໒. ອຠິຘມ຺ມຠາຊນີຍວຓ຺ຓນາ

໑໘໓. ອາເວຓິກຕ຺ໂຖ ອຕິສຍຕ຺ໂຖ ຈ ວິເສສສທ຺ໂທ ໂຫຕີຕິ ຕທຸຠຍໍ ທສ຺ເສຕຸໍ ‘‘ປຸຄ຺ຄລນ຺ຕຣາສາຘາຣຓໍ, ນີລາທິສພ຺ພຣູປສາຘາຣຓຎ຺ຈາ’’ຕິ ວຸຕ຺ຕໍ. ອສາຘາຣຓກາຣເຓນາປິ ຫິ ນິທ຺ເທໂສ ໂຫຕິ ຍຖາ ‘‘ເຠຣິສທ຺ໂທ, ຍວງ຺ກຸໂຣ’’ຕິ. ອຕິສຍກາຣເຓນປິ ຍຖາ ‘‘ອຕີຕານາຄຕປຈ຺ຈຸປ຺ປນ຺ນານໍ ກມ຺ມສມາທານານໍ ຐານໂສ ເຫຕຸໂສ ວິປາກໍ ຍຖາຠູຕໍ ປຊານາຕີ’’ຕິ (ກຖາ. ໓໕໕; ປຏິ. ມ. ໒.໔໔). ຘາຕຸອຕ຺ໂຖ ເອວາຕິ ‘‘ຘາຕຸ’’ອິຕິ ອິມສ຺ສ ຘາຕຸສທ຺ທສ຺ເສວ ອຕ຺ໂຖ. ຘາຕຸວຈນີໂຍ ຫິ ອຕ຺ໂຖ ອຸປສຄ຺ເຄນ ໂຊຕີຍຕິ.

ປຸຣິເມນ ອສທິໂສ ວິຘານຘາຣຓຕ຺ຖານໍ ປາກໂຏ ເຠໂທຕິ. ວິສຠາຄລກ຺ຂຓາ ວິສທິສສຠາວາ ອວຍວາ ຠາຄາ, ເຕສຸ.

ຍຖາສມ຺ຠວນ຺ຕິ ກິຣິຍາມໂນຘາຕຸ ອຸປນິສ຺ສຍໂກຏິຍາ, ວິປາກມໂນຘາຕຸ ວິປາກມໂນວິຎ຺ຎາຓສ຺ສ ອນນ຺ຕຣາທິນາປິ, ອິຕຣສ຺ສ ສພ຺ພາປິ ອຸປນິສ຺ສຍໂກຏິຍາວ. ຘມ຺ມຘາຕຸ ປນ ເວທນາທິກາ ສຫຊາຕາ ສຫຊາຕາທິນາ, ອສຫຊາຕາ ອນນ຺ຕຣາທິນາ, ອຸປນິສ຺ສເຍນ ອາຣມ຺ມຓາທິນາ ຈ ມໂນວິຎ຺ຎາຓສ຺ສ ປຈ຺ຈໂຍຕິ ເອວໍ ມໂນຘາຕຸຘມ຺ມຘາຕູນໍ ມໂນວິຎ຺ຎາຓສ຺ສ ເຫຕຸຠາໂວ ຍຖາສມ຺ຠວໍ ໂຍເຊຕພ຺ໂພ. ທ຺ວາຣຠູຕມໂນປິ ສຸຕ຺ເຕ ‘‘ມໂນຘາຕູ’’ຕິ ວຸຈ຺ຈຕີຕິ ອາຫ ‘‘ທ຺ວາຣຠູຕມໂນວເສນ ວາ’’ຕິ. ຕສ຺ສາ ມໂນຘາຕຸຍາ ມໂນວິຎ຺ຎາຓສ຺ສ ເຫຕຸຠາໂວ ຍຖາສມ຺ຠວໍ ໂຍເຊຕພ຺ໂພຕິ ສມ຺ພນ຺ໂຘ.

ປຸຣິມນເຍນາຕິ ວິເສສນໍ ທຸຕິຍນຍສ຺ສ ຫີນຕ຺ຕິກວເສເນວ ວິຠຕ຺ຕຕ຺ຕາ. ນານາຘາຕູນຎ຺ຈ ຈກ຺ຂຸຘາຕຸອາທີນນ຺ຕິ ສມ຺ພນ຺ໂຘ.

