໓. ປຈ຺ຈຍວາຣວຓ຺ຓນາ

໒໔໓. ປຈ຺ຈຍາຕິ ເອຕ຺ຖ ປຕິ ອໂຍ ປຈ຺ຈໂຍ. ປຕິ-ສທ຺ໂທ ປຕິຏ຺ຐຕ຺ຖໍ ທີເປຕິ, ອຍ-ສທ຺ໂທ ຄຕິໍ, ປຕິຏ຺ຐາຠູຕາ ຄຕິ ນິສ຺ສໂຍ ປຈ຺ຈໂຍຕິ ວຸຕ຺ຕໍ ໂຫຕິ, ຕໂຕ ປຈ຺ຈຍາ, ປຈ຺ຈຍກຣຓໂຕ ຕທາຍຕ຺ຕຠາວຄມນໂຕ ວາຕິ ອຕ຺ໂຖ.

‘‘ມຫາຠູເຕ ປຈ຺ຈຍາ ຈິຕ຺ຕສມຸຏ຺ຐານໍ ຣູປ’’ນ຺ຕິ (ປຏ຺ຐາ. ໑.໑.໒໔໕) ຠູຕຸປາທາຣູປານິ ສຫ ສງ຺ຄຓ຺ຫິຕ຺ວາ ວຸຕ຺ຕໍ. ອຏ຺ຐກຖາຍໍ ປນ ຈິຕ຺ຕສມຸຏ຺ຐາເນ ຈ ມຫາຠູເຕ ນິສ຺ສາຍ ຈິຕ຺ຕສມຸຏ຺ຐານໍ ອຸປາທາຣູປນ຺ຕິ ສຍໍ ນິສ຺ສໂຍ ອຫຸຕ຺ວາ ນິສ຺ສເຍ ອຸປ຺ປຊ຺ຊມາເນນ ອຸປາທາຣູເປນ ນິທສ຺ສນໍ ກຕນ຺ຕິ ທຏ຺ຐພ຺ພໍ.

໒໕໕. ອສຎ຺ຎ…ເປ… ກຏຕ຺ຕາຣູປໍ ອຸປາທາຣູປນ຺ຕິ ເອຕ຺ຖ ໂຍ ປຏິຈ຺ຈວາເຣ ສຫຊາເຕ ກມ຺ມອຸຕຸຊານໍ, ກມ຺ເມ ຈ ເອກນ຺ຕາເນກນ຺ຕກມ຺ມຊານໍ ວເສນ ອຕ຺ໂຖ ວຸຕ຺ໂຕ, ໂສ ນາຘິປ຺ເປໂຕ ເອວ ‘‘ກຏຕ຺ຕາຣູປ’’ນ຺ຕິ ກມ຺ມສມຸຏ຺ຐານຣູປສ຺ເສວ ສພ຺ພສ຺ສ ຈ ຄຫິຕຕ຺ຕາຕິ ຕໍ ປຫາຍ ຍຖາຄຫິຕສ຺ສ ກຏຕ຺ຕາຣູປສ຺ສ ວິເສສນວເສນ ‘‘ອຸປາທາຣູປສງ຺ຂາຕໍ ກຏຕ຺ຕາຣູປ’’ນ຺ຕິ ອຕ຺ຖມາຫ. ມຫາຠູເຕ ປນ ປຏິຈ຺ຈ ປຈ຺ຈຍາ ຈ ມຫາຠູຕານໍ ອຸປ຺ປຕ຺ຕິ ນ ນິວາເຣຕພ຺ພາຕິ ອຸປາທາຣູປຄ຺ຄຫເຓນ ກຏຕ຺ຕາຣູປຄ຺ຄຫຓໍ ອວິເສເສຕ຺ວາ ອຸປາທາຣູປານໍ ນິວຕ຺ເຕຕພ຺ພານໍ ອຕ຺ຖິຕາຍ ກຏຕ຺ຕາຣູປຄ຺ຄຫເຓເນວ ອຸປາທາຣູປຄ຺ຄຫຓສ຺ສ ວິເສສນໍ ທຏ຺ຐພ຺ພໍ.

