(໑໗) ໒. ອາຆາຕວຄ຺ໂຄ

໑-໕. ປຐມອາຆາຕປຏິວິນຍສຸຕ຺ຕາທິວຓ຺ຓນາ

໑໖໑-໑໖໕. ທຸຕິຍສ຺ສ ປຐເມ ນຕ຺ຖິ ວຕ຺ຕພ຺ພໍ. ທຸຕິເຍ ອາຆາໂຕ ປຏິວິນຍຕິ ເອຕ຺ຖ, ເອເຕຫີຕິ ວາ ອາຆາຕປຏິວິນຍາ. ເຕນາຫ ‘‘ອາຆາໂຕ ເອເຕຫິ ປຏິວິເນຕພ຺ໂພ’’ຕິອາທິ.

ນນ຺ຕກນ຺ຕິ ອນນ຺ຕກໍ, ອນ຺ຕວິຣຫິຕໍ ວຕ຺ຖຂຓ຺ຑໍ. ຍທິ ຫິ ຕສ຺ສ ອນ຺ໂຕ ຠເວຍ຺ຍ, ‘‘ປິໂລຕິກາ’’ຕິ ສງ຺ຂໍ ນ ຄຈ຺ເຉຍ຺ຍ.

ເສວາເລນາຕິ ພີຊກຓ຺ຓິກເກສຣາທິເຠເທນ ເສວາເລນ. ອຸທກປປ຺ປຏເກນາຕິ ນີລມຓ຺ຑູກປິຏ຺ຐິວຓ຺ເຓນ ອຸທກປິຏ຺ຐິໍ ຉາເທຕ຺ວາ ນິພ຺ພຕ຺ເຕນ ອຸທກປິຏ຺ຐິເກນ. ຆມ຺ເມນ ອນຸຄໂຕຕິ ຆມ຺ເມນ ຜຸຏ຺ໂຐ ອຠິຠູໂຕ. ຈິຕ຺ຕຸປ຺ປາທນ຺ຕິ ປຏິຆສມ຺ປຍຸຕ຺ຕຈິຕ຺ຕຸປ຺ປາທໍ.

ວິສຠາຄເວທນຸປ຺ປຕ຺ຕິຍາ ກກເຈເນວ ອິຣິຍາປຖປວຕ຺ຕິນິວາຣເຓນ ຉິນ຺ທນ຺ໂຕ ອາພາຘຕິ ປີເຬຕີຕິ ອາພາໂຘ, ໂສ ອສ຺ສ ອຕ຺ຖີຕິ ອາພາຘິໂກ. ຕໍສມຸຏ຺ຐາເນນ ທຸກ຺ຂິໂຕ ສຎ຺ຊາຕທຸກ຺ໂຂ. ພາຬ຺ຫຄິລາໂນຕິ ອຘິມຕ຺ຕຄິລາໂນ. ຄາມນ຺ຕນາຍກສ຺ສາຕິ ຄາມນ຺ຕສມ຺ປາປກສ຺ສ.

ປສນ຺ນຠາເວນ ອຸທກສ຺ສ ອຈ຺ຉຠາໂວ ເວທິຕພ຺ໂພຕິ ອາຫ ‘‘ອຈ຺ໂຉທກາຕິ ປສນ຺ໂນທກາ’’ຕິ. ສາທຸຣສຕາຍ ສາຕຕາຕິ ອາຫ ‘‘ມຘຸໂຣທກາ’’ຕິ. ຕນຸກເມວ ສລິລໍ ວິເສສໂຕ ສີຕລໍ, ນ ພຫລາຕິ ອາຫ ‘‘ຕນຸສີຕສລິລາ’’ຕິ. ເສຕກາຕິ ນິກ຺ກທ຺ທມາ. ສຈິກ຺ຂລ຺ລາທິວເສນ ຫິ ອຸທກສ຺ສ ວິວຓ຺ຓຕາ. ສຠາວໂຕ ປນ ຕໍ ເສຕວຓ຺ຓເມວ. ຕຕິຍາທີນິ ອຸຕ຺ຕານຕ຺ຖາເນວ.

ປຐມອາຆາຕປຏິວິນຍສຸຕ຺ຕາທິວຓ຺ຓນາ ນິຏ຺ຐິຕາ.