ນ ຫິ ທ຺ເວ ມໂນວິຎ຺ຎາຓຘາຕຸໂຍ ສນ຺ຕິ ອຏ຺ຐາຣສຘາຕຸວິຠາຄທສ຺ສເນຕິ ອຘິປ຺ປາໂຍ. ຂນ຺ຘາຍຕນຘາຕິນ຺ທ຺ຣິຍານໍເຍວ ວເສນ ສງ຺ເຂປາທິວິຠາຄທສ຺ສນໍ ເຕສໍ ພຫຸລໍ ປຣິຎ຺ເຎຍ຺ຍຘມ຺ມສງ຺ຄຓ຺ຫນໂຕ. ສຈ຺ຈເທສນາ ປນ ອຕິສໍຂິຕ຺ຕຠາວໂຕເຍເວຕ຺ຖ ພຫິກຕາ.

ນິຊ຺ຊີວສ຺ສາຕິອາທິ ວິເສສໂຕ ສຕ຺ຕສຸຎ຺ຎຕາທີປນຕ຺ຖາ ຘາຕຸເທສນາຕິ ກຕ຺ວາ ວຸຕ຺ຕໍ. ປຸຣິມນໂຍ ອຎ຺ເຎສມ຺ປິ ກມວຸຕ຺ຕີນໍ ຘາຕູນໍ ສມ຺ຠວຕີຕິ ອຘິປ຺ປາເຍນ ວຸຕ຺ໂຕຕິ ‘‘ມໂນຘາຕຸເຍວ ວາ’’ຕິອາທິນາ ທຸຕິຍນໂຍ ວຸຕ຺ໂຕ. ຕຕ຺ຖ ອວິຊ຺ຊມາເນປິ ປຸເຣຈຣານຸຈຣຠາເວຕິ ປຸເຣຈຣານຸຈຣາຠິສນ຺ຘິຍາ ອຠາເວປິ ເກວລໍ ອນນ຺ຕຣປຸພ຺ພກາລອນນ຺ຕຣາປຣກາລຕາຍ ມໂນຘາຕຸ ປຸເຣຈຣານຸຈຣາ ວິຍ ທຏ຺ຐພ຺ພາຕິ ວຸຕ຺ຕາ.

‘‘ອຎ຺ຎໍ ອຄ຺ຄເຫຕ຺ວາ ປວຕ຺ຕິຕຸໍ ອສມຕ຺ຖຕາຍາ’’ຕິ ເອເຕນ ວິຎ຺ຎາຓສ຺ສ ເອກນ຺ຕສາຣມ຺ມຓຕາທສ຺ສເນນ ‘‘ອາຣມ຺ມເຓນ ວິນາ ສຍເມວ ນີລາທິອາຠາສໍ ຈິຕ຺ຕໍ ປວຕ຺ຕຕີ’’ຕິ ເອວໍ ປວຕ຺ຕິຕໍ ວິຎ຺ຎາຓວາທໍ ປຏິເສເຘຕິ.

໑໘໔. ເອກນານາສນ຺ຕານຄຕານນ຺ຕິ ເອກສນ຺ຕານຄຕານໍ ອຠິນ຺ນສນ຺ຕານຄຕານໍ ທ຺ວາຣານໍ, ນານາສນ຺ຕານຄຕານໍ ຠິນ຺ນສນ຺ຕານຄຕານໍ ອາຣມ຺ມຓານນ຺ຕິ ໂຍຊນາ. ເອກນານາຊາຕິກຕ຺ຕາຕິ ຈກ຺ຂາທິເອເກກຊາຕິກຕ຺ຕາ ທ຺ວາຣານໍ, ນີລາທິອເນກຊາຕິກຕ຺ຕາ ອາຣມ຺ມຓານໍ.

