໒. ອຠິຘມ຺ມຠາຊນີຍວຓ຺ຓນາ

໑໕໕. ປຈ຺ຈຍຍຸຄຬວເສນາຕິ ອຊ຺ຌຕ຺ຕິກພາຫິຣປຈ຺ຈຍທ຺ວຍວເສນ. ອຊ຺ຌຕ຺ຕິກພາຫິຣວເສນ ອພ຺ໂພກາຣໂຕຕິ ອຊ຺ຌຕ຺ຕິກວເສນ ເຈວ ພາຫິຣວເສນ ຈ ອສງ຺ກຣໂຕ.

໑໖໗. ວິສງ຺ຂາຣນິນ຺ນສ຺ສາຕິ ນິພ຺ພານໂປຓສ຺ສ. ວິນິມຸຕ຺ຕສງ຺ຂາຣສ຺ສາຕິ ສມຸຈ຺ເຉທປຏິປສ຺ສທ຺ຘິວິມຸຕ຺ຕີຫິ ສມຸເຂນ, ຕປ຺ປຏິພທ຺ຘຉນ຺ທຣາຄປ຺ປຫາເນນ ຈ ສຸຏ຺ຐຸ ວິນິມຸຕ຺ຕສງ຺ຂາຣສ຺ສ ປຣມສ຺ສາສຠາເວນ, ຄຕິຠາເວນ ຈ ປຕິຏ຺ຐານຠູເຕ. ‘‘ນິພ຺ພານໍ ອຣຫໂຕ ຄຕີ’’ຕິ (ປຏິ. ໓໓໙) ຫິ ວຸຕ຺ຕໍ. ຐິຕິຠາເວນາຕິ ຈ ປາໂຐ. ຕໍສຈ຺ຉິກຣຓາຠາເວຕິ ຕສ຺ສ ນິພ຺ພານສ຺ສ ສຈ຺ຉິກຣຓາຠາເວ. ນີໂຕຕິ ປາປິໂຕ, ປກາສິໂຕຕິ ອຕ຺ໂຖ.

ຈຸຓ຺ຓິຕນ຺ຕິ ເຠທິຕໍ. ຕ຺ວເມວ ກິໍ ນ ຊານາສີຕິ ກິໍ ຕ຺ວໍ ນ ຊານາສິເຍວາຕິ ອຕ຺ໂຖ. ‘‘ກິໍ ຕ຺ວໍ ເອກໍ ນານໍ ຊານາສິ, ກິໍ ຕ຺ວໍ ນ ຊານາສິ ເອວາ’’ຕິ ເອວໍ ວິກ຺ເຂປໍ ກໂຣນ຺ຕໍ ປຣວາທິໍ ‘‘ນນຸ ຎາເຕ’’ຕິອາທິນາ ສກວາທີ ນິພນ຺ຘຕິ. ວິຠຊິຕ຺ວາຕິ ‘‘ຣາຄາທີນໍ ຂີຓນ຺ເຕ ອຸປ຺ປນ຺ນຕ຺ຕາ’’ຕິ ຠາວຕ຺ຖໍ ວິຠຊິຕ຺ວາ. ຣາຄາທີນໍ ຂຍາ ນ ໂຫນ຺ຕີຕິ ໂຍຊນາ. ສສຠາວຕາ ຈ ນິພ຺ພານສ຺ສ ອາປນ຺ນາ ໂຫຕີຕິ ສມ຺ພນ຺ໂຘ.

ນິພ຺ພານາຣມ຺ມຓກຣເຓນ ກາຣຓຠູເຕນ. ເຫຕຸອຕ຺ເຖ ຫິ ອິທໍ ກຣຓວຈນໍ. ກິເລສກ຺ຂຍມຕ຺ຕຕໍ ວາ ນິພ຺ພານສ຺ສ ອິຈ຺ຉໂຕ ກິເລສກ຺ຂເຍນ ຠວິຕພ຺ພນ຺ຕິ ໂຍຊນາ.

