(໗) ໒. ປຕ຺ຕກມ຺ມວຄ຺ໂຄ

໑-໔. ປຕ຺ຕກມ຺ມສຸຕ຺ຕາທິວຓ຺ຓນາ

໖໑-໖໔. ທຸຕິຍສ຺ສ ປຐເມ ເຍ ອນິຏ຺ຐາ ນ ໂຫນ຺ຕິ, ເຕ ອິຏ຺ຐາຕິ ອຘິປ຺ເປຕາຕິ ອາຫ ‘‘ອນິຏ຺ຐປຏິກ຺ເຂເປນ ອິຏ຺ຐາ’’ຕິ. ອິຏ຺ຐາຕິ ຈ ປຣິຍິຏ຺ຐາ ວາ ໂຫຕຸ ມາ ວາ, ອິຏ຺ຐາຣມ຺ມຓຠູຕາຕິ ອຕ຺ໂຖ. ຄເວສິຕມ຺ປິ ຫິ ອິຏ຺ຐນ຺ຕິ ວຸຈ຺ຈຕິ, ຕໍ ອິຘ ນາຘິປ຺ເປຕໍ. ມເນຕິ ມນສ຺ມິໍ. ກນ຺ຕາຕິ ວາ ກມນີຍາ, ກາເມຕພ຺ພາຕິ ອຕ຺ໂຖ. ມນໍ ອປ຺ປາຍນ຺ຕີຕິ ອິຏ຺ຐຠາເວນ ມນໍ ວຑ຺ເຒນ຺ຕິ. ກມ຺ມສາຘໂນ ອິຘ ໂຠຄ-ສທ຺ໂທຕິ ອາຫ ‘‘ໂຠຄາຕິ ຠຸຎ຺ຊິຕພ຺ພາ’’ຕິອາທິ. ຘມ຺ມູປຆາຕໍ ກຕ຺ວາ ກຸສລຘມ຺ມໍ ວິໂນເທຕ຺ວາ. ອຸປນິຊ຺ຌາຍີຍນ຺ຕີຕິ ອຸປຊ຺ຌາຍາຕິ ອາຫ ‘‘ສຸຂທຸກ຺ເຂສຸ ອຸປນິຊ຺ຌາຍິຕພ຺ພຕ຺ຕາ’’ຕິ, ສຸຂທຸກ຺ເຂສຸ ອຸປ຺ປນ຺ເນສຸ ອນຸສ຺ສຣິຕພ຺ພຕ຺ຕາຕິ ອຕ຺ໂຖ. ສນ຺ທິຏ຺ຐສມ຺ຠຕ຺ເຕຫີຕິ ເອຕ຺ຖ ຕຕ຺ຖ ຕຕ຺ຖ ສງ຺ຄມ຺ມ ທິຏ຺ຐມຕ຺ຕາ ນາຕິທຬ຺ຫມິຕ຺ຕາ ສນ຺ທິຏ຺ຐາ, ສຸຏ຺ຐຸ ຠຕ຺ຕາ ສິເນຫວນ຺ໂຕ ທຬ຺ຫມິຕ຺ຕາ ສມ຺ຠຕ຺ຕາ.

ວິສມໂລຠນ຺ຕິ ພລວໂລຠໍ. ສຸຂິຕນ຺ຕິ ສຎ຺ຊາຕສຸຂໍ. ປີຓິຕນ຺ຕິ ຘາຕໍ ສຸຫິຕໍ. ຕຖາຠູໂຕ ປນ ຍສ຺ມາ ພລສມ຺ປນ຺ໂນ ໂຫຕິ, ຕສ຺ມາ ‘‘ພລສມ຺ປນ຺ນໍ ກໂຣຕີ’’ຕິ ວຸຕ຺ຕໍ.

