໙. ປຣິສາສຸຕ຺ຕວຓ຺ຓນາ

໖໙. ນວເມ (ທີ. ນິ. ຏີ. ໒.໑໗໒) ສມາຄນ຺ຕພ຺ພໂຕ, ສມາຄຈ຺ຉຕີຕິ ວາ ສມາຄໂມ, ປຣິສາ. ພິມ຺ພິສາຣປ຺ປມຸໂຂ ສມາຄໂມ ພິມ຺ພິສາຣສມາຄໂມ. ເສສທ຺ວເຍປິ ເອເສວ ນໂຍ. ພິມ຺ພິສາຣ…ເປ… ສມາຄມສທິສໍ ຂຕ຺ຕິຍປຣິສນ຺ຕິ ໂຍຊນາ. ອຎ຺ເຎສຸ ຈກ຺ກວາເຬສຸປິ ລພ຺ຠເຕວ ສຕ຺ຖຸ ຂຕ຺ຕິຍປຣິສາທິອຸປສງ຺ກມນໍ. ອາທິໂຕ ເຕຫິ ສທ຺ຘິໍ ສຕ຺ຖຸ ຠາສນໍ ອາລາໂປ, ກຖນປ຺ປຏິກຖນໍ ສລ຺ລາໂປ. ຘມ຺ມູປສໍຫິຕາ ປຸຈ຺ຉາປຏິປຸຈ຺ຉາ ຘມ຺ມສາກຈ຺ຉາ. ສຓ຺ຐານໍ ປຏິຈ຺ຈ ກຖິຕໍ ສຓ຺ຐານປຣິຍາຍຕ຺ຕາ ວຓ຺ຓ-ສທ຺ທສ຺ສ ‘‘ມຫນ຺ຕໍ ຫຕ຺ຖິຣາຊວຓ຺ຓໍ ອຠິນິມ຺ມິນິຕ຺ວາ’’ຕິອາທີສຸ (ສໍ. ນິ. ໑.໑໓໘) ວິຍ. ເຕສນ຺ຕິ ປທໍ ອຸຠຍປທາເປກ຺ຂໍ ‘‘ເຕສມ຺ປິ ລກ຺ຂຓສຓ຺ຐານໍ ວິຍ ສຕ຺ຖຸ ສຣີຣສຓ຺ຐານໍ ເຕສໍ ເກວລໍ ປຎ຺ຎາຍຕິ ເອວາ’’ຕິ. ນາປິ ອາມຸຕ຺ຕມຓິກຸຓ຺ຑໂລ ຠຄວາ ໂຫຕີຕິ ໂຍຊນາ. ຉິນ຺ນສ຺ສຣາຕິ ທ຺ວິຘາ ຠິນ຺ນສ຺ສຣາ. ຄຄ຺ຄຣສ຺ສຣາຕິ ຊຊ຺ຊຣິຕສ຺ສຣາ. ຠາສນ຺ຕຣນ຺ຕິ ເຕສໍ ສຕ຺ຕານໍ ຠາສາໂຕ ອຎ຺ຎໍ ຠາສໍ. ວີມໍສາຕິ ຈິນ຺ຕນາ. ກິມຕ຺ຖໍ…ເປ… ເທເສຕີຕິ ອິທໍ ນນຸ ອຕ຺ຕານໍ ຊານາເປຕ຺ວາ ຘມ຺ເມ ກຖິເຕ ເຕສໍ ສາຕິສໂຍ ປສາໂທ ໂຫຕີຕິ ອິມິນາ ອຘິປ຺ປາເຍນ ວຸຕ຺ຕໍ? ເຍສໍ ອຕ຺ຕານໍ ອຊານາເປຕ຺ວາວ ຘມ຺ເມ ກຖິເຕ ປສາໂທ ໂຫຕິ, ນ ຊານາເປຕ຺ວາ, ຕາທິເສ ສນ຺ຘາຍ ສຕ຺ຖາ ຕຖາ ກໂຣຕິ. ຕຕ຺ຖ ປໂຍຊນມາຫ ‘‘ວາສນຕ຺ຖາຍາ’’ຕິ. ເອວໍ ສຸໂຕປີຕິ ເອວໍ ອວິຎ຺ຎາຕເທສໂກ ອວິຎ຺ຎາຕາຄມໂນປິ ສຸໂຕ ຘມ຺ໂມ ອຕ຺ຕໂນ ຘມ຺ມສຸຘມ຺ມຕາເຍວ ອນາຄເຕ ປຈ຺ຈໂຍ ໂຫຕິ ສຸຓນ຺ຕສ຺ສ.

ປຣິສາສຸຕ຺ຕວຓ຺ຓນາ ນິຏ຺ຐິຕາ.