ເອວໍ ກິເລສກ຺ຂຍມຕ຺ເຕ ນິພ຺ພາເນ ເຂເປຕພ຺ພາ ກິເລສາ ພຫຸວິຘາ ນານປ຺ປກາຣາ, ມຄ຺ໂຄ ຈ ໂອຘິໂສ ກິເລເສ ເຂເປຕິ. ສ຺ວາຍໍ ‘‘ກຕມໍ ກິເລສກ຺ຂຍໍ ນິພ຺ພານໍ ອາຣມ຺ມຓໍ ກຕ຺ວາ ກຕເມ ກິເລເສ ເຂເປຕີ’’ຕິ ປຸຣິມປຸຈ຺ຉາທ຺ວຍເມວ ວທຕິ. ຕເທວາຕິ ຍໍ ‘‘ອວິຊ຺ຊາຕຓ຺ຫານໍ ກິຎ຺ຈິ ເອກເທສມຕ຺ຕມ຺ປີ’’ຕິ ວຸຕ຺ຕໍ, ຕເທວ.

ເອຕ຺ຖ ຈ ຍາຍໍ ‘‘ກິເລສກ຺ຂໂຍວ ນິພ຺ພານ’’ນ຺ຕິ ນິພ຺ພານສ຺ສ ອຠາວຕາໂຈທນາ, ຕຕ຺ຣາຍໍ ອາຄມໂຕ ຍຸຕ຺ຕິໂຕ ຈສ຺ສ ຠາວາຠາວວິຠາວນາ. ຕຎ຺ຫິ ຠຄວຕາ –

‘‘ອຕ຺ຖິ, ຠິກ຺ຂເວ, ອຊາຕໍ ອຠູຕໍ ອກຕໍ ອສງ຺ຂຕ’’ນ຺ຕິ (ອຸທາ. ໗໓; ອິຕິວຸ. ໔໓).

‘‘ອຕ຺ຖິ, ຠິກ຺ຂເວ, ຕທາຍຕນໍ, ຍຕ຺ຖ ເນວ ປຖວີ ນ ອາໂປ ນ ເຕໂຊ ນ ວາໂຍ’’ຕິ (ອຸທາ. ໗໑) –

ຈ ອາທິນາ, ຕຖາ –

‘‘ຄມ຺ຠີໂຣ ທຸທ຺ທໂສ ທຸຣນຸໂພໂຘ ສນ຺ໂຕ ປຓີໂຕ ອຕກ຺ກາວຈໂຣ ນິປຸໂຓ ປຓ຺ຑິຕເວທນີໂຍ’’ຕິ (ມ. ນິ. ໒.໓໓໗; ສໍ. ນິ. ໑.໑໗໒; ມຫາວ. ໗-໘) –

‘‘ອສງ຺ຂຕຎ຺ຈ ໂວ, ຠິກ຺ຂເວ, ເທເສສ຺ສາມິ ອສງ຺ຂຕຄາມິນິຎ຺ຈ ປຏິປທໍ, ອນຕໍ, ອນາສວໍ, ສຈ຺ຈໍ, ປາຣໍ, ນິປຸຓໍ, ສຸທຸທ຺ທສໍ, ອຊຊ຺ຊຣໍ, ຘຸວໍ, ອປໂລກິຕໍ, ອນິທສ຺ສນໍ, ນິປ຺ປປຎ຺ຈໍ, ສນ຺ຕໍ, ອມຕໍ, ປຓີຕໍ, ສິວໍ, ເຂມໍ, ຕຓ຺ຫາກ຺ຂຍໍ, ອຈ຺ຉຣິຍໍ, ອພ຺ຠຸຕໍ, ອນີຕິກໍ, ອນີຕິກຘມ຺ມໍ, ນິພ຺ພານໍ, ອພ຺ຍາພຊ຺ຌໍ, ວິຣາຄໍ, ສຸທ຺ຘິໍ, ມຸຕ຺ຕິໍ, ອນາລຍໍ, ທີປໍ, ເລຓໍ, ຕາຓໍ, ສຣຓໍ, ປຣາຍຓຎ຺ຈ ໂວ, ຠິກ຺ຂເວ, ເທເສສ຺ສາມິ ປຣາຍຓຄາມິນິຎ຺ຈ ປຏິປທ’’ນ຺ຕິ (ສໍ. ນິ. ໔.໓໗໗) –