ຈກ຺ຂາທິ ເອກມ຺ປິ ວິຎ຺ຎາຓສ຺ສ ປຈ຺ຈໂຍ ໂຫຕິ, ຣູປາທິ ປນ ອເນກເມວ ສໍຫຕນ຺ຕິ ອິມສ຺ສ ວາ ອຕ຺ຖວິເສສສ຺ສ ທສ຺ສນຕ຺ຖໍ ຈກ຺ຂຸຣູປາທີສຸ ວຈນເຠໂທ ກໂຕ. ກິໍ ປນ ກາຣຓໍ ຈກ຺ຂາທິ ເອກມ຺ປິ ວິຎ຺ຎາຓສ຺ສ ປຈ຺ຈໂຍ ໂຫຕິ, ຣູປາທິ ປນ ອເນກເມວາຕິ? ປຈ຺ຈຍຠາວວິເສສໂຕ. ຈກ຺ຂຸ ຫິ ຈກ຺ຂຸວິຎ຺ຎາຓສ຺ສ ນິສ຺ສຍປຸເຣຊາຕອິນ຺ທ຺ຣິຍວິປ຺ປຍຸຕ຺ຕປຈ຺ຈເຍຫິ ປຈ຺ຈໂຍ ໂຫນ຺ຕໍ ອຕ຺ຖິຠາເວເນວ ໂຫຕິ ຕສ຺ມິໍ ສຕິ ຕສ຺ສ ຠາວໂຕ, ອສຕິ ອຠາວໂຕ, ຍໂຕ ຕໍ ອຕ຺ຖິອວິຄຕປຈ຺ຈເຍຫິສ຺ສ ປຈ຺ຈໂຍ ໂຫຕີຕິ ວຸຈ຺ຈຕີຕິ. ຕໍນິສ຺ສຍຕາ ຈສ຺ສ ນ ເອກເທເສນ ອລ຺ລີຍນວເສນ ອິຈ຺ຉິຕພ຺ພາ ອຣູປຠາວໂຕ, ອຖ ໂຂ ຄຣຸຣາຊາທີສຸ ສິສ຺ສຣາຊປຸຣິສາທີນໍ ວິຍ ຕປ຺ປຏິພທ຺ຘວຸຕ຺ຕິຕາຍ. ອິຕເຣ ຈ ປຈ຺ຈຍາ ເຕນ ເຕນ ວິເສເສນ ເວທິຕພ຺ພາ. ສ຺ວາຍໍ ປຈ຺ຈຍຠາໂວ ນ ເອກສ຺ມິໍ ນ ສມ຺ຠວຕີຕິ ເອກມ຺ປິ ຈກ຺ຂຸ ຈກ຺ຂຸວິຎ຺ຎາຓສ຺ສ ປຈ຺ຈໂຍ ໂຫຕີຕິ ທສ຺ເສຕຸໍ ປາຬິຍໍ ‘‘ຈກ຺ຂຸຎ຺ຈ ປຏິຈ຺ຈາ’’ຕິ ເອກວຈນນິທ຺ເທໂສ ກໂຕ.

ຣູປໍ ປນ ຍທິປິ ຈກ຺ຂຸ ວິຍ ປຸເຣຊາຕອຕ຺ຖິອວິຄຕປຈ຺ຈເຍຫິ ປຈ຺ຈໂຍ ໂຫຕິ ປຸເຣຕຣໍ ອຸປ຺ປນ຺ນໍ ຫຸຕ຺ວາ ວິຊ຺ຊມານກ຺ຂເຓເຍວ ອຸປກາຣກຕ຺ຕາ, ຕຖາປິ ອເນກເມວ ສໍຫຕໍ ຫຸຕ຺ວາ ປຈ຺ຈໂຍ ໂຫຕິ ອາຣມ຺ມຓຠາວໂຕ. ຍຎ຺ຫິ ປຈ຺ຈຍຘມ຺ມໍ ສຠາວຠູຕໍ, ປຣິກປ຺ປິຕາກາຣມຕ຺ຕໍ ວາ ວິຎ຺ຎາຓໍ ວິຠາເວນ຺ຕໍ ປວຕ຺ຕຕິ, ຕທຎ຺ເຎສຎ຺ຈ ສຕິປິ ປຈ຺ຈຍຠາເວ ໂສ ຕສ຺ສ ສາຣມ຺ມຓສຠາວໂຕ ຍໍ ກິຎ຺ຈິ ອນາລມ຺ພິຕ຺ວາ ປວຕ຺ຕິຕຸໍ ອສມຕ຺ຖສ຺ສ ໂອລຸພ຺ຠ ປວຕ຺ຕິກາຣຓຕາຍ ອາລມ຺ພນີຍໂຕ ອາຣມ຺ມຓໍ ນາມ. ຕສ຺ສ ຍສ຺ມາ ຍຖາ ຍຖາ ສຠາວູປລທ຺ຘິ ວິຎ຺ຎາຓສ຺ສ ອາຣມ຺ມຓປຈ຺ຈຍລາໂຠ, ຕສ຺ມາ ຈກ຺ຂຸວິຎ຺ຎາຓໍ ຣູປໍ ອາຣພ຺ຠ ປວຕ຺ຕມານໍ ຕສ຺ສ ສຠາວໍ ວິຠາເວນ຺ຕເມວ ປວຕ຺ຕຕິ. ສາ ຈສ຺ສ ອິນ຺ທ຺ຣິຍາຘີນວຸຕ຺ຕິກສ຺ສ ອາຣມ຺ມຓສຠາວູປລທ຺ຘິ ນ ເອກທ຺ວິກລາປຄຕວຓ຺ຓວເສເນວ ໂຫຕິ, ນາປິ ກຕິປຍກລາປວຓ຺ຓວເສນ, ອຖ ໂຂ ອາໂຠຄານຸຣູປໍ ອາປາຖຄຕວຓ຺ຓວເສນາຕິ ອເນກເມວ ຣູປໍ ສໍຫຈ຺ຈກາຣິຕາຍ ວິຎ຺ຎາຓສ຺ສ ປຈ຺ຈໂຍ ໂຫຕີຕິ ທສ຺ເສນ຺ໂຕ ຠຄວາ ‘‘ຣູເປ ຈາ’’ຕິ ພຫຸວຈເນນ ນິທ຺ທິສິ.

