໓. ປຣິຎ຺ຎາວາຣວຓ຺ຓນາ

໒໐໖-໒໐໘. ປຸຄ຺ຄໂລກາສວາໂຣ ລພ຺ຠມາໂນປີຕິ ກສ຺ມາ ວຸຕ຺ຕໍ, ນນຸ ໂອກາສວາຣສ຺ສ ອລາເຠ ຕສ຺ສປິ ອລາເຠນ ຠວິຕພ຺ພນ຺ຕິ? ນ, ຕຕ຺ຖ ປຸຄ຺ຄລສ຺ເສວ ປຣິຎ຺ຎາວຈນໂຕ. ປຸຄ຺ຄໂລກາສວາເຣປິ ຫິ ໂອກາເສ ປຸຄ຺ຄລສ຺ເສວ ປຣິຎ຺ຎາ ວຸຈ຺ຈຕິ, ນ ໂອກາສສ຺ສ. ໂອກາສວາໂຣປິ ຈ ຍທິ ວຸຈ຺ເຈຍ຺ຍ, ‘‘ຍຕ຺ຖ ຣູປກ຺ຂນ຺ຘໍ ປຣິຊານາຕີ’’ຕິ ໂອກາເສ ປຸຄ຺ຄລສ຺ເສວ ປຣິຊານນວເສນ ວຸຈ຺ເຈຍ຺ຍ, ຕສ຺ມາ ປຸຄ຺ຄໂລກາສວາຣສ຺ເສວ ລພ຺ຠມານຕາ ວຸຕ຺ຕາ, ນ ໂອກາສວາຣສ຺ສາຕິ. ເຕນາຫ – ‘‘ອາມນ຺ຕາ…ເປ… ສິຍາ’’ຕິ.

ເຕເນວາຕິ ປວຕ຺ເຕ ຈິຕ຺ຕກ຺ຂຓວເສນ ຕິຓ຺ຓໍ ອທ຺ຘານໍ ລາຠໂຕ ເອວ, ອຎ຺ຎຖາ ຈຸຕິປຏິສນ຺ຘິກ຺ຂເຓ ຣູປກ຺ຂນ຺ຘປຣິຊານນສ຺ສ ອຠາວາ ‘‘ໂຍ ຣູປກ຺ຂນ຺ຘໍ ປຣິຊານາຕິ, ໂສ ເວທນາກ຺ຂນ຺ຘໍ ປຣິຊານາຕີ’’ຕິ ເອຕ຺ຖ ‘‘ນຕ຺ຖີ’’ຕິ ວິສ຺ສຊ຺ຊເນນ ຠວິຕພ຺ພໍ ສິຍາ, ‘‘ອາມນ຺ຕາ’’ຕິ ຈ ກຕນ຺ຕິ. ສນ຺ນິຏ຺ຐານສໍສຍປທສງ຺ຄຫິຕານໍ ປຣິຎ຺ຎານໍ ປວຕ຺ເຕ ຈິຕ຺ຕກ຺ຂເຓ ເອວ ລາຠໍ ທສ຺ເສນ຺ໂຕ ‘‘ໂລກຸຕ຺ຕຣມຄ຺ຄກ຺ຂຓສ຺ມິຎ຺ຫີ’’ຕິອາທິມາຫ. ນ ປຣິຊານາຕີຕິ ປຎ຺ເຫ ປຸຖຸຊ຺ຊນໍ ສນ຺ຘາຍ ອາມນ຺ຕາຕິ ວຸຕ຺ຕນ຺ຕິ ອິທໍ ປຸຖຸຊ຺ຊນສ຺ສ ສພ຺ພຖາ ປຣິຎ຺ຎາກິຈ຺ຈສ຺ສ ອຠາວໂຕ ວຸຕ຺ຕໍ. ‘‘ອຣຫາ ຣູປກ຺ຂນ຺ຘໍ ນ ປຣິຊານາຕິ ໂນ ຈ ເວທນາກ຺ຂນ຺ຘໍ ນ ປຣິຊານິຕ຺ຖ, ອຄ຺ຄມຄ຺ຄສມງ຺ຄິຎ຺ຈ ອຣຫນ຺ຕຎ຺ຈ ຐເປຕ຺ວາ ອວເສສາ ປຸຄ຺ຄລາ ຣູປກ຺ຂນ຺ຘຎ຺ຈ ນ ປຣິຊານນ຺ຕິ ເວທນາກ຺ຂນ຺ຘຎ຺ຈ ນ ປຣິຊານິຕ຺ຖາ’’ຕິ ປນ ວຈເນນ ‘‘ອຄ຺ຄມຄ຺ຄສມງ຺ຄິໍ ຐເປຕ຺ວາ ອຎ຺ໂຎ ໂກຈິ ປຣິຊານາຕີ’’ຕິ ວຕ຺ຕພ຺ໂພ ນຕ຺ຖີຕິ ທສ຺ສິຕໍ ໂຫຕິ, ເຕນ ຕທວເສສປຸຄ຺ຄເລ ສນ຺ຘາຍ ‘‘ອາມນ຺ຕາ’’ຕິ ວຸຕ຺ຕນ຺ຕິ ວິຎ຺ຎາຍຕີຕິ.

ປຣິຎ຺ຎາວາຣວຓ຺ຓນາ ນິຏ຺ຐິຕາ.

ຂນ຺ຘຍມກວຓ຺ຓນາ ນິຏ຺ຐິຕາ.