(໑໕) ໕. ຕິກຓ຺ຑກີວຄ຺ໂຄ
໑. ອວຊານາຕິສຸຕ຺ຕວຓ຺ຓນາ
໑໔໑. ປຎ຺ຈມສ຺ສ ປຐເມ ທຕ຺ວາ ອວຊານາຕີຕິ ເອຕ຺ຖ ເອໂກ ຠິກ຺ຂຸ ມຫາປຸຎ຺ໂຎ ຈຕຸປຈ຺ຈຍລາຠີ ໂຫຕິ, ໂສ ຈີວຣາທີນິ ລຠິຕ຺ວາ ອຎ຺ຎໍ ອປ຺ປປຸຎ຺ຎໍ ອາປຸຈ຺ຉຕິ. ໂສປິ ຕສ຺ມິໍ ປຸນປ຺ປຸນໍ ອາປຸຈ຺ຉນ຺ເຕປິ ຄຓ຺ຫາຕິເຍວ. ອຖສ຺ສ ອິຕໂຣ ໂຖກໍ ກຸປິໂຕ ຫຸຕ຺ວາ ມງ຺ກຸຠາວໍ ອຸປ຺ປາເທຕຸກາໂມ ວທຕິ ‘‘ອຍໍ ອຕ຺ຕໂນ ຘມ຺ມຕາຍ ຈີວຣາທີນິ ນ ລຠຕິ, ອມ຺ເຫ ນິສ຺ສາຍ ລຠຕີ’’ຕິ. ເອວມ຺ປິ ທຕ຺ວາ ອວຊານາຕິ ນາມ. ເອໂກ ປນ ເອເກນ ສທ຺ຘິໍ ທ຺ເວ ຕີຓິ ວສ຺ສານິ ວສນ຺ໂຕ ປຸພ຺ເພ ຕໍ ປຸຄ຺ຄລໍ ຄຣຸໍ ກຕ຺ວາ ຄຈ຺ຉນ຺ເຕ ຄຈ຺ຉນ຺ເຕ ກາເລ ຈິຕ຺ຕີກາຣໍ ນ ກໂຣຕິ, ອາສນນິສິນ຺ນຏ຺ຐານມ຺ປິ ນ ຄຈ຺ຉຕິ. ອຍມ຺ປິ ປຸຄ຺ຄໂລ ສໍວາເສນ ອວຊານາຕິ ນາມ. ອາເຘຍ຺ຍມຸໂຂຕິ ອາທິໂຕ ເຘຍ຺ຍມຸໂຂ, ປຐມວຈນສ຺ມິໍເຍວ ຐປິຕມຸໂຂຕິ ອຕ຺ໂຖ. ຕຕ຺ຖາຍໍ ນໂຍ – ເອໂກ ປຸຄ຺ຄໂລ ສາຣຸປ຺ປໍເຍວ ຠິກ຺ຂຸໍ ‘‘ອສາຣຸປ຺ໂປ ເອໂສ’’ຕິ ກເຖຕິ. ຕໍ ສຸຕ຺ວາ ເອສ ນິຏ຺ຐໍ ຄຈ຺ຉຕິ, ປຸນ ອຎ຺ເຎນ ສຠາເຄນ ຠິກ຺ຂຸນາ ‘‘ສາຣຸປ຺ໂປ ອຍ’’ນ຺ຕິ ວຸຕ຺ເຕປິ ຕສ຺ສ ວຈນໍ ນ ຄຓ຺ຫາຕິ. ອສຸເກນ ນາມ ‘‘ອສາຣຸປ຺ໂປ ອຍ’’ນ຺ຕິ ອມ຺ຫາກໍ ກຖິຕນ຺ຕິ ປຸຣິມຠິກ຺ຂຸໂນວ ກຖໍ ຄຓ຺ຫາຕິ. ອປໂຣປິສ຺ສ ທຸສ຺ສີລໍ ‘‘ສີລວາ’’ຕິ ກເຖຕິ. ຕສ຺ສ ວຈນໍ ສທ຺ທຫິຕ຺ວາ ປຸນ ອຎ຺ເຎນ ‘‘ອສາຣຸປ຺ໂປ ເອໂສ ຠິກ຺ຂຸ, ນາຍໍ ຕຸມ຺ຫາກໍ ສນ຺ຕິກໍ ອຸປສງ຺ກມິຕຸໍ ຍຸຕ຺ໂຕ’’ຕິ ວຸຕ຺ເຕປິ ຕສ຺ສ ວຈນໍ ອຄ຺ຄເຫຕ຺ວາ ປຸຣິມໍເຍວ ກຖໍ ຄຓ຺ຫາຕິ. ອປໂຣ ວຓ຺ຓມ຺ປິ ກຖິຕໍ ຄຓ຺ຫາຕິ, ອວຓ຺ຓມ຺ປິ ກຖິຕໍ ຄຓ຺ຫາຕິເຍວ. ອຍມ຺ປິ ອາເຘຍ຺ຍມຸໂຂເຍວ ນາມ ອາຘາຕພ຺ພມຸໂຂ, ຍໍ ຍໍ ສຸຓາຕິ, ຕຕ຺ຖ ຕຕ຺ຖ ຐປິຕມຸໂຂຕິ ອຕ຺ໂຖ.
