໕. ໂຣຫິຕສ຺ສວຄ຺ໂຄ

໑. ສມາຘິຠາວນາສຸຕ຺ຕວຓ຺ຓນາ

໔໑. ປຎ຺ຈມສ຺ສ ປຐເມ ທິຏ຺ຐຘມ຺ມສຸຂວິຫາຣາຍາຕິ ອິມສ຺ມິໍເຍວ ອຕ຺ຕຠາເວ ສຸຂວິຫາຣຕ຺ຖາຍ, ນິກ຺ກິເລສຕາຍ ນິຣາມິເສນ ສຸເຂນ ວິຫຣຓຕ຺ຖາຍາຕິ ອຕ຺ໂຖ. ອິມິນາ ຈຕ຺ຕາຣິ ຜລສມາປຕ຺ຕິຊ຺ຌານານິ ຂີຓາສວສ຺ສ ອາສວກ຺ຂຍາຘິຄມໂຕ ອປຣຠາເຄ ອຘິຄຕຣູປາຣູປຊ຺ຌານານິ ຈ ກຖິຕານິ. ທິພ຺ພຈກ຺ຂຸຎາຓທສ຺ສນປ຺ປຏິລາຠາຍາຕິ ທິພ຺ພຈກ຺ຂຸຎາຓປ຺ປຏິລາຠຕ຺ຖາຍ. ທິພ຺ພຈກ຺ຂຸຎາຓຎ຺ຫິ ຣູປຄຕສ຺ສ ທິພ຺ພສ຺ສ ອິຕຣສ຺ສ ຈ ທສ຺ສນຏ຺ເຐນ ອິຘ ‘‘ຎາຓທສ຺ສນ’’ນ຺ຕິ ອຘິປ຺ເປຕໍ. ອາໂລກສຎ຺ຎໍ ມນສິ ກໂຣຕີຕິ ທິວາ ວາ ຣຕ຺ຕິໍ ວາ ສູຣິຍທີປຈນ຺ທມຓິອຸກ຺ກາວິຊ຺ຊຸລຕາທີນໍ ອາໂລໂກ ທິວາ ຣຕ຺ຕິຎ຺ຈ ອຸປລທ຺ໂຘ, ຍຖາລທ຺ຘວເສເນວ ອາໂລກໍ ມນສິ ກໂຣຕິ ຈິຕ຺ເຕ ຐເປຕິ, ຕຖາ ຈ ນໍ ມນສິ ກໂຣຕິ, ຍຖາສ຺ສ ສຸຠາວິຕາໂລກກສິຓສ຺ສ ວິຍ ກສິຓາໂລໂກ ຍຖິຈ຺ຉກໍ ຍາວທິຈ຺ຉກຎ຺ຈ ໂສ ອາໂລໂກ ຣຕ຺ຕິຍໍ ອຸປຕິຏ຺ຐຕິ, ເຍນ ຕຕ຺ຖ ທິວາສຎ຺ຎໍ ຐເປຕິ, ທິວາ ວິຍ ວິຄຕຖິນມິທ຺ໂຘ ໂຫຕິ. ເຕນາຫ ‘‘ຍຖາ ທິວາ ຕຖາ ຣຕ຺ຕິ’’ນ຺ຕິ.