ຍໍ ປນ ‘‘ຣູປາຍຕນໍ ຈກ຺ຂຸວິຎ຺ຎາຓຘາຕຸຍາ, ຕໍສມ຺ປຍຸຕ຺ຕການຎ຺ຈ ຘມ຺ມານໍ ອາຣມ຺ມຓປຈ຺ຈເຍນ ປຈ຺ຈໂຍ’’ຕິ (ປຏ຺ຐາ. ໑.໑.໑) ວຸຕ຺ຕໍ, ຕໍ ກຖນ຺ຕິ? ຕມ຺ປິ ຍາທິສໍ ຣູປາຍຕນໍ ຈກ຺ຂຸວິຎ຺ຎາຓສ຺ສ ອາຣມ຺ມຓປຈ຺ຈໂຍ, ຕາທິສເມວ ສນ຺ຘາຍ ວຸຕ຺ຕໍ. ກີທິສໍ ປນ ຕນ຺ຕິ? ສມຸທິຕນ຺ຕິ ປາກໂຏຍມຕ຺ໂຖ. ເອວຎ຺ຈ ກຕ຺ວາ ຍເທເກ ວທນ຺ຕິ ‘‘ອາຍຕນສລ຺ລກ຺ຂຓວເສນ ຈກ຺ຂຸວິຎ຺ຎາຓາທໂຍ ສລ຺ລກ຺ຂຓາຣມ຺ມຓາ, ນ ທພ຺ຍສລ຺ລກ຺ຂຓວເສນາ’’ຕິ, ຕໍ ຍຸຕ຺ຕເມວ ໂຫຕິ. ນ ເຈຕ຺ຖ ສມຸທາຍາຣມ຺ມຓຕາ ອາສງ຺ກິຕພ຺ພາ ສມຸທາຍາໂຠຄສ຺ເສວ ອຠາວໂຕ, ສມຸທິຕາ ປນ ວຓ຺ຓຘມ຺ມາ ອາຣມ຺ມຓປຈ຺ຈຍາ ໂຫນ຺ຕິ. ກຖໍ ປນ ປຈ຺ເຈກໍ ອສມຕ຺ຖາ ສມຸທິຕາ ອາຣມ຺ມຓາ ໂຫນ຺ຕິ, ນ ຫິ ປຈ຺ເຈກໍ ທຏ຺ຐຸໍ ອສກ຺ໂກນ຺ຕາ ອນ຺ຘາ ສມຸທິຕາ ປສ຺ສນ຺ຕີຕິ? ນຍິທເມກນ຺ຕິກໍ ວິສຸໍ ອສມຕ຺ຖານໍ ສິວິກາວຫນາທີສຸ ສມຕ຺ຖຕາຍ ທສ຺ສນໂຕ. ເກສາທີນຎ຺ຈ ຍສ຺ມິໍ ຐາເນ ຐິຕານໍ ປຈ຺ເຈກໍ ວຓ຺ຓໍ ຄເຫຕຸໍ ນ ສກ຺ກາ, ຕສ຺ມິໍເຍວ ຐາເນ ສມຸທິຕານໍ ຕໍ ຄເຫຕຸໍ ສກ຺ກາຕິ ຠິຍ຺ໂຍປິ ເຕສໍ ສໍຫຈ຺ຈກາຣິຕາ ປຣິພ຺ຍຕ຺ຕາ. ເອເຕນ ກິໍ ຈກ຺ຂຸວິຎ຺ຎາຓສ຺ສ ປຣມາຓຸຣູປໍ ອາຣມ຺ມຓໍ, ອຸທາຫຸ ຕໍສມຸທາໂຍຕິອາທິກາ ໂຈທນາ ປຏິກ຺ຂິຕ຺ຕາ ເວທິຕພ຺ພາ. ‘‘ໂສຕຎ຺ຈ ປຏິຈ຺ຈ ສທ຺ເທ ຈາ’’ຕິອາທີສຸປິ ອຍເມວ ນໂຍ.