ໂສຠເນ ກາຍິກວາຈສິກກມ຺ເມ ຣໂຕຕິ ສູຣໂຕ ອຸກາຣສ຺ສ ທີຆໍ ກຕ຺ວາ, ຕສ຺ສ ຠາໂວ ໂສຣຈ຺ຈໍ, ກາຍິກວາຈສິໂກ ອວີຕິກ຺ກໂມ. ໂສ ປນ ອຕ຺ຖໂຕ ສຸສີລຠາໂວຕິ ອາຫ ‘‘ຂນ຺ຕິໂສຣຈ຺ເຈ ນິວິຏ຺ຐາຕິ ອຘິວາສນກ຺ຂນ຺ຕິຍຎ຺ຈ ສຸສີລຕາຍ ຈ ນິວິຏ຺ຐາ’’ຕິ. ເອກມຕ຺ຕານນ຺ຕິ ເອກໍ ຈິຕ຺ຕນ຺ຕິ ອຕ຺ໂຖ. ຣາຄາທີນຎ຺ຫິ ປຸພ຺ພຠາຄິຍໍ ທມນາທິ ປຈ຺ເຈກໍ ອິຈ຺ຉິຕພ຺ພໍ, ນ ມຄ຺ຄກ຺ຂເຓ ວິຍ ເອກຊ຺ຌໍ ປຏິສງ຺ຂານມຸເຂນ ປຊຫນໂຕ. ເອກມຕ຺ຕານນ຺ຕິ ວາ ວິເວກວເສນ ເອກໍ ເອກາກິນໍ ອຕ຺ຕານໍ. ເຕເນວາຫ ‘‘ເອກໍ ອຕ຺ຕໂນວ ອຕ຺ຕຠາວ’’ນ຺ຕິອາທິ. ອຸປຣູປຣິຠູມີສູຕິ ຉກາມສຄ຺ຄສງ຺ຂາຕາສຸ ອຸປຣູປຣິກາມຠູມີສຸ. ກມ຺ມສ຺ສ ຜລໍ ອຄ຺ຄໍ ນາມ. ຕໍ ປເນຕ຺ຖ ອຸຈ຺ຈຄາມີຕິ ອາຫ ‘‘ອຸທ຺ຘມຄ຺ຄມສ຺ສາ’’ຕິ. ສຸວຄ຺ເຄ ນິຍຸຕ຺ຕາ, ສຸວຄ຺ຄປ຺ປໂຍຊນາຕິ ວາ ໂສວຄ຺ຄິກາ. ທສນ຺ນໍ ວິເສສານນ຺ຕິ ທິພ຺ພອາຍຸວຓ຺ຓຍສສຸຂອາຘິປເຕຍ຺ຍານຎ຺ເຈວ ອິຏ຺ຐຣູປາທີນຎ຺ຈ ຜລວິເສສານໍ. ວຓ຺ຓຄ຺ຄຫເຓນ ເຈຕ຺ຖ ສໂກ ອຕ຺ຕຠາວວຓ຺ໂຓ ຄຫິໂຕ, ຣູປຄ຺ຄຫເຓນ ພຫິທ຺ຘາ ຣູປາຣມ຺ມຓໍ. ທຸຕິຍຕຕິຍຈຕຸຕ຺ຖານິ ອຸຕ຺ຕານຕ຺ຖາເນວ.

ປຕ຺ຕກມ຺ມສຸຕ຺ຕາທິວຓ຺ຓນາ ນິຏ຺ຐິຕາ.

໕. ຣູປສຸຕ຺ຕວຓ຺ຓນາ

໖໕. ປຎ຺ຈເມ ປມິໂນຕິ ອຸຬາຣຕາທິວິເສສໍ ເອເຕນາຕິ ປມາຓໍ, ຣຸປກາໂຍ ປມາຓໍ ເອຕສ຺ສາຕິ ຣູປປ຺ປມາໂຓ. ຕໂຕ ເອວ ຣູເປ ປສນ຺ໂນຕິ ຣູປປ຺ປສນ຺ໂນ. ໂຆໂສຕິ ເຈຕ຺ຖ ຖຸຕິໂຆໂສ. ລູຂນ຺ຕິ ປຈ຺ຈຍລູຂຕາ. ຘມ຺ມາຕິ ສີລາທໂຍ ຄຸຓຘມ຺ມາ ອຘິປ຺ເປຕາ. ອິເມສໍ ປນ ຈຕຸນ຺ນໍ ປຸຄ຺ຄລານໍ ນານາກຣຓໍ ປາຬິຍໍເຍວ ອາຄຕໍ. ວຸຕ຺ຕຎ຺ເຫຕໍ –

