໑. ສີຫນາທສຸຕ຺ຕວຓ຺ຓນາ

໑໑. ທຸຕິຍສ຺ສ ປຐເມ ອວາປຸເຣນ຺ຕິ ວິວຣນ຺ຕິ ທ຺ວາຣໍ ເອເຕນາຕິ ອວາປຸຣຓໍ. ຣຊໍ ຫຣນ຺ຕິ ເອເຕນາຕິ ຣໂຊຫຣຓໍ. ກໂຬປິຫຕ຺ໂຖຕິ ວິລີວມຍຠາຊນຫຕ຺ໂຖ, ‘‘ຈມ຺ມມຍຠາຊນຫຕ຺ໂຖ’’ຕິ ຈ ວທນ຺ຕິ. ຉິນ຺ນານິ ວິສາຓານິ ເອຕສ຺ສາຕິ ຉິນ຺ນວິສາໂຓ, ອຸສໂຠ ຈ ໂສ ຉິນ຺ນວິສາໂຓ ຈາຕິ ອຸສຠຉິນ຺ນວິສາໂຓ. ວິເສສນປໂຣຍໍ ສມາໂສ. ອຫິກຸຓເປນ ວາຕິອາທິ ອຕິເຊຄຸຈ຺ຉປ຺ປຏິກູລກຸຓປທສ຺ສນຕ຺ຖໍ ວຸຕ຺ຕໍ. ກຓ຺ເຐ ອາສຕ຺ເຕນາຕິ ເກນຈິເທວ ປຈ຺ຈຕ຺ຖິເກນ ອາເນຕ຺ວາ ກຓ຺ເຐ ພທ຺ເຘນ, ໂອມຸກ຺ເກນາຕິ ອຕ຺ໂຖ. ອຏ຺ໂຏ ອາຕຸໂຣ ທຸຄ຺ຄນ຺ຘປີຬາຍ ປີຬິໂຕ. ອຈ຺ຈຍສ຺ສ ປຏິຄ຺ຄຓ຺ຫນໍ ວາ ອຘິວາສນໍ. ເອວຎ຺ຫິ ໂສ ກາຣເຓ ເທສິຍມາເນ ຕໂຕ ວິຄໂຕ ນາມ ໂຫຕິ. ເຕນາຫ ‘‘ປຏິຄ຺ຄຓ຺ຫຕູຕິ ຂມຕູ’’ຕິ. ເສສເມຕ຺ຖ ສຸວິຎ຺ເຎຍ຺ຍເມວ.

ສີຫນາທສຸຕ຺ຕວຓ຺ຓນາ ນິຏ຺ຐິຕາ.