໔. ເທວຕາວຄ຺ໂຄ

໑-໔. ເສຂສຸຕ຺ຕາທິວຓ຺ຓນາ

໓໑-໓໔. ຈຕຸຕ຺ຖສ຺ສ ປຐເມ ເສຂານໍ ປຏິລທ຺ຘຄຸຓສ຺ສ ປຣິຫານິ ນາມ ນຕ຺ຖີຕິ ອາຫ ‘‘ອຸປຣູປຣິຄຸຓປຣິຫານາຍາ’’ຕິ, ອຸປຣູປຣິລທ຺ຘພ຺ພານໍ ມຄ຺ຄຜລານໍ ປຣິຫານາຍ ອນຸປ຺ປາທາຍາຕິ ອຕ຺ໂຖ. ຕຕິຍາທີນິ ອຸຕ຺ຕານຕ຺ຖາເນວ.

ເສຂສຸຕ຺ຕາທິວຓ຺ຓນາ ນິຏ຺ຐິຕາ.

໕. ວິຊ຺ຊາຠາຄິຍສຸຕ຺ຕວຓ຺ຓນາ

໓໕. ປຎ຺ຈເມ ສມ຺ປໂຍຄວເສນ ວິຊ຺ຊໍ ຠຊນ຺ຕິ, ສຫຊາຕອຎ຺ຎມຎ຺ຎນິສ຺ສຍສມ຺ປຍຸຕ຺ຕອຕ຺ຖິອວິຄຕາທິປຈ຺ຈຍວເສນ ຕາຍ ສຫ ເອກີຠາວໍ ຄຈ຺ຉນ຺ຕີຕິ ວິຊ຺ຊາຠາຄິຍາ. ອຖ ວາ ວິຊ຺ຊາຠາເຄ ວິຊ຺ຊາໂກຏ຺ຐາເສ ວຕ຺ຕນ຺ຕິ ວິຊ຺ຊາສຠາຄຕາຍ ຕເທກເທເສ ວິຊ຺ຊາໂກຏ຺ຐາເສ ປວຕ຺ຕນ຺ຕີຕິ ວິຊ຺ຊາຠາຄິຍາ. ຕຕ຺ຖ ວິປສ຺ສນາຎາຓໍ, ມໂນມຍິທ຺ຘິ, ຉ ອຠິຎ຺ຎາຕິ ອຏ຺ຐ ວິຊ຺ຊາ. ປຸຣິເມນ ອຕ຺ເຖນ ຕາຫິ ສມ຺ປຍຸຕ຺ຕຘມ຺ມາ ວິຊ຺ຊາຠາຄິຍາ. ປຈ຺ຉິເມນ ອຕ຺ເຖນ ຕາສຸ ຍາ ກາຈິ ເອກາວ ວິຊ຺ຊາ ວິຊ຺ຊາ, ເສສາ ວິຊ຺ຊາຠາຄິຍາ. ເອວໍ ວິຊ຺ຊາປິ ວິຊ຺ຊາຍ ສມ຺ປຍຸຕ຺ຕຘມ຺ມາປິ ‘‘ວິຊ຺ຊາຠາຄິຍາ’’ຕ຺ເວວ ເວທິຕພ຺ພາ. ອິຘ ປນ ວິປສ຺ສນາຎາຓສມ຺ປຍຸຕ຺ຕາ ສຎ຺ຎາວ ວິຊ຺ຊາຠາຄິຍາຕິ ອາຄຕາ, ສຎ຺ຎາສີເສນ ເສສສມ຺ປຍຸຕ຺ຕຘມ຺ມາປິ ວຸຕ຺ຕາ ເອວາຕິ ທຏ຺ຐພ຺ພໍ. ອນິຈ຺ຈານຸປສ຺ສນາຎາເຓຕິ ອນິຈ຺ຈານຸປສ຺ສນາຎາເຓ ນິສ຺ສຍປຈ຺ຈຍຠູເຕ ອຸປ຺ປນ຺ນສຎ຺ຎາ, ເຕນ ສຫຄຕາຕິ ອຕ຺ໂຖ. ເສເສສຸປິ ເອເສວ ນໂຍ.