໒໖໙-໒໗໖. ‘‘ອພ຺ຍາກເຕນ ອພ຺ຍາກຕໍ, ກຸສລໍ, ອກຸສລ’’ນ຺ຕິ ວຕ຺ຕພ຺ເພ ‘‘ອພ຺ຍາກເຕນ ກຸສລໍ, ອກຸສລໍ, ອພ຺ຍາກຕ’’ນ຺ຕິ, ‘‘ກຸສລໍ ຘມ຺ມໍ ປຏິຈ຺ຈ ກຸສໂລ ຈ ອກຸສໂລ ຈ ຘມ຺ມາ ກຸສລສ຺ສາຕິ ອນາມສິຕ຺ວາ’’ຕິ ຈ ປຸຣິມປາເຐ ປມາທເລຂາ ທຏ຺ຐພ຺ພາ.

໒໘໖-໒໘໗. ນເຫຕຸປຈ຺ຈຍາ ນປຸເຣຊາເຕ ທ຺ເວຕິ ເອຕ຺ຖ ອຏ຺ຐກຖາຍໍ ‘‘ອາຣຸປ຺ເປ ປນ ອເຫຕຸກໂມຫສ຺ສ ອເຫຕຸກກິຣິຍສ຺ສ ຈ ວເສນ ທ຺ເວຕິ ວຸຕ຺ຕາ, ນວິປ຺ປຍຸຕ຺ເຕ ທ຺ເວຕິ ອາຣຸປ຺ເປ ອເຫຕຸກາກຸສລກິຣິຍວເສນາ’’ຕິ ວຸຕ຺ຕໍ, ຕໍ ລພ຺ຠມາເນສຸ ເອກເທເສນ ນິທສ຺ສນວເສນ ວຸຕ຺ຕນ຺ຕິ ທຏ຺ຐພ຺ພໍ. ອາຣຸປ຺ເປ ປນ ອເຫຕຸກໂມຫສ຺ສ ອເຫຕຸກກິຣິຍາຍ ອເຫຕຸກປຏິສນ຺ຘິຍາ ເອກຈ຺ຈສ຺ສ ຈ ຣູປສ຺ສ ວເສນ ທ຺ເວ ວຸຕ຺ຕາຕິ, ນວິປ຺ປຍຸຕ຺ເຕ ທ຺ເວຕິ ອາຣຸປ຺ເປ ອເຫຕຸກາກຸສລກິຣິຍາເອກຈ຺ຈຣູປານໍ ວເສນາຕິ ວຸຕ຺ຕນ຺ຕິ. ‘‘ໂນນຕ຺ຖິໂນວິຄເຕສຸ ເອກນ຺ຕິ ສພ຺ພຣູປສ຺ສ ວເສນາ’’ຕິ ວຸຕ຺ຕໍ, ນເຫຕຸມູລກຕ຺ຕາ ອິມສ຺ສ ນຍສ຺ສ ເຫຕຸປຈ຺ຈຍໍ ລຠນ຺ຕໍ ນ ລພ຺ຠຕີຕິ ‘‘ເອກຈ຺ຈສ຺ສ ຣູປສ຺ສ ວເສນາ’’ຕິ ຠວິຕພ຺ພໍ. ຈກ຺ຂາທິຘມ຺ມວເສນ ປນ ຈິຕ຺ຕສມຸຏ຺ຐານາທິໂກຏ຺ຐາສວເສນ ວາ ສພ຺ພໍ ລພ຺ຠຕີຕິ ‘‘ສພ຺ພຣູປສ຺ສາ’’ຕິ ວຸຕ຺ຕໍ ສິຍາ.

໒໘໙-໒໙໖. ອາຄຕານາຄຕນ຺ຕິ ປຎ຺ຫວເສນ ວຸຕ຺ຕໍ, ລພ຺ຠມານາລພ຺ຠມານນ຺ຕິ ອາຄເຕ ຈ ປຎ຺ເຫ ລພ຺ຠມານາລພ຺ຠມານຘມ຺ມວເສນ.

ປຈ຺ຈຍວາຣວຓ຺ຓນາ ນິຏ຺ຐິຕາ.