໔-໕. ສຕ຺ຕາວາສສຸຕ຺ຕາທິວຓ຺ຓນາ

໒໔-໒໕. ຈຕຸຕ຺ເຖ ສຕ຺ຕາ ອາວສນ຺ຕິ ເອເຕສູຕິ ສຕ຺ຕາວາສາ, ນານຕ຺ຕສຎ຺ຎິອາທິເຠທາ ສຕ຺ຕນິກາຍາ. ຍສ຺ມາ ເຕ ເຕ ສຕ຺ຕນິວາສາ ຕປ຺ປຣິຍາປນ຺ນານໍ ສຕ຺ຕານໍ ຕາຍ ເອວ ຕປ຺ປຣິຍາປນ຺ນຕາຍ ອາຘາໂຣ ວິຍ ວຕ຺ຕພ຺ພຕໍ ອຣຫນ຺ຕິ. ສມຸທາຍາຈາໂຣ ຫິ ອວຍວສ຺ສ ຍຖາ ‘‘ຣຸກ຺ເຂ ສາຂາ’’ຕິ, ຕສ຺ມາ ‘‘ສຕ຺ຕານໍ ອາວາສາ, ວສນຏ຺ຐານານີຕິ ອຕ຺ໂຖ’’ຕິ ວຸຕ຺ຕໍ. ສຸທ຺ຘາວາສາປິ ສຕ຺ຕາວາໂສວ ‘‘ນ ໂສ, ຠິກ຺ຂເວ, ສຕ຺ຕາວາໂສ ສຸລຠຣູໂປ, ໂຍ ມຍາ ອນາວຸຕ຺ຖປຸພ຺ໂພ ອິມິນາ ທີເຆນ ອທ຺ຘຸນາ ອຎ຺ຎຕ຺ຣ ສຸທ຺ຘາວາເສຫິ ເທເວຫີ’’ຕິ (ທີ. ນິ. ໒.໙໑) ວຈນໂຕ. ຍທິ ເອວໍ ເຕ ກສ຺ມາ ອິຘ ນ ຄຫິຕາຕິ ຕຕ຺ຖ ກາຣຓມາຫ ‘‘ອສພ຺ພກາລິກຕ຺ຕາ’’ຕິອາທິ. ເວຫປ຺ຜລາ ປນ ຈຕຸຕ຺ເຖເຍວ ສຕ຺ຕາວາເສ ຠຊນ຺ຕີຕິ ທຏ຺ຐພ຺ພໍ. ປຎ຺ຈມໍ ອຸຕ຺ຕານເມວ.

ສຕ຺ຕາວາສສຸຕ຺ຕາທິວຓ຺ຓນາ ນິຏ຺ຐິຕາ.