໗-໑໐. ສກ຺ຂິຠພ຺ພສຸຕ຺ຕາທິວຓ຺ຓນາ

໗໑-໗໔. ສຕ຺ຕເມ ຕສ຺ມິໍ ຕສ຺ມິໍ ວິເສເສຕິ ຕສ຺ມິໍ ຕສ຺ມິໍ ສຈ຺ຉິກາຕພ຺ເພ ວິເສເສ. ສກ຺ຂິຠາວາຍ ປຈ຺ຈກ຺ຂກາຣິຕາຍ ຠພ຺ໂພ ສກ຺ຂິຠພ຺ໂພ, ຕສ຺ສ ຠາໂວ ສກ຺ຂິຠພ຺ພຕາ. ຕໍ ສກ຺ຂິຠພ຺ພຕໍ. ສຕິ ສຕິອາຍຕເນຕິ ສຕິ ສຕິກາຣເຓ. ກິຎ຺ເຈຕ຺ຖ ກາຣຓໍ? ອຠິຎ຺ຎາ ວາ ອຠິຎ຺ຎາປາທກຊ຺ຌານໍ ວາ, ອວສາເນ ປນ ຉຏ຺ຐາຠິຎ຺ຎາຍ ອຣຫຕ຺ຕໍ ວາ ກາຣຓໍ, ອຣຫຕ຺ຕສ຺ສ ວິປສ຺ສນາ ວາຕິ ເວທິຕພ຺ພໍ. ຍຎ຺ຫິ ຕໍ ຕຕ຺ຣ ຕຕ຺ຣ ສກ຺ຂິຠພ຺ພຕາສງ຺ຂາຕໍ ອິທ຺ຘິວິຘປຈ຺ຈນຸຠວນາທິ, ຕສ຺ສ ອຠິຎ຺ຎາ ກາຣຓໍ. ອຖ ອິທ຺ຘິວິຘປຈ຺ຈນຸຠວນາທິ ອຠິຎ຺ຎາ, ເອວໍ ສຕິ ອຠິຎ຺ຎາປາທກຊ຺ຌານໍ ກາຣຓໍ. ອຣຫຕ຺ຕມ຺ປິ ‘‘ກຸທາສ຺ສຸ ນາມາຫໍ ຕທາຍຕນໍ ອຸປສມ຺ປຊ຺ຊ ວິຫຣິສ຺ສາມີ’’ຕິ ອນຸຕ຺ຕເຣສຸ ວິໂມກ຺ເຂສຸ ປິຫໍ ອຸປຏ຺ຐເປຕ຺ວາ ຉຏ຺ຐາຠິຎ຺ຎໍ ນິພ຺ພຕ຺ເຕນ຺ຕສ຺ສ ກາຣຓໍ. ອິທຎ຺ຈ ສພ຺ພສາຘາຣຓໍ ນ ໂຫຕິ, ສາຘາຣຓວເສນ ປນ ອຣຫຕ຺ຕສ຺ສ ວິປສ຺ສນາ ກາຣຓໍ. ອຖ ວາ ສຕິ ອາຍຕເນຕິ ຕສ຺ສ ຕສ຺ສ ວິເສສາຘິຄມສ຺ສ ອຸປນິສ຺ສຍສງ຺ຂາເຕ ກາຣເຓ ສຕີຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ.

