໔. ທານກຖາວຓ຺ຓນາ

໔໗໘. ເທຍ຺ຍຘມ຺ມວເສນ ໂຈເທຕຸນ຺ຕິ ຍທິ ເຈຕສິໂກວ ຘມ຺ໂມ ທານໍ, ‘‘ທິຍ຺ຍຕີຕິ ທານ’’ນ຺ຕິ ອິມິນາປິ ອຕ຺ເຖນ ເຈຕສິກສ຺ເສວ ທານຠາໂວ ອາປຊ຺ຊຕີຕິ ໂຈເທຕຸນ຺ຕິ ອຕ຺ໂຖ.

໔໗໙. ອນິຏ຺ຐຜລນ຺ຕິອາທິ ອເຈຕສິກສ຺ສ ຘມ຺ມສ຺ສ ທານຠາວທີປນຕ຺ຖໍ ວຸຕ຺ຕນ຺ຕິ ຜລທານຠາວທີປນຕ຺ຖໍ ນ ວຸຕ຺ຕນ຺ຕິ ອຕ຺ໂຖ ທຏ຺ຐພ຺ໂພ. ອນິຏ຺ຐຜລນ຺ຕິອາທິນາ ອເຈຕສິກສ຺ສ ຘມ຺ມສ຺ສ ຜລທານໍ ວຸຕ຺ຕໍ ວິຍ ໂຫຕິ, ນ ທານຠາໂວ, ຕນ຺ນິວາຣຓຕ຺ຖຎ຺ເຈຕມາຫາຕິ. ເອວຎ຺ຈ ກຕ຺ວາ ອນນ຺ຕຣເມວາຫ ‘‘ນ ຫິ ອເຈຕສິໂກ ອນ຺ນາທິຘມ຺ໂມ ອາຍຕິໍ ວິປາກໍ ເທຕີ’’ຕິ. ອິຏ຺ຐຜລຠາວນິຍມນຕ຺ຖນ຺ຕິ ເທຍ຺ຍຘມ຺ໂມ ວິຍ ເກນຈິ ປຣິຍາເຍນ ອນິຏ຺ຐຜລຕາ ທານສ຺ສ ນຕ຺ຖິ, ເອກນ຺ຕໍ ປນ ອິຏ຺ຐຜລເມວາຕິ ນິຍມນຕ຺ຖນ຺ຕິ ອຕ຺ໂຖ.

ອິຕເຣນາຕິ ‘‘ທິຍ຺ຍຕີຕິ ທານ’’ນ຺ຕິ ອິມິນາ ປຣິຍາເຍນ. ນ ປນ ເອເກນຕ຺ເຖນາຕິ ‘‘ເທຍ຺ຍຘມ຺ໂມວ ທານ’’ນ຺ຕິ ອິມໍ ສກວາທີວາທໍ ນິວຕ຺ເຕຕຸໍ ‘‘ສທ຺ຘາ ຫິຣິຍ’’ນ຺ຕິອາທິກໍ ສຸຕ຺ຕສາຘນໍ ປຣວາທີວາເທ ຍຸຊ຺ຊຕິ, ‘‘ອິເຘກຈ຺ໂຈ ອນ຺ນໍ ເທຕີ’’ຕິອາທິກຎ຺ຈ, ‘‘ເຈຕສິໂກວ ຘມ຺ໂມ ທານ’’ນ຺ຕິ ອິມໍ ນິວຕ຺ເຕຕຸໍ ‘‘ເຈຕສິໂກ ຘມ຺ໂມ ທານ’’ນ຺ຕິ ອິມໍ ປນ ສາເຘຕຸໍ ‘‘ສທ຺ຘາ ຫິຣິຍ’’ນ຺ຕິອາທິກໍ ສກວາທີວາເທ ຍຸຊ຺ຊຕິ, ‘‘ອິເຘກຈ຺ໂຈ ອນ຺ນໍ ເທຕີ’’ຕິອາທິກໍ ວາ ‘‘ເທຍ຺ຍຘມ຺ໂມ ທານ’’ນ຺ຕິ ສາເຘຕຸນ຺ຕິ ເອວໍ ນິວຕ຺ຕນສາຘນຕ຺ຖນານຕ຺ຕໍ ສນ຺ຘາຍ ‘‘ນ ປນ ເອເກນຕ຺ເຖນາ’’ຕິ ວຸຕ຺ຕນ຺ຕິ ທຏ຺ຐພ຺ພໍ. ຕຕ຺ຖ ຍຖາ ປຣວາທີວາເທ ຈ ສຸຕ຺ຕສາຘນຕ຺ຖໍ ‘‘ນ ວຕ຺ຕພ຺ພໍ ເຈຕສິໂກ ຘມ຺ໂມ ທານ’’ນ຺ຕິ ປຸຈ຺ຉາຍໍ ເຈຕສິໂກວາຕິ ອຕ຺ໂຖ ທຏ຺ຐພ຺ໂພ, ຕຖາ ‘‘ນ ວຕ຺ຕພ຺ພໍ ເທຍ຺ຍຘມ຺ໂມ ທານ’’ນ຺ຕິ ປຸຈ຺ຉາຍ ຈ ເທຍ຺ຍຘມ຺ໂມວາຕິ. ເທຍ຺ຍຘມ຺ໂມ ອິຏ຺ຐຜໂລຕິ ອິຏ຺ຐຜລາຠາວມຕ຺ຕເມວ ປຏິກ຺ຂິຕ຺ຕນ຺ຕິ ເອຕ຺ຖ ‘‘ອິຏ຺ຐຜລຠາວມຕ຺ຕເມວ ປຏິກ຺ຂິຕ຺ຕ’’ນ຺ຕິ ປາເຐນ ຠວິຕພ຺ພນ຺ຕິ. ‘‘ອິຏ຺ຐຜລາຠາວມຕ຺ຕເມວ ທິສ຺ວາ ປຏິກ຺ຂິຕ຺ຕ’’ນ຺ຕິ ວາ ວຕ຺ຕພ຺ພໍ. ສງ຺ກຣຠາວໂມຈນຕ຺ຖນ຺ຕິ ເຈຕສິກສ຺ສ ທາຕພ຺ພຏ຺ເຐນ ເທຍ຺ຍຘມ຺ມສ຺ສ ຈ ອິຏ຺ຐຜລຏ຺ເຐນ ທານຠາວໂມຈນຕ຺ຖນ຺ຕິ ວຸຕ຺ຕໍ ໂຫຕິ.

ທານກຖາວຓ຺ຓນາ ນິຏ຺ຐິຕາ.