ວິຊ຺ຊາຠາຄິຍສຸຕ຺ຕວຓ຺ຓນາ ນິຏ຺ຐິຕາ.

໖. ວິວາທມູລສຸຕ຺ຕວຓ຺ຓນາ

໓໖. ຉຏ຺ເຐ ໂກຘໂນຕິ ກຸຊ຺ຌນສີໂລ. ຍສ຺ມາ ໂສ ອປ຺ປຫີນໂກຘຕາຍ ອຘິຄຕໂກໂຘ ນາມ ໂຫຕິ, ຕສ຺ມາ ‘‘ໂກເຘນ ສມນ຺ນາຄໂຕ’’ຕິ ອາຫ. ອຸປນາໂຫ ເອຕສ຺ສ ອຕ຺ຖີຕິ ອຸປນາຫີ, ອຸປນຍ຺ຫນສີໂລຕິ ວາ ອຸປນາຫີ. ວິວາໂທ ນາມ ອຸປ຺ປຊ຺ຊມາໂນ ເຍຠຸຍ຺ເຍນ ປຐມໍ ທ຺ວິນ຺ນໍ ວເສນ ອຸປ຺ປຊ຺ຊຕີຕິ ວຸຕ຺ຕໍ ‘‘ທ຺ວິນ຺ນໍ ຠິກ຺ຂູນໍ ວິວາໂທ’’ຕິ. ໂສ ປນ ຍຖາ ພຫູນໍ ອນຕ຺ຖາວໂຫ ໂຫຕິ, ຕໍ ນິທສ຺ສນມຸເຂນ ນິທສ຺ເສນ຺ໂຕ ‘‘ກຖ’’ນ຺ຕິອາທິມາຫ. ອພ຺ຠນ຺ຕຣປຣິສາຍາຕິ ປຣິສພ຺ຠນ຺ຕເຣ.

ຄຸຓມກ຺ຂນາຍ ປວຕ຺ໂຕປິ ອຕ຺ຕໂນ ກາຣກໍ ຄູເຖນ ປຫຣນ຺ຕິໍ ຄູໂຖ ວິຍ ປຐມຕຣໍ ມກ຺ເຂຕີຕິ ມກ຺ໂຂ, ໂສ ເອຕສ຺ສ ອຕ຺ຖີຕິ ມກ຺ຂີ. ປຬາສຕີຕິ ປຬາໂສ, ປຣສ຺ສ ຄຸເຓ ຑໍສິຕ຺ວາ ວິຍ ອປເນຕີຕິ ອຕ຺ໂຖ. ໂສ ເອຕສ຺ສ ອຕ຺ຖີຕິ ປຬາສີ. ປຬາສີ ປຸຄ຺ຄໂລ ຫິ ທຸຕິຍສ຺ສ ຘຸຣໍ ນ ເທຕິ, ສມໍ ຫຣິຕ຺ວາ ອຕິວທຕິ. ເຕນາຫ ‘‘ຍຸຄຄ຺ຄາຫລກ຺ຂເຓນ ປຬາເສນ ສມນ຺ນາຄໂຕ’’ຕິ. ອິສ຺ສຕີຕິ ອິສ຺ສຸກີ. ມຈ຺ຉຣາຍຕີຕິ ມຈ຺ຉຣໍ, ຕໍ ເອຕສ຺ສ ອຕ຺ຖີຕິ ມຈ຺ຉຣີ. ສຐຍຕິ ນ ສມ຺ມາ ຠາສຕີຕິ ສໂຐ ອຎ຺ຎຖາ ສນ຺ຕໍ ອຕ຺ຕານໍ ອຎ຺ຎຖາ ປເວທນໂຕ. ມາຍາ ເອຕສ຺ສ ອຕ຺ຖີ ມາຍາວີ. ມິຈ຺ຉາ ປາປິກາ ວິຎ຺ຎຸຄຣຫິຕາ ເອຕສ຺ສ ທິຏ຺ຐີຕິ ມິຈ຺ຉາທິຏ຺ຐິ, ກມ຺ມປຖປຣິຍາປນ຺ນາຍ ‘‘ນຕ຺ຖິ ທິນ຺ນ’’ນ຺ຕິອາທິວຕ຺ຖຸກາຍ ມິຈ຺ຉຕ຺ຕປຣິຍາປນ຺ນາຍ ອນິຍ຺ຍານິກາຍ ທິຏ຺ຐິຍາ ສມນ຺ນາຄໂຕຕິ ອຕ຺ໂຖ. ເຕນາຫ ‘‘ນຕ຺ຖິກວາທີ’’ຕິອາທິ.

