(໖) ໑. ປຸຎ຺ຎາຠິສນ຺ທວຄ຺ໂຄ

໑. ປຐມປຸຎ຺ຎາຠິສນ຺ທສຸຕ຺ຕວຓ຺ຓນາ

໕໑. ທຸຕິຍສ຺ສ ປຐເມ ປຸຎ຺ຎາຠິສນ຺ທາຕິ ວາ ປຸຎ຺ຎນທິໂຍ. ອວິຈ຺ເຉເທນ ນິຈ຺ຈໍ ປວຕ຺ຕິຍມານານິ ຫິ ປຸຎ຺ຎານິ ອຠິສນ຺ທນຏ຺ເຐນ ‘‘ປຸຎ຺ຎາຠິສນ຺ທາ’’ຕິ ວຸຕ຺ຕາ. ອປຣິມິຕນ຺ຕິ ອາຬ຺ຫກຄຓນາຍ ອປຣິມິຕໍ, ໂຍຊນວເສນ ປນສ຺ສ ປຣິມາຓໍ ອຕ຺ຖິ. ຕຖາ ຫິ ເຫຏ຺ຐາ ມຫາປຖວິຍາ ອຸປຣິ ອາກາເສນ ປຣໂຕ ຈກ຺ກວາຬປພ຺ພເຕນ ມຊ຺ເຌ ຕຕ຺ຖ ຕຕ຺ຖ ຐິເຕຫິ ທີປປພ຺ພຕປຣິຍນ຺ເຕຫິ ປຣິຈ຺ຉິນ຺ນຕ຺ຕາ ໂຍຊນໂຕ ສກ຺ກາ ປມາຓໍ ກາຕຸໍ. ເຠຣວາຣມ຺ມເຓຫີຕິ ສວິຎ຺ຎາຓກາວິຎ຺ຎາຓເກຫິ ເຠຣວາຣມ຺ມເຓຫິ. ຕຖາ ຫິ ຕໍ ມຫາສຣີຣມຈ຺ຉກຸມ຺ຠີລຍກ຺ຂຣກ຺ຂສມຫານາຄທານວາທີນໍ ສວິຎ຺ຎາຓການໍ ວຬວາມຸຂປາຕາລາທີນໍ ອວິຎ຺ຎາຓການຎ຺ຈ ເຠຣວາຣມ຺ມຓານໍ ວເສນ ‘‘ພຫຸເຠຣວ’’ນ຺ຕິ ວຸຈ຺ຈຕິ. ເສສເມຕ຺ຖ ອຸຕ຺ຕານເມວ.

ປຐມປຸຎ຺ຎາຠິສນ຺ທສຸຕ຺ຕວຓ຺ຓນາ ນິຏ຺ຐິຕາ.

໒. ທຸຕິຍປຸຎ຺ຎາຠິສນ຺ທສຸຕ຺ຕວຓ຺ຓນາ

໕໒. ທຸຕິເຍ ໂສຕາປນ຺ນສ຺ສ ສທ຺ຘາ ອຘິປ຺ເປຕາຕິ ໂສຕາປນ຺ນສ຺ສ ມຄ຺ເຄນາຄຕາ ສທ຺ຘາ ອຘິປ຺ເປຕາ.

ທຸຕິຍປຸຎ຺ຎາຠິສນ຺ທສຸຕ຺ຕວຓ຺ຓນາ ນິຏ຺ຐິຕາ.

