໑. ປຐມອາຫຸເນຍ຺ຍສຸຕ຺ຕວຓ຺ຓນາ

໑. ຉກ຺ກນິປາຕສ຺ສ ປຐເມ ຈກ຺ຂຸນາ ຣູປໍ ທິສ຺ວາຕິ ນິສ຺ສຍໂວຫາເຣນ ວຸຕ຺ຕໍ. ສສມ຺ຠາຣກນິທ຺ເທໂສຍໍ ຍຖາ ‘‘ຘນຸນາ ວິຊ຺ຌຕີ’’ຕິ, ຕສ຺ມາ ນິສ຺ສຍສີເສນ ນິສ຺ສິຕສ຺ສ ຄຫຓໍ ທຏ຺ຐພ຺ພໍ. ເຕນາຍມຕ຺ໂຖ ‘‘ຈກ຺ຂຸທ຺ວາເຣ ຣູປາຣມ຺ມເຓ ອາປາຖຄເຕ ຕໍ ຣູປໍ ຈກ຺ຂຸວິຎ຺ຎາເຓນ ທິສ຺ວາ’’ຕິ. ເນວ ສຸມໂນ ໂຫຕີຕິ ຊວນກ຺ຂເຓ ອິຏ຺ເຐ ອາຣມ຺ມເຓ ຣາຄໍ ອນຸປ຺ປາເທນ຺ໂຕ ເນວ ສຸມໂນ ໂຫຕິ ເຄຫສ຺ສິຕເປມວເສນປິ ມຄ຺ເຄນ ສພ຺ພໂສ ຣາຄສ຺ສ ສມຸຈ຺ຉິນ຺ນຕ຺ຕາ. ນ ທຸມ຺ມໂນຕິ ອນິຏ຺ເຐ ອທຸສ຺ສນ຺ໂຕ ນ ທຸມ຺ມໂນ. ປສາທຎ຺ຎຖຕ຺ຕວເສນປິ ອິຏ຺ເຐປິ ອນິຏ຺ເຐປິ ມຊ຺ຌຕ຺ເຕປິ ອາຣມ຺ມເຓ ນ ສມໍ ສມ຺ມາ ອໂຍນິໂສ ຄຫຓໍ ອສມເປກ຺ຂນໍ. ອຍຎ຺ຈສ຺ສ ປຏິປຕ຺ຕິ ສຕິເວປຸລ຺ລປ຺ປຕ຺ຕິຍາ ປຎ຺ຎາເວປຸລ຺ລປ຺ປຕ຺ຕິຍາ ຈາຕິ ອາຫ ‘‘ສໂຕ ສມ຺ປຊາໂນ ຫຸຕ຺ວາ’’ຕິ. ສຕິຍາ ຍຸຕ຺ຕຕ຺ຕາ ສໂຕ. ສມ຺ປຊຎ຺ເຎນ ຍຸຕ຺ຕຕ຺ຕາ ສມ຺ປຊາໂນ. ຎາຓຸປ຺ປຕ຺ຕິປຈ຺ຈຍຣຫິຕກາເລປິ ປວຕ຺ຕິເຠທນໂຕ ‘‘ສຕຕວິຫາໂຣ ກຖິໂຕ’’ຕິ ວຸຕ຺ຕໍ. ສຕຕວິຫາໂຣຕິ ຂີຓາສວສ຺ສ ນິຈ຺ຈວິຫາໂຣ ສພ຺ພທາ ປວຕ຺ຕນກວິຫາໂຣ. ຐເປຕ຺ວາ ຫິ ສມາປຕ຺ຕິເວລໍ ຠວງ຺ຄເວລຎ຺ຈ ຂີຓາສວາ ອິມິນາວ ຉຬງ຺ຄຸເປກ຺ຂາວິຫາເຣນ ວິຫຣນ຺ຕິ.

ເອຕ຺ຖ ຈ ‘‘ຉສຸ ທ຺ວາເຣສຸປິ ອຸເປກ຺ຂໂກ ວິຫຣຕີ’’ຕິ ອິມິນາ ຉຬງ຺ຄຸເປກ຺ຂາ ກຖິຕາ. ‘‘ສມ຺ປຊາໂນ’’ຕິ ວຈນໂຕ ປນ ຈຕ຺ຕາຣິ ຎາຓສມ຺ປຍຸຕ຺ຕຈິຕ຺ຕານິ ລພ຺ຠນ຺ຕິ ເຕຫິ ວິນາ ສມ຺ປຊານຕາຍ ອສມ຺ຠວໂຕ. ສຕຕວິຫາຣຠາວໂຕ ອຏ຺ຐ ມຫາກິຣິຍຈິຕ຺ຕານິ ລພ຺ຠນ຺ຕິ. ‘‘ເນວ ສຸມໂນ ນ ທຸມ຺ມໂນ’’ຕິ ວຈນໂຕ ອຏ຺ຐ ມຫາກິຣິຍຈິຕ຺ຕານິ, ຫສິຕຸປ຺ປາໂທ, ໂວຏ຺ຐພ຺ພນຎ຺ຈາຕິ ທສ ຈິຕ຺ຕານິ ລພ຺ຠນ຺ຕິ. ຣາຄໂທສສຫຊາຕານໍ ໂສມນສ຺ສໂທມນສ຺ສານໍ ອຠາໂວ ເຕສມ຺ປິ ສາຘາຣໂຓຕິ ຉຬງ຺ຄຸເປກ຺ຂາວເສນ ອາຄຕານໍ ອິເມສໍ ສຕຕວິຫາຣານໍ ໂສມນສ຺ສໍ ກຖໍ ລພ຺ຠຕີຕິ ເຈ? ອາເສວນໂຕ. ກິຎ຺ຈາປິ ຂີຓາສໂວ ອິຏ຺ຐານິຏ຺ເຐປິ ອາຣມ຺ມເຓ ມຊ຺ຌຕ຺ໂຕ ວິຍ ພຫຸລໍ ອຸເປກ຺ຂໂກ ວິຫຣຕິ ອຕ຺ຕໂນ ປຣິສຸທ຺ຘປກຕິຠາວາວິຊຫນໂຕ, ກທາຈິ ປນ ຕຖາ ເຈໂຕຠິສງ຺ຂາຣາຠາເວ ຍໍ ຕໍ ສຠາວໂຕ ອິຏ຺ຐໍ ອາຣມ຺ມຓໍ, ຕສ຺ສ ຍາຖາວສຠາວຄ຺ຄຫຓວເສນປິ ອຣຫໂຕ ຈິຕ຺ຕໍ ປຸພ຺ພາເສວນວເສນ ໂສມນສ຺ສສຫຄຕໍ ຫຸຕ຺ວາ ປວຕ຺ຕເຕວ.

ປຐມອາຫຸເນຍ຺ຍສຸຕ຺ຕວຓ຺ຓນາ ນິຏ຺ຐິຕາ.