ເອວມາທີຫິ ຈ ສຸຕ຺ຕປເທຫິ ‘‘ອປ຺ປຈ຺ຈຍາ ຘມ຺ມາ, ອສງ຺ຂຕາ ຘມ຺ມາ (ຘ. ສ. ທຸກມາຕິກາ ໗), ສພ຺ພຎ຺ຈ ຣູປໍ ອສງ຺ຂຕາ ຈ ຘາຕູ’’ຕິອາທີຫິ (ຘ. ສ. ໑໑໙໒, ໑໑໙໘, ໑໒໐໐) ອຠິຘມ຺ມປເທເສຫິ ຈ ປຣມຕ຺ຖຠາເວເນວ ເທສິຕໍ. ນ ຫິ ສຠາວວິຣຫິຕສ຺ສ ອຠາວມຕ຺ຕສ຺ສ ຄມ຺ຠີຣາສງ຺ຂຕາທິຠາໂວ ອພ຺ຍາກຕຘມ຺ມາທິຠາໂວ ຈ ຍຸຕ຺ໂຕ, ວຸຕ຺ໂຕ ຈ ໂສ. ຕສ຺ມາ ນ ອຠາວມຕ຺ຕໍ ນິພ຺ພານໍ.

ອປິ ຈາຍໍ ອຠາວວາທີ ເອວໍ ປຸຈ຺ຉິຕພ຺ໂພ – ຍທິ ກິເລສາຠາໂວ ນິພ຺ພານໍ, ສ຺ວາຍມຠາໂວ ເອໂກ ວາ ສິຍາ ອເນໂກ ວາ? ຍທິ ເອໂກ, ເອເກເນວ ມຄ຺ເຄນ ກໂຕ ສຈ຺ຉິກໂຕ ຈ ໂຫຕີຕິ ອຸປຣິມານໍ ມຄ຺ຄານໍ ນິຣຕ຺ຖກຕາ ອາປຊ຺ຊຕິ. ນ ຫິ ເອກໍ ອເນເກຫິ ກມ຺ມປ຺ປວຕ຺ເຕຫິ ສາເຘຕພ຺ພໍ ທິຏ຺ຐໍ. ອຖ ສິຍາ ເອໂກວ ໂສ ກິເລສາຠາໂວ, ນ ປນ ມຄ຺ເຄຫິ ກາຕພ຺ໂພ, ອຖ ໂຂ ສຈ຺ຉິກາຕພ຺ໂພຕິ. ເອວໍ ສຕິ ສຸຏ຺ຐຸຕຣໍ ມຄ຺ຄສ຺ສ ນິຣຕ຺ຖກຕາ ອາປຊ຺ຊຕິ ກິເລສານໍ ອປ຺ປຫານໂຕ. ອກໂຣນ຺ໂຕ ຈ ມຄ຺ໂຄ ກິເລສາຠາວໍ ຕສ຺ສ ສຈ຺ຉິກິຣິຍາຍ ກມຕ຺ຖໍ ສາເຘຍ຺ຍ, ອຖ ມຄ຺ຄານໍ ສໍໂຍຊນຕ຺ຕຍປ຺ປຫານາທິປຏິນິຍຕກິຈ຺ຈຕາຍ ປຫາຍກວິຠາເຄນ ກິເລສາຠາວເຠໂທ, ເອວໍ ສຕິ ວິນາ ສຠາວເຠທໍ ພຫຸຠາໂວ ນຕ຺ຖີຕິ ພຫຸຠາວຕາປເທເສນສ຺ສ ສສຠາວຕາ ອາປນ຺ນາ. ອຖາປິ ສິຍາ ‘‘ເຍສໍ ອຠາໂວ, ເຕສໍ ພຫຸຠາເວນ ພຫຸຠາໂວປຈາໂຣ’’ຕິ, ເອວໍ ສຕິ ເຍສໍ ອຠາໂວ, ເຕສໍ ສຠາວຕາຍ ສສຠາໂວປຈາໂຣປິ ສິຍາ. ຕຖາ ເຕສໍ ກິເລສສງ຺ຂຕາທິຕາຍ ກິເລສສງ຺ຂຕາທິຠາວາ ຈ ສິຍຸໍ, ນ ເຈຕໍ ຍຸຕ຺ຕນ຺ຕິ ນ ເຕສໍ ພຫຸຠາໂວປຈາໂຣ ຍຸຕ຺ໂຕ. ເອກຠາໂວປິ ຈສ຺ສ ອສຠາວຕາຍ ເອວ ວຕ຺ຕຸໍ ນ ສກ຺ກາຕິ ເຈ? ນ, ອຠາວສາມຎ຺ຎໂຕ, ອຠາວສາມຎ຺ເຎນ ອເຠທສມຎ຺ຎາຍ ເອກຕ຺ຕນິທ຺ເທໂສ. ສຕິ ຈ ເອກຕ຺ເຕ ປຸພ຺ເພ ວຸຕ຺ຕໂທສານຕິວຕ຺ຕິ.

