(໒) ສງ຺ຂ຺ຍາວາໂຣ

໗໓. ຕຖາ ປຸເຣຊາຕປຈ຺ຈເຍຕິ ຍຖາ ອຎ຺ຎມຎ຺ຎປຈ຺ຈເຍ ວິເສໂສ ວິຠງ຺ເຄ ອຕ຺ຖິ, ຕຖາ ປຸເຣຊາຕປຈ຺ຈເຍປິ ອຕ຺ຖີຕິ ອຕ຺ໂຖ. ‘‘ວຕ຺ຖຸໍ ປຸເຣຊາຕປຈ຺ຈຍາ’’ຕິ ຫິ ຕຕ຺ຖ ວິເສໂສ ປຏິສນ຺ຘິອຠາໂວ ຈາຕິ. ວິປາການິ ເຈວ ວີຖິຈິຕ຺ຕານິ ຈ ນ ລພ຺ຠນ຺ຕີຕິ ເອເຕນ ‘‘ກິຣິຍາພ຺ຍາກຕໍ ເອກໍ ຂນ຺ຘໍ ປຏິຈ຺ຈາ’’ຕິອາທິເກ (ປຏ຺ຐາ. ໑.໑.໕໓) ວິຠງ຺ເຄ ວິປາກາພ຺ຍາກຕາຠາວໍ ກິຣິຍາພ຺ຍາກເຕ ຈ ອຊວນສ຺ສ ສພ຺ເພນ ສພ຺ພໍ ອລພ຺ຠມານຕໍ ວິເສສໍ ທສ຺ເສຕິ.

໗໔. ເອກມູລເກ ທສ຺ສິຕາຍ ເທສນາຍ ລພ຺ຠມານຄຓນຎ຺ເຎວ ອາທາຍາຕິ ອິທໍ ເອຕສ຺ມິໍ ອນຸໂລເມ ສຸທ຺ຘິກນເຍ ທສ຺ສິຕຄຓນໂຕ ຕໂຕ ປເຣສຸ ນເຍສຸ ອຎ຺ຎິສ຺ສາ ອຠາວໍ ສນ຺ຘາຍ ວຸຕ຺ຕໍ. ອພຫຸຄຓເນນ ຍຸຕ຺ຕສ຺ສ ເຕນ ສມານຄຓນຕາ ຈ ອິມສ຺ມິໍ ອນຸໂລເມເຍວ ທຏ຺ຐພ຺ພາ. ປຈ຺ຈນີເຍ ປນ ‘‘ນເຫຕຸປຈ຺ຈຍາ ນາຣມ຺ມເຓ ເອກ’’ນ຺ຕິອາທິໍ (ປຏ຺ຐາ. ໑.໑.໑໐໔) ວກ຺ຂຕີຕິ.

໗໖-໗໙. ເຕ ປນ ສງ຺ຂິປິຕ຺ວາ ເຕວີສຕິມູລໂກເວຕ຺ຖ ທສ຺ສິໂຕຕິ ເອຕ຺ຖ ປຈ຺ຉາຊາຕວິປາການໍ ປຣິຫີນຕ຺ຕາ ‘‘ທ຺ວາວີສຕິມູລໂກ’’ຕິ ວຕ຺ຕພ຺ພໍ ສິຍາ ສາເສວນສວິປາການໍ ວເສນ. ທຸວິຘມ຺ປິ ປນ ທ຺ວາວີສຕິມູລກໍ ສຫ ຄເຫຕ຺ວາ ສງ຺ຄຫິເຕ ຕສ຺ມິໍ ອຸຠຍສພ຺ຠາວໂຕ ‘‘ເຕວີສຕິມູລໂກ’’ຕິ ອາຫາຕິ ທຏ຺ຐພ຺ພໍ. ອາເສວນວິປາການໍ ວາ ວິໂຣຘາຠາເວ ສຕິ ປຸຈ຺ຉາຍ ທສ຺ສິຕນເຍນ ເຕວີສຕິມູລເກນ ຠວິຕພ຺ພໍ, ຕສ຺ສ ຈ ນາມໍ ທ຺ວາວີສຕິມູລເກ ອາໂຣເປຕ຺ວາ ‘‘ເຕວີສຕິມູລໂກ’’ຕິ ວຸຕ຺ຕນ຺ຕິ ອຍເມຕ຺ຖ ຣຸຬ຺ຫີ.

