໑໐. ນິສ຺ສາຣຓີຍສຸຕ຺ຕວຓ຺ຓນາ

໒໐໐. ທສເມ ນິສ຺ສຣນ຺ຕີຕິ ນິສ຺ສຣຓີຍາຕິ ວຕ຺ຕພ຺ເພ ທີຆໍ ກຕ຺ວາ ນິທ຺ເທໂສ. ກຕ຺ຕຣິ ເຫສ ອນີຍ-ສທ຺ໂທ ຍຖາ ‘‘ນິຍ຺ຍານິຍາ’’ຕິ. ເຕນາຫ ‘‘ນິສ຺ສຏາ’’ຕິ. ກຸໂຕ ປນ ນິສ຺ສຏາ? ຍຖາສກໍ ປຏິປກ຺ຂໂຕ. ນິຊ຺ຊີວຏ຺ເຐນ ຘາຕຸໂຍຕິ ອາຫ ‘‘ອຕ຺ຕສຸຎ຺ຎສຠາວາ’’ຕິ. ອຕ຺ຖໂຕ ປນ ຘມ຺ມຘາຕຸມໂນວິຎ຺ຎາຓຘາຕຸວິເສໂສ. ຕາທິສສ຺ສ ຠິກ຺ຂຸໂນ ກິເລສວເສນ ກາເມສຸ ມນສິກາໂຣ ນຕ຺ຖີຕິ ອາຫ ‘‘ວີມໍສນຕ຺ຖ’’ນ຺ຕິ, ‘‘ເນກ຺ຂມ຺ມນິຍຕໍ ອິທານິ ເມ ຈິຕ຺ຕໍ, ກິໍ ນຸ ໂຂ ກາມວິຕກ຺ໂກປິ ອຸປ຺ປຊ຺ຊິສ຺ສຕີ’’ຕິ ວີມໍສນ຺ຕສ຺ສາຕິ ອຕ຺ໂຖ. ປກ຺ຂນ຺ທນໍ ນາມ ອນຸປ຺ປເວໂສ. ໂສ ປນ ຕຕ຺ຖ ນຕ຺ຖີຕິ ອາຫ ‘‘ນປ຺ປວິສຕີ’’ຕິ. ປສີທນໍ ນາມ ອຠິຣຸຈິ. ສນ຺ຕິຏ຺ຐນໍ ປຕິຏ຺ຐານໍ. ວິມຸຈ຺ຈນໍ ອຘິມຸຈ຺ຈນນ຺ຕິ. ຕໍ ສພ຺ພໍ ປຏິກ຺ຂິປນ຺ໂຕ ວທຕິ ‘‘ປສາທໍ ນາປຊ຺ຊຕີ’’ຕິອາທິ. ເອວໍຠູຕໍ ປນສ຺ສ ຈິຕ຺ຕໍ ຕສ຺ສ ກຖໍ ຕິຏ຺ຐຕີຕິ ອາຫ ‘‘ຍຖາ’’ຕິອາທິ.