ສໍ ອຕ຺ຕໂນ ທິຏ຺ຐິໍ, ສຍໍ ວາ ອຕ຺ຕນາ ຍຖາຄຫິຕໍ ປຣາມສຕິ, ສຠາວໍ ອຕິກ຺ກມິຕ຺ວາ ປຣໂຕ ອາມສຕີຕິ ສນ຺ທິຏ຺ຐີປຣາມາສີ. ອາຘານໍ ທຬ຺ຫໍ ຄຓ຺ຫາຕີຕິ ອາຘານຄ຺ຄາຫີ, ທຬ຺ຫຄ຺ຄາຫີ, ‘‘ອິທເມວ ສຈ຺ຈ’’ນ຺ຕິ ຖິຣຄ຺ຄາຫີຕິ ອຕ຺ໂຖ. ຍຸຕ຺ຕໍ ກາຣຓໍ ທິສ຺ວາວ ລທ຺ຘິໍ ປຏິນິສ຺ສຊ຺ຊຕີຕິ ປຏິນິສ຺ສຄ຺ຄີ, ທຸກ຺ເຂນ ກິຈ຺ເຉນ ກສິເຣນ ພຫຸມ຺ປິ ກາຣຓໍ ທສ຺ເສຕ຺ວາ ນ ສກ຺ກາ ປຏິນິສ຺ສຄ຺ຄໍ ກາຕຸນ຺ຕິ ທຸປ຺ປຏິນິສ຺ສຄ຺ຄີ. ໂຍ ອຕ຺ຕໂນ ອຸປ຺ປນ຺ນທິຏ຺ຐິໍ ‘‘ອິທເມວ ສຈ຺ຈ’’ນ຺ຕິ ທຬ຺ຫໍ ຄຓ຺ຫິຕ຺ວາ ອປິ ພຸທ຺ຘາທີຫິ ກາຣຓໍ ທສ຺ເສຕ຺ວາ ວຸຈ຺ຈມາໂນ ນ ປຏິນິສ຺ສຊ຺ຊຕິ. ຕສ຺ເສຕໍ ອຘິວຈນໍ. ຕາທິໂສ ຫິ ປຸຄ຺ຄໂລ ຍໍ ຍເທວ ຘມ຺ມໍ ວາ ອຘມ຺ມໍ ວາ ສຸຓາຕິ, ຕໍ ສພ຺ພໍ ‘‘ເອວໍ ອມ຺ຫາກໍ ອາຈຣິເຍຫິ ກຖິຕໍ, ເອວໍ ອມ຺ເຫຫິ ສຸຕ’’ນ຺ຕິ ກຸມ຺ໂມວ ອງ຺ຄານິ ສເກ ກປາເລ ອນ຺ໂຕເຍວ ສໂມທຫຕິ. ຍຖາ ຫິ ກຈ຺ຉໂປ ອຕ຺ຕໂນ ຫຕ຺ຖປາທາທິເກ ອງ຺ເຄ ເກນຈິ ຆຏິເຕ ສພ຺ພານິ ອງ຺ຄານິ ອຕ຺ຕໂນ ກປາເລເຍວ ສໂມທຫຕິ, ນ ພຫິ ນີຫຣຕິ, ເອວມຍມ຺ປິ ‘‘ນ ສຸນ຺ທໂຣ ຕວ ຄາໂຫ, ຉຑ຺ເຑຫິ ນ’’ນ຺ຕິ ວຸຕ຺ໂຕ ຕໍ ນ ວິສ຺ສຊ຺ຊຕິ, ອນ຺ໂຕເຍວ ອຕ຺ຕໂນ ຫທເຍ ເອວ ຐເປຕ຺ວາ ວິຈຣຕິ, ກຸມ຺ຠີລຄ຺ຄາຫໍ ຄຓ຺ຫາຕິ. ຍຖາ ສຸສຸມາຣາ ຄຫິຕໍ ນ ປຏິນິສ຺ສຊ຺ຊນ຺ຕິ, ເອວໍ ຄຓ຺ຫາຕິ.