ໂລໂລຕິ ສທ຺ຘາທີນໍ ອິຕ຺ຕຣກາລປ຺ປຕິຕຕ຺ຕາ ອສ຺ສທ຺ຘິຍາທີຫິ ລຸລິຕຠາເວນ ໂລໂລ. ອິຕ຺ຕຣຠຕ຺ຕີຕິອາທີສຸ ປຸນປ຺ປຸນໍ ຠຊເນນ ສທ຺ຘາວ ຠຕ຺ຕິເປມໍ. ສທ຺ຘາເປມມ຺ປິ ເຄຫສ຺ສິຕເປມມ຺ປິ ວຏ຺ຏຕິ, ປສາໂທ ສທ຺ຘາປສາໂທ. ເອວໍ ປຸຄ຺ຄໂລ ໂລໂລ ໂຫຕີຕິ ເອວໍ ອິຕ຺ຕຣສທ຺ຘາທິຕາຍ ປຸຄ຺ຄໂລ ໂລໂລ ນາມ ໂຫຕິ. ຫລິທ຺ທິຣາໂຄ ວິຍ, ຖຸສຣາສິມ຺ຫິ ໂກຏ຺ຏິຕຂານຸໂກ ວິຍ, ອສ຺ສປິຏ຺ຐິຍໍ ຐປິຕກຸມ຺ຠຓ຺ຑໍ ວິຍ ຈ ອນິພທ຺ຘຏ຺ຐາເນ ມຸຫຸຕ຺ເຕນ ກຸປ຺ປຕິ. ມນ຺ໂທ ໂມມູໂຫຕິ ອຎ຺ຎາຓຠາເວນ ມນ຺ໂທ, ອວິສຍຕາຍ ໂມມູໂຫ, ມຫາມູຬ຺ໂຫຕິ ອຕ຺ໂຖ.
ອວຊານາຕິສຸຕ຺ຕວຓ຺ຓນາ ນິຏ຺ຐິຕາ.
໒-໓. ອາຣຠຕິສຸຕ຺ຕາທິວຓ຺ຓນາ
໑໔໒-໓. ທຸຕິເຍ ອາຣຠຕີຕິ ເອຕ຺ຖ ອາຣມ຺ຠ-ສທ຺ໂທ ກມ຺ມກິຣິຍຫິໍສນວີຣິຍໂກປນາປຕ຺ຕິວີຕິກ຺ກເມສຸ ວຕ຺ຕຕິ. ຕຖາ ເຫສ ‘‘ຍໍ ກິຎ຺ຈິ ທຸກ຺ຂໍ ສມ຺ໂຠຕິ, ສພ຺ພໍ ອາຣມ຺ຠປຈ຺ຈຍາ’’ຕິ (ສຸ. ນິ. ໗໔໙) ກມ຺ເມ ອາຄໂຕ. ‘‘ມຫາຣມ຺ຠາ ມຫາຍຎ຺ຎາ, ນ ເຕ ໂຫນ຺ຕິ ມຫປ຺ຜລາ’’ຕິ (ສໍ. ນິ. ໑.໑໒໐; ອ. ນິ. ໔.໓໙) ກິຣິຍາຍ. ‘‘ສມຓໍ ໂຄຕມໍ ອຸທ຺ທິສ຺ສ ປາຓໍ ອາຣຠນ຺ຕີ’’ຕິ (ມ. ນິ. ໒.໕໑) ຫິໍສເນ. ‘‘ອາຣມ຺ຠຖ ນິກ຺ຂມຖ, ຍຸຎ຺ຊຖ ພຸທ຺ຘສາສເນ’’ຕິ (ສໍ. ນິ. ໑.໑໘໕; ເນຕ຺ຕິ. ໒໙; ເປຏໂກ. ໓໘; ມິ. ປ. ໕.໑.໔) ວີຣິເຍ. ‘‘ພີຊຄາມຠູຕຄາມສມາຣມ຺ຠາ ປຏິວິຣໂຕ ໂຫຕີ’’ຕິ (ທີ. ນິ. ໑.໑໐, ໑໙໕; ມ. ນິ. ໑.໒໙໓) ໂກປເນ. ‘‘ອາຣຠຕິ ຈ ວິປ຺ປຏິສາຣີ ຈ ໂຫຕີ’’ຕິ (ອ. ນິ. ໕.