ຍຖາ ທິວາ ອາໂລກສຎ຺ຎາ ມນສິ ກຕາ, ຕເຖວ ນໍ ຣຕ຺ຕິມ຺ປິ ມນສິ ກໂຣຕີຕິ ຍຖາ ທິວາ ທິຏ຺ໂຐ ອາໂລໂກ, ຕເຖວ ຕໍ ຣຕ຺ຕິໍ ມນສິ ກໂຣຕິ. ທຸຕິຍປເທຕິ ‘‘ຍຖາ ຣຕ຺ຕິໍ ຕຖາ ທິວາ’’ຕິ ອິມສ຺ມິໍ ວາກ຺ເຍ. ເອສ ນໂຍຕິ ອິມິນາ ຍຖາ ຣຕ຺ຕິຍໍ ຈນ຺ທາໂລກາທິ ອາໂລໂກ ທິຏ຺ໂຐ, ເອວເມວ ຣຕ຺ຕິໍ ທິຏ຺ຐາກາເຣເນວ ທິວາ ຕໍ ອາໂລກໍ ມນສິ ກໂຣຕິ ຈິຕ຺ເຕ ຐເປຕີຕິ ອິມມຕ຺ຖໍ ອຕິທິສຕິ. ອິຕິ ວິວເຏນ ເຈຕສາຕິ ເອວໍ ອປິຫິເຕນ ຈິຕ຺ເຕນ, ຖິນມິທ຺ຘາປິຘາເນນ ອປິຫິຕຈິຕ຺ເຕນາຕິ ວຸຕ຺ຕໍ ໂຫຕິ. ອປຣິໂຍນທ຺ເຘນາຕິ ສມນ຺ຕໂຕ ອນທ຺ເຘນ ອສຎ຺ຉາທິເຕນ. ກິຎ຺ຈາປີຕິອາທິນາ ອຕ຺ຕນາ ວຸຕ຺ຕເມວຕ຺ຖໍ ສມຕ຺ເຖຕິ. ອາໂລກສທິສໍ ກຕໍ ‘‘ຍຖາ ທິວາ ຕຖາ ຣຕ຺ຕິ’’ນ຺ຕິອາທິນາ.

ສຕ຺ຕຏ຺ຐານິກສ຺ສາຕິ ‘‘ອຠິກ຺ກນ຺ເຕ ປຏິກ຺ກນ຺ເຕ ສມ຺ປຊານກາຣີ ໂຫຕີ’’ຕິອາທິນາ (ທີ. ນິ. ໑.໒໑໔; ໒.໓໗໖; ມ. ນິ. ໑.໑໐໙) ວຸຕ຺ຕສ຺ສ ສຕ຺ຕຏ຺ຐານິກສ຺ສ ສຕິສມ຺ປຊຎ຺ຎສ຺ສ ອຕ຺ຖາຍ. ປຣິຄ຺ຄຫິຕວຕ຺ຖາຣມ຺ມຓຕາຍາຕິ ວຕ຺ຖຸໂນ ອາຣມ຺ມຓສ຺ສ ຈ ຍາຖາວໂຕ ວິທິຕຠາເວນ. ຍຖາ ຫິ ສປ຺ປໍ ປຣິເຍສນ຺ເຕນ ຕສ຺ສ ອາສເຍ ວິທິເຕ ໂສປິ ວິທິໂຕ ຄຫິໂຕ ເອວ ຈ ໂຫຕິ ມນ຺ຕາຄທພເລນ ຕສ຺ສ ຄຫຓສ຺ສ ສຸກຣຕ຺ຕາ, ເອວໍ ເວທນາຍ ອາສຍຠູເຕ ວຕ຺ຖຸມ຺ຫິ ອາຣມ຺ມເຓ ຈ ວິທິເຕ ອາທິກມ຺ມິກສ຺ສປິ ເວທນາ ວິທິຕາ ຄຫິຕາ ເອວ ໂຫຕິ ສລກ຺ຂຓໂຕ ສາມຎ຺ຎລກ຺ຂຓໂຕ ຈ ຕສ຺ສາ ຄຫຓສ຺ສ ສຸກຣຕ຺ຕາ. ປເຄວ ປຣິຎ຺ຎາຕວຕ຺ຖຸກສ຺ສ ຂີຓາສວສ຺ສ. ຕສ຺ສ ຫິ ອຸປ຺ປາທກ຺ຂເຓປິ ຐິຕິກ຺ຂເຓປິ ຠງ຺ຄກ຺ຂເຓປິ ເວທນາ ວິທິຕາ ປາກຏາ ໂຫນ຺ຕິ ‘‘ຕາ ເວທນາ ເອວໍ ອຸປ຺ປຊ຺ຊິຕ຺ວາ’’ຕິອາທິນາ. ນ ເກວລຎ຺ຈ ເວທນາ ເອວ, ອິຘ ວຸຕ຺ຕາ ສຎ຺ຎາທໂຍປິ ອວຸຕ຺ຕາ ເຈຕນາທໂຍປິ ວິທິຕາວ ອຸປ຺ປຊ຺ຊນ຺ຕິ ເຈວ ຕິຏ຺ຐນ຺ຕິ ຈ ນິຣຸຊ຺ຌນ຺ຕິ ຈ. ນິທສ຺ສນມຕ຺ຕຎ຺ເຫຕໍ, ຍທິທໍ ປາຬິຍໍ ເວທນາສຎ຺ຎາວິຕກ຺ກຄ຺ຄຫຓໍ. ເຕນ ອນວເສສໂຕ ສພ຺ພຘມ຺ມານມ຺ປິ ອຸປ຺ປາທາທິໂຕ ວິທິຕຠາວໍ ທສ຺ເສຕິ.

