິອາທິ. ຍຖານິພ຺ພຕ຺ເຕຕິ ອຕ຺ຕໂນ ປຈ຺ຈເຍຫິ ນິພ຺ພຕ຺ຕປ຺ປກາເຣ. ນນ຺ທນໍ ສໍອຸປ຺ປິລາວນໍ ອຠິຕສ຺ສນໍ. ຣຎ຺ຊນໍ ວຕ຺ຖສ຺ສ ວິຍ ຣງ຺ຄຊາເຕນ ຈິຕ຺ຕສ຺ສ ວິປຣິຓາມນໍ, ຣມາປນໍ ວາ. ຣາຄສມ຺ພນ຺ເຘນາຕິ ຣາຄປທສມ຺ພນ຺ເຘນ ‘‘ອຸປ຺ປນ຺ນສ຺ສາ’’ຕິ ປຸລ຺ລິງ຺ຄວເສນ ວຸຕ຺ຕໍ. ຣູປາຣູປຠວຣາໂຄ ວິສຸໍ ວກ຺ຂຕີຕິ ເອຕ຺ຖ ວກ຺ຂຕິ-ກິຣິຍາປທໍ ກມ຺ມຕ຺ເຖ ເວທິຕພ຺ພໍ.

‘‘ສວຕ຺ຖຸກໍ ຈກ຺ຂຸ’’ນ຺ຕິ ອິມິນາ ສກລໍ ຈກ຺ຂຸທສກມາຫ, ທຸຕິເຍນ ສສມ຺ຠາຣຈກ຺ຂຸໍ. ຉິທ຺ທນ຺ຕິ ກຓ຺ຓສ຺ສ ຉິທ຺ທປເທສໍ. ກຓ຺ຓພທ຺ຘນ຺ຕິ ກຓ຺ຓປາຬິ. ວຓ຺ຓສຓ຺ຐານໂຕ ຣຕ຺ຕກມ຺ພລປຏລໍ ວິຍ, ກິຈ຺ຈໂຕ ມຸທຸສິນິທ຺ຘມຘຸຣຣສທໍ ມຎ຺ຎນ຺ຕິ. ສາມຎ຺ເຎນ ຄຫິຕາຕິ ວິສເຍນ ອວິເສເສຕ຺ວາ ຄຫິຕາ. ວິສຍວິສິຏ຺ຐາຕິ ຈກ຺ຂາທິວິສຍວິສິຏ຺ຐາ. ເອຕ຺ຖ ອຸປ຺ປຊ຺ຊຕີຕິ ສມຸທາຍາວຍເວຫິ ວິຍ ສາມຎ຺ຎວິເສເສຫິ ນ ນານຕ຺ຕໂວຫາໂຣ ນ ໂຫຕິ ຍຖາ ‘‘ຣຸກ຺ໂຂ ສິໍສປາ’’ຕິ. ນ ຫິ ສພ຺ໂພ ຣຸກ຺ໂຂ ສິໍສປາ. ຕສ຺ມາ ກິຣິຍາເຠທສພ຺ຠາວໂຕ ‘‘ສຍານາ ຠຸຎ຺ຊນ຺ຕິ ສຘນາ’’ຕິອາທີສຸ ວິຍ ‘‘ອຸປ຺ປຊ຺ຊມານາ’’ຕິ ເອຕ຺ຖ ກິຣິຍາຍ ລກ຺ຂຓຕາ, ອິຕຣຕ຺ຖ ລກ຺ຂິຕພ຺ພຕາ ຈ ວຸຕ຺ຕາ. ຍທິ ອຸປ຺ປຊ຺ຊມານາ ໂຫຕີຕິ ອນິຈ຺ຉິຕຕ຺ຕາ ສາສງ຺ກໍ ອຸປ຺ປາທກິຣິຍາຍ ອຕ຺ຖິຠາວມາຫ. ເຕນ ອຸປ຺ປາເທ ສຕີຕິ ອຍເມຕສ຺ສ ອຕ຺ໂຖຕິ ‘‘ອຸປ຺ປຊ຺ຊມານາ’’ຕິ ເອຕ຺ຖ ອຸປ຺ປາໂທ ເຫຕຸຠາເວນ ວຸຕ຺ໂຕ, ອິຕໂຣ ຈ ຕສ຺ສ ຜລຠາເວນາຕິ ອາຫ ‘‘ໂສ ຫິ ເຕນ ອຸປໂຍຊິໂຕ ວິຍ ໂຫຕີ’’ຕິ. ອຸປ຺ປຊ຺ຊມານາຕິ ວາ ຕຓ຺ຫາຍ ຕຕ຺ຖ ອຸປ຺ປຊ຺ຊນສີລຕາ ອຸປ຺ປຊ຺ຊນສຠາໂວ, ອຸປ຺ປຊ຺ຊນສມຕ຺ຖຕາ ວາ ວຸຕ຺ຕາ. ຕຕ຺ເຖວ ຈສ຺ສາ ອຸປ຺ປຊ຺ຊນສີລຕາ ສກ຺ກາຍໂຕ ອຎ຺ຎສ຺ມິໍ ວິສເຍ ປວຕ຺ຕິຍາ ອຠາວໂຕ, ສມຕ຺ຖຕາ ປຈ຺ຈຍສມວາເຍນ, ອຎ຺ຎຖາ ອສມຕ຺ຖຕາ, ຍໂຕ ກທາຈິ ນ ອຸປ຺ປຊ຺ຊຕິ. ນິວິສມານາ ນິວິສຕີຕິ ເອຕ຺ຖາປິ ອິມິນາ ນເຍນ ອຕ຺ໂຖ ເວທິຕພ຺ໂພຕິ.

ສມຸທຍສຈ຺ຈນິທ຺ເທສວຓ຺ຓນາ ນິຏ຺ຐິຕາ.