(໒໒) ໒. ອກ຺ໂກສກວຄ຺ໂຄ

໑-໒. ອກ຺ໂກສກສຸຕ຺ຕາທິວຓ຺ຓນາ

໒໑໑-໒. ທຸຕິຍສ຺ສ ປຐເມ ທສຫິ ອກ຺ໂກສວຕ຺ຖູຫິ ອກ຺ໂກສໂກຕິ ‘‘ພາໂລສິ, ມູຬ຺ໂຫສິ, ໂອຏ຺ໂຐສິ, ໂຄໂຓສິ, ຄທ຺ຣໂຠສີ’’ຕິອາທິນາ ທສຫິ ອກ຺ໂກສວຕ຺ຖູຫິ ອກ຺ໂກສໂກ. ‘‘ໂຫຕຸ, ມຸຓ຺ຑກສມຓ, ອທຓ຺ໂຑ ອຫນ຺ຕິ ກໂຣສິ, ອິທານິ ເຕ ຣາຊກຸລໍ ຄນ຺ຕ຺ວາ ທຓ຺ຑໍ ອາໂຣເປສ຺ສາມີ’’ຕິອາທີນິ ວທນ຺ໂຕ ປຣິຠາສໂກ ນາມາຕິ ອາຫ ‘‘ຠຍທສ຺ສເນນ ປຣິຠາສໂກ’’ຕິ. ໂລກຸຕ຺ຕຣຘມ຺ມາ ອປາຍມຄ຺ຄສ຺ສ ປຣິປນ຺ຖຠາວໂຕ ປຣິປນ຺ໂຖ ນາມາຕິ ອາຫ ‘‘ໂລກຸຕ຺ຕຣປຣິປນ຺ຖສ຺ສ ຉິນ຺ນຕ຺ຕາ’’ຕິ, ໂລກຸຕ຺ຕຣສງ຺ຂາຕສ຺ສ ອປາຍມຄ຺ຄປຣິປນ຺ຖສ຺ສ ຉິນ຺ນຕ຺ຕາຕິ ອຕ຺ໂຖ. ທຸຕິເຍ ນຕ຺ຖິ ວຕ຺ຕພ຺ພໍ.

ອກ຺ໂກສກສຸຕ຺ຕາທິວຓ຺ຓນາ ນິຏ຺ຐິຕາ.

໓-໑໐. ສີລສຸຕ຺ຕາທິວຓ຺ຓນາ

໒໑໓-໒໒໐. ຕຕິເຍ (ທີ. ນິ. ຏີ. ໒.໑໔໙) ທຸສ຺ສີໂລຕິ ເອຕ຺ຖ ທຸ-ສທ຺ໂທ ອຠາວຕ຺ໂຖ ‘‘ທຸປ຺ປຎ຺ໂຎ’’ຕິອາທີສຸ (ມ. ນິ. ໑.໔໔໙) ວິຍ, ນ ຄຣຫຓຕ຺ໂຖຕິ ອາຫ ‘‘ອສີໂລ ນິສ຺ສີໂລ’’ຕິ. ຠິນ຺ນສໍວໂຣຕິ ເອຕ຺ຖ ສມາທິນ຺ນສີໂລ ເກນຈິ ກາຣເຓນ ສີລເຠທໍ ປຕ຺ໂຕ, ໂສ ຕາວ ຠິນ຺ນສໍວໂຣ ໂຫຕຸ. ໂຍ ປນ ສພ຺ເພນ ສພ຺ພໍ ອສມາທິນ຺ນສີໂລ ອາຈາຣຫີໂນ, ໂສ ກຖໍ ຠິນ຺ນສໍວໂຣ ນາມ ໂຫຕີຕິ? ໂສປິ ສາຘຸສມາຈາຣສ຺ສ ປຣິຫຣຓີຍສ຺ສ ເຠທິຕຕ຺ຕາ ຠິນ຺ນສໍວໂຣ ເອວ ນາມ. ວິນຏ຺ຐສໍວໂຣ ສໍວຣຣຫິໂຕຕິ ຫິ ວຸຕ຺ຕໍ ໂຫຕິ. ຕໍ ຕໍ ສິປ຺ປຏ຺ຐານໍ. ມາຆາຕກາເລຕິ ‘‘ມາ ຆາເຕຖ ປາຓີນ’’ນ຺ຕິ ເອວໍ ມາຆາຕໂຆສນໍ ໂຆສິຕທິວເສ. ອພ຺ຠຸຄ຺ຄຈ຺ຉຕິ ປາປໂກ ກິຕ຺ຕິສທ຺ໂທ. ອຊ຺ຌາສເຍນ ມງ຺ກຸ ໂຫຕິເຍວ ວິປ຺ປຏິສາຣິຠາວໂຕ.

ຕສ຺ສາຕິ ທຸສ຺ສີລສ຺ສ. ສມາທາຍ ວຕ຺ຕິຕຏ຺ຐານນ຺ຕິ ອຸຏ຺ຐາຍ ສມຸຏ຺ຐາຍ ກຕກາຣຓໍ. ອາປາຖໍ ອາຄຈ຺ຉຕີຕິ ຕໍ ມນໂສ ອຸປຏ຺ຐາຕິ. ອຸມ຺ມີເລຕ຺ວາ ອິຘໂລກນ຺ຕິ ອຸມ຺ມີລນກາເລ ອຕ຺ຕໂນ ປຸຕ຺ຕທາຣາທິວເສນ ອິຘໂລກໍ ປສ຺ສຕິ. ນິມີເລຕ຺ວາ ປຣໂລກນ຺ຕິ ນິມີລນກາເລ ຄຕິນິມິຕ຺ຕຸປຏ຺ຐານວເສນ ປຣໂລກໍ ປສ຺ສຕິ. ເຕນາຫ ‘‘ຈຕ຺ຕາໂຣ ອປາຍາ’’ຕິອາທິ. ປຎ຺ຈມປທນ຺ຕິ ‘‘ກາຍສ຺ສ ເຠທາ’’ຕິອາທິນາ ວຸຕ຺ໂຕ ປຎ຺ຈໂມ ອາທີນວໂກຏ຺ຐາໂສ. ວຸຕ຺ຕວິປຣິຍາເຍນາຕິ ວຸຕ຺ຕຕ຺ຖາຍ ອາທີນວກຖາຍ ວິປຣິຍາເຍນ ‘‘ອປ຺ປມຕ຺ໂຕ ຕໍ ຕໍ ກສິວຓິຊ຺ຊາທິໍ ຍຖາກາລໍ ສມ຺ປາເທຕຸໍ ສກ຺ໂກຕີ’’ຕິອາທິນາ. ປາສໍສໍ ສີລມສ຺ສ ອຕ຺ຖີຕິ ສີລວາ. ສີລສມ຺ປນ຺ໂນຕິ ສີເລນ ສມນ຺ນາຄໂຕ ສມ຺ປນ຺ນສີໂລຕິ ເອວມາທິກໍ ປນ ອຕ຺ຖວຈນໍ ສຸກຣນ຺ຕິ ອນາມຏ຺ຐໍ. ຈຕຸຕ຺ຖາທີນິ ອຸຕ຺ຕານຕ຺ຖາເນວ.

ສີລສຸຕ຺ຕາທິວຓ຺ຓນາ ນິຏ຺ຐິຕາ.

ອກ຺ໂກສກວຄ຺ຄວຓ຺ຓນາ ນິຏ຺ຐິຕາ.