໒. ອຠິຘມ຺ມຠາຊນີຍວຓ຺ຓນາ

໗໒໕. ສາມຎ຺ເຎນ ວຕ຺ວາ ວິເສເສນ ອວຸຕ຺ຕຕ຺ຕາຕິ ‘‘ເຕສໍ ວິປາເກ’’ຕິ ຍຖາວຸຕ຺ຕກຸສລວິປາກຕາທິສາມຎ຺ເຎນ ວຕ຺ວາ ສເຫຕຸກາເຫຕຸກາທິວິເສເສນ ອວຸຕ຺ຕຕ຺ຕາ, ສຣູເປນ ນິທ຺ຘາເຣຕ຺ວາ ອວຸຕ຺ຕຕ຺ຕາຕິ ອຕ຺ໂຖ. ອວິປາກຕ຺ຕາຕິ ອວິປາກຘມ຺ມຕ຺ຕາ. ຍທິ ເອວນ຺ຕິ ປຈ຺ຈຍຠາວໂຕ ລພ຺ຠມາໂນປິ ຘມ຺ມຠາໂວ ອວິປາກຘມ຺ມຕາຍ ກິຣິຍານໍ ຍທິ ນ ວຸຕ຺ໂຕ, ເອວໍ ສຕິ. ສຕິປິ ປຈ຺ຈຍຸປ຺ປນ຺ນຠາເວ ອວິປາກຠາວໂຕ ອຕ຺ຖຠາໂວປິ ນ ວຕ຺ຕພ຺ໂພ. ເຕນາຫ ‘‘ວິປາກາ ນ ໂຫນ຺ຕີຕິ ອຕ຺ຖຠາໂວ ຈ ນ ວຕ຺ຕພ຺ໂພ’’ຕິ. ເອວຎ຺ເຈຕິ ຍທິ ປຈ຺ຈຍຸປ຺ປນ຺ນຕ຺ຕາ ກິຣິຍານໍ ອຕ຺ຖຠາໂວ ວຸຕ຺ໂຕ. ນປ຺ປຏິສິທ຺ໂຘ ອິຈ຺ຉິໂຕວາຕິ ອຕ຺ໂຖ. ຍທິ ເອວໍ ກສ຺ມາ ນ ວຸຕ຺ໂຕຕິ ອາຫ ‘‘ວິປາກສ຺ສ ປນາ’’ຕິອາທິ. ເຕສນ຺ຕິ ກຸສລາກຸສລານໍ, ວິປາກກິຣິຍຘມ຺ມານຎ຺ຈ. ອຕ຺ຖຘມ຺ມຕາຕິ ວຸຕ຺ຕນເຍນ ລພ຺ຠມາໂນປິ ຍຖາກ຺ກມໍ ອຕ຺ຖຠາໂວ, ຘມ຺ມຠາໂວ ຈ ນ ວຸຕ຺ໂຕ. ປຈ຺ຈຍຠາວໍ ສຕ຺ຕິວິເສສໍ ສນິປ຺ຜາເທຕພ຺ພຕນ຺ຕິ ປທຕ຺ຕເຍນາປິ ວິປາກຘມ຺ມຕເມວາຫ. ສາ ຫິ ວິປາການໍ ເຫຕຸຠາວໂຕ ປຈ຺ຈຍຠາໂວ, ຕທຸປ຺ປາທນສມຕ຺ຖຕາຍ ສຕ຺ຕິວິເສໂສ, ເຕຫິ ສຄພ຺ຠາ ວິຍ ໂຫຕີຕິ ‘‘ສນິປ຺ຜາເທຕພ຺ພຕາ’’ຕິ ຈ ວຸຈ຺ຈຕິ. ຕໍ ປສ຺ສນ຺ຕີ ນິປ຺ຜາທກວິເສສາປິ ນິປ຺ຜາເທຕພ຺ພາເປກ຺ຂາ ໂຫຕິ ຘມ຺ມປຏິສມ຺ຠິທາ. ຕໍສມ຺ພນ຺ເຘນາຕິ ນິປ຺ຜາເທຕພ຺ພສມ຺ພນ຺ເຘນ. ຘມ຺ມປຏິສມ຺ຠິທໍ ວທນ຺ເຕນ ອຕ຺ຖປຏິສມ຺ຠິທາປິ ວຸຕ຺ຕາ.

ສຠາວຘມ຺ເມ ປຎ຺ຎຕ຺ຕິ ສຠາວປຎ຺ຎຕ຺ຕີຕິ ອາຫ ‘‘ນ ສຕ຺ຕາທິປຎ຺ຎຕ຺ຕິຍາ’’ຕິ. ສຠາເວນ, ນິຣຸຕ຺ຕິເຍວ ວາ ສຠາວປຎ຺ຎຕ຺ຕີຕິ ວຸຕ຺ຕາຕິ ອາຫ ‘‘ອວິປຣີຕປຎ຺ຎຕ຺ຕິຍາ ວາ’’ຕິ.

໗໔໖. ໂວຫາຣຠູມິໍ, ອຘິຄມຠູມິຎ຺ຈ ເອກຊ຺ຌໍ ກຕ຺ວາ ອາຫ ‘‘ກາມາວຈຣາ, ໂລກຸຕ຺ຕຣາ ຈ ຠູມິ ຠູມີ’’ຕິ. ຈິຕ຺ຕຸປ຺ປາທາ ວາ ປວຕ຺ຕິຏ຺ຐານຠາວໂຕ ຠູມິ.

ອຠິຘມ຺ມຠາຊນີຍວຓ຺ຓນາ ນິຏ຺ຐິຕາ.