໓. ປຎ຺ຫປຸຈ຺ຉກວຓ຺ຓນາ

໗໔໗. ສພ຺ພຎາຓາຣມ຺ມຓຕາຍາຕິ ປຏິສມ຺ຠິທາປຏິສມ຺ຠິທາຎາຓາຣມ຺ມຓຕາຍ. ‘‘ສຸຕ຺ຕນ຺ຕຠາຊນີເຍ ປນ…ເປ… ສິຍາ’’ຕິ ອິທໍ ອຠິຘມ຺ມຠາຊນີເຍນ ວິຣຸຊ຺ຌຕິ, ຕສ຺ສ ວາ ສາວເສສເທສນຕາ ອາປຊ຺ຊຕີຕິ ໂຈທນໍ ມນສິ ກຕ຺ວາ ອາຫ ‘‘ອຠິຘມ຺ມຠາຊນີເຍ’’ຕິອາທິ. ນິຣວເສສກຖນນ຺ຕິ ອເສເສຕ຺ວາ ກຖນໍ. ເຕນ ຈິຕ຺ຕຸປ຺ປາທສງ຺ຄຫິເຕ ອຕ຺ເຖ ອເສເສຕ຺ວາ ເທສນາ ອິຘ ອຠິຘມ຺ມຠາຊນີຍສ຺ສ ຠາໂຣ, ນ ສພ຺ພເຎຍ຺ຍຘມ຺ເມຕິ ທສ຺ເສຕິ. ຍຖາທສ຺ສິຕວິສຍວຈນວເສນາຕິ ທສ຺ສິຕປ຺ປກາຣວິສຍສ຺ສ ກຖນວເສນ, ຘມ຺ມຕ຺ຖວເສນ ທສ຺ສິເຕ ຕໍຕໍຈິຕ຺ຕຸປ຺ປາເທ ຕຕ຺ຖ ຘມ຺ມນິຣຸຕ຺ຕາຠິລາເປນ ຎາຓສ຺ສ ກຖນວເສນາຕິ ອຕ຺ໂຖ. ອຎ຺ຎາຣມ຺ມຓຕໍ ນ ປຏິເສເຘຕິ ອຕປ຺ປຣຠາວໂຕຕິ ອຘິປ຺ປາໂຍ. ນ ນິຣວເສເສນ ກຖນໍ ອຈິຕ຺ຕຸປ຺ປາທປຣິຍາປນ຺ນສ຺ສ ວິສຍສ຺ສ ອກຖິຕຕ຺ຕາ. ເອວໍ ປຏິຠານປຏິສມ຺ຠິທາວິສຍສ຺ສາປິ ນ ນິຣວເສເສນ ກຖນນ຺ຕິ ສຸຕ຺ຕນ຺ຕຠາຊນີເຍ ອວິເສສວຈເນນ ສພ຺ພຎາຓາຣມ຺ມຓຕໍເຍວ ປຏິຠານປຏິສມ຺ຠິທາຍ ປຕິຏ຺ຐາເປຕິ. ຕຖາ ຕິສ຺ໂສ ປຏິສມ຺ຠິທາຕິອາທິປຎ຺ຫປຸຈ຺ຉກປາຬິຍາປິ. ຕິສ຺ໂສຕິ ອຕ຺ຖຘມ຺ມປຏິຠານປຏິສມ຺ຠິທາ. ນິຣຸຕ຺ຕິປຏິສມ຺ຠິທາ ຫິ ‘‘ປຣິຕ຺ຕາຣມ຺ມຓາ’’ເຕວ ວຸຕ຺ຕາ.