‘‘ກຕໂມ ຈ ປຸຄ຺ຄໂລ ຣູປປ຺ປມາໂຓ ຣູປປ຺ປສນ຺ໂນ? ອິເຘກຈ຺ໂຈ ປຸຄ຺ຄໂລ ອາໂຣຫໍ ວາ ປສ຺ສິຕ຺ວາ ປຣິຓາຫໍ ວາ ປສ຺ສິຕ຺ວາ ສຓ຺ຐານໍ ວາ ປສ຺ສິຕ຺ວາ ປາຣິປູຣິໍ ວາ ປສ຺ສິຕ຺ວາ ຕຕ຺ຖ ປມາຓໍ ຄເຫຕ຺ວາ ປສາທໍ ຊເນຕິ. ອຍໍ ວຸຈ຺ຈຕິ ປຸຄ຺ຄໂລ ຣູປປ຺ປມາໂຓ ຣູປປ຺ປສນ຺ໂນ.

‘‘ກຕໂມ ຈ ປຸຄ຺ຄໂລ ໂຆສປ຺ປມາໂຓ ໂຆສປ຺ປສນ຺ໂນ? ອິເຘກຈ຺ໂຈ ປຸຄ຺ຄໂລ ປຣວຓ຺ຓນາຍ ປຣໂຖມນາຍ ປຣປສໍສນາຍ ປຣວຓ຺ຓຫາຣິກາຍ ຕຕ຺ຖ ປມາຓໍ ຄເຫຕ຺ວາ ປສາທໍ ຊເນຕິ. ອຍໍ ວຸຈ຺ຈຕິ ປຸຄ຺ຄໂລ ໂຆສປ຺ປມາໂຓ ໂຆສປ຺ປສນ຺ໂນ.

‘‘ກຕໂມ ຈ ປຸຄ຺ຄໂລ ລູຂປ຺ປມາໂຓ ລູຂປ຺ປສນ຺ໂນ? ອິເຘກຈ຺ໂຈ ປຸຄ຺ຄໂລ ຈີວຣລູຂໍ ວາ ປສ຺ສິຕ຺ວາ ປຕ຺ຕລູຂໍ ວາ ປສ຺ສິຕ຺ວາ ເສນາສນລູຂໍ ວາ ປສ຺ສິຕ຺ວາ ວິວິຘໍ ວາ ທຸກ຺ກຣກາຣິກໍ ປສ຺ສິຕ຺ວາ ຕຕ຺ຖ ປມາຓໍ ຄເຫຕ຺ວາ ປສາທໍ ຊເນຕິ. ອຍໍ ວຸຈ຺ຈຕິ ປຸຄ຺ຄໂລ ລູຂປ຺ປມາໂຓ ລູຂປ຺ປສນ຺ໂນ.

‘‘ກຕໂມ ຈ ປຸຄ຺ຄໂລ ຘມ຺ມປ຺ປມາໂຓ ຘມ຺ມປ຺ປສນ຺ໂນ? ອິເຘກຈ຺ໂຈ ປຸຄ຺ຄໂລ ສີລໍ ວາ ປສ຺ສິຕ຺ວາ ສມາຘິໍ ວາ ປສ຺ສິຕ຺ວາ ປຎ຺ຎໍ ວາ ປສ຺ສິຕ຺ວາ ຕຕ຺ຖ ປມາຓໍ ຄເຫຕ຺ວາ ປສາທໍ ຊເນຕິ. ອຍໍ ວຸຈ຺ຈຕິ ປຸຄ຺ຄໂລ ຘມ຺ມປ຺ປມາໂຓ ຘມ຺ມປ຺ປສນ຺ໂນ’’ຕິ (ປຸ. ປ. ໑໗໑-໑໗໒).

