໖. ວິມຸຕ຺ຕາຍຕນສຸຕ຺ຕວຓ຺ຓນາ

໒໖. ຉຏ຺ເຐ ວິມຸຕ຺ຕິຍາ ວຏ຺ຏທຸກ຺ຂໂຕ ວິມຸຈ຺ຈນສ຺ສ ອາຍຕນານິ ກາຣຓານິ ວິມຸຕ຺ຕາຍຕນານີຕິ ອາຫ – ‘‘ວິມຸຈ຺ຈນກາຣຓານີ’’ຕິ. ປາຬິອຕ຺ຖໍ ຊານນ຺ຕສ຺ສາຕິ ‘‘ອິຘ ສີລໍ ອາຄຕໍ, ອິຘ ສມາຘິ, ອິຘ ປຎ຺ຎາ’’ຕິອາທິນາ ຕໍຕໍປາຬິອຕ຺ຖໍ ຍາຖາວໂຕ ຊານນ຺ຕສ຺ສ. ປາຬິໍ ຊານນ຺ຕສ຺ສາຕິ ຕທຕ຺ຖໂພຘິນິໍ ປາຬິໍ ຍາຖາວໂຕ ອຸປຘາເຣນ຺ຕສ຺ສ. ຕຣຸຓປີຕີຕິ ສຎ຺ຊາຕມຕ຺ຕາ ມຸທຸກາ ປີຕິ ຊາຍຕິ. ກຖໍ ຊາຍຕິ? ຍຖາເທສິຕໍ ຘມ຺ມໍ ອຸປຘາເຣນ຺ຕສ຺ສ ຕທນຸຈ຺ຉວິກເມວ ອຕ຺ຕໂນ ກາຍວາຈາມໂນສມາຈາຣໍ ປຣິຄ຺ຄຓ຺ຫນ຺ຕສ຺ສ ໂສມນສ຺ສໍ ປຕ຺ຕສ຺ສ ປໂມທລກ຺ຂຓໍ ປາໂມຊ຺ຊໍ ຊາຍຕິ. ຕຸຏ຺ຐາກາຣຠູຕາ ພລວປີຕີຕິ ປຸຣິມຸປ຺ປນ຺ນາຍ ປີຕິຍາ ວເສນ ລທ຺ຘາເສວນຕ຺ຕາ ອຕິວິຍ ຕຸຏ຺ຐາກາຣຠູຕາ ກາຍຈິຕ຺ຕທຣຖສ຺ສ ປສ຺ສມ຺ຠນສມຕ຺ຖຕາຍ ປສ຺ສທ຺ຘິຍາ ປຈ຺ຈໂຍ ຠວິຕຸໍ ສມຕ຺ຖາ ພລປ຺ປຕ຺ຕາ ປີຕິ ຊາຍຕິ. ຍສ຺ມາ ນາມກາເຍ ປສ຺ສທ຺ເຘ ຣູປກາໂຍປິ ປສ຺ສທ຺ໂຘ ເອວ ໂຫຕິ, ຕສ຺ມາ ‘‘ນາມກາໂຍ ປສ຺ສມ຺ຠຕິ’’ຈ຺ເຈວ ວຸຕ຺ຕໍ.

ສຸຂໍ ປຏິລຠຕີຕິ ວກ຺ຂມານສ຺ສ ຈິຕ຺ຕສມາຘານສ຺ສ ປຈ຺ຈໂຍ ຠວິຕຸໍ ສມຕ຺ຖໍ ເຈຕສິກໍ ນິຣາມິສສຸຂໍ ປຏິລຠຕິ ວິນ຺ທຕິ. ສມາຘິຍຕີຕິ ເອຕ຺ຖ ປນ ນ ໂຍ ໂກຈິ ສມາຘິ ອຘິປ຺ເປໂຕ, ອຖ ໂຂ ອນຸຕ຺ຕຣສມາຘີຕິ ທສ຺ເສນ຺ໂຕ ‘‘ອຣຫຕ຺ຕ…ເປ… ສມາຘິຍຕີ’’ຕິ ອາຫ. ‘‘ອຍໍ ຫີ’’ຕິອາທິ ຕສ຺ສໍ ເທສນາຍໍ ຕາທິສສ຺ສ ປຸຄ຺ຄລສ຺ສ ຍຖາວຸຕ຺ຕສມາຘິປຏິລາຠສ຺ສ ກາຣຓຠາວວິຠາວນໍ, ຍໍ ຕຖາ ວິມຸຕ຺ຕາຍຕນຠາໂວ. ໂອສກ຺ກິຕຸນ຺ຕິ ທສ຺ສິຕຸໍ. ສມາຘິເຍວ ສມາຘິນິມິຕ຺ຕນ຺ຕິ ກມ຺ມຏ຺ຐານປາຬິຍາ ອາຣຸຬ຺ໂຫ ສມາຘິ ເອວ ປຣໂຕ ອຸປ຺ປຊ຺ຊນກຠາວນາສມາຘິສ຺ສ ກາຣຓຠາວໂຕ ສມາຘິນິມິຕ຺ຕໍ. ເຕນາຫ ‘‘ອາຈຣິຍສ຺ສ ສນ຺ຕິເກ’’ຕິອາທິ.

ວິມຸຕ຺ຕາຍຕນສຸຕ຺ຕວຓ຺ຓນາ ນິຏ຺ຐິຕາ.