໔-໕. ນນ຺ທກສຸຕ຺ຕາທິວຓ຺ຓນາ

໔-໕. ຈຕຸຕ຺ເຖ ອາຄມຍມາໂນຕິ ໂອໂລກຍມາໂນ, ພຸທ຺ໂຘ ສຫສາ ອປວິສິຕ຺ວາ ຍາວ ສາ ກຖາ ນິຏ຺ຐາຕິ, ຕາວ ອຏ຺ຐາສີຕິ ອຕ຺ໂຖ. ເຕນາຫ ‘‘ອິທມໂວຈາຕິ ອິທໍ ກຖາວສານໍ ອຸທິກ຺ຂມາໂນ’’ຕິ. ອນິຈ຺ຈທຸກ຺ຂາທິວເສນ ສພ຺ພຘມ຺ມສນ຺ຕີຣຓໍ ອຘິປຎ຺ຎາວິປສ຺ສນາຕິ ອາຫ ‘‘ສງ຺ຂາຣປຣິຄ຺ຄຫວິປສ຺ສນາຎາຓສ຺ສາ’’ຕິ. ມານສນ຺ຕິ ຣາໂຄປິ ຈິຕ຺ຕມ຺ປິ ອຣຫຕ຺ຕມ຺ປິ. ‘‘ອນ຺ຕລິກ຺ຂຈໂຣ ປາໂສ, ຍ຺ວາຍໍ ຈຣຕິ ມານໂສ’’ຕິ (ສໍ. ນິ. ໑.໑໕໑; ມຫາວ. ໓໓) ເອຕ຺ຖ ຣາໂຄ ມານສໍ. ‘‘ຈິຕ຺ຕໍ ມໂນ ມານສ’’ນ຺ຕິ (ຘ. ສ. ໖) ເອຕ຺ຖ ຈິຕ຺ຕໍ. ‘‘ອປ຺ປຕ຺ຕມານໂສ ເສໂຂ, ກາລໍ ກຍິຣາ ຊເນ ສຸຕາ’’ຕິ (ສໍ. ນິ. ໑.໑໕໙) ເອຕ຺ຖ ອຣຫຕ຺ຕໍ. ອິຘາປິ ອຣຫຕ຺ຕເມວ ອຘິປ຺ເປຕໍ. ເຕນາຫ ‘‘ອປ຺ປຕ຺ຕມານສາຕິ ອປ຺ປຕ຺ຕອຣຫຕ຺ຕາ’’ຕິ. ອປ຺ປຕ຺ຕໍ ມານສໍ ອຣຫຕ຺ຕໍ ເອເຕຫີຕິ ອປ຺ປຕ຺ຕມານສາ. ອິທານິ ຈິຕ຺ຕປຣິຍາຍເມວ ມານສສທ຺ທໍ ສນ຺ຘາຍາຫ ‘‘ອຣຫຕ຺ຕໍ ວາ’’ຕິອາທິ. ປຎ຺ຈມໍ ສຸວິຎ຺ເຎຍ຺ຍເມວ.

ນນ຺ທກສຸຕ຺ຕາທິວຓ຺ຓນາ ນິຏ຺ຐິຕາ.