໑. ປຓ຺ຓຕ຺ຕິວາຣວຓ຺ຓນາ

໑. ຂນ຺ຘາທໂຍ ວິຍ ປຸພ຺ເພ ອວິຠຕ຺ຕາ ກາຍສງ຺ຂາຣາທໂຍຕິ ເຕສໍ ອວິຎ຺ຎາຕຕ຺ຕາ ‘‘ອສ຺ສາສປສ຺ສາສາ ກາຍສງ຺ຂາໂຣ’’ຕິອາທິນາ (ສໍ. ນິ. ໔.໓໔໘) ຕໂຍ ສງ຺ຂາເຣ ວິຠຊຕິ. ກາຍສ຺ສ ສງ຺ຂາໂຣຕິ ປຐເມ ອຕ຺ເຖ ສາມິອຕ຺ເຖ ເອວ ສາມິວຈນໍ, ທຸຕິເຍ ອຕ຺ເຖ ກຕ຺ຕຸອຕ຺ເຖ. ວຈິຍາ ສງ຺ຂາໂຣຕິ ກມ຺ມຕ຺ເຖ ສາມິວຈນໍ. ຈິຕ຺ຕສ຺ສ ສງ຺ຂາໂຣຕິ ຈ ກຕ຺ຕຸອຕ຺ເຖເຍວ. ໂສ ປນ ກຣຓວຈນສ຺ສ ອຕ຺ໂຖຕິ ກຕ຺ວາ ‘‘ກຣຓຕ຺ເຖ ສາມິວຈນໍ ກຕ຺ວາ’’ຕິ ວຸຕ຺ຕໍ.

໒-໗. ສຸທ຺ຘິກເອເກກປທວເສນ ອຕ຺ຖາຠາວໂຕຕິ ປທໂສຘນຕໍມູລກຈກ຺ກວາເຣຫິ ໂຍປິ ອຕ຺ໂຖ ທສ຺ສິໂຕ ທ຺ວີຫິ ປເທຫິ ລພ຺ຠມາໂນ ເອໂກ ອສ຺ສາສປສ຺ສາສາທິໂກ, ຕສ຺ສ ສຸທ຺ຘິເກຫິ ກາຍາທິປເທຫິ ສຸທ຺ຘິເກນ ຈ ສງ຺ຂາຣປເທນ ອວຈນີຍຕ຺ຕາ ຍຖາ ຣູປປທສ຺ສ ຂນ຺ເຘກເທໂສ ຂນ຺ຘປທສ຺ສ ຂນ຺ຘສມຸທາໂຍ ປທໂສຘເນ ທສ຺ສິໂຕ ຍຖາຘິປ຺ເປໂຕ ອຕ຺ໂຖ ອຕ຺ຖິ, ເອວໍ ເອເກກປທສ຺ສ ຍຖາຘິປ຺ເປຕຕ຺ຖາຠາວໂຕຕິ ອຘິປ຺ປາໂຍ. ກາໂຍ ກາຍສງ຺ຂາໂຣຕິອາທິ ປນ ວຕ຺ຕພ຺ພໍ ສິຍາຕິ ຍທິ ວິສຸໍ ອທີເປຕ຺ວາ ສມຸທິໂຕ ກາຍສງ຺ຂາຣສທ຺ໂທ ເອກຕ຺ຖ ທີເປຕິ, ກາຍສງ຺ຂາຣສທ຺ໂທ ກາຍສງ຺ຂາຣຕ຺ເຖ ວຕ຺ຕມາໂນ ຂນ຺ຘສທ຺ໂທ ວິຍ ຣູປສທ຺ເທນ ກາຍສທ຺ເທນ ວິເສສິຕພ຺ໂພຕິ ອຘິປ຺ປາເຍນ ວທຕິ. ສຸທ຺ຘສງ຺ຂາຣວາໂຣ ເຫສາຕິ ເອເຕນ ອິມສ຺ສ ວາຣສ຺ສ ປທໂສຘເນນ ທສ຺ສິຕານໍ ຍຖາຘິປ຺ເປຕານເມວ ຄຫຓໂຕ ເຕສຎ຺ຈ ກາຍາທິປເທຫິ ອຄ຺ຄຫິຕຕ຺ຕາ ‘‘ກາໂຍ ກາຍສງ຺ຂາໂຣ’’ຕິອາທິວຈນສ຺ສ ອຍຸຕ຺ຕິໍ ທສ຺ເສຕິ. ອິຘ ປນ ສງ຺ຂາຣຍມເກ ກາຍາທິປທານໍ ສງ຺ຂາຣປທສ຺ສ ຈ ອສມານາຘິກຣຓຕ຺ຕາ ‘‘ກາໂຍ ສງ຺ຂາໂຣ, ສງ຺ຂາຣາ ກາໂຍ’’ຕິອາທິມ຺ຫິ ວຸຈ຺ຈມາເນ ອຘິປ຺ເປຕຕ຺ຖປຣິຈ຺ຈາໂຄ ອນຘິປ຺ເປຕຕ຺ຖປຣິຄ຺ຄໂຫ ຈ ກໂຕ ສິຍາຕິ ສຸທ຺ຘສງ຺ຂາຣຕໍມູລຈກ຺ກວາຣາ ນ ວຸຕ຺ຕາ. ປທໂສຘນວາຣຕໍມູລຈກ຺ກວາເຣຫິ ປນ ອສມານາຘິກຣເຓຫິ ກາຍາທິປເທຫິ ສງ຺ຂາຣສທ຺ທສ຺ສ ວິເສສນີຍຕາຍ ທສ຺ສິຕາຍ ສໍສໂຍ ໂຫຕິ ‘‘ໂຍ ອຕ຺ຖນ຺ຕຣປ຺ປວຕ຺ຕິນາ ກາຍສທ຺ເທນ ວິເສສິໂຕ ກາຍສງ຺ຂາໂຣ, ເອໂສ ອຕ຺ຖນ຺ຕຣປ຺ປວຕ຺ຕີຫິ ວຈີຈິຕ຺ເຕຫິ ວິເສສິໂຕ ອຸທາຫຸ ອຎ຺ໂຎ’’ຕິ. ເອວໍ ເສເສສຸປິ. ເອຕ຺ຖ ເຕສໍ ອຎ຺ຎຕ຺ຖ ທສ຺ສນຕ຺ຖໍ ‘‘ກາຍສງ຺ຂາໂຣ ວຈີສງ຺ຂາໂຣ’’ຕິອາທິນາ ອນຸໂລມປຏິໂລມວເສນ ຉ ຍມການິ ວຸຕ຺ຕານີຕິ ທຏ຺ຐພ຺ພໍ. ອຏ຺ຐກຖາຍໍ ປນ ສຸທ຺ຘສງ຺ຂາຣວາຣຏ຺ຐາເນ ວຸຕ຺ຕຕ຺ຕາ ອຍໍ ນໂຍ ສຸທ຺ຘສງ຺ຂາຣວາໂຣຕິ ວຸຕ຺ໂຕ.

ປຓ຺ຓຕ຺ຕິວາຣວຓ຺ຓນາ ນິຏ຺ຐິຕາ.