໓. ອຘິປຕິປຈ຺ຈຍນິທ຺ເທສວຓ຺ຓນາ

໓. ຘຸຣນ຺ຕິ ຘຸຣຄ຺ຄາຫໍ. ເຊຏ຺ຐກນ຺ຕິ ເສຏ຺ຐໍ. ຉນ຺ທາຘິປຕິ ຉນ຺ທສມ຺ປຍຸຕ຺ຕການນ຺ຕິ ເອຕ຺ຖ ປຸຣິມຉນ຺ທສ຺ສ ສມານຣູເປນ ຕທນນ຺ຕຣໍ ນິທ຺ທິຏ຺ເຐນ ຕໍສມ຺ພນ຺ເຘນ ຉນ຺ທສທ຺ເທເນວ ປຈ຺ຈຍຠູຕສ຺ສ ຉນ຺ທສ຺ສ ສມ຺ປຍຸຕ຺ຕກວິເສສນຠາໂວ ທສ຺ສິໂຕ ໂຫຕີຕິ ‘‘ຉນ຺ທາຘິປຕິ ສມ຺ປຍຸຕ຺ຕການ’’ນ຺ຕິ ອວຕ຺ວາ ‘‘ຉນ຺ທສມ຺ປຍຸຕ຺ຕການ’’ນ຺ຕິ ວຸຕ຺ຕນ຺ຕິ ທຏ຺ຐພ຺ພໍ. ເອສ ນໂຍ ອິຕເຣສຸປິ.

ຄຣຸກາຣຈິຕ຺ຕີກາຣວເສນ ວາຕິ ກຸສລາພ຺ຍາກຕານໍ ປວຕ຺ຕິໍ ທສ຺ເສຕິ. ອລທ຺ຘໍ ລທ຺ຘພ຺ພໍ, ລທ຺ຘໍ ອວິຊຫິຕພ຺ພໍ. ເຍນ ວາ ວິນາ ນ ຠວິຕພ຺ພໍ, ຕໍ ລທ຺ຘພ຺ພໍ, ຕສ຺ເສວຕ຺ໂຖ ອວິຊຫິຕພ຺ພນ຺ຕິ. ອນວຎ຺ຎາຕນ຺ຕິ ອວຎ຺ຎາຕມ຺ປິ ອໂທສທສ຺ສິຕາຍ ອສ຺ສາທເນນ ອນວຎ຺ຎາຕໍ ກຕ຺ວາ.

ມິຈ຺ຉຕ຺ຕນິຍຕາ ອປ຺ປນາສທິສາ ມຫາພລາ ວິນາ ອຘິປຕິນາ ນຸປ຺ປຊ຺ຊນ຺ຕີຕິ ‘‘ເອກນ຺ເຕເນວາ’’ຕິ ອາຫ. ກມ຺ມກິເລສາວຣຓຠູຕາ ຈ ເຕ ສຄ຺ຄາວຣຓາ ຈ ມຄ຺ຄາວຣຓາ ຈ ປຈ຺ຈກ຺ຂສຄ຺ຄານໍ ກາມາວຈຣເທວານມ຺ປິ ອຸປ຺ປຊ຺ຊິຕຸໍ ນ ອຣຫນ຺ຕິ, ໂກ ປນ ວາໂທ ຣູປາຣູປີນນ຺ຕິ.

ກາມາວຈຣາທິເຠທໂຕ ປນ ຕິວິໂຘ ກິຣິຍາຣມ຺ມຓາຘິປຕິ ໂລຠສຫຄຕາກຸສລສ຺ເສວ ອາຣມ຺ມຓາຘິປຕິປຈ຺ຈໂຍ ໂຫຕີຕິ ອິທໍ ປຣສນ຺ຕານຄຕານໍ ສາຣມ຺ມຓຘມ຺ມານໍ ‘‘ອຊ຺ຌຕ຺ຕາຣມ຺ມໂຓ ຘມ຺ໂມ ພຫິທ຺ຘາຣມ຺ມຓສ຺ສ ຘມ຺ມສ຺ສ ອຘິປຕິປຈ຺ຈເຍນ ປຈ຺ຈໂຍ’’ຕິ ເອຕສ຺ສ ອຠາວໂຕ ‘‘ພຫິທ຺ຘາຣມ຺ມໂຓ ຘມ຺ໂມ ພຫິທ຺ຘາຣມ຺ມຓສ຺ສາ’’ຕິ ເອຕ຺ຖ ຈ ອາຣມ຺ມຓາຘິປຕິໂນ ອນຸທ຺ຘຏຕ຺ຕາ ອຘິປຕິປຈ຺ຈຍຕາ ນຕ຺ຖີຕິ ວິຎ຺ຎາຍມາເນປິ ‘‘ພຫິທ຺ຘາ ຂນ຺ເຘ ຄຣຸໍ ກຕ຺ວາ ອສ຺ສາເທຕີ’’ຕິອາທິວຈນໍ (ປຏ຺ຐາ. ໒.໒໐.໓໑) ນິສ຺ສາຍ ອຣຫໂຕ ກິຣິຍຘມ຺ມາ ປຸຖຸຊ຺ຊນາທີຫິ ຄຣຸໍ ກຕ຺ວາ ອສ຺ສາທິຍນ຺ຕີຕິ ອິມິນາ ອຘິປ຺ປາເຍນ ວຸຕ຺ຕນ຺ຕິ ທຏ຺ຐພ຺ພໍ. ‘‘ສນິທສ຺ສນສປ຺ປຏິຆາ ຂນ຺ຘາ’’ຕິອາທີສຸ (ປຏ຺ຐາ. ໒.໒໒.໓໐) ວິຍ ຂນ຺ຘສທ຺ໂທ ຣູເປ ເອວ ຠວິຕຸໍ ອຣຫຕີຕິ ວິຈາຣິຕເມຕໍ. ປຸຖຸຊ຺ຊນາທິກາເລ ວາ ອນາຄເຕ ກິຣິຍຘມ຺ເມ ຄຣຸໍ ກຕ຺ວາ ອສ຺ສາທນໍ ສນ຺ຘາເຍຕໍ ວຸຕ຺ຕໍ. ‘‘ເນວວິປາກນວິປາກຘມ຺ມຘມ຺ເມ ຂນ຺ເຘ ຄຣຸໍ ກຕ຺ວາ ອສ຺ສາເທຕິ ອຠິນນ຺ທຕີ’’ຕິອາທິວຈນໂຕ (ປຏ຺ຐາ. ໑.໓.໙໖) ກິຣິຍຘມ຺ມາ ຣາຄທິຏ຺ຐີນໍ ອຘິປຕິປຈ຺ຈໂຍ ໂຫນ຺ເຕວ, ເຕ ຈ ‘‘ອຕີຕາຣມ຺ມເຓ ອນາຄເຕ ຂນ຺ເຘ ຄຣຸໍ ກຕ຺ວາ ອສ຺ສາເທຕີ’’ຕິອາທິວຈນໂຕ (ປຏ຺ຐາ. ໒.໑໙.໒໓) ອນາຄຕາ ເຕຠູມກາປິ ອຘິປຕິປຈ຺ຈໂຍ ໂຫນ຺ຕີຕິ. ອາວຊ຺ຊນກິຣິຍສພ຺ຠາວໂຕ ປນ ອິທມ຺ປິ ວິຈາເຣຕພ຺ພໍ.

ອຘິປຕິປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.