໑໔໒; ປຸ. ປ. ໑໙໑) ອຍໍ ປນ ອາປຕ຺ຕິວີຕິກ຺ກເມ ອາຄໂຕ, ຕສ຺ມາ ອາປຕ຺ຕິວີຕິກ຺ກມວເສນ ອາຣຠຕິ ເຈວ, ຕປ຺ປຈ຺ຈຍາ ຈ ວິປ຺ປຏິສາຣີ ໂຫຕີຕິ ອຍເມຕ຺ຖ ອຕ຺ໂຖ. ຍຖາຠູຕໍ ນປ຺ປຊານາຕີຕິ ອນຘິຄຕຕ຺ຕາ ຍຖາສຠາວໂຕ ນ ຊານາຕິ. ຍຕ຺ຖສ຺ສາຕິ ຍສ຺ມິໍ ອສ຺ສ, ຍໍ ຐານໍ ປຕ຺ວາ ເອຕສ຺ສ ປຸຄ຺ຄລສ຺ສ ອຸປ຺ປນ຺ນາ ປາປກາ ອກຸສລາ ຘມ຺ມາ ອປຣິເສສາ ນິຣຸຊ຺ຌນ຺ຕີຕິ ອຕ຺ໂຖ. ກິໍ ປນ ປຕ຺ວາ ເຕ ນິຣຸຊ຺ຌນ຺ຕີຕິ? ອຣຫຕ຺ຕມຄ຺ຄໍ, ຜລປ຺ປຕ຺ຕສ຺ສ ປນ ນິຣຸທ຺ຘາ ນາມ ໂຫນ຺ຕິ. ເອວໍ ສນ຺ເຕປິ ອິຘ ມຄ຺ຄກິຈ຺ຈວເສນ ປນ ຜລເມວ ວຸຕ຺ຕນ຺ຕິ ເວທິຕພ຺ພໍ.
ອາຣຠຕີ ນ ວິປ຺ປຏິສາຣີ ໂຫຕີຕິ ອາປຕ຺ຕິໍ ອາປຊ຺ຊຕິ, ຕໍ ປເນສ ເທເສຕຸໍ ສຠາຄປຸຄ຺ຄລໍ ປຣິເຍສຕິ, ຕສ຺ມາ ນ ວິປ຺ປຏິສາຣີ ໂຫຕິ. ນ ອາຣຠຕິ ວິປ຺ປຏິສາຣີ ໂຫຕີຕິ ອາປຕ຺ຕິໍ ນ ອາປຊ຺ຊຕິ, ວິນຍປຎ຺ຎຕ຺ຕິຍໍ ປນ ອໂກວິທຕ຺ຕາ ອນາປຕ຺ຕິຍາ ອາປຕ຺ຕິສຎ຺ຎີ ຫຸຕ຺ວາ ວິປ຺ປຏິສາຣີ ໂຫຕີຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ. ‘‘ນ ອາຣຠຕິ ນ ວິປ຺ປຏິສາຣີ ໂຫຕີ’’ຕິ ໂຍ ວຸຕ຺ໂຕ, ກຕໂຣ ໂສ ປຸຄ຺ຄໂລ? ໂອສ຺ສຏ຺ຐວີຣິຍປຸຄ຺ຄໂລ. ໂສ ຫິ ‘‘ກິໍ ເມ ອິມສ຺ມິໍ ກາເລ ປຣິນິພ຺ພາເນນ, ອນາຄເຕ ເມຕ຺ເຕຍ຺ຍສມ຺ມາສມ຺ພຸທ຺ຘກາເລ ປຣິນິພ຺ພາຍິສ຺ສາມີ’’ຕິ ວິສຸທ຺ຘສີໂລປິ ປຏິປຕ຺ຕິໍ ນ ປູເຣຕິ. ໂສ ຫິ ‘‘ກິມຕ຺ຖໍ ອາຍສ຺ມາ ປມຕ຺ໂຕ ວິຫຣຕິ, ປຸຖຸຊ຺ຊນສ຺ສ ນາມ ຄຕິ ອນິພທ຺ຘາ, ຕສ຺ມາ ຫິ ເມຕ຺ເຕຍ຺ຍສມ຺ມາສມ຺ພຸທ຺ຘສ຺ສ ສມ຺ມຸຂີຠາວໍ ລເຠຍ຺ຍາສິ, ອຣຫຕ຺ຕຕ຺ຖາຍ ວິປສ຺ສນໍ ຠາເວຫີ’’ຕິ ໂອວທິຕພ຺ໂພວ.
