(໑໔) ໔. ຣາຊວຄ຺ໂຄ

໑. ປຐມຈກ຺ການຸວຕ຺ຕນສຸຕ຺ຕວຓ຺ຓນາ

໑໓໑. ຈຕຸຕ຺ຖສ຺ສ ປຐເມ ອຕ຺ຖຎ຺ຎູຕິ ຫິຕຎ຺ຎູ. ຫິຕປຣິຍາໂຍ ເຫຕ຺ຖ ອຕ຺ຖ-ສທ຺ໂທ ‘‘ອຕ຺ຕຕ຺ໂຖ ປຣຕ຺ໂຖ’’ຕິອາທີສຸ (ມຫານິ. ໖໙; ຈູຬນິ. ໂມຆຣາຊມາຓວປຸຈ຺ຉານິທ຺ເທໂສ ໘໕; ປຏິ. ມ. ໓.໕) ວິຍ. ຍສ຺ມາ ເຈສ ປເຣສໍ ຫິຕໍ ຊານນ຺ໂຕ ເຕ ອຕ຺ຕນິ ຣຎ຺ເຊຕິ, ຕສ຺ມາ ວຸຕ຺ຕໍ ‘‘ຣຎ຺ຊິຕຸໍ ຊານາຕີ’’ຕິ. ທຓ຺ເຑຕິ ອປຣາຘານຸຣູເປ ທຓ຺ຑເນ. ພລມ຺ຫີຕິ ພລກາເຍ. ປຎ຺ຈ ອຕ຺ເຖຕິ ອຕ຺ຕຕ຺ໂຖ, ປຣຕ຺ໂຖ, ອຸຠຍຕ຺ໂຖ, ທິຏ຺ຐຘມ຺ມິໂກ ອຕ຺ໂຖ, ສມ຺ປຣາຍິໂກ ອຕ຺ໂຖຕິ ເອວໍ ປຎ຺ຈປ຺ປເຠເທ ອຕ຺ເຖ. ຈຕ຺ຕາໂຣ ຘມ຺ເມຕິ ຈຕຸສຈ຺ຈຘມ຺ເມ, ກາມຣູປາຣູປໂລກຸຕ຺ຕຣເຠເທ ວາ ຈຕ຺ຕາໂຣ ຘມ຺ເມ. ປຏິຄ຺ຄຫຓປຣິໂຠຄມຕ຺ຕຎ຺ຎຸຕາຍ ເອວ ປຣິເຍສນວິສ຺ສຊ຺ຊນມຕ຺ຕຎ຺ຎຸຕາປິ ໂພຘິຕາ ໂຫນ຺ຕີຕິ ‘‘ປຏິຄ຺ຄຫຓປຣິໂຠຄມຕ຺ຕໍ ຊານາຕິ’’ອິຈ຺ເຈວ ວຸຕ຺ຕໍ.