ຕຕ຺ຖ ອາໂຣຫນ຺ຕິ ອຸຈ຺ຈຕໍ. ສາ ຈ ໂຂ ຕສ຺ມິໍ ຕສ຺ມິໍ ກາເລ ປມາຓຍຸຕ຺ຕາ ທຏ຺ຐພ຺ພາ. ປຣິຓາຫນ຺ຕິ ນາຕິກິສຖູລຕາວເສນ ປີຓຕໍ. ສຓ຺ຐານນ຺ຕິ ເຕສໍ ເຕສໍ ອງ຺ຄປຈ຺ຈງ຺ຄານໍ ສຸສຓ຺ຐິຕຕໍ ທີຆຣສ຺ສວຏ຺ຏາທິຍຸຕ຺ຕຏ຺ຐາເນສຸ ຕຖາຠາວໍ. ປາຣິປູຣິນ຺ຕິ ສພ຺ເພສໍ ສຣີຣາວຍວານໍ ປຣິປຸຓ຺ຓຕໍ ອວິກລຕໍ. ຕຕ຺ຖ ປມາຓໍ ຄເຫຕ຺ວາຕິ ຕສ຺ມິໍ ຣູເປ ຣູປສມ຺ປຕ຺ຕິຍໍ ປມາຓຠາວໍ ອຸປາທາຍ. ປສາທໍ ຊເນຕີຕິ ອຘິໂມກ຺ຂໍ ຊເນຕິ ອຸປ຺ປາເທຕິ.

ປຣວຓ຺ຓນາຍາຕິ ‘‘ອສຸໂກ ເອທິໂສ ຈ ເອທິໂສ ຈາ’’ຕິ ປຣສ຺ສ ຄຸຓວຈເນນ. ປຣໂຖມນາຍາຕິ ປຣມ຺ມຸຂາ ປຣສ຺ສ ສິລາຆຸປ຺ປາທເກນ ອຠິຕ຺ຖວເນນ ປເຣນ ຖຸຕິວເສນ, ຄາຖາທິອຸປນິພນ຺ຘເນນ ວຸຕ຺ຕາຍ ໂຖມນາຍາຕິ ວຸຕ຺ຕໍ ໂຫຕິ. ປຣປສໍສນາຍາຕິ ປຣມ຺ມຸຂາ ປຣສ຺ສ ຄຸຓສໍກິຕ຺ຕເນນ. ປຣວຓ຺ຓຫາຣິກາຍາຕິ ປຣມ຺ປຣວຓ຺ຓຫາຣິກາຍ ປຣມ຺ປຣາຍ ປຣສ຺ສ ກິຕ຺ຕນສທ຺ທສ຺ສ ອຸປສໍຫາເຣນ. ຕຕ຺ຖາຕິ ຕສ຺ມິໍ ຖຸຕິໂຆເສ.

ຈີວຣລູຂນ຺ຕິ ຖູລຊິຓ຺ຓພຫຸຕຸນ຺ນກຕາທິຈີວຣສ຺ສ ລູຂຠາວໍ. ປຕ຺ຕລູຂນ຺ຕິ ອເນກຄນ຺ຖິກາຫຏຕາທິປຕ຺ຕສ຺ສ ລູຂຠາວໍ. ວິວິຘໍ ວາ ທຸກ຺ກຣກາຣິກນ຺ຕິ ຘຸຕງ຺ຄາທິວເສນ ປວຕ຺ຕນານາວິຘໍ ທຸກ຺ກຣຈຣິຍໍ. ສີລໍ ວາ ປສ຺ສິຕ຺ວາຕິ ສີລປາຣິປູຣິວເສນ ວິສຸທ຺ຘໍ ກາຍວຈີສຸຈຣິຕໍ ຎາຓຈກ຺ຂຸນາ ປສ຺ສິຕ຺ວາ, ຌານາທິອຘິຄມສຸທ຺ຘິສມາຘິໍ ວາ ວິປສ຺ສນາຠິຎ຺ຎາສງ຺ຂາຕໍ ປຎ຺ຎໍ ວາ ປສ຺ສິຕ຺ວາຕິ ອຕ຺ໂຖ.