ສາຘູຕິ ອາຍາຈນຕ຺ເຖ ນິປາໂຕ. ອິທໍ ວຸຕ຺ຕໍ ໂຫຕິ – ຍາວ ອປຣທ຺ຘໍ ວຕ ອາຍສ຺ມຕາ, ເອວໍ ສນ຺ເຕປິ ມຍໍ ອາຍສ຺ມນ຺ຕໍ ຍາຈາມ, ເທເສຕພ຺ພຍຸຕ຺ຕກສ຺ສ ເທສນາຍ, ວຸຏ຺ຐາຕພ຺ພຍຸຕ຺ຕກສ຺ສ ວຸຏ຺ຐາເນນ, ອາວິກາຕພ຺ພຍຸຕ຺ຕກສ຺ສ ອາວິກິຣິຍາຍ ອາຣມ຺ຠເຊ ອາສເວ ປຫາຍ ສຸທ຺ຘນ຺ເຕ ຐິຕຠາວປຈ຺ຈເວກ຺ຂເຓນ ວິປ຺ປຏິສາຣເຊ ອາສເວ ປຏິວິໂນເທຕ຺ວາ ນີຫຣິຕ຺ວາ ວິປສ຺ສນາຈິຕ຺ຕຎ຺ເຈວ ວິປສ຺ສນາປຎ຺ຎຎ຺ຈ ວຑ຺ເຒຕູຕິ. ອມຸນາ ປຎ຺ຈເມນ ປຸຄ຺ຄເລນາຕິ ເອເຕນ ປຎ຺ຈເມນ ຂີຓາສວປຸຄ຺ຄເລນ. ສມສໂມ ຠວິສ຺ສຕີຕິ ໂລກຸຕ຺ຕຣຄຸເຓຫິ ສມຠາເວເນວ ສໂມ ຠວິສ຺ສຕີຕິ ເອວໍ ຂີຓາສເວນ ໂອວທິຕພ຺ໂພຕິ ອຕ຺ໂຖ. ຕຕິຍໍ ອຸຕ຺ຕານເມວ.
ອາຣຠຕິສຸຕ຺ຕາທິວຓ຺ຓນາ ນິຏ຺ຐິຕາ.
