໖. ເສວນາສຸຕ຺ຕວຓ຺ຓນາ

໖. ຉຏ຺ເຐ ຊີວິຕສມ຺ຠາຣາຕິ ຊີວິຕປ຺ປວຕ຺ຕິຍາ ສມ຺ຠາຣາ ປຈ຺ຈຍາ. ສມຸທາເນຕພ຺ພາຕິ ສມ຺ມາ ຎາເຍນ ອນວຊ຺ຊອຸຎ຺ຉາຈຣິຍາທິນາ ອຸທ຺ຘມຸທ຺ຘມາເນຕພ຺ພາ ປາປຸຓິຕພ຺ພາ. ເຕ ປນ ສມຸທານິຕາ ສມາຫຕາ ນາມ ໂຫນ຺ຕີຕິ ອາຫ ‘‘ສມາຫຣິຕພ຺ພາ’’ຕິ. ທຸກ຺ເຂນ ອຸປ຺ປຊ຺ຊນ຺ຕີຕິ ສຸລຠຸປ຺ປາທາ ນ ໂຫນ຺ຕິ. ເອເຕນ ໂຄຈຣອສປ຺ປາຍາທິຠາວໍ ທສ຺ເສຕິ. ຣຕ຺ຕິຠາຄໍ ວາ ທິວສຠາຄໍ ວາຕິ ຠຸມ຺ມຕ຺ເຖ ອຸປໂຍຄວຈນນ຺ຕິ ອາຫ ‘‘ຣຕ຺ຕິໂກຏ຺ຐາເສ ວາ ທິວສໂກຏ຺ຐາເສ ວາ’’ຕິ. ຣຕ຺ຕິໍເຍວ ປກ຺ກມິຕພ຺ພໍ ສມຓຘມ຺ມສ຺ສ ຕຕ຺ຖ ອນິປ຺ຜຊ຺ຊນໂຕ. ສງ຺ຂາປີຕິ ‘‘ຍທຕ຺ຖມຫໍ ປພ຺ພຊິໂຕ, ນ ເມຕໍ ອິຘ ນິປ຺ຜຊ຺ຊຕິ, ຈີວຣາທິ ປນ ສມຸທາຄຈ຺ຉຕິ, ນາຫໍ ຕທຕ຺ຖໍ ປພ຺ພຊິໂຕ, ກິໍ ເມ ອິຘ ວາເສນາ’’ຕິ ປຏິສງ຺ຂາຍປິ. ເຕນາຫ ‘‘ສາມຎ຺ຎຕ຺ຖສ຺ສ ຠາວນາປາຣິປູຣິອຄມນໍ ຊານິຕ຺ວາ’’ຕິ. ອນນ຺ຕຣວາເຣ ສງ຺ຂາປີຕິ ສມຓຘມ຺ມສ຺ສ ນິປ຺ຜຊ຺ຊນຠາວໍ ຊານິຕ຺ວາ. ໂສ ປຸຄ຺ຄໂລ ອນາປຸຈ຺ຉາ ປກ຺ກມິຕພ຺ພໍ, ນານຸພນ຺ຘິຕພ຺ໂພຕິ ‘‘ໂສ ປຸຄ຺ຄໂລ’’ຕິ ປທສ຺ສ ‘‘ນານຸພນ຺ຘິຕພ຺ໂພ’’ຕິ ອິມິນາ ສມ຺ພນ຺ໂຘ. ຍສ຺ສ ເຍນ ຫິ ສມ຺ພນ຺ໂຘ, ທູຣຏ຺ເຐນປິ ໂສ ຠວຕິ. ຕໍ ປຸຄ຺ຄລນ຺ຕິ ໂສ ປຸຄ຺ຄໂລຕິ ປຈ຺ຈຕ຺ຕວຈນໍ ອຸປໂຍຄວເສນ ປຣິຓາເມຕ຺ວາ ຕໍ ປຸຄ຺ຄລໍ ອນາປຸຈ຺ຉາ ປກ຺ກມິຕພ຺ພນ຺ຕິ ອຕ຺ໂຖ. ອຕ຺ຖວເສນ ຫິ ວິຠຕ຺ຕິປຣິຓາໂມຕິ. ອາປຸຈ຺ຉາ ປກ຺ກມິຕພ຺ພນ຺ຕິ ຈ ກຕຎ຺ຎຸກຕເວທິຕາຍ ນິໂຍຊນໍ. ເອວຣູໂປຕິ ຍໍ ນິສ຺ສາຍ ຠິກ຺ຂຸໂນ ຄຸເຓຫິ ວຸທ຺ຘິເຍວ ປາຏິກງ຺ຂາ, ປຈ຺ຈເຍຫິ ນ ປຣິສ຺ສໂຍ, ເອວຣູໂປ ທຓ຺ຑກມ຺ມາທີຫິ ນິຄ຺ຄຓ຺ຫາຕິ ເຈປິ, ນ ປຣິຈ຺ຈຊິຕພ຺ໂພຕິ ທສ຺ເສຕິ ‘‘ສເຈປີ’’ຕິອາທິນາ.

ເສວນາສຸຕ຺ຕວຓ຺ຓນາ ນິຏ຺ຐິຕາ.