ພຫຸຠາເວ ຈ ສສຠາວຕາ ສິທ຺ຘາ. ຍທິປິ ສິຍາ ຍຖາ ພຫຸຠາໂວ ສສຠາວຕໍ, ເອວໍ ສາມຎ຺ເຎນ ສສຠາວຕາ ພຫຸຠາວໍ ນ ພ຺ຍຠິຈເຣຍ຺ຍາຕິ ສສຠາວປກ຺ເຂປິ ນິພ຺ພານສ຺ສ ພຫຸຠາໂວ ອາປຊ຺ຊຕີຕິ? ຕໍ ນ, ກສ຺ມາ? ຕຖາ ສາມຎ຺ຎາເຠທໂຕ. ນ ຫິ ເອວໍ ວຕ຺ຕຸໍ ລພ຺ຠາ ຍຖາ ຂຣຠາໂວ ສສຠາວຕໍ ນ ພ຺ຍຠິຈຣຕິ, ເອວໍ ສສຠາວຕາປິ ຂຣຠາວໍ ນ ພ຺ຍຠິຈເຣຍ຺ຍາຕິ. ເອວຎ຺ຫິ ສຕິ ຕທຎ຺ຎສພ຺ພຘມ຺ມາຠາວປ຺ປສງ຺ໂຄ ສິຍາ, ຕສ຺ມາ ພຫຸຠາໂວ ສສຠາວຕາເປກ຺ໂຂ, ນ ສສຠາວຕາ ພຫຸຠາວາເປກ຺ຂາຕິ ນ ສສຠາວສ຺ສ ນິພ຺ພານສ຺ສ ພຫຸຠາວາປຕ຺ຕິ. ‘‘ເອກຎ຺ຫິ ສຈ຺ຈໍ ນ ທຸຕີຍມຕ຺ຖິ (ສຸ. ນິ. ໘໙໐; ມຫານິ. ໑໑໙), ເອກາ ນິຏ຺ຐາ ນ ປຸຖຸນິຏ຺ຐາ’’ຕິອາທິວຈນໂຕ.

ອປິ ເຈຕ຺ຖ ກິເລສາຠາໂວ ນາມ ຣາຄາທີນໍ ສມຸຈ຺ເຉໂທ ອຈ຺ຈນ຺ຕປ຺ປຫານໍ ອນຸປ຺ປາທນິໂຣໂຘ. ຕສ຺ສ ຈ ເອກຕ຺ເຕ ເອເກເນວ ມຄ຺ເຄນ ສາເຘຕພ຺ພຕາ ກິຈ຺ຈວິເສສາຠາວໂຕຕິ ທສ຺ສນາທິມຄ຺ຄວິຠາໂຄ ນ ສິຍາ. ອິຈ຺ຉິໂຕ ຈ ໂສ ໂອຘິໂສວ ກິເລສານໍ ປຫາຕພ຺ພຕ຺ຕາ. ໂສ ຈ ມຄ຺ຄວິຠາໂຄ ສທ຺ຘາທີນໍ ອິນ຺ທ຺ຣິຍານໍ ນາຕິຕິກ຺ຂຕິກ຺ຂຕິກ຺ຂຕຣຕິກ຺ຂຕມຠາເວນ ເອກສ຺ມິມ຺ປິ ສມຸຈ຺ເຉທປ຺ປຫານໂຍຄ຺ຍຠາເວ ສຈ຺ຉິກິຣິຍາວິເສເສນ ໂຫຕີຕິ ນິພ຺ພານສ຺ສ ສສຠາວຕາຍເຍວ ຍຸຕ຺ໂຕ. ອຠາໂວ ປນ ກິເລສານໍ ມຄ຺ເຄນ ກາຕພ຺ໂພ ສິຍາ ‘‘ມາ ມຄ຺ຄສ຺ສ ນິຣຕ຺ຖກຕາ ອໂຫສີ’’ຕິ, ນ ສຈ຺ຉິກາຕພ຺ໂພ. ໂກ ຫິ ຕສ຺ສ ສຠາໂວ, ໂຍ ເຕນ ສຈ຺ຉິກຣິເຍຍ຺ຍ. ໂສ ຈ ກິເລສາຠາໂວ ເອເກເນວ ມຄ຺ເຄນ ສາເຘຕພ຺ໂພ ສິຍາ, ນ ຈຕູຫິ ‘‘ມາ ຈຕຸຠາວນິພ຺ພານຕາປຕ຺ຕິ, ນິພ຺ພານວິເສສາປຕ຺ຕິ ຈ ອໂຫສີ’’ຕິ. ຕໂຕ ທສ຺ສນາທິມຄ຺ຄວິຠາໂຄ ນ ສິຍາຕິ ສພ຺ພໍ ອາວຕ຺ຕຕິ.

