໕. ອຸໂປສຖວຄ຺ໂຄ
໑-໘. ສໍຂິຕ຺ຕູໂປສຖສຸຕ຺ຕາທິວຓ຺ຓນາ
໔໑-໔໘. ປຎ຺ຈມສ຺ສ ປຐມາທີສຸ ນຕ຺ຖິ ວຕ຺ຕພ຺ພໍ. ຉຏ຺ເຐ (ສໍ. ນິ. ຏີ. ໑.໑.໑໖໕) ປຎ຺ຈ ອງ຺ຄານິ ເອຕສ຺ສາຕິ ປຎ຺ຈງ຺ຄໍ, ປຎ຺ຈງ຺ຄເມວ ປຎ຺ຈງ຺ຄິກໍ, ຕສ຺ສ ປຎ຺ຈງ຺ຄິກສ຺ສ. ມຫຕີ ທທ຺ທຣີ ວີຓາວິເສໂສປິ ອາຕຕເມວາຕິ ‘‘ຈມ຺ມປຣິໂຍນທ຺ເຘສູ’’ຕິ ວິເສສນໍ ກຕໍ. ເອກຕລຕູຣິຍໍ ກຸມ຺ຠຖຸນທທ຺ທຣິກາທິ. ອຸຠຍຕລໍ ເຠຣິມຸທິງ຺ຄາທິ. ຈມ຺ມປຣິໂຍນທ຺ຘໍ ຫຸຕ຺ວາ ວິນິພທ຺ຘໍ ອາຕຕວິຕຕໍ. ສພ຺ພໂສ ປຣິໂຍນທ຺ຘໍ ນາມ ຈຕຸຣສ຺ສອມ຺ພຓໍ ປຓວາທິ ຈ. ໂຄມຸຂີອາທີນມ຺ປິ ເອຕ຺ເຖວ ສງ຺ຄໂຫ ທຏ຺ຐພ຺ໂພ. ວໍສາທີຕິ ອາທິ-ສທ຺ເທນ ສງ຺ຂາທີນໍ ສງ຺ຄໂຫ. ສມ຺ມາທີຕິ ສມ຺ມຕາຬກໍສຕາຬສິລາສລາກຕາຬາທິ. ຕຕ຺ຖ ສມ຺ມຕາຬໍ ນາມ ທນ຺ຕມຍຕາຬໍ. ກໍສຕາຬໍ ໂລຫມຍໍ. ສິລາມຍໍ ອໂຍປຕ຺ເຕນ ຈ ວາທນຕາຬໍ ສິລາສລາກຕາຬໍ. ສຸມຸຈ຺ຉິຕສ຺ສາຕິ ສຸຏ຺ຐຸ ປຏິຍຕ຺ຕສ຺ສ. ປມາເຓຕິ ນາຕິທຬ຺ຫນາຕິສິຖິລສງ຺ຂາເຕ ມຊ຺ຌິເມ ມຸຈ຺ຉນາປມາເຓ. ເຉໂກຕິ ປຏຸ ປຏ຺ໂຐ. ໂສ ຈສ຺ສ ປຏຸຠາໂວ ມໂນຫໂຣຕິ ອາຫ ‘‘ສຸນ຺ທໂຣ’’ຕິ. ຣຎ຺ເຊຕຸນ຺ຕິ ຣາຄໍ ອຸປ຺ປາເທຕຸໍ. ຂມເຕວາຕິ ໂຣຈເຕວ. ນ ນິພ຺ພິນ຺ທຕີຕິ ນ ຕຊ຺ເຊຕິ, ໂສຕສຸຂຠາວໂຕ ປິຍາຍິຕພ຺ໂພວ ໂຫຕິ.