໖. ນິໂຣຘສຸຕ຺ຕວຓ຺ຓນາ

໑໖໖. ຉຏ຺ເຐ ອມຣິສນຕ຺ເຖຕິ ອສຫນຕ຺ເຖ. ອນາຄຕວຈນໍ ກຕນ຺ຕິ ອນາຄຕສທ຺ທປ຺ປໂຍໂຄ ກໂຕ, ອຕ຺ໂຖ ປນ ວຕ຺ຕມານກາລິໂກວ. ອກ຺ຂຣຈິນ຺ຕກາ (ປາຓິນິ. ໓.໓.໑໔໕-໑໔໖) ຫິ ອີທິເສສຸ ຐາເນສຸ ອໂນກປ຺ປນາມຣິສນຕ຺ຖວເສນ ອຕ຺ຖິສທ຺ເທ ອຸປປເທ ວຕ຺ຕມານກາເລປິ ອນາຄຕວຈນໍ ກໂຣນ຺ຕິ.

ນິໂຣຘສຸຕ຺ຕວຓ຺ຓນາ ນິຏ຺ຐິຕາ.

໗-໙. ໂຈທນາສຸຕ຺ຕາທິວຓ຺ຓນາ

໑໖໗-໙. ສຕ຺ຕເມ ວຕ຺ຖຸສນ຺ທສ຺ສນາຕິ ຍສ຺ມິໍ ວຕ຺ຖຸສ຺ມິໍ ອາປຕ຺ຕິ, ຕສ຺ສ ສຣູປໂຕ ທສ຺ສນໍ. ອາປຕ຺ຕິສນ຺ທສ຺ສນາຕິ ຍໍ ອາປຕ຺ຕິໍ ໂສ ອາປນ຺ໂນ, ຕສ຺ສາ ທສ຺ສນໍ. ສໍວາສປ຺ປຏິກ຺ເຂໂປຕິ ອຸໂປສຖປ຺ປວາຣຓາທິສໍວາສສ຺ສ ປຏິກ຺ຂິປນໍ ອກຣຓໍ. ສາມີຈິປ຺ປຏິກ຺ເຂໂປຕິ ອຠິວາທນາທິສາມີຈິກິຣິຍາຍ ອກຣຓໍ. ໂຈທຍມາເນນາຕິ ໂຈເທນ຺ເຕນ. ຈຸທິຕກສ຺ສ ກາໂລຕິ ຈຸທິຕກສ຺ສ ໂຈເທຕພ຺ພກາໂລ. ປຸຄ຺ຄລນ຺ຕິ ໂຈເທຕພ຺ພປຸຄ຺ຄລໍ. ອຸປປຣິກ຺ຂິຕ຺ວາຕິ ‘‘ອຍໍ ຈຸທິຕກລກ຺ຂເຓ ຕິຏ຺ຐຕິ, ນ ຕິຏ຺ຐຕີ’’ຕິ ວີມໍສິຕ຺ວາ. ອຍສໍ ອາໂຣເປຕີຕິ ‘‘ອິເມ ມໍ ອຠູເຕນ ອພ຺ຠາຈິກ຺ຂນ຺ຕາ ອຍສໍ ພ຺ຍສນໍ ອຸປ຺ປາເທນ຺ຕີ’’ຕິ ຠິກ຺ຂູນໍ ອຍສໍ ອຸປ຺ປາເທຕິ. ອຏ຺ຐມນວມານິ ອຸຕ຺ຕານຕ຺ຖາເນວ.

ໂຈທນາສຸຕ຺ຕາທິວຓ຺ຓນາ ນິຏ຺ຐິຕາ.

໑໐. ຠທ຺ທຊິສຸຕ຺ຕວຓ຺ຓນາ

໑໗໐. ທສເມ ອຠິຠວິຕ຺ວາ ຐິໂຕ ອິເມ ສຕ຺ເຕຕິ ອຘິປ຺ປາໂຍ. ຍສ຺ມາ ປນ ໂສ ‘‘ປາສໍສຠາເວນ ອຸຕ຺ຕມຠາເວນ ຈ ເຕ ສຕ຺ເຕ ອຠິຠວິຕ຺ວາ ຐິໂຕ’’ຕິ ອຕ຺ຕານໍ ມຎ຺ຎຕິ, ຕສ຺ມາ ວຸຕ຺ຕໍ ‘‘ເຊຏ຺ຐໂກ’’ຕິ. ອຎ຺ຎທຕ຺ຖຸ ທໂສຕິ ທສ຺ສເນ ອນ຺ຕຣາຍາຠາວວຈເນນ ເຎຍ຺ຍວິເສສປຣິຄ຺ຄາຫິກຠາເວນ ຈ ອນາວຣຓທສ຺ສາວິຕໍ ປຏິຊານາຕີຕິ ອາຫ ‘‘ສພ຺ພໍ ປສ຺ສຕີຕິ ອຘິປ຺ປາໂຍ’’ຕິ.

ຠທ຺ທຊິສຸຕ຺ຕວຓ຺ຓນາ ນິຏ຺ຐິຕາ.

ອາຆາຕວຄ຺ຄວຓ຺ຓນາ ນິຏ຺ຐິຕາ.