ເອວເມຕສ຺ມິໍ ຈຕຸປ຺ປມາເຓ ໂລກສນ຺ນິວາເສ ພຸທ຺ເຘສຸ ອປ຺ປສນ຺ນາ ມນ຺ທາ, ປສນ຺ນາ ພຫຸກາ. ຣູປປ຺ປມາຓສ຺ສ ຫິ ພຸທ຺ຘຣູປໂຕ ອຸຕ຺ຕຣິ ປສາທາວຫໍ ຣູປໍ ນາມ ນຕ຺ຖິ. ໂຆສປ຺ປມາຓສ຺ສ ພຸທ຺ຘານໍ ກິຕ຺ຕິໂຆສໂຕ ອຸຕ຺ຕຣິ ປສາທາວໂຫ ໂຆໂສ ນາມ ນຕ຺ຖິ. ລູຂປ຺ປມາຓສ຺ສ ກາສິການິ ວຕ຺ຖານິ ມຫາຣຫານິ ກຎ຺ຈນຠາຊນານິ ຕິຓ຺ຓໍ ອຸຕູນໍ ອນຸຈ຺ຉວິເກ ສພ຺ພສມ຺ປຕ຺ຕິຍຸຕ຺ເຕ ປາສາທວເຣ ປຫາຍ ປໍສຸກູລຈີວຣເສລມຍປຕ຺ຕຣຸກ຺ຂມູລາທິເສນາສນເສວິໂນ ພຸທ຺ຘສ຺ສ ຠຄວໂຕ ລູຂໂຕ ອຸຕ຺ຕຣິ ປສາທາວຫໍ ອຎ຺ຎໍ ລູຂໍ ນາມ ນຕ຺ຖິ. ຘມ຺ມປ຺ປມາຓສ຺ສ ສເທວເກ ໂລເກ ອສາຘາຣຓສີລາທິຄຸຓສ຺ສ ຕຖາຄຕສ຺ສ ສີລາທິຄຸຓໂຕ ອຸຕ຺ຕຣິ ປສາທາວໂຫ ອຎ຺ໂຎ ສີລາທິຄຸໂຓ ນາມ ນຕ຺ຖິ. ອິຕິ ຠຄວາ ອິມໍ ຈຕຸປ຺ປມາຓິກໍ ໂລກສນ຺ນິວາສໍ ມຸຏ຺ຐິນາ ຄເຫຕ຺ວາ ວິຍ ຐິໂຕຕິ.

ປມາຓິໍສູຕິ ປມາຓໍ ອຄ຺ຄເຫສຸໍ. ນິຍກຊ຺ຌຕ຺ເຕ ຕສ຺ສ ຄຸຓໍ ນ ຊານາຕີຕິ ຕສ຺ສ ອພ຺ຠນ຺ຕເຣ ປວຕ຺ຕມານໍ ສີລາທິຄຸຓໍ ນ ຊານາຕິ. ເສສໍ ສຸວິຎ຺ເຎຍ຺ຍເມວ.

ຣູປສຸຕ຺ຕວຓ຺ຓນາ ນິຏ຺ຐິຕາ.

໗. ອຫິຣາຊສຸຕ຺ຕວຓ຺ຓນາ

໖໗. ສຕ຺ຕເມ ທຏ຺ຐວິສາເນວາຕິ ອວຘາຣເຓນ ທິຏ຺ຐວິສາທໂຍ ນິວຕ຺ເຕຕິ. ກຏ຺ຐມຸຂາທໂຍ ຫິ ຈຕ຺ຕາໂຣ ອາສີວິສາ ທຏ຺ຐວິໂສ, ທິຏ຺ຐວິໂສ, ຜຸຏ຺ຐວິໂສ, ວາຕວິໂສຕິ ປຈ຺ເຈກໍ ຈຕຸພ຺ພິຘາ ໂຫນ຺ຕີຕິ ວິສເວຄວິກາຣວເສນ ໂສຬສ ວຸຕ຺ຕາ. ເຕສຸ ທຏ຺ຐວິສານໍເຍວ ອິຘ ຄຫຓໍ, ນ ອິຕເຣສນ຺ຕິ ທສ຺ເສຕິ. ເສສໍ ສຸວິຎ຺ເຎຍ຺ຍເມວ.