ຠຕ຺ຕາຣໍ ນາຕິມຎ຺ຎຕີຕິ ສາມິກໍ ມຸຎ຺ຈິຕ຺ວາ ອຎ຺ຎໍ ມນສາປິ ນ ປຕ຺ເຖຕິ. ອຸຏ຺ຐາຫິກາຕິ ອຸຏ຺ຐານວີຣິຍສມ຺ປນ຺ນາ. ອນລສາຕິ ນິກ຺ໂກສຊ຺ຊາ. ສງ຺ຄຫິຕປຣິຊ຺ຊນາຕິ ສມ຺ມານນາທີຫິ ເຈວ ຉຓາທີສຸ ເປເສຕພ຺ພ-ປິຍຠຓ຺ຑາທິປຓ຺ຓາກາຣເປສນາທີຫິ ຈ ສງ຺ຄຫິຕປຣິຊນາ. ອິຘ ປຣິຊໂນ ນາມ ສາມິກສ຺ສ ເຈວ ອຕ຺ຕໂນ ຈ ຎາຕິຊໂນ. ສມ຺ຠຕນ຺ຕິ ກສິວຓິຊ຺ຊາທີນິ ກຕ຺ວາ ອາຠຕຘນໍ. ສຕ຺ຕມຏ຺ຐມານິ ອຸຕ຺ຕານຕ຺ຖານິ.
ສໍຂິຕ຺ຕູໂປສຖສຸຕ຺ຕາທິວຓ຺ຓນາ ນິຏ຺ຐິຕາ.
໙-໑໐. ປຐມອິຘໂລກິກສຸຕ຺ຕາທິວຓ຺ຓນາ
໔໙-໕໐. ນວເມ ອິຘໂລກວິຊຍາຍາຕິ ອິຘໂລກວິຊິນນຕ຺ຖາຍ ອຠິຠວຕ຺ຖາຍ. ໂຍ ຫິ ທິຏ຺ຐຘມ຺ມິກໍ ອນຕ຺ຖໍ ປຣິວຊ຺ຊນວເສນ ອຠິຠວຕິ, ຕໂຕ ເອວ ຕທຕ຺ຖໍ ສມ຺ປາເທຕິ, ໂສ ອິຘໂລກວິຊຍາຍ ປຏິປນ຺ໂນ ນາມ ໂຫຕິ ປຈ຺ຈຕ຺ຖິກນິຄ຺ຄຓ຺ຫນໂຕ ສທຕ຺ຖສມ຺ປາທນໂຕ ຈ. ເຕນາຫ ‘‘ອຍໍສ ໂລໂກ ອາຣທ຺ໂຘ ໂຫຕີ’’ຕິ. (ປສໍສາວຫໂຕ ຕຍິທໍ ປສໍສາວຫນໍ ກິຕ຺ຕິສທ຺ເທນ ອິຘໂລເກ ສທ຺ທານໍ ຈິຕ຺ຕໂຕສນວິທ຺ເຘຍ຺ຍຠາວາປາທເນນ ຈ ໂຫຕີຕິ ທຏ຺ຐພ຺ພໍ.) ສຸສໍວິຫິຕກມ຺ມນ຺ໂຕຕິ ຍາຄຸຠຕ຺ຕປຈນກາລາທີນິ ອນຕິກ຺ກມິຕ຺ວາ ຕສ຺ສ ຕສ຺ສ ສາຘຸກໍ ກຣເຓນ ສຸຏ຺ຐຸ ສໍວິຫິຕກມ຺ມນ຺ໂຕ. ປຣໂລກວິຊຍາຍາຕິ ປຣໂລກສ຺ສ ວິຊິນນຕ຺ຖາຍ ອຠິຠວຕ຺ຖາຍ. ໂຍ ຫິ ສມ຺ປຣາຍິກໍ ອນຕ຺ຖໍ ປຣິວຊ຺ຊນວເສນ ອຠິຠວຕິ, ຕໂຕ ເອວ ຕທຕ຺ຖໍ ສມ຺ປາເທຕິ, ໂສ ປຣໂລກວິຊຍາຍ ປຏິປນ຺ໂນ ນາມ ໂຫຕິ. ເສສໍ ສພ຺ພຕ຺ຖ ອຸຕ຺ຕານເມວ.
ປຐມອິຘໂລກິກສຸຕ຺ຕາທິວຓ຺ຓນາ ນິຏ຺ຐິຕາ.
ອຸໂປສຖວຄ຺ຄວຓ຺ຓນາ ນິຏ຺ຐິຕາ.
ປຐມປຓ຺ຓາສກໍ ນິຏ຺ຐິຕໍ.