ເອວມ຺ປິ ອຕ຺ໂຖ ລພ຺ຠຕີຕິ ‘‘ມໂນຘາຕຸຍາປີ’’ຕິ ປິ-ສທ຺ເທນ ນ ເກວລໍ ຊວນປຣິໂຍສານາ ມໂນວິຎ຺ຎາຓຘາຕຸເຍວ ສມ຺ປິຓ຺ຑີຍຕິ, ອຖ ໂຂ ຕທາຣມ຺ມຓຠວງ຺ຄສງ຺ຂາຕາປິ ສມ຺ປິຓ຺ຑີຍຕີຕິ ເອວມ຺ປິ ອຕ຺ໂຖ ລພ຺ຠຕິ, ສມ຺ຠວຕີຕິ ອຕ຺ໂຖ. ເອວໍ ສຕີຕິ ເອວໍ ອຎ຺ຎມໂນຘາຕຸປ຺ປວຕ຺ຕິຍາ ໂອຣໍ ປວຕ຺ຕຈິຕ຺ຕານໍ ມໂນວິຎ຺ຎາຓຘາຕຸຕາທສ຺ສເນ ສຕິ. ສຕິປິ ມນໂສ ສມ຺ຠູຕຠາເວ ມໂນຘາຕຸຍາ ມໂນວິຎ຺ຎາຓຘາຕຸຠາວປ຺ປສງ຺ໂຄ ນ ໂຫຕິເຍວ ຕໍສຠາວສ຺ເສວ ມໂນວິຎ຺ຎາຓຘາຕຸຠາເວນ ນິທ຺ທິຏ຺ຐຕ຺ຕາ. ອິທານິ ຕເມວຕ຺ຖໍ ‘‘ປຎ຺ຈວິຎ຺ຎາຓຘາຕຸມໂນຘາຕູ’’ຕິອາທິນາ ປາກຏຕຣໍ ກໂຣຕິ. ຕພ຺ພິຘຸຣສຠາເວນາຕິ ປຎ຺ຈວິຎ຺ຎາຓຘາຕູຫິ ວິສທິສສຠາເວນ. ອຸປ຺ປຕ຺ຕິຏ຺ຐາເນນ ຈາຕິ ມໂນຘາຕຸກິຣິຍມໂນວິຎ຺ຎາຓຘາຕຸອາທີຫິ ປຣິຈ຺ຉິນ຺ເນນ ອຸປ຺ປຊ຺ຊນຏ຺ຐາເນນ ຈ. ອິທານິ ເອກຕ຺ຕຄ຺ຄຫຓໍ ວິນາປິ ຍຖາວຸຕ຺ຕສ຺ສ ອຕ຺ຖສ຺ສ ສມ຺ຠວໍ ທສ຺ເສຕຸໍ ‘‘ອນຸປນີເຕປີ’’ຕິອາທິ ວຸຕ຺ຕໍ. ຕຕ຺ຖ ສາມຎ຺ຎວເສນາຕິ ສທິສຕາວເສນ. ຕສ຺ສາຕິ ຠວງ຺ຄານນ຺ຕຣໍ ອຸປ຺ປນ຺ນຈິຕ຺ຕສ຺ສ. ອມໂນວິຎ຺ຎາຓຘາຕຸຠາວາສິທ຺ຘິໂຕຕິ ມໂນຘາຕຸຠາວາສິທ຺ຘິໂຕ. ນ ຫິ ‘‘ມໂນວິຎ຺ຎາຓຘາຕຸຍາປິ ອຸປ຺ປຊ຺ຊິຕ຺ວາ ນິຣຸທ຺ຘສມນນ຺ຕຣໍ ອຸປ຺ປຊ຺ຊຕິ ຈິຕ຺ຕໍ…ເປ… ຕຊ຺ຊາ ມໂນວິຎ຺ຎາຓຘາຕູ’’ຕິ ອິທໍ ວຈນໍ ຠວງ຺ຄານນ຺ຕຣໍ ອຸປ຺ປນ຺ນຈິຕ຺ຕສ຺ສ ມໂນຘາຕຸຠາວໍ ສາເຘຕິ. ສິທ຺ເຘ ຫິ ມໂນຘາຕຸຠາເວ ຕໍ ຕສ຺ສ ນິວຕ຺ຕກໍ ສິຍາຕິ ອຘິປ຺ປາໂຍ. ມໂນວິຎ຺ຎາຓຘາຕຸຍາ ປນ ອຸປ຺ປນ຺ນສ຺ສ ຈິຕ຺ຕສ຺ສ ມໂນວິຎ຺ຎາຓຘາຕຸຠາວທີປກໍ ວຈນໍ ຕາທິສາຍ ມໂນຘາຕຸຍາປິ ມໂນວິຎ຺ຎາຓຘາຕຸຠາວເມວ ທີເປຍ຺ຍາຕິ ກຖໍ ຕສ຺ສາ ນິວຕ຺ຕກໍ ສິຍາຕິ ອາຫ ‘‘ນ ຫິ ຍໍ ໂຈທີຍຕິ, ຕເທວ ປຣິຫາຣາຍ ໂຫຕີ’’ຕິ.