ອຫິຣາຊສຸຕ຺ຕວຓ຺ຓນາ ນິຏ຺ຐິຕາ.

໘. ເທວທຕ຺ຕສຸຕ຺ຕວຓ຺ຓນາ

໖໘. ອຏ຺ຐເມ ກາເລ ສມ຺ປຕ຺ເຕຕິ ຄພ຺ຠສ຺ສ ປຣິປາກຄຕຕ຺ຕາ ວິຊາຍນກາເລ ສມ຺ປຕ຺ເຕ. ໂປຕກນ຺ຕິ ອສ຺ສຕຣິຍາ ປຸຕ຺ຕໍ. ‘‘ຜລໍ ເວ ກທລິໍ ຫນ຺ຕີ’’ຕິອາທິຄາຖາຍ ກຸກ຺ກຸຊເກເນວ ປຕ຺ຕວຏ຺ຏິປສວສ຺ສ ອຸຈ຺ຉິນ຺ນຕ຺ຕາ ຜລຸປ຺ປຕ຺ຕິ ກທລິຍາ ປຣາຠວາຍ ໂຫຕີຕິ ອາຫ ‘‘ຜລໍ ເວ ກທລິໍ ຫນ຺ຕີ’’ຕິ. ກຸກ຺ກຸຊກໍ ນາມ ກທລິຍາ ປຸປ຺ຜນາຬໍ. ຕຖາ ຜລປາກປຣິໂຍສານຕ຺ຕາ ໂອສຘີນໍ ‘‘ຜລໍ ເວຬຸໍ ນຬ’’ນ຺ຕິ ວຸຕ຺ຕໍ. ອຍໍ ປເນຕ຺ຖ ປິຓ຺ຑຕ຺ໂຖ – ຍຖາ ອຕ຺ຕໂນ ຜລໍ ກທລິເວຬຸນເຬ ວິນາເສຕິ, ຄພ຺ໂຠ ຈ ອສ຺ສຕຣິໍ, ເອວໍ ອຕ຺ຕໂນ ກມ຺ມຠູໂຕ ສກ຺ກາໂຣ ອສປ຺ປຸຣິສໍ ວິນາເສຕີຕິ.

ເທວທຕ຺ຕສຸຕ຺ຕວຓ຺ຓນາ ນິຏ຺ຐິຕາ.

໙. ປຘານສຸຕ຺ຕວຓ຺ຓນາ

໖໙. ນວເມ ປທຫຕິ ເອເຕຫີຕິ ປຘານານິ. ອຸຕ຺ຕມວີຣິຍານິ ເສຏ຺ຐວີຣິຍານິ ວິສິຏ຺ຐສ຺ສ ອຕ຺ຖສ຺ສ ສາຘນໂຕ. ກິເລສານໍ ສໍວຣຕ຺ຖາຍາຕິ ຍຖາ ອຠິຊ຺ຌາທໂຍ ນ ອຸປ຺ປຊ຺ຊນ຺ຕິ, ເອວໍ ສຕິຍາ ອຸປຏ຺ຐາເນນ ກິເລສານໍ ສໍວຣຓຕ຺ຖາຍ. ປຊຫນຕ຺ຖາຍາຕິ ກາມວິຕກ຺ກາທີນໍ ວິໂນທນຕ຺ຖາຍ. ປຘານນ຺ຕິ ຕສ຺ເສວ ປຊຫນສ຺ສ ສາຘນວເສນ ປວຕ຺ຕວີຣິຍໍ. ກຸສລານໍ ຘມ຺ມານໍ ພ຺ຣູຫນຕ຺ຖາຍາຕິ ໂພຊ຺ຌງ຺ຄສງ຺ຂາຕານໍ ກຸສລຘມ຺ມານໍ ວຑ຺ຒນຕ຺ຖາຍ. ປຘານນ຺ຕິ ຕສ຺ເສວ ວຑ຺ຒນສ຺ສ ສາຘນວເສນ ປວຕ຺ຕວີຣິຍໍ.

