໑-໒. ປຐມເຈໂຕວິມຸຕ຺ຕິຜລສຸຕ຺ຕາທິວຓ຺ຓນາ

໗໑-໗໒. ຕຕິຍສ຺ສ ປຐເມ ອວິຊ຺ຊາປລິຆນ຺ຕິ ເອຕ຺ຖ ອວິຊ຺ຊາຕິ ວຏ຺ຏມູລິກາ ອວິຊ຺ຊາ, ອຍໍ ປຈຸຣຊເນຫິ ອຸກ຺ຂິປິຕຸໍ ອສກ຺ກຸເຓຍ຺ຍຠາວໂຕ ທຸກ຺ຂິປນຏ຺ເຐນ ນິພ຺ພານທ຺ວາຣປ຺ປເວສວິພນ຺ຘເນນ ຈ ‘‘ປລິໂຆ ວິຍາຕິ ປລິໂຆ’’ຕິ ວຸຈ຺ຈຕິ. ເຕເນສ ຕສ຺ສາ ອຸກ຺ຂິຕ຺ຕຕ຺ຕາ ‘‘ອຸກ຺ຂິຕ຺ຕປລິໂຆ’’ຕິ ວຸຕ຺ໂຕ. ປຸນພ຺ຠວສ຺ສ ກຣຓສີໂລ, ປຸນພ຺ຠວໍ ວາ ຜລໍ ອຣຫຕີຕິ ໂປໂນຠວິກາ, ປຸນພ຺ຠວທາຍິກາຕິ ອຕ຺ໂຖ. ຊາຕິສໍສາໂຣຕິ ຊາຍນວເສນ ເຈວ ສໍສຣຓວເສນ ຈ ເອວໍລທ຺ຘນາມານໍ ປຸນພ຺ຠວກ຺ຂນ຺ຘານໍ ປຈ຺ຈໂຍ ກມ຺ມາຠິສງ຺ຂາໂຣ. ຊາຕິສໍສາໂຣຕິ ຫິ ຜລູປຈາເຣນ ກາຣຓໍ ວຸຕ຺ຕໍ. ຕຎ຺ຫິ ປຸນປ຺ປຸນໍ ອຸປ຺ປຕ຺ຕິກາຣຓວເສນ ປຣິກ຺ຂິປິຕ຺ວາ ຐິຕຕ຺ຕາ ‘‘ປຣິຂາ’’ຕິ ວຸຈ຺ຈຕິ ສນ຺ຕານສ຺ສ ປຣິກ຺ຂິປນໂຕ. ເຕເນສ ຕສ຺ສ ສໍກິຓ຺ຓຕ຺ຕາ ວິກິຓ຺ຓຕ຺ຕາ ສພ຺ພໂສ ຂິຕ຺ຕຕ຺ຕາ ວິນາສິຕຕ຺ຕາ ‘‘ສໍກິຓ຺ຓປຣິໂຂ’’ຕິ ວຸຕ຺ໂຕ.

