໔. ຘມ຺ມຎ຺ຎູສຸຕ຺ຕວຓ຺ຓນາ

໖໘. ຈຕຸຕ຺ເຖ ສຸຕ຺ຕເຄຍ຺ຍາທິຘມ຺ມໍ ຊານາຕີຕິ ຘມ຺ມຎ຺ຎູ. ຕສ຺ສ ຕສ຺ເສວ ສຸຕ຺ຕເຄຍ຺ຍາທິນາ ຠາສິຕສ຺ສ ຕທຎ຺ຎສ຺ສ ສຸຕ຺ຕປທຕ຺ຖສ຺ສ ໂພຘກສ຺ສ ສທ຺ທສ຺ສ ອຕ຺ຖກຸສລຕາວເສນ ອຕ຺ຖໍ ຊານາຕີຕິ ອຕ຺ຖຎ຺ຎູ. ‘‘ເອຕ຺ຕໂກມ຺ຫິ ສີເລນ ສມາຘິນາ ປຎ຺ຎາຍາ’’ຕິ ເອວໍ ຍຖາ ອຕ຺ຕໂນ ປມາຓຊານນວເສນ ອຕ຺ຕານໍ ຊານາຕີຕິ ອຕ຺ຕຎ຺ຎູ. ປຏິຄ຺ຄຫຓປຣິໂຠຄປຣິເຍສນວິສ຺ສຊ຺ຊເນສຸ ມຕ຺ຕໍ ຊານາຕີຕິ ມຕ຺ຕຎ຺ຎູ. ນິທ຺ເທເສ ປນ ປຏິຄ຺ຄຫຓມຕ຺ຕຎ຺ຎຸຕາຍ ເອວ ປຣິໂຠຄາທິມຕ຺ຕຎ຺ຎຸຕາ ປໂພຘິຕາ ໂຫຕີຕິ ປຏິຄ຺ຄຫຓມຕ຺ຕຎ຺ຎຸຕາວ ທສ຺ສິຕາ. ‘‘ອຍໍ ກາໂລ ອຸທ຺ເທສສ຺ສ, ອຍໍ ກາໂລ ປຣິປຸຈ຺ຉາຍ, ອຍໍ ກາໂລ ໂຍຄສ຺ສ ອຘິຄມາຍາ’’ຕິ ເອວໍ ກາລໍ ຊານາຕີຕິ ກາລຎ຺ຎູ. ຕຕ຺ຖ ປຎ຺ຈ ວສ຺ສານິ ອຸທ຺ເທສສ຺ສ ກາໂລ, ທສ ປຣິປຸຈ຺ຉາຍ, ອິທໍ ອຕິສມ຺ພາຘໍ, ອຕິກ຺ຂປຎ຺ຎສ຺ສ ຕາວຕາ ກາເລນ ຕີເຣຕຸໍ ອສກ຺ກຸເຓຍ຺ຍຕ຺ຕາ ທສ ວສ຺ສານິ ອຸທ຺ເທສສ຺ສ ກາໂລ, ວີສຕິ ປຣິປຸຈ຺ຉາຍ, ຕໂຕ ປຣໍ ໂຍເຄ ກມ຺ມໍ ກາຕພ຺ພໍ. ຂຕ຺ຕິຍປຣິສາທິກໍ ອຏ຺ຐວິຘໍ ປຣິສໍ ຊານາຕີຕິ ປຣິສຎ຺ຎູ. ຠິກ຺ຂຸປຣິສາທິກໍ ຈຕຸພ຺ພິຘໍ, ຂຕ຺ຕິຍປຣິສາທິກໍ ມນຸສ຺ສປຣິສໍເຍວ ປຸນ ຈຕຸພ຺ພິຘໍ ຄເຫຕ຺ວາ ອຏ຺ຐວິຘໍ ວທນ຺ຕິ ອປເຣ. ນິທ຺ເທເສ ປນສ຺ສ ຂຕ຺ຕິຍປຣິສາທິຈຕຸພ຺ພິຘປຣິສຄ຺ຄຫຓໍ ນິທສ຺ສນມຕ຺ຕໍ ທຏ຺ຐພ຺ພໍ. ‘‘ອິມໍ ເມ ເສວນ຺ຕສ຺ສ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ, ຕສ຺ມາ ອຍໍ ປຸຄ຺ຄໂລ ເສວິຕພ຺ໂພ, ວິປຣິຍາຍໂຕ ອຎ຺ໂຎ ອເສວິຕພ຺ໂພ’’ຕິ ເສວິຕພ຺ພາເສວິຕພ຺ພປຸຄ຺ຄລໍ ຊານາຕີຕິ ປຸຄ຺ຄລປໂຣປຣຎ຺ຎູ. ເອວຎ຺ຫິ ເຕສໍ ປຸຄ຺ຄລານໍ ປໂຣປຣໍ ອຸກ຺ກຏ຺ຐນິຫີນຕໍ ຊານາຕິ ນາມ. ນິທ຺ເທເສປິສ຺ສ ເສວິຕພ຺ພາເສວິຕພ຺ພປຸຄ຺ຄເລ ວິຠາວນເມວ ສມຓກຖາກຕນ຺ຕິ ທຏ຺ຐພ຺ພໍ.

ຘມ຺ມຎ຺ຎູສຸຕ຺ຕວຓ຺ຓນາ ນິຏ຺ຐິຕາ.