໙. ປຐມມຣຓສ຺ສຕິສຸຕ຺ຕວຓ຺ຓນາ

໑໙. ນວເມ ເອວໍນາມເກ ຄາເມຕິ ນາຕິການາມກໍ ຄາມໍ ນິສ຺ສາຍ. ທ຺ວິນ຺ນໍ ຈູຬປິຕິມຫາປິຕິປຸຕ຺ຕານໍ ທ຺ເວ ຄາມາ, ເຕສຸ ເອກສ຺ມິໍ ຄາເມ. ຎາຕີນຎ຺ຫິ ນິວາສຏ຺ຐານຠູໂຕ ຄາໂມ ຎາຕິໂກ, ຎາຕິໂກເຍວ ນາຕິໂກ ຎ-ກາຣສ຺ສ ນ-ກາຣາເທໂສ ‘‘ອນິມິຕ຺ຕາ ນ ນາຍເຣ’’ຕິອາທີສຸ (ວິສຸທ຺ຘິ. ໑.໑໗໔; ສໍ. ນິ. ອຏ຺ຐ. ໑.໑.໒໐; ຊາ. ອຏ຺ຐ. ໒.໒.໓໔) ວິຍ. ໂສ ກິຣ ຄາໂມ ເຍສໍ ຕທາ ເຕສໍ ປຸພ຺ພປຸຣິເສນ ອຕ຺ຕໂນ ຎາຕີນໍ ສາຘາຣຓຠາເວນ ນິວສິໂຕ, ເຕນ ຎາຕິໂກຕິ ປຎ຺ຎາຍິຕ຺ຖ. ອຖ ປຈ຺ຉາ ທ຺ວີຫິ ທາຍາເທຫິ ທ຺ວິຘາ ວິຠຊິຕ຺ວາ ປຣິຠຸຕ຺ໂຕ. ຄິຎ຺ຊກາ ວຸຈ຺ຈຕິ ອິຏ຺ຐກາ, ຄິຎ຺ຊກາຫິເຍວ ກໂຕ ອາວສໂຖຕິ ຄິຎ຺ຊກາວສໂຖ. ໂສ ຫິ ອາວາໂສ ຍຖາ ສຸຘາປຣິກມ຺ເມນ ປໂຍຊນໍ ນຕ຺ຖິ, ເອວໍ ອິຏ຺ຐກາຫິ ເອວ ຈິນິຕ຺ວາ ຉາເທຕ຺ວາ ກໂຕ. ຕສ຺ມິໍ ກິຣ ປເທເສ ມຕ຺ຕິກາ ສກ຺ຂຣມຣຸມ຺ປວາລຸກາທີຫິ ອສມ຺ມິສ຺ສາ ກຖິນາ ສຓ຺ຫສຸຂຸມາ, ຕາຍ ກຕານິ ກຸລາລຠາຊນານິປິ ສິລາມຍານິ ວິຍ ທຬ຺ຫານິ. ຕສ຺ມາ ເຕ ອຸປາສກາ ຕາຍ ມຕ຺ຕິກາຍ ທີຆປຸຖູ ອິຏ຺ຐກາ ກາເຣຕ຺ວາ ຐເປຕ຺ວາ ຐເປຕ຺ວາ ທ຺ວາຣວາຕປານກວາຏຕຸລາໂຍ ສພ຺ພໍ ທພ຺ພສມ຺ຠາເຣນ ວິນາ ຕາຫິ ອິຏ຺ຐກາຫິເຍວ ປາສາທໍ ກາເຣສຸໍ. ເຕນ ວຸຕ຺ຕໍ ‘‘ອິຏ຺ຐກາມເຍ ປາສາເທ’’ຕິ.

ຣຕ຺ຕິນ຺ທິວນ຺ຕິ ເອກຣຕ຺ຕິທິວໍ. ຠຄວໂຕ ສາສນນ຺ຕິ ອຣິຍມຄ຺ຄປ຺ປຏິເວຘາວຫໍ ສຕ຺ຖຸ ໂອວາທໍ. ພຫຸ ວຕ ເມ ກຕໍ ອສ຺ສາຕິ ພຫຸ ວຕ ມຍາ ອຕ຺ຕຫິຕໍ ປພ຺ພຊິຕກິຈ຺ຈໍ ກຕໍ ຠເວຍ຺ຍ.

ຕທນ຺ຕຣນ຺ຕິ ຕຕ຺ຕກໍ ເວລໍ. ເອກປິຓ຺ຑປາຕນ຺ຕິ ເອກໍ ທິວສໍ ຍາປນປ຺ປໂຫນກໍ ປິຓ຺ຑປາຕໍ. ຍາວ ອນ຺ໂຕ ປວິຏ຺ຐວາໂຕ ພຫິ ນິກ຺ຂມຕິ, ພຫິ ນິກ຺ຂນ຺ຕວາໂຕ ວາ ອນ຺ໂຕ ປວິສຕີຕິ ເອກສ຺ເສວ ປເວສນິກ຺ຂໂມ ວິຍ ວຸຕ຺ຕໍ, ຕໍ ນາສິກາວາຕຠາວສາມຎ຺ເຎນາຕິ ທຏ຺ຐພ຺ພໍ.

ປຐມມຣຓສ຺ສຕິສຸຕ຺ຕວຓ຺ຓນາ ນິຏ຺ຐິຕາ.