ອຸຕ຺ຕຣຕິ ອຕິກ຺ກມຕິ, ອຠິຠວຕີຕິ ວາ ອຸຕ຺ຕຣໍ, ນຕ຺ຖິ ເອຕ຺ຖ ອຸຕ຺ຕຣນ຺ຕິ ອນຸຕ຺ຕຣໍ. ອນຕິສຍໍ, ອປ຺ປຏິຠາຄໍ ວາ ອເນກາສຸ ເທວມນຸສ຺ສປຣິສາສຸ ອເນກສຕກ຺ຂຕ຺ຕຸໍ ເຕສໍ ອຣິຍສຈ຺ຈປ຺ປຏິເວຘສມ຺ປາທນວເສນ ປວຕ຺ຕາ ຠຄວໂຕ ຘມ຺ມເທສນາ ຘມ຺ມຈກ຺ກໍ. ອປິຈ ສພ຺ພປຐມໍ ອຎ຺ຎາຕໂກຓ຺ຑຎ຺ຎປ຺ປມຸຂາຍ ອຏ຺ຐາຣສປຣິສຄຓາຍ ພ຺ຣຫ຺ມໂກຏິຍາ ຈຕຸສຈ຺ຈສ຺ສ ປຏິເວຘວິຘາຍິນີ ຍາ ຘມ຺ມເທສນາ, ຕສ຺ສາ ສາຕິສຍາ ຘມ຺ມຈກ຺ກສມຎ຺ຎາ. ຕຕ຺ຖ ສຕິປຏ຺ຐານາຕິຘມ຺ໂມ ເອວ ປວຕ຺ຕນຏ຺ເຐນ ຈກ຺ກນ຺ຕິ ຘມ຺ມຈກ຺ກໍ. ຈກ຺ກນ຺ຕິ ວາ ອາຓາ ຘມ຺ມໂຕ ອນເປຕຕ຺ຕາ, ຘມ຺ມຎ຺ຈ ຕໍ ຈກ຺ກຎ຺ຈາຕິ ຘມ຺ມຈກ຺ກໍ. ຘມ຺ເມນ ຎາເຍນ ຈກ຺ກນ຺ຕິປິ ຘມ຺ມຈກ຺ກໍ. ຍຖາຫ ‘‘ຘມ຺ມຎ຺ຈ ປວຕ຺ເຕຕິ ຈກ຺ກຎ຺ຈາຕິ ຘມ຺ມຈກ຺ກໍ, ຈກ຺ກຎ຺ຈ ປວຕ຺ເຕຕິ ຘມ຺ມຎ຺ຈາຕິ ຘມ຺ມຈກ຺ກໍ, ຘມ຺ເມນ ປວຕ຺ເຕຕີຕິ ຘມ຺ມຈກ຺ກ’’ນ຺ຕິອາທິ (ປຏິ. ມ. ໒.໔໐-໔໑). ອປ຺ປຏິວຕ຺ຕິຍນ຺ຕິ ຘມ຺ມິສ຺ສຣສ຺ສ ຠຄວໂຕ ສມ຺ມາສມ຺ພຸທ຺ຘສ຺ສ ຘມ຺ມຈກ຺ກສ຺ສ ອນຸຕ຺ຕຣຠາວໂຕ ອປ຺ປຏິເສຘນີຍໍ. ເກຫິ ປນ ອປ຺ປຏິວຕ຺ຕິຍນ຺ຕິ ອາຫ – ‘‘ສມເຓນ ວາ’’ຕິອາທິ. ຕຕ຺ຖ ສມເຓນາຕິ ປພ຺ພຊ຺ຊໍ ອຸປຄເຕນ. ພ຺ຣາຫ຺ມເຓນາຕິ ຊາຕິພ຺ຣາຫ຺ມເຓນ. ສາສນປຣມຕ຺ຖສມຓພ຺ຣາຫ຺ມຓານຎ຺ຫິ ປຏິໂລມຈິຕ຺ຕໍເຍວ ນຕ຺ຖິ. ເທເວນາຕິ ກາມາວຈຣເທເວນ. ເກນຈີຕິ ເຍນ ເກນຈິ ອວສິຏ຺ຐປາຣິສຊ຺ເຊນ. ເອຕ຺ຕາວຕາ ອຏ຺ຐນ຺ນມ຺ປິ ປຣິສານໍ ອນວເສສປຣິຍາທານໍ ທຏ຺ຐພ຺ພໍ. ໂລກສ຺ມິນ຺ຕິ ສຕ຺ຕໂລເກ.

ປຐມຈກ຺ການຸວຕ຺ຕນສຸຕ຺ຕວຓ຺ຓນາ ນິຏ຺ຐິຕາ.

