(໒໑) ໑. ກິມິລວຄ຺ໂຄ

໑-໔. ກິມິລສຸຕ຺ຕາທິວຓ຺ຓນາ

໒໐໑-໔. ປຎ຺ຈມສ຺ສ ປຐມທຸຕິຍານິ ອຸຕ຺ຕານຕ຺ຖາເນວ. ຕຕິເຍ ອຘິວາສນໍ ຂມນໍ, ປເຣສໍ ທຸກ຺ກຏໍ ທຸຣຸຕ຺ຕຎ຺ຈ ປຏິວິໂຣຘາກຣເຓນ ອຕ຺ຕໂນ ອຸປຣິ ອາໂຣເປຕ຺ວາ ວາສນໍ ອຘິວາສນໍ, ຕເທວ ຂນ຺ຕີຕິ ອຘິວາສນກ຺ຂນ຺ຕິ. ສຸເຠ ຣໂຕຕິ ສູຣໂຕ, ສຸຏ຺ຐຸ ວາ ປາປໂຕ ໂອຣໂຕ ວິຣໂຕ ໂສຣໂຕ, ຕສ຺ສ ຠາໂວ ໂສຣຈ຺ຈໍ. ເຕນາຫ ‘‘ໂສຣຈ຺ເຈນາຕິ ສຸຈິສີລຕາຍາ’’ຕິ. ສາ ຫິ ໂສຠນກມ຺ມຣຕຕາ, ສຸຏ຺ຐຸ ວາ ປາປໂຕ ໂອຣຕຠາໂວ ວິຣຕຕາ. ຈຕຸຕ຺ເຖ ນຕ຺ຖິ ວຕ຺ຕພ຺ພໍ.

ກິມິລສຸຕ຺ຕາທິວຓ຺ຓນາ ນິຏ຺ຐິຕາ.

໕. ເຈໂຕຂິລສຸຕ຺ຕວຓ຺ຓນາ

໒໐໕. ປຎ຺ຈເມ ເຈໂຕຂິລາ ນາມ ອຕ຺ຖໂຕ ວິຈິກິຈ຺ຉາ ໂກໂຘ ຈ. ເຕ ປນ ຍສ຺ມິໍ ສນ຺ຕາເນ ອຸປ຺ປຊ຺ຊນ຺ຕິ, ຕສ຺ສ ຂຣຠາໂວ ກກ຺ຂຬຠາໂວ ຫຸຕ຺ວາ ອຸປຕິຏ຺ຐນ຺ຕິ, ປເຄວ ອຕ຺ຕນາ ສມ຺ປຍຸຕ຺ຕຈິຕ຺ຕສ຺ສາຕິ ອາຫ ‘‘ຈິຕ຺ຕສ຺ສ ຖທ຺ຘຠາວາ’’ຕິ. ຍຖາ ລກ຺ຂຓປາຣິປູຣິຍາ ຄຫິຕາຍ ສພ຺ພາ ສຕ຺ຖຸ ຣູປກາຍສິຣີ ຄຫິຕາ ເອວ ນາມ ໂຫຕິ ເອວໍ ສພ຺ພຎ຺ຎຸຕາຍ ສພ຺ພຘມ຺ມກາຍສິຣີ ຄຫິຕາ ເອວ ນາມ ໂຫຕີຕິ ຕທຸຠຍວຕ຺ຖຸກເມວ ກງ຺ຂໍ ທສ຺ເສນ຺ໂຕ ‘‘ສຣີເຣ ກງ຺ຂມາໂນ’’ຕິອາທິມາຫ. ວິຈິນນ຺ໂຕຕິ ຘມ຺ມສຠາວໍ ວີມໍສນ຺ໂຕ. ກິຈ຺ຉຕີຕິ ກິລມຕິ. ວິນິຈ຺ເຉຕຸໍ ນ ສກ຺ໂກຕີຕິ ສນ຺ນິຏ຺ຐາຕຸໍ ນ ສກ຺ໂກຕິ. ອາຕປຕິ ກິເລເສຕິ ອາຕປ຺ປໍ, ສມ຺ມາວາຍາໂມຕິ ອາຫ ‘‘ອາຕປ຺ປາຍາຕິ ກິເລສສນ຺ຕາປນວີຣິຍກຣຓຕ຺ຖາຍາ’’ຕິ. ປຸນປ຺ປຸນໍ ໂຍຄາຍາຕິ ຠາວນໍ ປຸນປ຺ປຸນໍ ຍຸຎ຺ຊນາຍ. ສຕຕກິຣິຍາຍາຕິ ຠາວນາຍ ນິຣນ຺ຕຣປ຺ປໂຍຄາຍ.