ອປິຈ ເວທນາຍ ອຸປ຺ປາໂທ ວິທິໂຕ ໂຫຕິ, ອຸປຏ຺ຐານໍ ວິທິຕໍ ໂຫຕິ, ອຕ຺ຖງ຺ຄໂມ ວິທິໂຕ ໂຫຕິ. ກຖໍ ເວທນາຍ ອຸປ຺ປາໂທ ວິທິໂຕ ໂຫຕິ? ອວິຊ຺ຊາສມຸທຍາ ເວທນາສມຸທໂຍ, ຕຓ຺ຫາສມຸທຍາ ກມ຺ມສມຸທໂຍ, ຜສ຺ສສມຸທຍາ ເວທນາສມຸທໂຍຕິ ນິພ຺ພຕ຺ຕິລກ຺ຂຓໍ ປສ຺ສນ຺ໂຕປິ ເວທນາກ຺ຂນ຺ຘສ຺ສ ສມຸທຍໍ ປສ຺ສຕິ. ເອວໍ ເວທນາຍ ອຸປ຺ປາໂທ ວິທິໂຕ ໂຫຕິ. ກຖໍ ເວທນາຍ ອຸປຏ຺ຐານໍ ວິທິຕໍ ໂຫຕິ? ອນິຈ຺ຈໂຕ ມນສິກໂຣໂຕ ຂຍຕຸປຏ຺ຐານໍ ວິທິຕໍ ໂຫຕິ, ທຸກ຺ຂໂຕ ມນສິກໂຣໂຕ ຠຍຕຸປຏ຺ຐານໍ ວິທິຕໍ ໂຫຕິ, ອນຕ຺ຕໂຕ ມນສິກໂຣໂຕ ສຸຎ຺ຎຕຸປຏ຺ຐານໍ ວິທິຕໍ ໂຫຕິ. ເອວໍ ເວທນາຍ ອຸປຏ຺ຐານໍ ວິທິຕໍ ໂຫຕິ. ອິຕິ ຂຍໂຕ ຠຍໂຕ ສຸຎ຺ຎໂຕ ຊານາຕິ. ກຖໍ ເວທນາຍ ອຕ຺ຖງ຺ຄໂມ ວິທິໂຕ ໂຫຕິ? ອວິຊ຺ຊານິໂຣຘາ ເວທນານິໂຣໂຘ…ເປ… ເອວໍ ເວທນາຍ ອຕ຺ຖງ຺ຄໂມ ວິທິໂຕ ໂຫຕິ. ອິມິນາປິ ນເຍເນຕ຺ຖ ອຕ຺ໂຖ ເວທິຕພ຺ໂພ.