໒. ທຸຕິຍຈກ຺ການຸວຕ຺ຕນສຸຕ຺ຕວຓ຺ຓນາ

໑໓໒. ທຸຕິເຍ ຈກ຺ກວຕ຺ຕິວຕ຺ຕນ຺ຕິ ທສວິຘໍ, ທ຺ວາທສວິຘໍ ວາ ຈກ຺ກວຕ຺ຕິຠາວາວຫໍ ວຕ຺ຕໍ. ຕຕ຺ຖ ອນ຺ໂຕຊນສ຺ມິໍ ພລກາເຍ ຘມ຺ມິກາເຍວ ຣກ຺ຂາວຣຓຄຸຕ຺ຕິຍາ ສໍວິຘານໍ, ຂຕ຺ຕິເຍສຸ, ອນຸຍນ຺ເຕສຸ, ພ຺ຣາຫ຺ມຓຄຫປຕິເກສຸ, ເນຄມຊານປເທສຸ, ສມຓພ຺ຣາຫ຺ມເຓສຸ, ມິຄປກ຺ຂີສຸ, ອຘມ຺ມິກປຏິກ຺ເຂໂປ, ອຘນານໍ ຘນານຸປ຺ປທານໍ, ສມຓພ຺ຣາຫ຺ມເຓ ອຸປສງ຺ກມິຕ຺ວາ ປຎ຺ຫປຸຈ຺ຉນນ຺ຕິ ອິທໍ ທສວິຘໍ ຈກ຺ກວຕ຺ຕິວຕ຺ຕໍ. ອິທເມວ ຈ ຄຫປຕິເກ ປກ຺ຂິຊາເຕ ຈ ວິສຸໍ ກຕ຺ວາ ຄຫຓວເສນ ທ຺ວາທສວິຘໍ. ປິຕຣາ ປວຕ຺ຕິຕເມວ ອນຸປ຺ປວຕ຺ເຕຕີຕິ ທສວິຘໍ ວາ ທ຺ວາທສວິຘໍ ວາ ຈກ຺ກວຕ຺ຕິວຕ຺ຕໍ ປູເຣຕ຺ວາ ນິສິນ຺ນສ຺ສ ປຸຕ຺ຕສ຺ສ ອຎ຺ຎໍ ປາຕຸຠວຕິ, ໂສ ຕໍ ປວຕ຺ເຕຕິ. ຣຕນມຍຕ຺ຕາ ປນ ສທິສຏ຺ເຐນ ຕເທເວຕນ຺ຕິ ກຕ຺ວາ ‘‘ປິຕຣາ ປວຕ຺ຕິຕ’’ນ຺ຕິ ວຸຕ຺ຕໍ. ຍສ຺ມາ ວາ ໂສ ‘‘ອປ຺ໂປສ຺ສຸກ຺ໂກ, ຕ຺ວໍ ເທວ, ໂຫຫິ, ອຫມນຸສາສິສ຺ສາມີ’’ຕິ ອາຫ. ຕສ຺ມາ ປິຕຣາ ປວຕ຺ຕິຕໍ ອາຓາຈກ຺ກໍ ອນຸປ຺ປວຕ຺ເຕຕິ ນາມາຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ. ຍຎ຺ຫິ ອຕ຺ຕໂນ ປຸຎ຺ຎານຸຠາວສິທ຺ຘໍ ຈກ຺ກຣຕນໍ, ຕໍ ນິປ຺ປຣິຍາຍໂຕ ເຕນ ປວຕ຺ຕິຕໍ ນາມ, ເນຕຣນ຺ຕິ ປຐມນໂຍ ວຸຕ຺ໂຕ. ຍສ຺ມາ ປວຕ຺ຕິຕສ຺ເສວ ອນຸວຕ຺ຕນໍ, ປຐມນໂຍ ຈ ຕໍສທິເສ ຕພ຺ໂພຫາຣວເສນ ວຸຕ຺ໂຕຕິ ຕໍ ອນາທິຍິຕ຺ວາ ທຸຕິຍນໂຍ ວຸຕ຺ໂຕ.

ທຸຕິຍຈກ຺ການຸວຕ຺ຕນສຸຕ຺ຕວຓ຺ຓນາ ນິຏ຺ຐິຕາ.