ຍທິ ເອວໍ ປຎ຺ຈທ຺ວາຣາວຊ຺ຊນສ຺ສ ມໂນວິຎ຺ຎາຓຘາຕຸຠາວາປຕ຺ຕິ ເອວາຕິ ໂຈທນໍ ມນສິ ກຕ຺ວາ ອາຫ ‘‘ມໂນຘາຕຸຍາປີ’’ຕິອາທິ. ປຎ຺ຈວິຎ຺ຎາເຓຫິ ມໂນຘາຕູຫິ ຈ ວິສິຏ຺ໂຐ ສຠາໂວ ປຎ຺ຈວິຎ຺ຎາຓ…ເປ… ສຠາໂວ, ຕສ຺ສ ວເສນ. ຈຸຕິປຏິສນ຺ຘິຠວງ຺ຄານນ຺ຕິ ຕທາຣມ຺ມຓມ຺ປິ ຠວງ຺ຄນ຺ໂຕຄຘໍ ກຕ຺ວາ ວຸຕ຺ຕໍ. ຊວນາວສານານີຕິ ວາ ຊວນາຣມ຺ມຓຕ຺ຕາ ຕທາຣມ຺ມຓມ຺ປິ ຄຫິຕໍ ທຏ຺ຐພ຺ພໍ. ເຕເນວາຫ ‘‘ຉທ຺ວາຣິກຈິຕ຺ເຕຫິ ວາ’’ຕິອາທິ.

ວິສຸໍ ກາຕຸໍ ຍຸຕ຺ຕນ຺ຕິ ອາວຊ຺ຊນມ຺ປິ ຍທິປິ ຣູປາທິວິສຍໍ ໂຫຕິ, ຊວນໍ ວິຍ ອາຣມ຺ມຓຣສານຸຠວນໍ ປນ ນ ໂຫຕີຕິ ເອທິເສ ຐາເນ ວິສຸໍ ກາຕພ຺ພເມວ. ມໂນ ຈາຕິ ຈ-ສທ຺ໂທ ‘‘ມນຎ຺ຈ ປຏິຈ຺ຈາ’’ຕິອາທີສຸ ວິຍ ນ ສມ຺ປິຓ຺ຑນຕ຺ໂຖ, ອຖ ໂຂ ພ຺ຍຕິເຣກຕ຺ໂຖ ທຏ຺ຐພ຺ໂພ.

ອຠິຘມ຺ມຠາຊນີຍວຓ຺ຓນາ ນິຏ຺ຐິຕາ.