໓. ສຎ຺ຎາກ຺ຂນ຺ຘນິທ຺ເທສວຓ຺ຓນາ

໑໗. ຕສ຺ສາປີຕິ ສຎ຺ຎາຍປິ. ຕພ຺ພຕ຺ຖຸກຕ຺ຕາຕິ ຈກ຺ຂຸວຕ຺ຖຸກຕ຺ຕາ. ປຏິຆວິຎ຺ເຎຍ຺ໂຍຕິ ຍຖາວຸຕ຺ຕປຏິຆໂຕ ວິຊານິຕພ຺ໂພ ປຏິຆວເສນ ຄເຫຕພ຺ໂພ. ອຸຕ຺ຕຣປທໂລປໍ ກຕ຺ວາຕິ ປຸຣິມປເທ ອຸຕ຺ຕຣປທໂລປໍ ກຕ຺ວາ.

ວິຎ຺ເຎຍ຺ຍຠາເວ, ນ ອຸປ຺ປຕ຺ຕິຍນ຺ຕິ ອຘິປ຺ປາໂຍ. ວຈນນ຺ຕິ ສທ຺ໂທ, ນາມນ຺ຕິ ອຕ຺ໂຖ. ວຈນາຘີນາຕິ ຄເຫຕພ຺ພຕໍ ປຕິ ສທ຺ທາຘີນາ, ນາມາຍຕ຺ຕຄຫຓາຕິ ອຕ຺ໂຖ. ຍເທຕ຺ຖ ວຕ຺ຕພ຺ພໍ, ຕໍ ນາມຣູປທຸເກ (ຘ. ສ. ມູລຏີ. ໑໐໑-໑໐໘) ວຸຕ຺ຕເມວ. ອຘິວຈນໍ ປຎ຺ຎຕ຺ຕິປກາສກໍ ຎາປກໍ ເອເຕສໍ ອຕ຺ຖີຕິ ອຘິວຈນາ ຍຖາ ອຣິສໂສຕິ. ຕໂຕໂຊຕິ ອຘິວຈນສງ຺ຂາຕໂຕ ອຣູປກ຺ຂນ຺ຘໂຕ ຊາໂຕ. ອຣູປກ຺ຂນ຺ຘປຣິຍາປນ຺ນຕ຺ຕາ ຜສ຺ເສປິ ຍຖາວຸຕ຺ໂຕ ອຕ຺ໂຖ ສມ຺ຠວຕີຕິ ທສ຺ເສຕຸໍ ‘‘ສມ຺ຜສ຺ໂສເຍວ ວາ’’ຕິອາທິມາຫ. ນ ເກວລໍ ມໂນທ຺ວາຣິກຜສ຺ເສ ເອວ, ອຖ ໂຂ ປຎ຺ຈທ຺ວາຣິກຜສ຺ເສປິ ‘‘ວິຎ຺ເຎຍ຺ຍຠາເວ ວຈນໍ ອຘິກິຈ຺ຈ ປວຕ຺ຕາ ອຘິວຈນາ’’ຕິອາທິວຸຕ຺ຕປ຺ປກາໂຣ ອຕ຺ໂຖ ສມ຺ຠວຕິ. ອິຕີຕິ ຕສ຺ມາ. ເຕນ ປຣິຍາເຍນາຕິ ມໂນສມ຺ຜສ຺ສຊປຣິຍາເຍນ. ຕໂຕຊາປີຕິ ປຎ຺ຈທ຺ວາຣິກຜສ຺ສຊາຕາປິ. ອຎ຺ຎປ຺ປກາຣາສມ຺ຠວໂຕຕິ ປຏິຆສມ຺ຜສ຺ສຊປຣິຍາຍສ຺ສ ອສມ຺ຠວໂຕ. ອາເວຓິກໍ ປຏິຆສມ຺ຜສ຺ສຊຕາ. ປກາຣນ຺ຕຣໍ ອຘິວຈນສມ຺ຜສ຺ສຊຕາ.