ວິວາທມູລສຸຕ຺ຕວຓ຺ຓນາ ນິຏ຺ຐິຕາ.

໗. ຉຬງ຺ຄທານສຸຕ຺ຕວຓ຺ຓນາ

໓໗. ສຕ຺ຕເມ ທກ຺ຂນ຺ຕິ ວຑ຺ຒນ຺ຕິ ເອຕາຍາຕິ ທກ຺ຂິຓາ, ປຣິຈ຺ຈາຄມຍໍ ປຸຎ຺ຎໍ, ຕສ຺ສູປກຣຓຠູໂຕ ເທຍ຺ຍຘມ຺ໂມ ຈ. ອິຘ ປນ ເທຍ຺ຍຘມ຺ໂມ ອຘິປ຺ເປໂຕ. ເຕເນວາຫ ‘‘ທກ຺ຂິຓໍ ປຕິຏ຺ຐາເປຕີ’’ຕິ. ອິໂຕ ອຸຏ຺ຐິເຕນາຕິ ອິໂຕ ເຂຕ຺ຕໂຕ ອຸປ຺ປນ຺ເນນ. ຣາໂຄ ວິນຍຕິ ເອເຕນາຕິ ຣາຄວິນໂຍ, ຣາຄສ຺ສ ສມຸຈ຺ເຉທິກາ ປຏິປທາ. ເຕນາຫ ‘‘ຣາຄວິນຍປຏິປທໍ ປຏິປນ຺ນາ’’ຕິ.

‘‘ປຸພ຺ເພວ ທານາ ສຸມໂນ’’ຕິອາທິຄາຖາຍ ປຸພ຺ເພວ ທານາ ມຸຎ຺ຈເຈຕນາຍ ປຸພ຺ເພ ທານູປກຣຓສມ຺ຠຣຓໂຕ ປຏ຺ຐາຍ ສຸມໂນ ‘‘ສມ຺ປຕ຺ຕີນໍ ນິທານໍ ອນຸຄາມິກທານໍ ທສ຺ສາມີ’’ຕິ ໂສມນສ຺ສິໂຕ ຠເວຍ຺ຍ. ທທໍ ຈິຕ຺ຕໍ ປສາທເຍຕິ ທທນ຺ໂຕ ເທຍ຺ຍຘມ຺ມໍ ທກ຺ຂິເຓຍ຺ຍຫຕ຺ເຖ ປຕິຏ຺ຐາເປນ຺ໂຕ ‘‘ອສາຣໂຕ ຘນໂຕ ສາຣາທານໍ ກໂຣມີ’’ຕິ ອຕ຺ຕໂນ ຈິຕ຺ຕໍ ປສາເທຍ຺ຍ. ທຕ຺ວາ ອຕ຺ຕມໂນ ໂຫຕີຕິ ທກ຺ຂິເຓຍ຺ຍານໍ ເທຍ຺ຍຘມ຺ມໍ ປຣິຈ຺ຈຊິຕ຺ວາ ‘‘ປຓ຺ຑິຕປຎ຺ຎຕ຺ຕໍ ນາມ ມຍາ ອນຸຏ຺ຐິຕໍ, ອໂຫ ສາຘຸ ສຸຏ຺ຐູ’’ຕິ ອຕ຺ຕມໂນ ປມຸທິໂຕ ປີຕິໂສມນສ຺ສຊາໂຕ ໂຫຕິ. ເອສາຕິ ຍາ ອຍໍ ປຸພ຺ພເຈຕນາ ມຸຎ຺ຈເຈຕນາ ອປຣເຈຕນາຕິ ອິມາສໍ ກມ຺ມຜລານໍ ສທ຺ຘານຸຄຕານໍ ໂສມນສ຺ສປຣິຄ຺ຄຫິຕານໍ ຕິວິຘານໍ ເຈຕນານໍ ປາຣິປູຣີ, ເອສາ.