໓-໔. ປຐມສໍວາສສຸຕ຺ຕາທິວຓ຺ຓນາ

໕໓-໕໔. ຕຕິເຍ ຍຖາກມ຺ມໍ ຕາ ຕາ ຄຕິໂຍ ອຣນ຺ຕິ ອຸປຄຈ຺ຉນ຺ຕີຕິ ອຣິຍາ, ສຕ຺ຕາ. ອິເມ ປນ ກຸຈ຺ຉິຕາ ອຣິຍາຕິ ກທຣິຍາ. ຖທ຺ຘມຈ຺ຉຣິໂນ, ຖທ຺ເຘນ ມຈ຺ຉເຣນ ສມນ຺ນາຄຕາຕິ ອຕ຺ໂຖ. ຖທ຺ຘມຈ຺ຉຣິຍສທິສຎ຺ຫິ ກຸຈ຺ຉິຕໍ ສພ຺ພທາ ນິຫີນໍ ນຕ຺ຖິ ສພ຺ພຄຸຓານໍ ອາທິຠູຕສ຺ສ ໂຠຄສມ຺ປຕ຺ຕິອາທິສພ຺ພສມ຺ປຕ຺ຕີນໍ ມູລຠູຕສ຺ສ ທານສ຺ສ ນິເສຘນໂຕ. ເຕນາຫ ‘‘ກທຣິຍາຕິ ຖທ຺ຘມຈ຺ຉຣິໂນ’’ຕິ. ເອກຈ຺ໂຈ ຫິ ອຕ຺ຕໂນ ວສນຏ຺ຐາເນ ຠິກ຺ຂູ ຫຕ຺ຖໍ ປສາເຣຕ຺ວາປິ ນ ວນ຺ທຕິ. ອຎ຺ຎຕ຺ຖ ຄໂຕ ວິຫາຣໍ ປວິສິຕ຺ວາ ສກ຺ກຈ຺ຈໍ ວນ຺ທິຕ຺ວາ ມຘຸຣປ຺ປຏິສນ຺ຖາຣໍ ກໂຣຕິ ‘‘ກິໍ, ຠນ຺ເຕ, ອມ຺ຫາກໍ ວສນຏ຺ຐານໍ ນາຄຈ຺ຉຖ, ສມ຺ປນ຺ໂນ ປເທໂສ, ປຏິພລາຫໍ ອຍ຺ຍານໍ ຍາຄຸຠຕ຺ຕາທີຫິ ອຸປຏ຺ຐານໍ ກາຕຸ’’ນ຺ຕິ. ຠິກ຺ຂຸ ‘‘ສທ຺ໂຘ ອຍໍ ອຸປາສໂກ’’ຕິ ຍາຄຸຠຕ຺ຕາທີຫິ ສງ຺ຄຓ຺ຫາຕິ.

ອເຖໂກ ເຖໂຣ ຕສ຺ສ ຄາມໍ ຄນ຺ຕ຺ວາ ປິຓ຺ຑາຍ ຈຣຕິ. ໂສ ຕໍ ທິສ຺ວາ ອຎ຺ເຎນ ວາ ຄຈ຺ຉຕິ, ຆຣໍ ວາ ປວິສຕິ. ສເຈປິ ສມ຺ມຸຂີຠາວໍ ອາຄຈ຺ຉຕິ, ຫຕ຺ເຖນ ວນ຺ທິຕ຺ວາ ‘‘ອຍ຺ຍສ຺ສ ຠິກ຺ຂໍ ເທຖ, ອຫໍ ເອເກນ ກມ຺ເມນ ຄຈ຺ຉາມີ’’ຕິ ປກ຺ກມຕິ. ເຖໂຣ ສກລຄາມໍ ຈຣິຕ຺ວາ ຕຸຈ຺ຉປຕ຺ໂຕວ ນິກ຺ຂມຕິ. ອິທໍ ຕາວ ມຸທຸມຈ຺ຉຣິຍໍ ນາມ. ເຍນ ອທາຍໂກປິ ທາຍໂກ ວິຍ ປຎ຺ຎາຍຕິ. ອິຘ ປນ ຖທ຺ຘມຈ຺ຉຣິຍໍ ອຘິປ຺ເປຕໍ. ເຍນ ສມນ຺ນາຄໂຕ ຠິກ຺ຂູສຸ ປິຓ຺ຑາຍ ປວິຏ຺ເຐສຸ ‘‘ເຖຣາ ຐິຕາ’’ຕິ ວຸຕ຺ເຕ ‘‘ກິໍ ມຍ຺ຫໍ ປາທາ ຣຸຊ຺ຊນ຺ຕີ’’ຕິອາທີນິ ວຕ຺ວາ ສິລາຖມ຺ໂຠ ວິຍ ຂາຓຸໂກ ວິຍ ຈ ຖທ຺ໂຘ ຫຸຕ຺ວາ ຕິຏ຺ຐຕິ, ສາມີຈິມ຺ປິ ນ ກໂຣຕິ, ກຸໂຕ ທານໍ. ອຍມິຘ ອຘິປ຺ເປໂຕ. ເຕນ ວຸຕ຺ຕໍ ‘‘ຖທ຺ຘມຈ຺ຉຣິໂນຕິ ຖທ຺ເຘນ ມຈ຺ຉເຣນ ສມນ຺ນາຄຕາຕິ ອຕ຺ໂຖ’’ຕິ. ມຈ຺ຉຣໍ ມຈ຺ເຉຣໍ ມຈ຺ຉຣິຍນ຺ຕິ ອຕ຺ຖໂຕ ເອກໍ.