ຍທິ ເອວນ຺ຕິ ຍທິ ປຎ຺ຈທ຺ວາຣິກຜສ຺ເສຫິ ອຸປ຺ປນ຺ນສຎ຺ຎາ ປຣິຍາຍໂຕ ນິປ຺ປຣິຍາຍໂຕ ຈ ‘‘ອຘິວຈນສມ຺ຜສ຺ສຊາ’’ຕິ ວຸຈ຺ຈນ຺ຕິ, ເອວໍ ຈຕ຺ຕາໂຣປິ ອຣູປິໂນ ຂນ຺ຘາ ເອວໍ ວຕ຺ຕຸໍ ຍຸຕ຺ຕາ. ເອວໍ ສນ຺ເຕ ສຎ຺ຎາວ ກສ຺ມາ ‘‘ອຘິວຈນສມ຺ຜສ຺ສຊາ’’ຕິ ວຸຕ຺ຕາຕິ ອາຫ ‘‘ຕິຓ຺ຓໍ ຂນ຺ຘານ’’ນ຺ຕິອາທິ. ຕຕ຺ຖ ຕິຓ຺ຓໍ ຂນ຺ຘານນ຺ຕິ ເວທນາສງ຺ຂາຣວິຎ຺ຎາຓກ຺ຂນ຺ຘານໍ. ອຕ຺ຖວເສນາຕິ ‘‘ວຈນໍ ອຘິກິຈ຺ຈ ປວຕ຺ຕາ ອຘິວຈນາ’’ຕິອາທິນາ ວຸຕ຺ຕອຕ຺ຖວເສນ ອນ຺ວຕ຺ຖຕາວເສນ. ອຕ຺ຕໂນ ປຕ຺ຕມ຺ປິ ນາມນ຺ຕິ ‘‘ອຘິວຈນສມ຺ຜສ຺ສຊາ’’ຕິ ເອວໍ ອຕ຺ຕໂນ ອນຸປ຺ປຕ຺ຕມ຺ປິ ນາມໍ. ຘມ຺ມາຠິລາໂປຕິ ສຠາວນິຣຸຕ຺ຕິ. ປຸພ຺ເພ ຈຕຸນ຺ນໍ ອຣູປກ຺ຂນ຺ຘານໍ ສາຘາຣໂຓປິ ອຘິວຈນສມ຺ຜສ຺ສຊໂວຫາໂຣ ຣຸຬ຺ຫິວເສນ ສຎ຺ຎາຍ ເອວ ປວຕ຺ໂຕຕິ ວຕ຺ວາ ອິທານິ ໂສ ຕທຎ຺ຎາຣູປກ຺ຂນ຺ຘສາຘາຣໂຓ ສຎ຺ຎາຍ ນິເວສິໂຕຕິ ທສ຺ເສຕຸໍ ‘‘ອຖ ວາ’’ຕິອາທິມາຫ. ຣຊ຺ຊິຕ຺ວາ ໂອໂລກນາທີສູຕິ ເອຕ຺ຖ ອາທິ-ສທ຺ເທນ ກຸຊ຺ຌິຕ຺ວາ ໂອໂລກນາທິ ວິຍ ຣຊ຺ຊິຕ຺ວາ ສວນາທິປິ ສງ຺ຄຍ຺ຫຕີຕິ ເວທິຕພ຺ພໍ, ຕຖາໂສຕາວຘານາທິໂນປິ ຣຕ຺ຕຕາທິວິຊານນນິມິຕ຺ຕຕາສມ຺ຠວໂຕ. ຈກ຺ຂຸສມ຺ຜສ຺ສຊາສຎ຺ຎາຍ ປນ ປາກຏຠາວໍ ນິທສ຺ສນວເສນ ທສ຺ເສຕຸໍ ‘‘ໂອໂລກນໍ ຈກ຺ຂຸວິຎ຺ຎາຓວິສຍສມາຄເມ’’ຕິອາທິມາຫ.

ໂອໂລກນສ຺ສ ອປາກຏຠາເວ ຣຕ຺ຕຕາທິວິຊານນໍ ນ ໂຫຕິ, ປາກຏຠາເວ ຈ ໂຫຕີຕິ ອາຫ ‘‘ປສາທວຕ຺ຖຸກາ ເອວາ’’ຕິ. ‘‘ອຎ຺ຎໍ ຈິນ຺ເຕນ຺ຕ’’ນ຺ຕິ ຍໍ ປຸພ຺ເພ ເຕນ ກຖິຕໍ, ກາເຍນ ວາ ປກາສິຕໍ, ຕໂຕ ອຎ຺ຎໍ ກິຎ຺ຈິ ອຕ຺ຖໍ ຈິນ຺ເຕນ຺ຕໍ. ເຕເນວາຫ ‘‘ຎາຕ’’ນ຺ຕິ.

ສຎ຺ຎາກ຺ຂນ຺ຘນິທ຺ເທສວຓ຺ຓນາ ນິຏ຺ຐິຕາ.