ປຏິເວຘຘມ຺ເມ ກງ຺ຂມາໂນຕິ ເອຕ຺ຖ ກຖໍ ໂລກຸຕ຺ຕຣຘມ຺ເມ ກງ຺ຂາ ປວຕ຺ຕີຕິ? ນ ອາຣມ຺ມຓກຣຓວເສນ, ອນຸສ຺ສຸຕາກາຣປຣິວິຕກ຺ກລທ຺ເຘ ປຣິກປ຺ປິຕຣູເປ ກງ຺ຂາ ປວຕ຺ຕຕີຕິ ທສ຺ເສນ຺ໂຕ ອາຫ ‘‘ວິປສ຺ສນາ…ເປ… ວທນ຺ຕິ, ຕໍ ອຕ຺ຖິ ນຸ ໂຂ ນຕ຺ຖີຕິ ກງ຺ຂຕີ’’ຕິ. ສິກ຺ຂາຕິ ເຈຕ຺ຖ ປຸພ຺ພຠາຄສິກ຺ຂາ ເວທິຕພ຺ພາ. ກາມຎ຺ເຈຕ຺ຖ ວິເສສຸປ຺ປຕ຺ຕິຍາ ມຫາສາວຊ຺ຊຕາຍ ເຈວ ສໍວາສນິມິຕ຺ຕໍ ຆຏນາເຫຕຸ ອຠິຓ຺ຫຸປ຺ປຕ຺ຕິກຕາຍ ຈ ສພ຺ຣຫ຺ມຈາຣີສູຕິ ໂກປສ຺ສ ວິສໂຍ ວິເສເສຕ຺ວາ ວຸຕ຺ໂຕ, ອຎ຺ຎຕ຺ຖາປິ ໂກໂປ ນ ເຈໂຕຂິໂລຕິ ນ ສກ຺ກາ ວິຎ຺ຎາຕຸນ຺ຕິ ເກຈິ. ຍທິ ເອວໍ ວິຈິກິຈ຺ຉາຍປິ ອຍໍ ນໂຍ ອາປຊ຺ຊຕິ, ຕສ຺ມາ ຍຖາຣຸຕວເສນ ຄເຫຕພ຺ພໍ.

ເຈໂຕຂິລສຸຕ຺ຕວຓ຺ຓນາ ນິຏ຺ຐິຕາ.