໔-໖. ຕິກຓ຺ຑກີສຸຕ຺ຕາທິວຓ຺ຓນາ
໑໔໔-໖. ຈຕຸຕ຺ເຖ ປຏິກູເລຕິ ອມນຸຎ຺ເຎ ອນິຏ຺ເຐ. ອປ຺ປຏິກູລສຎ຺ຎີຕິ ອິຏ຺ຐາກາເຣເນວ ປວຕ຺ຕຈິຕ຺ໂຕ. ອິຏ຺ຐສ຺ມິໍ ວຕ຺ຖຸສ຺ມິໍ ອສຸຠາຍ ວາ ຜຣຕິ, ອນິຈ຺ຈໂຕ ວາ ອຸປສໍຫຣຕິ ອຸປເນຕິ ປວຕ຺ເຕຕິ. ອນິຏ຺ຐສ຺ມິໍ ວຕ຺ຖຸສ຺ມິນ຺ຕິ ອນິຏ຺ເຐ ສຕ຺ຕສຎ຺ຎິເຕ ອາຣມ຺ມເຓ. ເມຕ຺ຕາຍ ວາ ຜຣຕີຕິ ເມຕ຺ຕໍ ຫິເຕສິຕໍ ອຸປສໍຫຣນ຺ໂຕ ສພ຺ພຕ຺ຖກເມວ ວາ ຕຕ຺ຖ ຜຣຕິ. ຘາຕຸໂຕ ວາ ອຸປສໍຫຣຕີຕິ ຘມ຺ມສຠາວຈິນ຺ຕເນນ ຘາຕຸໂຕ ປຈ຺ຈເວກ຺ຂຓາຍ ຘາຕຸມນສິກາຣໍ ວາ ຕຕ຺ຖ ປວຕ຺ເຕຕິ. ຕທຸຠຍໍ ອຠິນິວຊ຺ເຊຕ຺ວາຕິ ສຠາວໂຕ ອານຸຠາວໂຕ ຈ ອຸປຕິຏ຺ຐນ຺ຕໍ ອາຣມ຺ມເຓ ປຏິກູລຠາວໍ ອປ຺ປຏິກູລຠາວຎ຺ຈາຕິ ຕໍ ອຸຠຍໍ ປຫາຍ ອຄ຺ຄເຫຕ຺ວາ, ສພ຺ພສ຺ມິໍ ປນ ຕສ຺ມິໍ ມຊ຺ຌຕ຺ໂຕ ຫຸຕ຺ວາຕິ ວຸຕ຺ຕໍ ໂຫຕິ. ມຊ຺ຌຕ຺ໂຕ ຫຸຕ຺ວາ ວິຫຣິຕຸກາໂມ ປນ ກິໍ ກໂຣຕີຕິ? ອິຏ຺ຐານິຏ຺ເຐສຸ ອາປາຖໍ ຄເຕສຸ ເນວ ໂສມນສ຺ສິໂຕ ໂຫຕິ, ນ ໂທມນສ຺ສິໂຕ ໂຫຕິ. ອຸເປກ຺ຂໂກ ວິຫເຣຍ຺ຍາຕິ ອິຏ຺ເຐ ອຣຊ຺ຊນ຺ໂຕ ອນິຏ຺ເຐ ອທຸສ຺ສນ຺ໂຕ ຍຖາ ອຎ຺ເຎ ອສມເປກ຺ຂເນນ ໂມຫໍ ອຸປ຺ປາເທນ຺ຕິ, ເອວໍ ອນຸປ຺ປາເທນ຺ໂຕ ຉສຸ ອາຣມ຺ມເຓສຸ ຉຬງ຺ຄຸເປກ຺ຂາຍ ອຸເປກ຺ຂໂກ ວິຫເຣຍ຺ຍ. ເຕເນວາຫ ‘‘ຉຬງ຺ຄຸເປກ຺ຂາວເສນ ປຎ຺ຈໂມ’’ຕິ. ອິຏ຺ຐານິຏ຺ຐຉຬາຣມ຺ມຓາປາເຖ ປຣິສຸທ຺ຘປກຕິຠາວາວິຊຫນລກ຺ຂຓາຍ ຉສຸ ທ຺ວາເຣສຸ ປວຕ຺ຕນໂຕ ‘‘ຉຬງ຺ຄຸເປກ຺ຂາ’’ຕິ ລທ຺ຘນາມາຍ ຕຕ຺ຣມຊ຺ຌຕ຺ຕຸເປກ຺ຂາຍ ວເສນ ປຎ຺ຈໂມ ວາໂຣ ວຸຕ຺ໂຕຕິ ອຕ຺ໂຖ. ປຎ຺ຈມໍ ຉຏ຺ຐຎ຺ຈ ອຸຕ຺ຕານເມວ.
ຕິກຓ຺ຑກີສຸຕ຺ຕາທິວຓ຺ຓນາ ນິຏ຺ຐິຕາ.
