໑໐. ມຫານາມສຸຕ຺ຕວຓ຺ຓນາ

໑໐. ທສເມ ຕສ຺ມິໍ ສມເຍຕິ ພຸທ຺ຘາຄຸຓານຸສ຺ສຣຓສມເຍ. ຣາຄປຣິຍຸຏ຺ຐິຕນ຺ຕິ ຣາເຄນ ປຣິຍຸຏ຺ຐິຕໍ. ປຣິຍຸຏ຺ຐານປ຺ປຕ຺ຕິປິ, ຣາເຄນ ວາ ສໍຫິຕໍ ຈິຕ຺ຕໍ ອຣຎ຺ຎມິວ ໂຈເຣຫິ ເຕນ ປຣິຍຸຏ຺ຐິຕນ຺ຕິ ວຸຕ຺ຕໍ, ຕສ຺ສ ປຣິຍຸຏ຺ຐານຏ຺ຐານຠາວໂຕປິ ປຣິຍຸຏ຺ຐິຕຣາຄນ຺ຕິ ອຕ຺ໂຖ. ພ຺ຍຎ຺ຊນໍ ປນ ອນາທິຍິຕ຺ວາ ອຕ຺ຖມຕ຺ຕໍ ທສ຺ເສນ຺ໂຕ ‘‘ອຸປ຺ປຊ຺ຊມາເນນ ຣາເຄນ ອຸຏ຺ຐຫິຕ຺ວາ ຄຫິຕ’’ນ຺ຕິ ອາຫ. ອຸຊຸກເມວາຕິ ປເຄວ ກາຍວງ຺ກາທີນໍ ອປນີຕຕ຺ຕາ ຈິຕ຺ຕສ຺ສ ຈ ອນຸຊຸຠາວກຣານໍ ມານາທີນໍ ອຠາວໂຕ, ຣາຄາທິປຣິຍຸຏ຺ຐານາຠາເວນ ວາ ໂອຓຕິອຸຓ຺ຓຕິວິຣຫໂຕ ອຸຊຸຠາວເມວ ຄຕໍ. ອຖ ວາ ອຸຊຸກເມວາຕິ ກມ຺ມຏ຺ຐານສ຺ສ ຖິນໍ ມິທ຺ຘໍ ໂອຕິຓ຺ຓຕາຍ ລີນຸທ຺ຘຈ຺ຈວິຄມໂຕ ມຊ຺ຌິມສມຖນິມິຕ຺ຕປ຺ປຏິປຕ຺ຕິຍາ ອຸຊຸຠາວເມວ ຄຕໍ. ອຏ຺ຐກຖໍ ນິສ຺ສາຍາຕິ ຠວຊາຕິອາທີນໍ ປທານໍ ອຕ຺ຖໍ ນິສ຺ສາຍ. ອຕ຺ຖເວທນ຺ຕິ ວາ ເຫຕຸຜລໍ ປຏິຈ຺ຈ ອຸປ຺ປນ຺ນໍ ຕຸຏ຺ຐິມາຫ. ຘມ຺ມເວທນ຺ຕິ ເຫຕຸໍ ປຏິຈ຺ຈ ອຸປ຺ປນ຺ນໍ ຕຸຏ຺ຐິໍ. ‘‘ອາຣກຕ຺ຕາ ອຣຫ’’ນ຺ຕິ ອນຸສ຺ສຣນ຺ຕສ຺ສ ຫິ ຍທິທໍ ຠຄວໂຕ ກິເລເສຫິ ອາຣກຕ຺ຕໍ, ໂສ ເຫຕຸ. ຎາປໂກ ເຈຕ຺ຖ ເຫຕຸ ອຘິປ຺ເປໂຕ, ນ ກາຣໂກ ສມ຺ປາປໂກ. ຕໂຕເນນ ຎາຍມາໂນ ອຣຫຕ຺ຕຕ຺ໂຖ ຜລໍ. ອິມິນາ ນເຍນ ເສສປເທສຸປິ ເຫຕຸໂສ ຜລວິປາໂກ ເວທິຕພ຺ໂພ. ຘມ຺ມານຸສ຺ສຕິອາທີສຸປິ ຫິ ອາທິມຊ຺ຌປຣິໂຍສານກລ຺ຍາຓຕາທໂຍ ສຸປ຺ປຏິປຕ຺ຕິອາທໂຍ ຈ ຕຕ຺ຖ ຕຕ຺ຖ ເຫຕຸຠາເວນ ນິທ຺ທິຏ຺ຐາເຍວ. ຘມ຺ມູປສໍຫິຕນ຺ຕິ ຍຖາວຸຕ຺ຕເຫຕຸຜລສງ຺ຂາຕຄຸຓູປສໍຫິຕໍ.

ມຫານາມສຸຕ຺ຕວຓ຺ຓນາ ນິຏ຺ຐິຕາ.

ອາຫຸເນຍ຺ຍວຄ຺ຄວຓ຺ຓນາ ນິຏ຺ຐິຕາ.