໔. ຍສ຺ສໍທິສໍສຸຕ຺ຕວຓ຺ຓນາ

໑໓໔. ຈຕຸຕ຺ເຖ ‘‘ອຸຠໂຕ ສຸຊາໂຕ’’ຕິ ເອຕ຺ຕເກ ວຸຕ຺ເຕ ເຍຫິ ເກຫິຈິ ທ຺ວີຫິ ຠາເຄຫິ ສຸຊາຕຕາ ປຎ຺ຎາເປຍ຺ຍ, ສຸຊາຕ-ສທ຺ໂທ ຈ ‘‘ສຸຊາໂຕ ຈາຣຸທສ຺ສໂນ’’ຕິອາທີສຸ (ມ. ນິ. ໒.໓໙໙; ສຸ. ນິ. ໕໕໓; ເຖຣຄາ. ໘໑໘) ອາໂຣຫສມ຺ປຕ຺ຕິປຣິຍາໂຍຕິ ຊາຕິວເສນ ສຸຊາຕຕໍ ວິຠາເວຕຸໍ ‘‘ມາຕິໂຕ ຈ ປິຕິໂຕ ຈາ’’ຕິ ວຸຕ຺ຕໍ. ອໂນຣສປຸຕ຺ຕວເສນປິ ໂລເກ ມາຕຸປິຕຸສມຎ຺ຎາ ທິສ຺ສຕິ, ອິຘ ປນ ສາ ໂອຣສປຸຕ຺ຕວເສນ ອິຈ຺ຉິຕາຕິ ທສ຺ເສຕຸໍ ‘‘ສໍສຸທ຺ຘຄ຺ຄຫຓິໂກ’’ຕິ ວຸຕ຺ຕໍ. ຄພ຺ຠໍ ຄຓ຺ຫາຕິ ຘາເຣຕີຕິ ຄຫຓີ, ຄພ຺ຠາສຍສຎ຺ຎິໂຕ ມາຕຸກຸຈ຺ຉິປ຺ປເທໂສ. ເຕນາຫ ‘‘ສໍສຸທ຺ຘາຍ ມາຕຸກຸຈ຺ຉິຍາ ສມນ຺ນາຄໂຕ’’ຕິ. ຍຖາຠຸຕ຺ຕສ຺ສ ອາຫາຣສ຺ສ ວິປາຈນວເສນ ຄຓ຺ຫນໂຕ ອຉຑ຺ຑນໂຕ ຄຫຓີ, ເຕໂຊຘາຕຸ. ປິຕາ ຈ ມາຕາ ຈ ປິຕໂຣ. ປິຕູນໍ ປິຕໂຣ ປິຕາມຫາ. ເຕສໍ ຍຸໂຄ ປິຕາມຫຍຸໂຄ, ຕສ຺ມາ ຍາວ ສຕ຺ຕມາ ປິຕາມຫຍຸຄາ, ປິຕາມຫທ຺ວນ຺ທາຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ. ເອວຎ຺ຫິ ປິຕາມຫຄ຺ຄຫເຓເນວ ມາຕາມໂຫປິ ຄຫິໂຕຕິ ໂສ ອຏ຺ຐກຖາຍໍ ວິສຸໍ ນ ອຸທ຺ຘໂຕ. ຍຸຄ-ສທ຺ໂທ ເຈຕ຺ຖ ເອກເສສນເຍນ ທຏ຺ຐພ຺ໂພ ‘‘ຍຸໂຄ ຈ ຍຸໂຄ ຈ ຍຸໂຄ’’ຕິ. ເອວຎ຺ຫິ ຕຕ຺ຖ ຕຕ຺ຖ ທ຺ວິນ຺ນໍ ຄຫິຕເມວ ໂຫຕິ. ເຕນາຫ ‘‘ຕໂຕ ອຸທ຺ຘໍ ສພ຺ເພປິ ປຸພ຺ພປຸຣິສາ ປິຕາມຫຄ຺ຄຫເຓເນວ ຄຫິຕາ’’ຕິ. ປຸຣິສຄ຺ຄຫຓຎ຺ເຈຕ຺ຖ ອຸກ຺ກຏ຺ຐນິທ຺ເທສວເສນ ກຕນ຺ຕິ ທຏ຺ຐພ຺ພໍ. ເອວຎ຺ຫິ ‘‘ມາຕິໂຕ’’ຕິ ປາຬິວຈນໍ ສມຕ຺ຖິຕໍ ໂຫຕິ.

ອກ຺ຂິຕ຺ໂຕຕິ ອປ຺ປຕ຺ຕກ຺ເຂໂປ. ອນວກ຺ຂິຕ຺ໂຕຕິ ສມ຺ປຕ຺ຕວິວາທາທີສຸ ນ ອວກ຺ຂິຕ຺ໂຕ ນ ຉຑ຺ຑິໂຕ. ຊາຕິວາເທນາຕິ ເຫຕຸມ຺ຫິ ກຣຓວຈນນ຺ຕິ ທສ຺ເສຕຸໍ ‘‘ເກນ ກາຣເຓນາ’’ຕິອາທິ ວຸຕ຺ຕໍ. ເອຕ຺ຖ ຈ ‘‘ອຸຠໂຕ…ເປ… ປິຕາມຫຍຸຄາ’’ຕິ ເອເຕນ ຂຕ຺ຕິຍສ຺ສ ໂຍນິໂທສາຠາໂວ ທສ຺ສິໂຕ ສໍສຸທ຺ຘຄ຺ຄຫຓິກຠາວກິຕ຺ຕນໂຕ. ‘‘ອກ຺ຂິຕ຺ໂຕ’’ຕິ ອິມິນາ ກິຣິຍາປຣາຘາຠາໂວ. ກິຣິຍາປຣາເຘນ ຫິ ສຕ຺ຕາ ເຂປໍ ປາປຸຓນ຺ຕິ. ‘‘ອນຸປກ຺ກຸຏ຺ໂຐ’’ຕິ ອິມິນາ ອຍຸຕ຺ຕສໍສຄ຺ຄາຠາໂວ. ອຍຸຕ຺ຕສໍສຄ຺ຄຎ຺ຫິ ປຏິຈ຺ຈ ສຕ຺ຕາ ອກ຺ໂກສໍ ລຠນ຺ຕິ.

