໓. ສຎ຺ຎາກ຺ຂນ຺ຘນິທ຺ເທສວຓ຺ຓນາ

໑໗. ຈກ຺ຂຸສມ຺ຜສ຺ສຊາ ສຎ຺ຎາຕິ ເອຕ຺ຖ ຍທິປິ ວຕ຺ຖຸໂຕ ຜສ຺ສສ຺ສ ນາມໍ ຜສ຺ສໂຕ ຈ ສຎ຺ຎາຍ, ວຕ຺ຖຸວິສິຏ຺ຐຜສ຺ເສນ ປນ ວິສິຏ຺ຐສຎ຺ຎາ ວຕ຺ຖຸນາ ຈ ວິສິຏ຺ຐາ ໂຫຕິ ຜສ຺ສສ຺ສ ວິຍ ຕສ຺ສາປິ ຕພ຺ພຕ຺ຖຸກຕ຺ຕາຕິ ‘‘ວຕ຺ຖຸໂຕ ນາມ’’ນ຺ຕິ ວຸຕ຺ຕໍ. ປຏິຆສມ຺ຜສ຺ສຊາ ສຎ຺ຎາຕິ ເອຕ຺ຖາປິ ຍຖາ ຜສ຺ໂສ ວຕ຺ຖາຣມ຺ມຓປຏິຆຏ຺ຏເນນ ອຸປ຺ປນ຺ໂນ, ຕຖາ ຕໂຕ ຊາຕສຎ຺ຎາປີຕິ ‘‘ວຕ຺ຖາຣມ຺ມຓໂຕ ນາມ’’ນ຺ຕິ ວຸຕ຺ຕໍ. ເອຕ຺ຖ ຈ ປຏິຆໂຊ ສມ຺ຜສ຺ໂສ, ປຏິຆວິຎ຺ເຎຍ຺ໂຍ ວາ ສມ຺ຜສ຺ໂສ ປຏິຆສມ຺ຜສ຺ໂສຕິ ອຸຕ຺ຕຣປທໂລປໍ ກຕ຺ວາ ວຸຕ຺ຕນ຺ຕິ ເວທິຕພ຺ພໍ.

ວິຎ຺ເຎຍ຺ຍຠາເວ ວຈນໍ ອຘິກິຈ຺ຈ ປວຕ຺ຕາ, ວຈນາຘີນາ ວາ ອຣູປກ຺ຂນ຺ຘາ, ອຘິວຈນໍ ວາ ເອເຕສໍ ປກາສນໍ ອຕ຺ຖີຕິ ‘‘ອຘິວຈນາ’’ຕິ ວຸຈ຺ຈນ຺ຕິ, ຕໂຕໂຊ ສມ຺ຜສ຺ໂສ ອຘິວຈນສມ຺ຜສ຺ໂສ, ສມ຺ຜສ຺ໂສເຍວ ວາ ຍຖາວຸຕ຺ເຕຫິ ອຕ຺ເຖຫິ ອຘິວຈໂນ ຈ ສມ຺ຜສ຺ໂສ ຈາຕິ ອຘິວຈນສມ຺ຜສ຺ໂສ, ອຘິວຈນວິຎ຺ເຎຍ຺ໂຍ ວາ ສມ຺ຜສ຺ໂສ ອຘິວຈນສມ຺ຜສ຺ໂສ, ຕໂຕ ຕສ຺ມິໍ ວາ ຊາຕາ ອຘິວຈນສມ຺ຜສ຺ສຊາ. ປຎ຺ຈທ຺ວາຣິກສມ຺ຜສ຺ເສປິ ຍຖາວຸຕ຺ໂຕ ອຕ຺ໂຖ ສມ຺ຠວຕີຕິ ເຕນ ປຣິຍາເຍນ ຕໂຕຊາປິ ສຎ຺ຎາ ‘‘ອຘິວຈນສມ຺ຜສ຺ສຊາ’’ຕິ ວຸຕ຺ຕາ. ຍຖາ ປນ ອຎ຺ຎປ຺ປກາຣາສມ຺ຠວໂຕ ມໂນສມ຺ຜສ຺ສຊາ ນິປ຺ປຣິຍາເຍນ ‘‘ອຘິວຈນສມ຺ຜສ຺ສຊາ’’ຕິ ວຸຈ຺ຈຕິ, ນ ເອວໍ ອຍໍ ປຏິຆສມ຺ຜສ຺ສຊາ ອາເວຓິກປ຺ປກາຣນ຺ຕຣສມ຺ຠວໂຕຕິ ອຘິປ຺ປາໂຍ.