ສີລສຎ຺ຎເມນາຕິ ກາຍິກວາຈສິກສໍວເຣນ. ຫຕ຺ຖປາເທຕິ ທກ຺ຂິເຓຍ຺ຍານໍ ຫຕ຺ຖປາເທ. ມຸຂໍ ວິກ຺ຂາເລຕ຺ວາຕິ ເຕສໍເຍວ ມຸຂໍ ວິກ຺ຂາເລຕ຺ວາ, ອຕ຺ຕນາວ ມຸໂຂທກໍ ທຕ຺ວາຕິ ອຘິປ຺ປາໂຍ.

ຉຬງ຺ຄທານສຸຕ຺ຕວຓ຺ຓນາ ນິຏ຺ຐິຕາ.

໘-໑໑. ອຕ຺ຕກາຣີສຸຕ຺ຕາທິວຓ຺ຓນາ

໓໘-໔໑. ອຏ຺ຐເມ ກຸສລກິຣິຍາຍ ອາທິອາຣມ຺ຠຠາເວນ ປວຕ຺ຕວີຣິຍໍ ຐິຕສຠາວຕາຍ ສຠາວຘາຣຓຏ຺ເຐນ ຘາຕູຕິ ວຸຕ຺ຕນ຺ຕິ ອາຫ – ‘‘ອາຣມ຺ຠຘາຕູຕິ ອາຣຠນວເສນ ປວຕ຺ຕວີຣິຍ’’ນ຺ຕິ. ລທ຺ຘາເສວນໍ ວີຣິຍໍ ພລປ຺ປຕ຺ຕໍ ຫຸຕ຺ວາ ປຏິປກ຺ເຂ ວິຘມຕີຕິ ອາຫ ‘‘ນິກ຺ກມຘາຕູຕິ ໂກສຊ຺ຊໂຕ ນິກ຺ຂມນສຠາວໍ ວີຣິຍ’’ນ຺ຕິ. ປຣກ຺ກມນສຠາໂວຕິ ອຘິມຕ຺ຕຕຣານໍ ປຏິປກ຺ຂຘມ຺ມານໍ ວິຘມນສມຕ຺ຖຕາຍ ປຏຸປຏຸຕຣຠາເວນ ປຣໍ ປຣໍ ຐານໍ ອກ຺ກມນສຠາໂວ. ນວມາທີສຸ ນຕ຺ຖິ ວຕ຺ຕພ຺ພໍ.

ອຕ຺ຕກາຣີສຸຕ຺ຕາທິວຓ຺ຓນາ ນິຏ຺ຐິຕາ.

໑໒. ນາຄິຕສຸຕ຺ຕວຓ຺ຓນາ

໔໒. ທ຺ວາທສເມ ມາຫໍ ນາຄິຕ ຍເສນ ສມາຄມນ຺ຕິ ມາ ອຫໍ ຍເສນ ສມາຄມນໍ ປຕ຺ເຖມິ. ມາ ຈ ມຍາ ຍໂສຕິ ຍໂສ ຈ ມຍາ ມາ ສມາຄຈ຺ຉຕູຕິ ອຕ຺ໂຖ. ອິມິນາ ອຕ຺ຕໂນ ລາຠສກ຺ກາເຣນ ອນຕ຺ຖິກຕໍ ວິຠາເວຕິ. ປຎ຺ຈຫິ ວິມຸຕ຺ຕີຫີຕິ ຕທງ຺ຄວິມຸຕ຺ຕິອາທີຫິ ປຎ຺ຈຫິ ວິມຸຕ຺ຕີຫິ. ເສສເມຕ຺ຖ ອຸຕ຺ຕານເມວ.

ນາຄິຕສຸຕ຺ຕວຓ຺ຓນາ ນິຏ຺ຐິຕາ.

ເທວຕາວຄ຺ຄວຓ຺ຓນາ ນິຏ຺ຐິຕາ.