ຍທິ ຈ ອຠາໂວ ຠາວສ຺ສ ສິຍາຕິ ຕສ຺ສ ຠາວຘມ຺ມຕາ ອິຈ຺ຉິຕາ, ເອວໍ ສຕິ ຍຖາ ສງ຺ຂຕຘມ຺ມສ຺ສ ຕສ຺ສ ຊຣາມຣຓາທີນໍ ວິຍ ສງ຺ຂຕຘມ຺ມຕາປິ ອາປນ຺ນາ, ເອວໍ ພຫູນໍ ກິເລສານໍ ຘມ຺ມສ຺ສ ຕສ຺ສ ພຫຸຠາວາທິປ຺ປສງ຺ໂຄປິ ທຸນ຺ນິວາໂຣຕິ ອຕໍສຠາວສ຺ສ ອສງ຺ຂຕສ຺ເສກສ຺ສ ສສຠາວສ຺ສ ນິພ຺ພານຠາໂວ ເວທິຕພ຺ໂພ.

ຍທິ ເອວໍ ກສ຺ມາ ‘‘ຣາຄກ຺ຂໂຍ ໂທສກ຺ຂໂຍ ໂມຫກ຺ຂໂຍ’’ຕິ (ສໍ. ນິ. ໔.໓໑໕, ໓໓໐) ວຸຕ຺ຕນ຺ຕິ? ຂເຍນ ອຘິຄນ຺ຕພ຺ພຕ຺ຕາ. ຂໂຍ ຫິ ອຣິຍມຄ຺ໂຄ. ຍຖາຫ ‘‘ຂເຍ ຎາຓໍ, ອນຸປ຺ປາເທ ຎາຓ’’ນ຺ຕິ (ຘ. ສ. ທຸກມາຕິກາ ໑໔໒). ເຕນ ຣາຄາທິກ຺ຂຍປຣິຍາເຍນ ອຣິຍມຄ຺ເຄນ ອຘິຄນ຺ຕພ຺ພໂຕ ‘‘ປຣມຕ຺ຖໍ ຄມ຺ຠີຣໍ ນິປຸຓໍ ທຸທ຺ທສໍ ທຸຣນຸໂພຘໍ ນິພ຺ພານໍ ຣາຄາທິກ຺ຂໂຍ’’ຕິ ວຸຕ຺ຕໍ. ຣາຄາທິປ຺ປຫານມຸເຂນ ວາ ຕຖາ ປຕ຺ຕພ຺ພໂຕ, ຍຖາ ອຎ຺ຎຕ຺ຖາປິ ວຸຕ຺ຕໍ ‘‘ມທນິມ຺ມທ຺ທໂນ ປິປາສວິນໂຍ’’ຕິອາທິ (ອ. ນິ. ໔.໓໔; ອິຕິວຸ. ໙໐).