໖-໘. ວິນິພນ຺ຘສຸຕ຺ຕາທິວຓ຺ຓນາ

໒໐໖-໘. ຉຏ຺ເຐ ປວຕ຺ຕິຕຸໍ ອປ຺ປທານວເສນ ກຸສລຈິຕ຺ຕໍ ວິນິພນ຺ຘນ຺ຕີຕິ ເຈຕໂສວິນິພນ຺ຘາ. ຕໍ ປນ ວິນິພນ຺ຘນ຺ຕາ ມຸຏ຺ຐິຄ຺ຄາຫໍ ຄຓ຺ຫນ຺ຕາ ວິຍ ໂຫນ຺ຕີຕິ ອາຫ ‘‘ຈິຕ຺ຕໍ ວິນິພນ຺ຘິຕ຺ວາ’’ຕິອາທິ. ກາມຄິທ຺ໂຘ ປຸຄ຺ຄໂລ ວຕ຺ຖຸກາເມປິ ກິເລສກາເມປິ ອສ຺ສາເທຕິ ອຠິນນ຺ທຕີຕິ ວຸຕ຺ຕໍ ‘‘ວຕ຺ຖຸກາເມປິ ກິເລສກາເມປີ’’ຕິ. ອຕ຺ຕໂນ ກາເຍຕິ ອຕ຺ຕໂນ ນາມກາເຍ, ອຕ຺ຕຠາເວ ວາ. ພຫິທ຺ຘາຣູເປຕິ ປເຣສໍ ກາເຍ ອນິນ຺ທ຺ຣິຍພທ຺ຘຣູເປ ຈ. ອຸທຣໍ ອວທິຫຕິ ອຸປຈິໂນຕິ ປູເຣຕີຕິ ອຸທຣາວເທຫກໍ. ເສຍ຺ຍສຸຂນ຺ຕິ ເສຍ຺ຍາຍ ສຍນວເສນ ອຸປ຺ປຊ຺ຊນກສຸຂໍ. ສມ຺ປຣິວຕ຺ຕກນ຺ຕິ ສມ຺ປຣິວຕ຺ຕິຕ຺ວາ. ປຓິຘາຍາຕິ ຕຓ຺ຫາວເສເນວ ປຓິທຫິຕ຺ວາ. ອິຕິ ປຎ຺ຈວິໂຘປິ ໂລຠວິເສໂສ ເອວ ‘‘ເຈໂຕວິນິພນ຺ໂຘ’’ຕິ ວຸຕ຺ໂຕຕິ ເວທິຕພ຺ໂພ. ສຕ຺ຕມຏ຺ຐເມສຸ ນຕ຺ຖິ ວຕ຺ຕພ຺ພໍ.

ວິນິພນ຺ຘສຸຕ຺ຕາທິວຓ຺ຓນາ ນິຏ຺ຐິຕາ.

໙-໑໐. ຄີຕສ຺ສຣສຸຕ຺ຕາທິວຓ຺ຓນາ

໒໐໙-໒໑໐. ນວເມ ອາຍຕໂກ ນາມ ຄີຕສ຺ສໂຣ ຕໍ ຕໍ ວຕ຺ຕໍ ຠິນ຺ທິຕ຺ວາ ອກ຺ຂຣານິ ວິນາເສຕ຺ວາ ປວຕ຺ໂຕຕິ ອາຫ ‘‘ອາຍຕເກນາ’’ຕິອາທິ. ຘມ຺ເມຫິ ສຸຕ຺ຕວຕ຺ຕໍ ນາມ ອຕ຺ຖິ, ຄາຖາວຕ຺ຕໍ ນາມ ອຕ຺ຖິ, ຕໍ ວິນາເສຕ຺ວາ ອຕິທີຆໍ ກາຕຸໍ ນ ວຏ຺ຏຕິ. ຘມ຺ມຎ຺ຫິ ຠາສນ຺ເຕນ ຈຕຸຣສ຺ເສນ ວຕ຺ເຕນ ປຣິມຓ຺ຑລານິ ປທພ຺ຍຎ຺ຊນານິ ທສ຺ເສຕພ຺ພານິ. ‘‘ອນຸຊານາມິ, ຠິກ຺ຂເວ, ສຣຠຎ຺ຎ’’ນ຺ຕິ (ຈູຬວ. ໒໔໙) ຈ ວຈນໂຕ ສເຣນ ຘມ຺ມໍ ຠຓິຕຸໍ ວຏ຺ຏຕິ. ສຣຠຎ຺ເຎ ກິຣ ຕຣງ຺ຄວຕ຺ຕໂຘຕກວຕ຺ຕຠາຄຄ຺ຄຫກວຕ຺ຕາທີນິ ທ຺ວຕ຺ຕິໍສ ວຕ຺ຕານິ ອຕ຺ຖິ. ເຕສຸ ຍໍ ອິຈ຺ຉຕິ, ຕໍ ກາຕຸໍ ລຠຕີຕິ. ທສເມ ນຕ຺ຖິ ວຕ຺ຕພ຺ພໍ.

ຄີຕສ຺ສຣສຸຕ຺ຕາທິວຓ຺ຓນາ ນິຏ຺ຐິຕາ.

ກິມິລວຄ຺ຄວຓ຺ຓນາ ນິຏ຺ຐິຕາ.