ອາຣມ຺ມຓປເທ ເຈວາຕິ ເອເຕນ ເອກມູລເກ ອຎ຺ຎປທານິ ວຊ຺ເຊຕິ. ນ ຫິ ເອກມູລເກ ເຫຕາທີສຸ ຕໂຍວາຕິ ອຘິປ຺ປາໂຍ. ສຸທ຺ຘິກນໂຍ ປນ ອາຣມ຺ມຓມູລກາທີສຸ ນ ລພ຺ຠຕີຕິ ອາຣມ຺ມຓມູລເກ ‘‘ນວາ’’ຕິ ເອຕາຍ ອຘິກຄຓນາຍ ອຠາວທສ຺ສນຕ຺ຖໍ ‘‘ອາຣມ຺ມເຓ ຐິເຕນ ສພ຺ພຕ຺ຖ ຕີເຓວ ປຎ຺ຫາ’’ຕິ ວຸຕ຺ຕໍ. ຕຕ຺ຖ ກາຕພ຺ພາຕິ ວຈນເສໂສ. ຕີເຓວາຕິ ຈ ຕໂຕ ອຸທ຺ຘໍ ຄຓນໍ ນິວາເຣຕິ, ນ ອໂຘ ປຏິກ຺ຂິປຕິ. ເຕນ ‘‘ວິປາເກ ເອກ’’ນ຺ຕິ ຄຓນາ ນ ນິວາຣິຕາຕິ ທຏ຺ຐພ຺ພາ. ຕີສຸ ເອກສ຺ສ ອນ຺ໂຕຄຘຕາຍ ຈ ‘‘ຕີເຓວາ’’ຕິ ວຸຕ຺ຕນ຺ຕິ. ອິຕີຕິອາທິນາ ‘‘ສພ຺ພຕ຺ຖ ຕີເຓວາ’’ຕິ ວຈເນນ ອຕ຺ຕໂນ ວຈນໍ ທຬ຺ຫໍ ກໂຣຕິ.

໘໐-໘໕. ເຍ …ເປ… ຕໍ ທສ຺ເສຕຸນ຺ຕິ ເອຕ຺ຖາຍມຘິປ຺ປາໂຍ – ຍທິປິ ອວິຄຕານນ຺ຕຣໍ ‘‘ອາຣມ຺ມຓປຈ຺ຈຍາ ເຫຕຸຍາ ຕີຓີ’’ຕິ ວຸຕ຺ເຕປິ ອູນຕຣຄຓເນນ ສທ຺ຘິໍ ສໍສນ຺ທເນ ຍາ ຄຓນາ ລພ຺ຠຕິ, ສາ ທສ຺ສິຕາ ໂຫຕິ, ຕຖາປິ ອູນຕຣຄຓເນຫິ ສມານຄຓເນຫິ ຈ ສທ຺ຘິໍ ສໍສນ຺ທເນ ອູນຕຣາ ສມານາ ຈ ໂຫຕິ, ນ ເອວໍ ອາວິກຣຓວເສນ ທສ຺ສິຕາ ໂຫຕິ, ວິປລ຺ລາສໂຍຊນາຍ ປນ ຕຖາ ທສ຺ເສຕິ. ວຈເນນ ວາ ຫິ ລິງ຺ເຄນ ວາ ອຕ຺ຖວິເສສາວິກຣຓໍ ໂຫຕີຕິ. ເຕເນຕໍ ອາວິກໂຣຕີຕິ ເອຕ຺ຖາປິ ເອວເມວ ອຘິປ຺ປາໂຍ ໂຍເຊຕພ຺ໂພ. ປຈ຺ຈນີຍາທີສຸປິ ປນ ‘‘ນາຣມ຺ມຓປຈ຺ຈຍາ ນເຫຕຸຍາ ເອກໍ…ເປ… ໂນວິຄຕປຈ຺ຈຍາ ນເຫຕຸຍາ ເອກ’’ນ຺ຕິອາທິນາ (ປຏ຺ຐາ. ໑.໑.໑໐໗) ມູລປທໍ ອາທິມ຺ຫິເຍວ ຐເປຕ຺ວາ ໂຍຊນາ ກຕາ, ນ ຈ ຕຕ຺ຖ ເອຕໍ ລກ຺ຂຓໍ ລພ຺ຠຕິ, ຕສ຺ມາ ມູລປທສ຺ສ ອາທິມ຺ຫິ ຐເປຕ຺ວາ ໂຍຊນເມວ ກໂມ, ນ ຈກ຺ກພນ຺ຘນນ຺ຕິ ‘‘ອາຣມ຺ມຓປຈ຺ຈຍາ ເຫຕຸຍາ ຕີຓີ’’ຕິອາທິ ໂຍຊິຕໍ, ນ ຈ ວິຎ຺ຎາເຕ ອຕ຺ເຖ ວຈເນນ ລິງ຺ເຄນ ຈ ປໂຍຊນມຕ຺ຖີຕິ.

ປຈ຺ຈຍານຸໂລມວຓ຺ຓນາ ນິຏ຺ຐິຕາ.