ປຣິຠາສກາຕິ ຠິກ຺ຂູ ຆຣທ຺ວາເຣ ຐິເຕ ທິສ຺ວາ ‘‘ກິໍ ຕຸມ຺ເຫ ກສິຕ຺ວາ ອາຄຕາ ວປິຕ຺ວາ ລາຍິຕ຺ວາ, ມຍໍ ອຕ຺ຕໂນປິ ນ ລຠາມ, ກຸໂຕ ຕຸມ຺ຫາກໍ, ສີຆໍ ນິກ຺ຂມຖາ’’ຕິອາທີຫິ ສນ຺ຕຊ຺ຊກາ. ຍາຈການໍ ວຈນສ຺ສ ອຕ຺ຖໍ ຊານນ຺ຕີຕິ ເອຕ຺ຖ ກິຎ຺ຈາປິ ຠິກ຺ຂູ ຆຣທ຺ວາເຣ ຐິຕາ ຕຸຓ຺ຫີ ໂຫນ຺ຕິ, ອຕ຺ຖໂຕ ປນ ‘‘ຠິກ຺ຂໍ ເທຖາ’’ຕິ ວທນ຺ຕິ ນາມ ອຣິຍາຍ ຍາຈນາຍ. ວຸຕ຺ຕຎ຺ເຫຕໍ ‘‘ອຸທ຺ທິສ຺ສ ອຣິຍາ ຕິຏ຺ຐນ຺ຕິ, ເອສາ ອຣິຍານ ຍາຈນາ’’ຕິ (ມິ. ປ. ໔.໕.໙). ຕຕ຺ຣ ເຍ ‘‘ມຍໍ ປຈາມ, ອິເມ ນ ປຈນ຺ຕິ, ປຈມາເນ ປຕ຺ວາ ອລຠນ຺ຕາ ກຸຫິໍ ລຠິສ຺ສຕີ’’ຕິ ເທຍ຺ຍຘມ຺ມໍ ສໍວິຠຊນ຺ຕິ, ເຕ ວທຎ຺ຎູ ຍາຈການໍ ວຈນສ຺ສ ອຕ຺ຖໍ ຊານນ຺ຕິ ນາມ ຎຕ຺ວາ ກຕ຺ຕພ຺ພກຣຓໂຕ. ຈຕຸຕ຺ຖໍ ອຸຕ຺ຕານເມວ.

ປຐມສໍວາສສຸຕ຺ຕາທິວຓ຺ຓນາ ນິຏ຺ຐິຕາ.

໕-໖. ສມຊີວີສຸຕ຺ຕາທິວຓ຺ຓນາ

໕໕-໕໖. ປຎ຺ຈເມ ອນຸຄ຺ຄຓ຺ຫນຕ຺ຖນ຺ຕິ ນກຸລມາຕາ ນກຸລປິຕາຕິ ອິເມສໍ ທ຺ວິນ຺ນໍ ສງ຺ຄຫຕ຺ຖາຍ. ນກຸລສ຺ສ ທາຣກສ຺ສ ປິຕາ ນກຸລປິຕາ. ນກຸລມາຕາຕິ ເອຕ຺ຖາປິ ເອເສວ ນໂຍ. ເສສເມຕ຺ຖ ອຸຕ຺ຕານເມວ. ຉຏ຺ເຐ ນຕ຺ຖິ ວຕ຺ຕພ຺ພໍ.

ສມຊີວີສຸຕ຺ຕາທິວຓ຺ຓນາ ນິຏ຺ຐິຕາ.

໗-໑໐. ສຸປ຺ປວາສາສຸຕ຺ຕາທິວຓ຺ຓນາ

໕໗-໖໐. ສຕ຺ຕເມ ອາຍຸຠາຄປຏິລາຠິນີ ໂຫຕີຕິ ອາຍຸໂກຏ຺ຐາສສ຺ສ ປຏິລາຠິນີ ໂຫຕິ. ຕິວິຘໂລກນ຺ຕິ ສຕ຺ຕສງ຺ຂາຣຠາຊນສງ຺ຂາຕໍ ຕິວິຘໍ ໂລກໍ. ວິທິຕໍ ກຕ຺ວາຕິ ວິຠູຕໍ ກຕ຺ວາ. ໂລກວິທູນນ຺ຕິ ກຣຓຕ຺ເຖ ສາມິວຈນນ຺ຕິ ອາຫ ‘‘ພຸທ຺ເຘຫິ ປສຕ຺ຖາ’’ຕິ. ອຏ຺ຐມນວມທສມານິ ອຸຕ຺ຕານຕ຺ຖາເນວ.

ສຸປ຺ປວາສາສຸຕ຺ຕາທິວຓ຺ຓນາ ນິຏ຺ຐິຕາ.

ປຸຎ຺ຎາຠິສນ຺ທວຄ຺ຄວຓ຺ຓນາ ນິຏ຺ຐິຕາ.