ອຑ຺ຒຕາ ນາມ ວິຠວສມ຺ປນ຺ນຕາ, ສາ ຕໍ ຕໍ ອຸປາທາຍຸປາທາຍ ວຸຈ຺ຈຕີຕິ ອາຫ ‘‘ໂຍ ໂກຈິ ອຕ຺ຕໂນ ສນ຺ຕເກນ ວິຠເວນ ອຑ຺ໂຒ ໂຫຕີ’’ຕິ. ຕຖາ ມຫທ຺ຘນຕາປີຕິ ຕໍ ອຸກ຺ກໍສຄຕໍ ທສ຺ເສຕຸໍ ‘‘ມຫຕາ ອປຣິມາຓສງ຺ເຂນ ຘເນນ ສມນ຺ນາຄໂຕ’’ຕິ ວຸຕ຺ຕໍ. ຠຸຎ຺ຊິຕພ຺ພໂຕ ປຣິຠຸຎ຺ຊິຕພ຺ພໂຕ ວິເສສໂຕ ກາມາ ໂຠຄາ ນາມາຕິ ອາຫ ‘‘ປຎ຺ຈກາມຄຸຓວເສນາ’’ຕິ. ໂກຏ຺ຐໍ ວຸຈ຺ຈຕິ ຘຎ຺ຎສ຺ສ ອາວສນຏ຺ຐານໍ, ໂກຏ຺ຐຠູຕໍ ອຄາຣໍ ໂກຏ຺ຐາຄາຣໍ. ເຕນາຫ ‘‘ຘຎ຺ເຎນ ຈ ປຣິປຸຓ຺ຓໂກຏ຺ຐາຄາໂຣ’’ຕິ. ເອວໍ ສາຣຄພ຺ຠໍ ໂກໂສ, ຘຎ຺ຎປຣິຏ຺ຐປນຏ຺ຐານຎ຺ຈ ໂກຏ຺ຐາຄາຣນ຺ຕິ ທສ຺ເສຕ຺ວາ ອິທານິ ຕໂຕ ອຎ຺ຎຖາ ຕໍ ທສ຺ເສຕຸໍ ‘‘ອຖ ວາ’’ຕິອາທິ ວຸຕ຺ຕໍ. ຕຕ຺ຖ ຍຖາ ອສິໂນ ຕິກ຺ຂຠາວປຣິຫາຣໂກ ປຏິຈ຺ຉໂທ ‘‘ໂກໂສ’’ຕິ ວຸຈ຺ຈຕິ. ເອວໍ ຣຎ຺ໂຎ ຕິກ຺ຂຠາວປຣິຫາຣໍ ກຕ຺ວາ ຈຕຸຣງ຺ຄິນີ ເສນາ ໂກໂສຕິ ອາຫ ‘‘ຈຕຸພ຺ພິໂຘ ໂກໂສ ຫຕ຺ຖີ ອສ຺ສາ ຣຖາ ປຕ຺ຕີ’’ຕິ. ວຕ຺ຖໂກຏ຺ຐາຄາຣຄ຺ຄຫເຓເນວ ສພ຺ພສ຺ສປິ ຠຓ຺ຑຏ຺ຐປນຏ຺ຐານສ຺ສ ຄຫິຕຕ຺ຕາ ‘‘ຕິວິຘໍ ໂກຏ຺ຐາຄາຣ’’ນ຺ຕິ ວຸຕ຺ຕໍ.

