໔. ກາຣຓປາລີສຸຕ຺ຕວຓ຺ຓນາ

໑໙໔. ຈຕຸຕ຺ເຖ ປຓ຺ຑິໂຕ ມຎ຺ເຎຕິ ເອຕ຺ຖ ມຎ຺ເຎຕິ ອິທໍ ‘‘ມຎ຺ຎຕີ’’ຕິ ອິມິນາ ສມານຕ຺ຖໍ ນິປາຕປທໍ. ຕສ຺ສ ອິຕິ-ສທ຺ທໍ ອາເນຕ຺ວາ ອຕ຺ຖໍ ທສ຺ເສນ຺ໂຕ ‘‘ປຓ຺ຑິໂຕຕິ ມຎ຺ຎຕີ’’ຕິ ອາຫ. ອນຸມຕິປຸຈ຺ຉາວເສນ ເຈຕໍ ວຸຕ຺ຕໍ. ເຕເນວາຫ ‘‘ອຸທາຫຸ ໂນ’’ຕິ. ‘‘ຕໍ ກິໍ ມຎ຺ຎຕິ ຠວໍ ປິງ຺ຄິຍານີ ສມຓສ຺ສ ໂຄຕມສ຺ສ ປຎ຺ຎາເວຍ຺ຍຕ຺ຕິຍ’’ນ຺ຕິ ວຸຕ຺ຕເມວຕ຺ຖໍ ປຸນ ຄຓ຺ຫນ຺ໂຕ ‘‘ປຓ຺ຑິໂຕ ມຎ຺ເຎ’’ຕິ ອາຫ, ຕສ຺ມາ ວຸຕ຺ຕໍ ‘‘ຠວໍ ປິງ຺ຄິຍານີ ສມຓໍ ໂຄຕມໍ ປຓ຺ຑິໂຕຕິ ມຎ຺ຎຕິ ອຸທາຫຸ ໂນ’’ຕິ, ຍຖາ ເຕ ຂເມຍ຺ຍ, ຕຖາ ນໍ ກເຖຫີຕິ ອຘິປ຺ປາໂຍ. ອຫໍ ໂກ ນາມ, ມມ ອວິສໂຍ ເອໂສຕິ ທສ຺ເສຕິ. ໂກ ຈາຕິ ເຫຕຸນິສ຺ສກ຺ເກ ປຈ຺ຈຕ຺ຕວຈນນ຺ຕິ ອາຫ ‘‘ກຸໂຕ ຈາ’’ຕິ. ຕຖາ ຈາຫ ‘‘ເກນ ກາຣເຓນ ຊານິສ຺ສາມີ’’ຕິ, ເຍນ ກາຣເຓນ ສມຓສ຺ສ ໂຄຕມສ຺ສ ປຎ຺ຎາເວຍ຺ຍຕ຺ຕິຍໍ ຊາເນຍ຺ຍໍ, ຕໍ ກາຣຓໍ ມຍິ ນຕ຺ຖີຕິ ອຘິປ຺ປາໂຍ. ພຸທ຺ໂຘເຍວ ຠເວຍ຺ຍ ອພຸທ຺ຘສ຺ສ ສພ຺ພຖາ ພຸທ຺ຘຎາຓານຸຠາວໍ ຊານິຕຸໍ ອສກ຺ກຸເຓຍ຺ຍຕ຺ຕາຕິ. ວຸຕ຺ຕຎ຺ເຫຕໍ – ‘‘ອປ຺ປມຕ຺ຕກໍ ປເນຕໍ, ຠິກ຺ຂເວ, ໂອຣມຕ຺ຕກໍ ສີລມຕ຺ຕກໍ, ເຍນ ປຸຖຸຊ຺ຊໂນ ຕຖາຄຕສ຺ສ ວຓ຺ຓໍ ວທມາໂນ ວເທຍ຺ຍ (ທີ. ນິ. ໑.໗). ອຕ຺ຖິ, ຠິກ຺ຂເວ, ອຎ຺ເຎວ ຘມ຺ມາ ຄມ຺ຠີຣາ ທຸທ຺ທສາ ທຸຣນຸໂພຘາ…ເປ… ເຍຫິ ຕຖາຄຕສ຺ສ ຍຖາຠູຕໍ ວຓ຺ຓໍ ສມ຺ມາ ວທມາໂນ ວເທຍ຺ຍາ’’ຕິ (ທີ. ນິ. ໑.໒໘) ຈ. ເອຕ຺ຖາຕິ ‘‘ໂສປິ ນູນສ຺ສ ຕາທິໂສ’’ຕິ ເອຕສ຺ມິໍ ປເທ.

ປສຕ຺ຖປ຺ປສຕ຺ໂຖຕິ ປສຕ຺ເຖຫິ ປາສໍເສຫິ ອຕ຺ຕໂນ ຄຸເຓເຫວ ໂສ ປສຕ຺ໂຖ, ນ ຕສ຺ສ ກິຕ຺ຕິນາ, ປສໍສາສຠາເວເນວ ປາສໍໂສຕິ ອຕ຺ໂຖ. ເຕນາຫ ‘‘ສພ຺ພຄຸຓານ’’ນ຺ຕິອາທິ. ມຓິຣຕນນ຺ຕິ ຈກ຺ກວຕ຺ຕິໂນ ມຓິຣຕນໍ.

ສເທວເກ ປາສໍສານມ຺ປິ ປາສໍໂສຕິ ທສ຺ເສຕຸໍ ‘‘ປສຕ຺ເຖຫິ ວາ’’ຕິ ທຸຕິຍວິກປ຺ໂປ ຄຫິໂຕ. ອຣຓີຍໂຕ ອຕ຺ໂຖ, ໂສ ເອວ ວສຕີຕິ ວໂສຕິ ອຕ຺ຖວໂສ. ຕສ຺ສ ຕສ຺ສ ປໂຍຄສ຺ສ ອານິສໍສຠູຕໍ ຜລນ຺ຕິ ອາຫ ‘‘ອຕ຺ຖວສນ຺ຕິ ອຕ຺ຖານິສໍສ’’ນ຺ຕິ. ອຕ຺ໂຖ ວາ ຜລໍ ຕທຘີນວຸຕ຺ຕິຕາຍ ວໂສ ເອຕສ຺ສາຕິ ອຕ຺ຖວໂສ, ກາຣຓໍ.

ຂຸທ຺ທກມຘູຕິ ຂຸທ຺ທກມກ຺ຂິກາຫິ ກຕທຓ຺ຑກມຘຸ. ອເນຬກນ຺ຕິ ນິທ຺ໂທສໍ ອປຄຕມກ຺ຂິກຓ຺ຑກໍ.

ອຸທາຫຣີຍຕິ ອຸພ຺ເພຄປີຕິວເສນາຕິ ອຸທານໍ, ຕຖາ ວາ ອຸທາຫຣຓໍ ອຸທານໍ. ເຕນາຫ ‘‘ອຸທາຫາຣໍ ອຸທາຫຣີ’’ຕິ. ຍຖາ ປນ ຕໍ ວຈນໍ ອຸທານນ຺ຕິ ວຸຈ຺ຈຕິ, ຕໍ ທສ຺ເສຕຸໍ ‘‘ຍຖາ ຫີ’’ຕິອາທິ ວຸຕ຺ຕໍ. ເສສໍ ສຸວິຎ຺ເຎຍ຺ຍເມວ.

ກາຣຓປາລີສຸຕ຺ຕວຓ຺ຓນາ ນິຏ຺ຐິຕາ.