໙. ສີຕິວຄ຺ໂຄ

໑. ສີຕິຠາວສຸຕ຺ຕວຓ຺ຓນາ

໘໕. ນວມສ຺ສ ປຐເມ ສີຕິຠາວນ຺ຕິ ນິພ຺ພານໍ, ກິເລສວູປສມໍ ວາ. ນິຄ຺ຄຓ຺ຫາຕີຕິ ອຈ຺ຈາຣທ຺ຘວີຣິຍຕາທີຫິ ອຸທ຺ຘຕໍ ຈິຕ຺ຕໍ ອຸທ຺ຘຈ຺ຈປກ຺ຂໂຕ ຣກ຺ຂຓວເສນ ນິຄ຺ຄຓ຺ຫາຕິ. ປຄ຺ຄຓ຺ຫາຕີຕິ ອຕິສິຖິລວີຣິຍຕາທີຫິ ລີນໍ ຈິຕ຺ຕໍ ໂກສຊ຺ຊປາຕໂຕ ຣກ຺ຂຓວເສນ ປຄ຺ຄຓ຺ຫາຕິ. ສມ຺ປຫໍເສຕີຕິ ສມປ຺ປວຕ຺ຕຈິຕ຺ຕໍ ຕຖາປວຕ຺ຕິຍໍ ປຎ຺ຎາຍ ໂຕເສຕິ ອຸຕ຺ເຕເຊຕິ ວາ. ຍທາ ວາ ປຎ຺ຎາປໂຍຄມນ຺ທຕາຍ ອຸປສມສຸຂານຘິຄເມນ ວາ ນິຣສ຺ສາທໍ ຈິຕ຺ຕໍ ຠາວນາຍ ນ ປກ຺ຂນ຺ທຕິ, ຕທາ ຊາຕິອາທີນິ ສໍເວຄວຕ຺ຖູນິ ປຈ຺ຈເວກ຺ຂິຕ຺ວາ ສມ຺ປຫໍເສຕິ ສມຸຕ຺ເຕເຊຕິ. ອຊ຺ຌຸເປກ຺ຂຕີຕິ ຍທາ ປນ ຈິຕ຺ຕໍ ອລີນໍ ອນຸທ຺ຘຕໍ ອນິຣສ຺ສາທໍ ອາຣມ຺ມເຓ ສມປ຺ປວຕ຺ຕໍ ສມ຺ມເທວ ຠາວນາວີຕິໍ ໂອຕິຓ຺ຓໍ ໂຫຕິ, ຕທາ ປຄ຺ຄຫນິຄ຺ຄຫສມ຺ປຫໍສເນສຸ ກິຎ຺ຈິ ພ຺ຍາປາຣໍ ອກຕ຺ວາ ສມປ຺ປວຕ຺ເຕສຸ ອສ຺ເສສຸ ສາຣຖີ ວິຍ ອຊ຺ຌຸເປກ຺ຂຕິ, ອຸເປກ຺ຂໂກວ ໂຫຕິ. ປຓີຕາຘິມຸຕ຺ຕິໂກຕິ ປຓີເຕ ອຸຕ຺ຕເມ ມຄ຺ຄຜເລ ອຘິມຸຕ຺ໂຕ ນິນ຺ນໂປຓປພ຺ຠາໂຣ.

ສີຕິຠາວສຸຕ຺ຕວຓ຺ຓນາ ນິຏ຺ຐິຕາ.

໒-໑໑. ອາວຣຓສຸຕ຺ຕາທິວຓ຺ຓນາ

໘໖-໙໕. ທຸຕິເຍ ອຈ຺ຉນ຺ທິໂກຕິ ກຕ຺ຕຸກມ຺ຍຕາກຸສລຈ຺ຉນ຺ທຣຫິໂຕ. ອຸຕ຺ຕຣກຸຣຸກາ ມນຸສ຺ສາ ອຈ຺ຉນ຺ທິກຏ຺ຐານໍ ປວິຏ຺ຐາ. ທຸປ຺ປຎ຺ໂຎຕິ ຠວງ຺ຄປຎ຺ຎາຍ ປຣິຫີໂນ. ຠວງ຺ຄປຎ຺ຎາຍ ປນ ປຣິປຸຓ຺ຓາຍປິ ຍສ຺ສ ຠວງ຺ຄໍ ໂລກຸຕ຺ຕຣສ຺ສ ປຈ຺ຈໂຍ ນ ໂຫຕິ, ໂສປິ ທຸປ຺ປຎ຺ໂຎ ເອວ ນາມ. ອຠພ຺ໂພ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕນ຺ຕິ ກຸສເລສຸ ຘມ຺ເມສຸ ສມ຺ມຕ຺ຕນິຍາມສງ຺ຂາຕໍ ອຣິຍມຄ຺ຄໍ ໂອກ຺ກມິຕຸໍ ອຘິຄນ຺ຕຸໍ ອຠພ຺ໂພ. ນ ກມ຺ມາວຣຓຕາຍາຕິອາທີສຸ ອຠພ຺ພວິປຣິຍາເຍນ ອຕ຺ໂຖ ເວທິຕພ຺ໂພ. ຈຕຸຕ຺ຖາທີນິ ອຸຕ຺ຕານຕ຺ຖານິ.

ອາວຣຓສຸຕ຺ຕາທິວຓ຺ຓນາ ນິຏ຺ຐິຕາ.

ສີຕິວຄ຺ຄວຓ຺ຓນາ ນິຏ຺ຐິຕາ.