ຍທິ ເອວໍ ຈຕ຺ຕາໂຣ ຂນ຺ຘາປິ ຍຖາວຸຕ຺ຕສມ຺ຜສ຺ສໂຕ ຊາຕຕ຺ຕາ ‘‘ອຘິວຈນສມ຺ຜສ຺ສຊາ’’ຕິ ວຕ຺ຕຸໍ ຍຸຕ຺ຕາ, ສຎ຺ຎາວ ກສ຺ມາ ເອວໍ ວຸຕ຺ຕາຕິ? ຕິຓ຺ຓໍ ຂນ຺ຘານໍ ອຕ຺ຖວເສນ ອຕ຺ຕໂນ ປຕ຺ຕມ຺ປິ ນາມໍ ຍຕ຺ຖ ປວຕ຺ຕມາໂນ ອຘິວຈນສມ຺ຜສ຺ສຊ-ສທ຺ໂທ ນິຣຸຬ຺ຫຕາຍ ຘມ຺ມາຠິລາໂປ ໂຫຕິ, ຕສ຺ສາ ສຎ຺ຎາຍ ເອວ ອາໂຣເປຕ຺ວາ ສຍໍ ນິວຕ຺ຕນໍ ໂຫຕິ. ເຕນາຫ ‘‘ຕໂຍ ຫິ ອຣູປິໂນ ຂນ຺ຘາ’’ຕິອາທິ. ອຖ ວາ ສຎ຺ຎາຍ ປຏິຆສມ຺ຜສ຺ສຊາຕິ ອຎ຺ຎມ຺ປິ ວິສິຏ຺ຐໍ ນາມໍ ອຕ຺ຖີຕິ ອຘິວຈນສມ຺ຜສ຺ສຊານາມໍ ຕິຓ຺ຓໍເຍວ ຂນ຺ຘານໍ ຠວິຕຸໍ ອຣຫຕິ. ເຕ ປນ ອຕ຺ຕໂນ ນາມໍ ສຎ຺ຎາຍ ທຕ຺ວາ ນິວຕ຺ຕາຕິ ອິມມຕ຺ຖໍ ສນ຺ຘາຍາຫ ‘‘ຕໂຍ ຫິ ອຣູປິໂນ ຂນ຺ຘາ’’ຕິອາທິ. ປຎ຺ຈທ຺ວາຣິກສຎ຺ຎາ ໂອໂລເກຕ຺ວາປິ ຊານິຕຸໍ ສກ຺ກາຕິ ອິທໍ ເຕນ ເຕນາຘິປ຺ປາເຍນ ຫຕ຺ຖວິກາຣາທິກຣເຓ ຕທຘິປ຺ປາຍວິຊານນນິມິຕ຺ຕຠູຕາ ວິຎ຺ຎຕ຺ຕິ ວິຍ ຣຊ຺ຊິຕ຺ວາ ໂອໂລກນາທີສຸ ຣຕ຺ຕຕາທິວິຊານນນິມິຕ຺ຕໍ ໂອໂລກນໍ ຈກ຺ຂຸວິຎ຺ຎາຓວິສຍສມາຄເມ ປາກຏໍ ໂຫຕີຕິ ຕໍສມ຺ປຍຸຕ຺ຕາຍ ສຎ຺ຎາຍປິ ຕຖາປາກຏຠາວໍ ສນ຺ຘາຍ ວຸຕ຺ຕໍ.

ຣຊ຺ຊິຕ຺ວາ ໂອໂລກນາທິວເສນ ປາກຏາ ຊວນປ຺ປວຕ຺ຕາ ຠວິຕຸໍ ອຣຫຕີຕິ ເອຕິສ຺ສາ ອາສງ຺ກາຍ ນິວຕ຺ຕນຕ຺ຖໍ ‘‘ປສາທວຕ຺ຖຸກາ ເອວາ’’ຕິ ອາຫ. ອຎ຺ຎໍ ຈິນ຺ເຕນ຺ຕນ຺ຕິ ຍໍ ປຸພ຺ເພ ເຕນ ຈິນ຺ຕິຕໍ ຎາຕໍ, ຕໂຕ ອຎ຺ຎໍ ຈິນ຺ເຕນ຺ຕນ຺ຕິ ອຕ຺ໂຖ.

ສຎ຺ຎາກ຺ຂນ຺ຘນິທ຺ເທສວຓ຺ຓນາ ນິຏ຺ຐິຕາ.