ຕນ຺ຕິ ປຐມຊ຺ຌານໍ. ອສ຺ສາຕິ ຠິກ຺ຂຸໂນ. ຈິຕ຺ຕໍ ປກ຺ຂນ຺ທຕີຕິ ປຣິກມ຺ມຈິຕ຺ເຕນ ສທ຺ຘິໍ ຌານຈິຕ຺ຕໍ ເອກຕ຺ຕວເສນ ເອກຊ຺ຌໍ ກຕ຺ວາ ວທຕິ. ໂຄຈເຣ ຄຕຕ຺ຕາຕິ ອຕ຺ຕໂນ ອາຣມ຺ມເຓ ເອວ ປວຕ຺ຕຕ຺ຕາ. ອຫານຠາຄິຍຕ຺ຕາຕິ ຐິຕິຠາຄິຍຕ຺ຕາ. ສຸຏ຺ຐຸ ວິມຸຕ຺ຕນ຺ຕິ ວິກ຺ຂມ຺ຠນວິມຸຕ຺ຕິຍາ ສມ຺ມເທວ ວິມຸຕ຺ຕໍ. ຈິຕ຺ຕສ຺ສ ຈ ກາຍສ຺ສ ຈ ວິຫນນໂຕ ວິຆາໂຕ. ທຸກ຺ຂໍ ປຣິທຫນໂຕ ປຣິຬາໂຫ. ກາມເວທນໍ ນ ເວທິຍຕິ ອນຸປ຺ປຊ຺ຊນໂຕ. ນິສ຺ສຣນ຺ຕິ ຕໂຕຕິ ນິສ຺ສຣຓໍ. ເກ ນິສ຺ສຣນ຺ຕິ? ກາມາ. ເອວຎ຺ຈ ກາມານນ຺ຕິ ກຕ຺ຕຸສາມິວຈນໍ ສຸຏ຺ຐຸ ຍຸຊ຺ຊຕິ. ຍທຄ຺ເຄນ ກາມາ ຕໂຕ ນິສ຺ສຏາຕິ ວຸຈ຺ຈນ຺ຕິ, ຕທຄ຺ເຄນ ຌານມ຺ປິ ກາມໂຕ ນິສ຺ສຏນ຺ຕິ ວຕ຺ຕພ຺ພຕໍ ລຠຕີຕິ ວຸຕ຺ຕໍ ‘‘ກາເມຫິ ນິສ຺ສຏຕ຺ຕາ’’ຕິ. ເອວໍ ວິກ຺ຂມ຺ຠນວເສນ ກາມນິສ຺ສຣຓໍ ວຕ຺ວາ ອິທານິ ສມຸຈ຺ເຉທວເສນ ອຈ຺ຈນ຺ຕໂຕ ນິສ຺ສຣຓໍ ທສ຺ເສຕຸໍ ‘‘ໂຍ ປນາ’’ຕິອາທິ ວຸຕ຺ຕໍ. ເສສປເທສູຕິ ເສສໂກຏ຺ຐາເສສຸ.

ອຍໍ ປນ ວິເສໂສຕິ ວິເສສໍ ວທນ຺ເຕນ ຕໍ ຌານໍ ປາທກໍ ກຕ຺ວາຕິອາທິໂກ ອວິເສໂສຕິ ກຕ຺ວາ ທຸຕິຍຕຕິຍວາເຣສຸ ສພ຺ພໂສ ອນາມຏ຺ໂຐ, ຈຕຸຕ຺ຖວາເຣ ປນ ອຍມ຺ປິ ວິເສໂສຕິ ທສ຺ເສຕຸໍ ‘‘ອຈ຺ຈນ຺ຕນິສ຺ສຣຓຎ຺ເຈຕ຺ຖ ອຣຫຕ຺ຕຜລໍ ໂຍເຊຕພ຺ພ’’ນ຺ຕິ ວຸຕ຺ຕໍ. ຍສ຺ມາ ອຣູປຊ຺ຌານໍ ປາທກໍ ກຕ຺ວາ ອຄ຺ຄມຄ຺ຄໍ ອຘິຄນ຺ຕ຺ວາ ອຣຫຕ຺ເຕ ຐິຕສ຺ສ ຈິຕ຺ຕໍ ສພ຺ພໂສ ຣູເປຫິ ນິສ຺ສຏໍ ນາມ ໂຫຕິ. ຕສ຺ສ ຫິ ຜລສມາປຕ຺ຕິໂຕ ວຸຏ຺ຐາຍ ວີມໍສນຕ຺ຖໍ ຣູປາຠິມຸຂໍ ຈິຕ຺ຕໍ ເປເສນ຺ຕສ຺ສ. ອິທມກ຺ຂາຕນ຺ຕິ ສມຖຍານິການໍ ວເສນ ເຫຏ຺ຐາ ຈຕ຺ຕາໂຣ ວາຣາ ຄຫິຕາ. ອິທໍ ປນ ສຸກ຺ຂວິປສ຺ສກສ຺ສ ວເສນາຕິ ອາຫ ‘‘ສຸທ຺ຘສງ຺ຂາເຣ’’ຕິອາທິ. ‘‘ປຸນ ສກ຺ກາໂຍ ນຕ຺ຖີ’’ຕິ ອຸປ຺ປນ຺ນນ຺ຕິ ‘‘ອິທານິ ເມ ສກ຺ກາຍປ຺ປພນ຺ໂຘ ນຕ຺ຖີ’’ຕິ ວີມໍສນ຺ຕສ຺ສ ອຸປ຺ປນ຺ນໍ.

ນິສ຺ສາຣຓີຍສຸຕ຺ຕວຓ຺ຓນາ ນິຏ຺ຐິຕາ.

ພ຺ຣາຫ຺ມຓວຄ຺ຄວຓ຺ຓນາ ນິຏ຺ຐິຕາ.

ຈຕຸຕ຺ຖປຓ຺ຓາສກໍ ນິຏ຺ຐິຕໍ.