ຍທິປິ ສິຍາ ນ ຕສ຺ສາ ມຫຄ຺ຄຕາຣມ຺ມຓຕາຕິ ສມ຺ພນ຺ໂຘ. ‘‘ນ ຫິ ມຄ຺ໂຄ ປຈ຺ຈຍຸປ຺ປນ຺ໂນ ນ ໂຫຕີ’’ຕິ ອິມິນາ ‘‘ອຕ຺ຖປຏິສມ຺ຠິທາ ນ ມຄ຺ຄາຣມ຺ມຓາ’’ຕິ ວຈນສ຺ສ ຍຖາວຸຕ຺ຕຕ຺ຖສາຘກຕໍ ວິຠາເວຕິ. ຕສ຺ສາຕິ ປຏິຠານປຏິສມ຺ຠິທາຍ ນ ມຫຄ຺ຄຕາຣມ຺ມຓຕາ ສມ຺ຠວຕິ ນນຸ ນຍໍ ອນຸສ຺ສຣນ຺ຕສ຺ສາຕິ ອຘິປ຺ປາໂຍ. ທ຺ເວປີຕິ ‘‘ອຕ຺ຖປຏິສມ຺ຠິທາ ນ ມຄ຺ຄາຣມ຺ມຓາ, ຕິສ຺ໂສ ປຏິສມ຺ຠິທາ ສິຍາ ປຣິຕ຺ຕາຣມ຺ມຓາ, ສິຍາ ມຫຄ຺ຄຕາຣມ຺ມຓາ, ສິຍາ ອປ຺ປມາຓາຣມ຺ມຓາ’’ຕິ ຈ ທ຺ເວປິ ເອຕາ ປາຬິໂຍ. ຕາສຸ ພລວຕຣາຍ ຐານສ຺ສ, ອິຕຣາຍ ອຘິປ຺ປາຍມຄ຺ຄນສ຺ສ ຈ ອຸປາຍທສ຺ສນມຸເຂນ ຕາສໍ ອຎ຺ຎມຎ຺ຎໍ ອວິໂຣຘໍ ທສ຺ເສຕຸໍ ‘‘ກຸສລາກຸສລານໍ ປນາ’’ຕິອາທິມາຫ. ‘‘ນິປ຺ປຣິຍາຍາ ຕຕ຺ຖ ຘມ຺ມປຏິສມ຺ຠິທາ’’ຕິ ເອເຕນ ຕຕ຺ຖ ອຕ຺ຖປຏິສມ຺ຠິທາຍ ປຣິຍາຍຠາວມາຫ. ຕຖາ ວິປາກກິຣິຍານນ຺ຕິອາທິ ຍຖາຘິປ຺ເປຕສ຺ສ ອຕ຺ຖສ຺ສ ວິສທິສູທາຫຣຓທສ຺ສນໍ. ອຸຠເຍນປິ ‘‘ອຕ຺ຖປຏິສມ຺ຠິທາ ນ ມຄ຺ຄາຣມ຺ມຓາ’’ຕິ (ວິຠ. ໗໔໙) ວຈນໍ ສຸຕ຺ຕນ຺ຕນຍານຸຄຕໍ ນິປ຺ປຣິຍາຍຕ຺ຖສ຺ສ ຕຕ຺ຖ ອຘິປ຺ເປຕຕ຺ຕາຕິ ທີເປຕິ. ກິຎ຺ຈິ ປນ ຎາຓນ຺ຕິອາທິ ‘‘ຕິສ຺ໂສ ປຏິສມ຺ຠິທາ’’ຕິອາທິປາຬິຍາ ສມຕ຺ຖກໍ. ຍຖາຘິປ຺ເປຕສ຺ສ ອຕ຺ຖສ຺ສ ປຏິຠານໍ ທີປນໍ ປຏິຠານໍ. ເຕນາຫ ‘‘ເຎຍ຺ຍປ຺ປກາສນໂຕ’’ຕິ. ອິຕິ ຍາ ‘‘ຕິສ຺ໂສ ປຏິສມ຺ຠິທາ’’ຕິ ປາຬິ, ຕສ຺ສາ ພລວຠາວວິຠາວເນນ ອິຕຣາຍ ອຘິປ຺ປາຍມຄ຺ຄນໍ ກຕນ຺ຕິ ເວທິຕພ຺ພໍ. ນິປ຺ປຣິຍາຍາຕິ ປຣິຍາຍຣຫິຕາ ອຸຊຸກໍ ສຣູເປເນວ ປວຕ຺ຕາ. ນິປ຺ປຣິຍາຍ…ເປ… ປວຕ຺ຕິຍນ຺ຕິ ເອກນ຺ຕິກອຕ຺ຖາຣມ຺ມຓໍ ຎາຓໍ ອຕ຺ຖປຏິສມ຺ຠິທາ, ຎາຓາຣມ຺ມຓໍ ປຏິຠານປຏິສມ຺ຠິທາຕິ ຄເຫຕ຺ວາ ເທສນາຍໍ.

ໂສ ເອວາຕິ ປຣສ຺ສ ອຠິລາປສທ຺ໂທ ເອວ. ອນຸວຕ຺ຕມານຕາ ຈສ຺ສ ນິຣຸຕ຺ຕິປຏິສມ຺ຠິທາ ປຈ຺ຈຸປ຺ປນ຺ນເມວ ສທ຺ທໍ ອາຣມ຺ມຓໍ ກໂຣນ຺ຕີ, ສທ຺ທໍ ສຸຕ຺ວາ ‘‘ອຍໍ ສຠາວນິຣຸຕ຺ຕິ, ອຍໍ ນ ສຠາວນິຣຸຕ຺ຕີ’’ຕິ ຊານນ຺ຕີຕິ ຈ ອາທິວຈນວເສນ ເວທິຕພ຺ໂພ.

ປຎ຺ຫປຸຈ຺ຉກວຓ຺ຓນາ ນິຏ຺ຐິຕາ.

ປຏິສມ຺ຠິທາວິຠງ຺ຄວຓ຺ຓນາ ນິຏ຺ຐິຕາ.