ຕຓ຺ຫາສງ຺ຂາຕນ຺ຕິ ເອຕ຺ຖ ຕຓ຺ຫາຕິ ວຏ຺ຏມູລິກາ ຕຓ຺ຫາ. ອຍຎ຺ຫິ ຄມ຺ຠີຣານຸຄຕຏ຺ເຐນ ‘‘ເອສິກາ’’ຕິ ວຸຈ຺ຈຕິ. ລຸຎ຺ຈິຕ຺ວາ ອຸທ຺ຘຣິຕ຺ວາ. ໂອຣມ຺ຠາຄິຍານີຕິ ໂອຣມ຺ຠາຄຊນການິ ກາມຠເວ ອຸປປຕ຺ຕິປຈ຺ຈຍານິ ກາມຣາຄສໍໂຍຊນາທີນິ. ເອຕານິ ຫິ ກວາຏໍ ວິຍ ນຄຣທ຺ວາຣໍ ຈິຕ຺ຕໍ ປິທຫິຕ຺ວາ ຐິຕຕ຺ຕາ ‘‘ອຄ຺ຄຬາ’’ຕິ ວຸຈ຺ຈນ຺ຕິ. ເຕເນສ ເຕສໍ ນິຄ຺ຄຕຕ຺ຕາ ຠິນ຺ນຕ຺ຕາ ‘‘ນິຣຄ຺ຄໂຬ’’ຕິ ວຸຕ຺ໂຕຕິ. ອຄ຺ຄມຄ຺ເຄນ ປນ຺ໂນ ອປຈິໂຕ ມານທ຺ຘໂຊ ເອຕສ຺ສາຕິ ປນ຺ນທ຺ຘໂຊ. ປນ຺ນຠາໂຣຕິ ຂນ຺ຘຠາຣກິເລສຠາຣອຠິສງ຺ຂາຣຠາຣາ ໂອໂຣປິຕາ ອສ຺ສາຕິ ປນ຺ນຠາໂຣ. ວິສໍຍຸຕ຺ໂຕຕິ ຈຕູຫິ ໂຍເຄຫິ ສພ຺ພກິເລເສຫິ ຈ ວິສໍຍຸຕ຺ໂຕ. ອສ຺ມິມາໂນຕິ ຣູເປ ອສ຺ມີຕິ ມາໂນ, ເວທນາຍ, ສຎ຺ຎາຍ, ສງ຺ຂາເຣສຸ, ວິຎ຺ຎາເຓ ອສ຺ມິມາໂນ. ເອຕ຺ຖ ຫິ ປຎ຺ຈປິ ຂນ຺ເຘ ອວິເສສໂຕ ‘‘ອສ຺ມີ’’ຕິ ຄເຫຕ຺ວາ ປວຕ຺ຕມາໂນ ອສ຺ມິມາໂນຕິ ອຘິປ຺ເປໂຕ.

ນຄຣທ຺ວາຣສ຺ສ ປຣິສ຺ສຍປຏິພາຫນຕ຺ຖຎ຺ເຈວ ໂສຘນຕ຺ຖຎ຺ຈ ອຸໂຠສຸ ປສ຺ເສສຸ ເອສິກາຖມ຺ເຠ ນິຂຓິຕ຺ວາ ຐເປຕີຕິ ອາຫ ‘‘ນຄຣທ຺ວາເຣ ອຸສ຺ສາປິເຕ ເອສິກາຖມ຺ເຠ’’ຕິ. ປາກາຣວິທ຺ຘໍສເນເນວ ປຣິຂາຠູມິສມກຣຓໍ ໂຫຕີຕິ ອາຫ ‘‘ປາກາຣໍ ຠິນ຺ທິຕ຺ວາ ປຣິຂໍ ວິກິຣິຕ຺ວາ’’ຕິ. ‘‘ເອວ’’ນ຺ຕິອາທິ ອຸປມາສໍສນ຺ທນໍ. ສນ຺ໂຕ ສໍວິຊ຺ຊມາໂນ ກາໂຍ ຘມ຺ມສມູໂຫຕິ ສກ຺ກາໂຍ, ອຸປາທານກ຺ຂນ຺ຘປຎ຺ຈກໍ. ທ຺ວຕ຺ຕິໍສກມ຺ມກາຣຓາ ທຸກ຺ຂກ຺ຂນ຺ເຘ ອາຄຕທຸກ຺ຂານິ. ອກ຺ຂິໂຣຄສີສໂຣຄາທໂຍ. ອຏ຺ຐນວຸຕິ ໂຣຄາ, ຣາຊຠຍາທີນິ ປຎ຺ຈວີສຕິມຫາຠຍານິ. ທຸຕິຍໍ ອຸຕ຺ຕານເມວ.

ປຐມເຈໂຕວິມຸຕ຺ຕິຜລສຸຕ຺ຕາທິວຓ຺ຓນາ ນິຏ຺ຐິຕາ.