ອປິຈ ຍຖາ ປຣິຎ຺ເຎຍ຺ຍຕາຍ ສອຸຕ຺ຕຣານໍ ກາມານໍ ຣູປານຎ຺ຈ ປຏິປກ຺ຂຠູຕໍ ຕພ຺ພິຘຸຣສຠາວໍ ນິສ຺ສຣຓໍ ປຎ຺ຎາຍຕິ, ເອວໍ ສສຠາວານໍ ສພ຺ເພສມ຺ປິ ສງ຺ຂຕຘມ຺ມານໍ ປຏິປກ຺ຂຠູເຕນ ຕພ຺ພິຘຸຣສຠາເວນ ນິສ຺ສຣເຓນ ຠວິຕພ຺ພໍ. ຍຎ຺ຈ ຕນ຺ນິສ຺ສຣຓໍ, ສາ ອສງ຺ຂຕາ ຘາຕຸ. ກິຎ຺ຈ ຠິຍ຺ໂຍ – ສງ຺ຂຕຘມ຺ມາຣມ຺ມຓໍ ວິປສ຺ສນາຎາຓໍ ອປິ ອນຸໂລມຎາຓໍ ກິເລເສ ຕທງ຺ຄວເສນ ປຊຫຕິ, ນ ສມຸຈ຺ເຉທວເສນ ປຊຫິຕຸໍ ສກ຺ໂກຕິ. ຕຖາ ສມ຺ມຸຕິສຈ຺ຈາຣມ຺ມຓໍ ປຐມຊ຺ຌານາທີສຸ ຎາຓໍ ວິກ຺ຂມ຺ຠນວເສເນວ ກິເລເສ ປຊຫຕິ, ນ ສມຸຈ຺ເຉທວເສນ. ອິຕິ ສງ຺ຂຕຘມ຺ມາຣມ຺ມຓສ຺ສ, ສມ຺ມຸຕິສຈ຺ຈາຣມ຺ມຓສ຺ສ ຈ ຎາຓສ຺ສ ກິເລສານໍ ສມຸຈ຺ເຉທປ຺ປຫາເນ ອສມຕ຺ຖຠາວໂຕ ເຕສໍ ສມຸຈ຺ເຉທປ຺ປຫານກຣສ຺ສ ອຣິຍມຄ຺ຄຎາຓສ຺ສ ຕທຸຠຍວິປຣີຕສຠາເວນ ອາຣມ຺ມເຓນ ຠວິຕພ຺ພໍ, ສາ ອສງ຺ຂຕາ ຘາຕຸ. ຕຖາ ‘‘ອຕ຺ຖິ, ຠິກ຺ຂເວ, ອຊາຕໍ ອຠູຕໍ ອກຕໍ ອສງ຺ຂຕ’’ນ຺ຕິ (ອຸທາ. ໗໓; ອິຕິວຸ. ໔໓) ອິທໍ ນິພ຺ພານສ຺ສ ປຣມຕ຺ຖໂຕ ອຕ຺ຖິຠາວໂຊຕກໍ ວຈນໍ ອວິປຣີຕຕ຺ຖໍ ຠຄວຕາ ຠາສິຕຕ຺ຕາ. ຍຎ຺ຫິ ຠຄວຕາ ຠາສິຕໍ, ຕໍ ອວິປຣີຕຕ຺ຖໍ ຍຖາ ຕໍ ‘‘ສພ຺ເພ ສງ຺ຂາຣາ ອນິຈ຺ຈາ, ສພ຺ເພ ສງ຺ຂາຣາ ທຸກ຺ຂາ, ສພ຺ເພ ຘມ຺ມາ ອນຕ຺ຕາ’’ຕິ (ຘ. ປ. ໒໗໗-໒໗໙; ເຖຣຄາ. ໖໗໖-໖໗໘; ເນຕ຺ຕິ. ໕), ຕຖາ ນິພ຺ພານ-ສທ຺ໂທ ກຕ຺ຖຈິ ວິສເຍ ຍຖາຠູຕປຣມຕ຺ຖວິສໂຍ ອຸປຈາຣວຸຕ຺ຕິສພ຺ຠາວໂຕ ເສຍ຺ຍຖາປິ ສີຫ-ສທ຺ໂທ. ອຖ ວາ ອຕ຺ເຖວ ປຣມຕ຺ຖໂຕ ອສງ຺ຂຕາ ຘາຕຸ ອິຕຣຕພ຺ພິປຣີຕວິມຸຕ຺ຕິສຠາວຕ຺ຕາ ເສຍ຺ຍຖາປິ ‘‘ປຖວີຘາຕຸ ເວທນາ ຈາ’’ຕິ ເອວມາທີຫິ ນເຍຫິ ຍຸຕ຺ຕິໂຕປິ ອສງ຺ຂຕາຍ ຘາຕຸຍາ ປຣມຕ຺ຖໂຕ ອຕ຺ຖິຠາໂວ ເວທິຕພ຺ໂພ.

ອຠິຘມ຺ມຠາຊນີຍວຓ຺ຓນາ ນິຏ຺ຐິຕາ.