ປຘານສຸຕ຺ຕວຓ຺ຓນາ ນິຏ຺ຐິຕາ.

໑໐. ອຘມ຺ມິກສຸຕ຺ຕວຓ຺ຓນາ

໗໐. ທສເມ ວິສມນ຺ຕິ ຠາວນປຸໍສກເມຕໍ. ເຕນາຫ ‘‘ວິສມາ ຫຸຕ຺ວາ’’ຕິ. ອສມເຍນາຕິ ອກາເລ. ຠຸມ຺ມຕ຺ເຖ ເຫຕໍ ກຣຓວຈນໍ. ປກຏ຺ຐໍ ປຘານໍ ອຎ຺ຊສໍ ເອເຕສນ຺ຕິ ປຎ຺ຊສາ, ອຎ຺ຊສໍ ປຄຕາ ປຏິປນ຺ນາຕິ ວາ ປຎ຺ຊສາ, ປກຕິມຄ຺ຄຄາມິໂນ. ນ ປຎ຺ຊສາ ອປຎ຺ຊສາ, ອມຄ຺ຄປ຺ປຏິປນ຺ນາ. ເຕ ປນ ຍສ຺ມາ ມຄ຺ຄໂຕ ອປຄຕາ ນາມ ໂຫນ຺ຕິ, ຕສ຺ມາ ວຸຕ຺ຕໍ ‘‘ມຄ຺ຄໂຕ ອປຄຕາ’’ຕິອາທິ.

ຄາຖາສຸ ປນ ເອວເມຕ຺ຖ ສມ຺ພນ຺ໂຘ ເວທິຕພ຺ໂພ. ຄຸນ຺ນໍ ເຈ ຕຣມານານນ຺ຕິ ຄາວີສຸ ມໂຫຆໍ ຕຣນ຺ຕີສຸ. ຊິມ຺ຫໍ ຄຈ຺ຉຕິ ປຸງ຺ຄໂວຕິ ຍທິ ຍູຖປຕິ ອຸສໂຠ ກຸຏິລໍ ຄຈ຺ຉຕິ. ສພ຺ພາ ຕາ ຊິມ຺ຫໍ ຄຈ຺ຉນ຺ຕີຕິ ສພ຺ພາ ຕາ ຄາວິໂຍ ກຸຏິລເມວ ຄຈ຺ຉນ຺ຕິ. ກສ຺ມາ? ເນຕ຺ເຕ ຊິມ຺ຫໍ ຄເຕ ສຕິ ຕສ຺ສ ກຸຏິລຄຕຕ຺ຕາ. ໂສ ຫິ ຕາສໍ ປຈ຺ຈຍິໂກ ອຸປທ຺ທວຫໂຣ ຈ. ເອວເມວນ຺ຕິ ຍຖາ ເຈຕໍ, ເອວເມວ ໂຍ ມນຸສ຺ເສສຸ ປຘານສມ຺ມໂຕ, ຍທິ ໂສ ອຘມ຺ມຈາຣີ ສິຍາ, ເຍ ຕສ຺ສ ອນຸຊີວິໂນ, ສພ຺ເພປິ ອຘມ຺ມິກາ ໂຫນ຺ຕິ. ສາມິສມ຺ປທາ ຫິ ປກຕິສມ຺ປທໍ ສມ຺ປາເທຕິ. ຍສ຺ມາ ເອຕເທວໍ, ຕສ຺ມາ ສພ຺ພໍ ຣຏ຺ຐໍ ທຸກ຺ຂໍ ເສຕິ, ຣາຊາ ເຈ ໂຫຕິ ອຘມ຺ມິໂກ.

ອຘມ຺ມິກສຸຕ຺ຕວຓ຺ຓນາ ນິຏ຺ຐິຕາ.

ປຕ຺ຕກມ຺ມວຄ຺ຄວຓ຺ຓນາ ນິຏ຺ຐິຕາ.