ຍສ຺ສາ ປຎ຺ຎາຍ ວເສນ ປຸຣິໂສ ‘‘ປຓ຺ຑິໂຕ’’ຕິ ວຸຈ຺ຈຕິ, ຕໍ ປຓ຺ຑິຈ຺ຈນ຺ຕິ ອາຫ ‘‘ປຓ຺ຑິຈ຺ເຈນ ສມນ຺ນາຄໂຕ’’ຕິ. ຕໍຕໍອິຕິກຕ຺ຕພ຺ພຕາສຸ ເຉກຠາໂວ ພ຺ຍຕ຺ຕຠາໂວ ເວຍ຺ຍຕ຺ຕິຍໍ. ສມ຺ໂມຫໍ ຫິໍສຕິ ວິຘມຕີຕິ ເມຘາ, ສາ ເອຕສ຺ສ ອຕ຺ຖີຕິ ເມຘາວີ. ຐາເນ ຐາເນ ອຸປ຺ປຕ຺ຕິ ເອຕິສ຺ສາ ອຕ຺ຖີຕິ ຐານຸປ຺ປຕ຺ຕິ, ຐານໂສ ອຸປ຺ປຊ຺ຊນປຎ຺ຎາ. ວຑ຺ຒິອຕ຺ເຖຕິ ວຑ຺ຒິສງ຺ຂາເຕ ອຕ຺ເຖ.

ຍສ຺ສໍທິສໍສຸຕ຺ຕວຓ຺ຓນາ ນິຏ຺ຐິຕາ.

໕-໙. ປຕ຺ຖນາສຸຕ຺ຕາທິວຓ຺ຓນາ

໑໓໕-໙. ປຎ຺ຈເມ ຫຕ຺ຖິສ຺ມິນ຺ຕິ ຫຕ຺ຖິສິປ຺ເປ. ຫຕ຺ຖີຕິ ຫິ ຫຕ຺ຖິວິສຍຕ຺ຕາ ຫຕ຺ຖິສນ຺ນິສ຺ສິຕຕ຺ຕາ ຈ ຫຕ຺ຖິສິປ຺ປໍ ຄຫິຕໍ. ເສສປເທສຸປິ ເອເສວ ນໂຍ. ວຍຕີຕິ ວໂຍ, ໂສຠເນສຸ ກຕ຺ຖຈິ ອປກ຺ຂລນ຺ໂຕ ອວິຕ຺ຖາຍນ຺ໂຕ ຕານິ ສນ຺ຘາເຣຕຸໍ ສກ຺ໂກຕີຕິ ອຕ຺ໂຖ. ນ ວໂຍ ອວໂຍ, ຕານິ ອຕ຺ຖໂຕ ສທ຺ທໂຕ ຈ ສນ຺ຘາເຣຕຸໍ ນ ສກ຺ໂກຕິ. ອວໂຍ ນ ໂຫຕີຕິ ອນວໂຍ. ທ຺ເວ ປຏິເສຘາ ປກຕິໍ ຄເມນ຺ຕີຕິ ອາຫ ‘‘ອນວໂຍຕິ ສມຕ຺ໂຖ’’ຕິ. ຉຏ຺ຐາທີນິ ອຸຕ຺ຕານຕ຺ຖາເນວ.

ປຕ຺ຖນາສຸຕ຺ຕາທິວຓ຺ຓນາ ນິຏ຺ຐິຕາ.

໑໐. ໂສຕສຸຕ຺ຕວຓ຺ຓນາ

໑໔໐. ທສເມ ຕິພ຺ພານນ຺ຕິ ຕິກ຺ຂານໍ. ຂຣານນ຺ຕິ ກກ຺ກສານໍ. ກຏຸການນ຺ຕິ ທາຣຸຓານໍ. ອສາຕານນ຺ຕິ ນສາຕານໍ ອປ຺ປິຍານໍ. ນ ຕາສຸ ມໂນ ອປ຺ເປຕິ, ນ ຕາ ມນໍ ອປ຺ປາຍນ຺ຕິ ວຑ຺ເຒນ຺ຕີຕິ ອມນາປາ.

ໂສຕສຸຕ຺ຕວຓ຺ຓນາ ນິຏ຺ຐິຕາ.

ຣາຊວຄ຺ຄວຓ຺ຓນາ ນິຏ຺ຐິຕາ.