໘. ອຣຫຕ຺ຕວຄ຺ໂຄ

໑-໓. ທຸກ຺ຂສຸຕ຺ຕາທິວຓ຺ຓນາ

໗໕-໗໗. ອຏ຺ຐມສ຺ສ ປຐມາທີສຸ ນຕ຺ຖິ ວຕ຺ຕພ຺ພໍ. ຕຕິເຍ ຕິວິຘໍ ກຸຫນວຕ຺ຖຸນ຺ຕິ ປຈ຺ຈຍປ຺ປຏິເສວນສາມນ຺ຕຊປ຺ປນອິຣິຍາປຖປ຺ປວຕ຺ຕນສງ຺ຂາຕໍ ຕິວິຘໍ ກຸຫນວຕ຺ຖຸໍ. ອຸກ຺ຂິປິຕ຺ວາຕິ ‘‘ມຫາກຸຏຸມ຺ພິໂກ ມຫານາວິໂກ ມຫາທານປຕີ’’ຕິອາທິນາ ປຄ຺ຄຓ຺ຫິຕ຺ວາ ລປນໍ. ອວກ຺ຂິປິຕ຺ວາຕິ ‘‘ກິໍ ອິມສ຺ສ ຊີວິຕໍ, ພີຊໂຠຊໂນ ນາມາຍ’’ນ຺ຕິ ຫີເຬຕ຺ວາ ລປນໍ.

ທຸກ຺ຂສຸຕ຺ຕາທິວຓ຺ຓນາ ນິຏ຺ຐິຕາ.

໔. ສຸຂໂສມນສ຺ສສຸຕ຺ຕວຓ຺ຓນາ

໗໘. ຈຕຸຕ຺ເຖ ຍຖາວຸຕ຺ຕຘມ຺ມາທີສຸ ຕສ຺ສ ກິເລສນິມິຕ຺ຕໍ ທຸກ຺ຂໍ ອນວສ຺ສນນ຺ຕິ ‘‘ສຸຂໂສມນສ຺ສພຫຸໂລ ວິຫຣຕີ’’ຕິ ວຸຕ຺ຕໍ. ກາຍິກສຸຂຎ຺ເຈວ ເຈຕສິກໂສມນສ຺ສຎ຺ຈ ພຫຸລໍ ອສ຺ສາຕິ ສຸຂໂສມນສ຺ສພຫຸໂລ. ຍວຕິ ເຕນ ຜລໍ ມິສ຺ສິຕໍ ວິຍ ໂຫຕີຕິ ໂຍນິ, ເອກນ຺ຕິກໍ ກາຣຓໍ. ອສ຺ສາຕິ ຍຖາວຸຕ຺ຕສ຺ສ ຠິກ຺ຂຸໂນ. ປຣິປຸຓ຺ຓນ຺ຕິ ອວິກລໍ ອນວເສສໍ.

ສຸຂໂສມນສ຺ສສຸຕ຺ຕວຓ຺ຓນາ ນິຏ຺ຐິຕາ.

໕. ອຘິຄມສຸຕ຺ຕວຓ຺ຓນາ

໗໙. ປຎ຺ຈເມ ອາຄຈ຺ຉນ຺ຕິ ເອເຕນ ກຸສລາ ວາ ອກຸສລາ ວາຕິ ອາຄມນໍ, ກຸສລາກຸສລານໍ ອຸປ຺ປຕ຺ຕິກາຣຓໍ. ຕຕ຺ຖ ກຸສໂລຕິ ອາຄມນກຸສໂລ. ເອວໍ ຘມ຺ເມ ມນສິກໂຣໂຕ ກຸສລາ ວາ ອກຸສລາ ວາ ຘມ຺ມາ ອຠິວຑ຺ຒນ຺ຕີຕິ ເອວໍ ຊານນ຺ໂຕ. ອປຄຈ຺ຉນ຺ຕິ ກຸສລາ ວາ ອກຸສລາ ວາ ເອເຕນາຕິ ອປຄມນໍ. ເຕສໍ ເອວ ອນຸປ຺ປຕ຺ຕິກາຣຓໍ, ຕຕ຺ຖ ກຸສໂລຕິ ອປຄມນກຸສໂລ. ເອວໍ ຘມ຺ເມ ມນສິກໂຣໂຕ ກຸສລາ ວາ ອກຸສລາ ວາ ຘມ຺ມາ ນາຠິວຑ຺ຒນ຺ຕີຕິ ເອວໍ ຊານນ຺ໂຕ. ອຸປາຍກຸສໂລຕິ ຐານຸປ຺ປຕ຺ຕິກປຎ຺ຎາສມນ຺ນາຄໂຕ. ອິທຎ຺ຈ ອຈ຺ຈາຍິກກິຈ຺ເຈ ວາ ຠເຍ ວາ ອຸປ຺ປນ຺ເນ ຕສ຺ສ ຕິກິຈ຺ຉນຕ຺ຖໍ ຐານຸປ຺ປຕ຺ຕິຍາ ກາຣຓຊານນວເສນ ເວທິຕພ຺ພໍ.

ອຘິຄມສຸຕ຺ຕວຓ຺ຓນາ ນິຏ຺ຐິຕາ.

໖-໗. ມຫນ຺ຕຕ຺ຕສຸຕ຺ຕາທິວຓ຺ຓນາ

໘໐-໘໑. ຉຏ຺ເຐ ສມ຺ປຕ຺ເຕຕິ ກິເລເສ ສມ຺ປຕ຺ເຕ. ສຕ຺ຕມໍ ອຸຕ຺ຕານເມວ.

ມຫນ຺ຕຕ຺ຕສຸຕ຺ຕາທິວຓ຺ຓນາ ນິຏ຺ຐິຕາ.

໘-໑໐. ທຸຕິຍນິຣຍສຸຕ຺ຕາທິວຓ຺ຓນາ

໘໒-໘໔. ອຏ຺ຐເມ ກາຍປາຄພ຺ຠິຍາທີຫີຕິ ອາທິ-ສທ຺ເທນ ວຈີປາຄພ຺ຠິຍໍ ມໂນປາຄພ຺ຠິຍຎ຺ຈ ສງ຺ຄຓ຺ຫາຕິ. ນວມາທີນິ ອຸຕ຺ຕານຕ຺ຖາເນວ.

ທຸຕິຍນິຣຍສຸຕ຺ຕາທິວຓ຺ຓນາ ນິຏ຺ຐິຕາ.

ອຣຫຕ຺ຕວຄ຺ຄວຓ຺ຓນາ ນິຏ຺ຐິຕາ.