ຫານຠາຄິຍາທີສຸ ‘‘ປຐມຊ຺ຌານສ຺ສ ລາຠິໍ ກາມສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ, ຫານຠາຄິໂຍ ສມາຘິ. ຕທນຸຘມ຺ມຕາ ສຕິ ສນ຺ຕິຏ຺ຐຕິ, ຐິຕິຠາຄິໂຍ ສມາຘິ. ອວິຕກ຺ກສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ, ວິເສສຠາຄິໂຍ ສມາຘິ. ນິພ຺ພິທາສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິຣາຄູປສໍຫິຕາ, ນິພ຺ເພຘຠາຄິໂຍ ສມາຘີ’’ຕິ (ວິຠ. ໗໙໙) ອິມິນາ ນເຍນ ສພ຺ພສມາປຕ຺ຕິໂຍ ວິຕ຺ຖາເຣຕ຺ວາ ຫານຠາຄິຍາທິອຕ຺ໂຖ ເວທິຕພ຺ໂພ. ຕຕ຺ຖ ປຐມຊ຺ຌານສ຺ສ ລາຠິນ຺ຕິ ຍ຺ວາຍໍ ອປ຺ປຄຸຓສ຺ສ ປຐມສ຺ສ ຌານສ຺ສ ລາຠີ, ຕໍ. ກາມສຫຄຕາ ສຎ຺ຎາມນສິກາຣາ ສມຸທາຈຣນ຺ຕີຕິ ຕໂຕ ວຸຏ຺ຐິຕໍ ອາຣມ຺ມຓວເສນ ກາມສຫຄຕາ ຫຸຕ຺ວາ ສຎ຺ຎາມນສິກາຣາ ສມຸທາຈຣນ຺ຕິ ຕຸທນ຺ຕິ, ຕສ຺ສ ກາມານຕີຕສ຺ສ ກາມານຸປກ຺ຂນ຺ທານໍ ສຎ຺ຎາມນສິກາຣານໍ ວເສນ ໂສ ປຐມຊ຺ຌານສມາຘິ ຫາຍຕິ ປຣິຫາຍຕິ, ຕສ຺ມາ ຫານຠາຄິໂຍ ວຸຕ຺ໂຕ. ຕທນຸຘມ຺ມຕາຕິ ຕທນຸຣູປສຠາໂວ. ສຕິ ສນ຺ຕິຏ຺ຐຕີຕິ ອິທໍ ມິຈ຺ຉາສຕິໍ ສນ຺ຘາຍ ວຸຕ຺ຕໍ. ຍສ຺ສ ຫິ ປຐມຊ຺ຌານານຸຣູປສຠາວາ ປຐມຊ຺ຌານໍ ສນ຺ຕໂຕ ປຓີຕໂຕ ທິສ຺ວາ ອສ຺ສາທຍມານາ ອຠິນນ຺ທມານາ ນິກນ຺ຕິ ໂຫຕິ, ຕສ຺ສ ນິກນ຺ຕິວເສນ ໂສ ປຐມຊ຺ຌານສມາຘິ ເນວ ຫາຍຕິ ນ ວຑ຺ຒຕິ, ຐິຕິໂກຏ຺ຐາສິໂກ ໂຫຕິ. ເຕນ ວຸຕ຺ຕໍ ‘‘ຐິຕິຠາຄິໂຍ ສມາຘີ’’ຕິ. ອວິຕກ຺ກສຫຄຕາຕິ ອວິຕກ຺ກໍ ທຸຕິຍຊ຺ຌານໍ ສນ຺ຕໂຕ ປຓີຕໂຕ ມນສິກໂຣໂຕ ອາຣມ຺ມຓວເສນ ອວິຕກ຺ກສຫຄຕາ. ສຎ຺ຎາມນສິກາຣາ ສມຸທາຈຣນ຺ຕີຕິ ປຄຸຓປຐມຊ຺ຌານໂຕ ວຸຏ຺ຐິຕໍ ທຸຕິຍຊ຺ຌານາຘິຄມຕ຺ຖາຍ ໂຈເທນ຺ຕິ ຕຸທນ຺ຕິ. ຕສ຺ສ ອຸປຣິ ທຸຕິຍຊ຺ຌານານຸປກ຺ຂນ຺ທານໍ ສຎ຺ຎາມນສິກາຣານໍ ວເສນ ໂສ ປຐມຊ຺ຌານສມາຘິ ວິເສສຠູຕສ຺ສ ທຸຕິຍຊ຺ຌານສ຺ສ ອຸປ຺ປຕ຺ຕິປທຏ຺ຐານຕາຍ ‘‘ວິເສສຠາຄິໂຍ’’ຕິ ວຸຕ຺ໂຕ.

ນິພ຺ພິທາສຫຄຕາຕິ ຕເມວ ປຐມຊ຺ຌານລາຠິໍ ຌານໂຕ ວຸຏ຺ຐິຕໍ ນິພ຺ພິທາສງ຺ຂາເຕນ ວິປສ຺ສນາຎາເຓນ ສຫຄຕາ. ວິປສ຺ສນາຎາຓຎ຺ຫິ ຌານງ຺ເຄສຸ ປເຠເທນ ອຸປຏ຺ຐຫນ຺ເຕສຸ ນິພ຺ພິນ຺ທຕິ ອຸກ຺ກຓ຺ຐຕິ, ຕສ຺ມາ ‘‘ນິພ຺ພິທາ’’ຕິ ວຸຈ຺ຈຕິ. ສມຸທາຈຣນ຺ຕີຕິ ນິພ຺ພານສຈ຺ຉິກິຣິຍຕ຺ຖາຍ ໂຈເທນ຺ຕິ ຕຸທນ຺ຕິ. ວິຣາຄູປສໍຫິຕາຕິ ວິຣາຄສງ຺ຂາເຕນ ນິພ຺ພາເນນ ອຸປສໍຫິຕາ. ວິປສ຺ສນາຎາຓຎ຺ຫິ ສກ຺ກາ ອິມິນາ ມຄ຺ເຄນ ວິຣາຄໍ ນິພ຺ພານໍ ສຈ຺ຉິກາຕຸນ຺ຕິ ປວຕ຺ຕິໂຕ ‘‘ວິຣາຄູປສໍຫິຕ’’ນ຺ຕິ ວຸຈ຺ຈຕິ. ຕໍສມ຺ປຍຸຕ຺ຕາ ສຎ຺ຎາມນສິກາຣາ ວິຣາຄູປສໍຫິຕາ ເອວ ນາມ. ຕສ຺ສ ເຕສໍ ສຎ຺ຎາມນສິກາຣານໍ ວເສນ ປຐມຊ຺ຌານສມາຘິ ອຣິຍມຄ຺ຄປ຺ປຏິເວຘສ຺ສ ປທຏ຺ຐານຕາຍ ‘‘ນິພ຺ເພຘຠາຄິໂຍ’’ຕິ ວຸຕ຺ໂຕ. ຫານໍ ຠຊນ຺ຕີຕິ ຫານຠາຄິຍາ, ຫານຠາໂຄ ວາ ເອເຕສໍ ອຕ຺ຖີຕິ ຫານຠາຄິຍາ, ປຣິຫານໂກຏ຺ຐາສິກາຕິ ອຕ຺ໂຖ. ອິມິນາ ນເຍນ ຐິຕິຠາຄິໂຍ ເວທິຕພ຺ໂພ. ອຏ຺ຐມາທີນິ ອຸຕ຺ຕານຕ຺ຖາເນວ.

ສກ຺ຂິຠພ຺ພສຸຕ຺ຕາທິວຓ຺ຓນາ ນິຏ຺ຐິຕາ.

ເທວຕາວຄ຺ຄວຓ຺ຓນາ ນິຏ຺ຐິຕາ.