໗-໑໐. ອສປ຺ປຸຣິສທານສຸຕ຺ຕາທິວຓ຺ຓນາ
໑໔໗-໑໕໐. ສຕ຺ຕເມ ອສກ຺ກຈ຺ຈນ຺ຕິ ອນາທຣໍ ກຕ຺ວາ. ເທຍ຺ຍຘມ຺ມສ຺ສ ອສກ຺ກຈ຺ຈກຣຓໍ ນາມ ອສມ຺ປນ຺ນໍ ກໂຣຕີຕິ ອາຫ ‘‘ນ ສກ຺ກຣິຕ຺ວາ ສຸຈິໍ ກຕ຺ວາ ເທຕີ’’ຕິ, ອຸຕ຺ຕຓ຺ຑຸລາທິໂທສວິຣຫິຕໍ ສຸຈິສມ຺ປນ຺ນໍ ກຕ຺ວາ ນ ເທຕີຕິ ອຕ຺ໂຖ. ອຈິຕ຺ຕີກຕ຺ວາຕິ ນ ຈິຕ຺ເຕ ກຕ຺ວາ, ນ ປູເຊຕ຺ວາຕິ ອຕ຺ໂຖ. ປູເຊນ຺ໂຕ ຫິ ປູເຊຕພ຺ພວຕ຺ຖຸໍ ຈິຕ຺ເຕ ຐເປຕິ, ນ ຕໂຕ ພຫິ ກໂຣຕິ. ຈິຕ຺ຕໍ ວາ ອຈ຺ຉຣິຍໍ ກຕ຺ວາ ປຏິປຕ຺ຕິວິກຣຓໍ ສມ຺ຠາວນກິຣິຍາ, ຕປ຺ປຏິກ຺ເຂປໂຕ ອຈິຕ຺ຕີກຣຓໍ ອສມ຺ຠາວນກິຣິຍາ. ອຄາຣເວນ ເທຕີຕິ ປຸຄ຺ຄເລ ອຄຣຸໍ ກໂຣນ຺ໂຕ ນິສີທນຏ຺ຐາເນ ອສມ຺ມຊ຺ຊິຕ຺ວາ ຍຕ຺ຖ ວາ ຕຕ຺ຖ ວາ ນິສີທາເປຕ຺ວາ ຍໍ ວາ ຕໍ ວາ ອາຘາຣກໍ ຐເປຕ຺ວາ ທານໍ ເທຕິ. ອສຫຕ຺ຖາຕິ ນ ອຕ຺ຕໂນ ຫຕ຺ເຖນ ເທຕິ, ທາສກມ຺ມກໂຣທີຫິ ທາເປຕິ. ອປວິທ຺ຘໍ ເທຕີຕິ ອນ຺ຕຣາ ອປວິທ຺ຘໍ ວິຈ຺ເຉທໍ ກຕ຺ວາ ເທຕິ. ເຕນາຫ ‘‘ນ ນິຣນ຺ຕຣໍ ເທຕີ’’ຕິ. ອຖ ວາ ອປວິທ຺ຘໍ ເທຕີຕິ ອຸຈ຺ຉິຏ຺ຐາທິຉຑ຺ຑນີຍຘມ຺ມໍ ວິຍ ອວກ຺ຂິຕ຺ຕກໍ ກຕ຺ວາ ເທຕິ. ເຕນາຫ ‘‘ຉຑ຺ເຑຕຸກາໂມ ວິຍ ເທຕີ’’ຕິ. ‘‘ອທ຺ຘາ ອິມສ຺ສ ທານສ຺ສ ຜລເມວ ອາຄຈ຺ຉຕີ’’ຕິ ເອວໍ ຍສ຺ສ ກມ຺ມສ຺ສກຕາທິຏ຺ຐິ ອຕ຺ຖິ, ໂສ ອາຄມນທິຏ຺ຐິໂກ, ອຍໍ ປນ ນ ຕາທິໂສຕິ ອນາຄມນທິຏ຺ຐິໂກ. ເຕນາຫ ‘‘ກຕສ຺ສ ນາມ ຜລໍ ອາຄມິສ຺ສຕີ’’ຕິອາທິ. ອຏ຺ຐມາທີສຸ ນຕ຺ຖິ ວຕ຺ຕພ຺ພໍ.
ອສປ຺ປຸຣິສທານສຸຕ຺ຕາທິວຓ຺ຓນາ ນິຏ຺ຐິຕາ.
ຕິກຓ຺ຑກີວຄ຺ຄວຓ຺ຓນາ ນິຏ຺ຐິຕາ.
ຕຕິຍປຓ຺ຓາສກໍ ນິຏ຺ຐິຕໍ.