໒. ປຈ຺ຈຍປຈ຺ຈນີຍວຓ຺ຓນາ

໔໒-໔໔. ເຕວີສຕິມູລກນ຺ຕິ ອິທຎ຺ເຈຕ຺ຖ ທຸມູລກໍເຍວ ສນ຺ຘາຍ ວຸຕ຺ຕນ຺ຕິ ອິທໍ ທຸກມູລເກ ປຸຈ຺ຉານໍ ມູລຠູຕາ ເຕວີສຕິ ທຸກາ ສມ຺ຠວນ຺ຕີຕິ ຕສ຺ສ ‘‘ເຕວີສຕິມູລກ’’ນ຺ຕິ ນາມໍ ກຕ຺ວາ ຍາວ ຍຕ຺ຕໂກ ປເຠໂທ ອຕ຺ຖິ, ຕາວ ຕຕ຺ຕກໍ ເຕວີສຕິມູລກໍ ຍຖານຸໂລເມ ວິຕ຺ຖາຣິຕໍ. ເອວໍ ປຈ຺ຈນີເຍປິ ວິຕ຺ຖາເຣຕພ຺ພນ຺ຕິ ທຸກມູລເກນ ຕິກມູລກາທີສຸ ນຍໍ ທສ຺ເສຕີຕິ ອິມິນາ ອຘິປ຺ປາເຍນ ວຸຕ຺ຕໍ ສິຍາ. ຍທິ ປນ ຍາວ ເຕວີສຕິມໍ ມູລໍ ຍຖາ ວິຕ຺ຖາຣິຕນ຺ຕິ ອຍມຕ຺ໂຖ ອຘິປ຺ເປໂຕ, ‘‘ຍາວ ເຕວີສຕິມໍ ມູລ’’ນ຺ຕ຺ເວວ ປາເຐນ ຠວິຕພ຺ພໍ ສິຍາ. ນ ຫິ ‘‘ເຕວີສຕິມູລກ’’ນ຺ຕິ ເອຕສ຺ສ ພ຺ຍຎ຺ຊນສ຺ສ ເຕວີສຕິມໍ ມູລກນ຺ຕິ ອຍມຕ຺ໂຖ ສມ຺ຠວຕິ. ຍຖາ ອນຸໂລເມ ‘‘ເອເກກປທສ຺ສາ’’ຕິອາທິນາ ປນ ເອກມູລາທິສພ຺ພມູລກປຣິໂຍສານໍ ຕຕ຺ຖ ນຍທສ຺ສນວເສນ ທສ຺ສິຕໍ ເອເກກສ຺ສ ປທສ຺ສ ວິຕ຺ຖາຣໍ ທສ຺ເສຕີຕິ ສພ຺ພມູລກເມວ ເຈຕ຺ຖ ‘‘ເຕວີສຕິມູລກ’’ນ຺ຕິ ວຸຕ຺ຕນ຺ຕິ ເວທິຕພ຺ພໍ. ຕຎ຺ຫິ ເຕວີສຕິຍາ ປຈ຺ຈຍານໍ ອວເສສສ຺ສ ປຈ຺ຈຍສ຺ສ ມູລຠາວໂຕ ‘‘ເຕວີສຕິມູລກ’’ນ຺ຕິ ຈ ຕໂຕ ປຣໍ ມູລສ຺ສ ອຎ຺ຎສ຺ສ ອຠາວໂຕ ‘‘ສພ຺ພມູລກ’’ນ຺ຕິ ຈ ວຸຈ຺ຈຕິ.

ປຈ຺ຈຍປຈ຺ຈນີຍວຓ຺ຓນາ ນິຏ຺ຐິຕາ.