໔. ອນນ຺ຕຣປຈ຺ຈຍນິທ຺ເທສວຓ຺ຓນາ

໔. ຍຖາ ໂອກາສທານວິເສສຠາເວນ ນຕ຺ຖິວິຄຕາ ວຸຕ຺ຕາ, ນ ເອວໍ ອນນ຺ຕຣສມນນ຺ຕຣາ, ເອເຕ ປນ ຈິຕ຺ຕນິຍາມເຫຕຸວິເສສຠາເວນ ວຸຕ຺ຕາ, ຕສ຺ມາ ຕໍ ຈິຕ຺ຕນິຍາມເຫຕຸວິເສສຠາວໍ ທສ຺ເສນ຺ໂຕ ‘‘ຈກ຺ຂຸວິຎ຺ຎາຓຘາຕູ’’ຕິອາທິນາ ຘາຕຸວເສນ ກຸສລາທິວເສນ ຈ ນິທ຺ເທສມາຫ. ຕຕ຺ຖ ‘‘ມໂນວິຎ຺ຎາຓຘາຕຸ ມໂນວິຎ຺ຎາຓຘາຕຸຍາ’’ຕິ ວຸຕ຺ເຕ ປຈ຺ຈຍປຈ຺ຈຍຸປ຺ປນ຺ນວິເສໂສ ນ ວິຎ຺ຎາຍຕີຕິ ‘‘ປຸຣິມາ ປຸຣິມາ ປຈ຺ຉິມາຍ ປຈ຺ຉິມາຍາ’’ຕິ ວຕ຺ຕພ຺ພໍ ສິຍາ. ຕຖາ ຈ ສຕິ ຘາຕຸວິເສເສນ ຈິຕ຺ຕວິເສເສ ທສ຺ສນໍ ຍໍ ກາຕຸໍ ອາຣທ຺ໂຘ, ຕໍ ໂວຈ຺ຉິຊ຺ເຊຍ຺ຍ. ‘‘ມໂນວິຎ຺ຎາຓຘາຕຸ ມໂນຘາຕຸຍາ’’ຕິ ອິທມ຺ປິ ນ ສກ຺ກາ ວຕ຺ຕຸໍ ນິຍາມາຠາວໂຕ, ‘‘ມໂນຘາຕຸ ຈກ຺ຂຸວິຎ຺ຎາຓຘາຕຸຍາ’’ຕິ ຈ ຕເຖວ ນ ສກ຺ກາ. ນ ຫິ ມໂນຘາຕຸ ຈກ຺ຂຸວິຎ຺ຎາຓຘາຕຸຍາເຍວ ອນນ຺ຕຣປຈ຺ຈໂຍຕິ ນິຍາໂມ ອຕ຺ຖິ, ຕສ຺ມາ ປາກຏາ ປຎ຺ຈວິຎ຺ຎາຓຘາຕຸໂຍ ອາທິໍ ກຕ຺ວາ ຍາວ ຘາຕຸວິເສສນິຍາໂມ ອຕ຺ຖິ, ຕາວ ນິທສ຺ສເນນ ນຍໍ ທສ຺ເສຕ຺ວາ ປຸນ ນິຣວເສສທສ຺ສນຕ຺ຖໍ ‘‘ປຸຣິມາ ປຸຣິມາ ກຸສລາ’’ຕິອາທິມາຫ. ສທິສກຸສລານນ຺ຕິ ເວທນາຍ ວາ ເຫຕູຫິ ວາ ສທິສກຸສລານໍ ອນຸຣູປກຸສລານນ຺ຕິ ວາ ອຕ຺ໂຖ. ເຕນ ຠູມິຠິນ຺ນານມ຺ປິ ປຈ຺ຈຍຠາໂວ ວຸຕ຺ໂຕ ໂຫຕິ. ຠວງ຺ຄຄ຺ຄຫເຓນ ກຸສລາກຸສລມູລເກສຸ ຈຸຕິປິ ຄຫິຕາຕິ ທຏ຺ຐພ຺ພໍ, ອພ຺ຍາກຕມູລເກ ຕທາຣມ຺ມຓມ຺ປິ.

ກາມາວຈຣກິຣິຍາວຊ຺ຊນສ຺ສາຕິ ກາມາວຈຣກິຣິຍາຍ ອາວຊ຺ຊນສ຺ສາຕິ ອາວຊ຺ຊນຄ຺ຄຫເຓນ ກາມາວຈຣກິຣິຍໍ ວິເສເສຕີຕິ ທຏ຺ຐພ຺ພໍ. ກາມາວຈຣວິປາໂກ ກາມາວຈຣກິຣິຍຣາສິສ຺ສ ຈ ອນນ຺ຕຣປຈ຺ຈໂຍ ໂຫຕິ, ໂຫນ຺ໂຕ ຈ ອາວຊ຺ຊນສ຺ເສວາຕິ ອຍຎ຺ເຫຕ຺ຖ ອຘິປ຺ປາໂຍ. ອາວຊ຺ຊນຄ຺ຄຫເຓເນວ ເຈຕ຺ຖ ໂວຏ຺ຐພ຺ພນມ຺ປິ ຄຫິຕນ຺ຕິ ທຏ຺ຐພ຺ພໍ.

ອນນ຺ຕຣປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.