ອິຕິ ຣູປນ຺ຕິ ເອຕ຺ຖ ອິຕິສທ຺ໂທ ອນວເສສໂຕ ຣູປສ຺ສ ສຣູປນິທສ຺ສນຕ຺ໂຖຕິ ຕສ຺ສ ອິທໍ ຣູປນ຺ຕິ ເອເຕນ ສາຘາຣຓໂຕ ສຣູປນິທສ຺ສນມາຫ, ເອຕ຺ຕກໍ ຣູປນ຺ຕິ ເອເຕນ ອນວເສສໂຕ, ນ ອິໂຕ ປຣໍ ຣູປໍ ອຕ຺ຖີຕິ ຕພ຺ພິນິມຸຕ຺ຕສ຺ສ ອຎ຺ຎສ຺ສ ອຠາວໍ. ອິຕິ ເວທນາຕິອາທີສຸປິ ອຍໍ ເວທນາ, ເອຕ຺ຕກາ ເວທນາ, ອິໂຕ ປຣໍ ເວທນາ ນຕ຺ຖິ. ອຍໍ ສຎ຺ຎາ…ເປ… ອິເມ ສງ຺ຂາຣາ…ເປ… ອິທໍ ວິຎ຺ຎາຓໍ, ເອຕ຺ຕກໍ ວິຎ຺ຎາຓໍ, ອິໂຕ ປຣໍ ວິຎ຺ຎາຓໍ ນຕ຺ຖີຕິ ເອວມຕ຺ໂຖ ທຏ຺ຐພ຺ໂພຕິ ອາຫ ‘‘ເວທນາທີສຸປິ ເອເສວ ນໂຍ’’ຕິ.

ຎາເຓນ ຊານິຕ຺ວາ ປໂຣປຣານິ. ປໂຣປຣານີຕິ ປຣານິ ຈ ໂອປຣານິ ຈ. ອຸຕ຺ຕມາຘມານີຕິ ປຣຕ຺ຕຠາວສກຕ຺ຕຠາວາທີນິ ອຸຕ຺ຕມາຘມານິ. ຈລິຕນ຺ຕິ ຕຓ຺ຫາທິຏ຺ຐິວິປ຺ຜນ຺ທິຕໍ. ອນີໂຆຕິ ຣາຄາທິອີຆຣຫິໂຕ. ອຕາຣິ ໂສຕິ ໂສ ເອວຣູໂປ ອຣຫາ ຊາຕິຊຣໍ ອຕຣິ.

ສມາຘິຠາວນາສຸຕ຺ຕວຓ຺ຓນາ ນິຏ຺ຐິຕາ.

໒-໔. ປຎ຺ຫພ຺ຍາກຣຓສຸຕ຺ຕາທິວຓ຺ຓນາ

໔໒-໔໔. ທຸຕິເຍ ເອເຕສໍ ປຎ຺ຫານນ຺ຕິ ເອກໍສພ຺ຍາກຣຓາທີນໍ ຈຕຸນ຺ນໍ ປຎ຺ຫານໍ. ຕສ຺ມິໍ ຕສ຺ມິໍ ຐາເນ ພ຺ຍາກຣຓໍ ຊານາຕີຕິ ‘‘ຈກ຺ຂຸໍ ອນິຈ຺ຈ’’ນ຺ຕິ ປຸຏ຺ເຐ ‘‘ອນິຈ຺ຈ’’ນ຺ຕິ ເອກໍເສເນວ ພ຺ຍາກາຕພ຺ພໍ. ‘‘ອນິຈ຺ຈາ ນາມ ຈກ຺ຂຸ’’ນ຺ຕິ ປຸຏ຺ເຐ ປນ ‘‘ນ ເກວລໍ ຈກ຺ຂຸເມວ, ໂສຕມ຺ປິ ອນິຈ຺ຈ’’ນ຺ຕິ ເອວໍ ວິຠຊິຕ຺ວາ ພ຺ຍາກາຕພ຺ພໍ. ‘‘ຍຖາ ຈກ຺ຂຸໍ ຕຖາ ໂສຕໍ, ຍຖາ ໂສຕໍ ຕຖາ ຈກ຺ຂຸ’’ນ຺ຕິ ປຸຏ຺ເຐ ‘‘ເກນຏ຺ເຐນ ປຸຈ຺ຉສີ’’ຕິ ປຏິປຸຈ຺ຉິຕ຺ວາ ‘‘ທສ຺ສນຏ຺ເຐນ ປຸຈ຺ຉາມີ’’ຕິ ວຸຕ຺ເຕ ‘‘ນ ຫີ’’ຕິ ພ຺ຍາກາຕພ຺ພໍ. ‘‘ອນິຈ຺ຈຏ຺ເຐນ ປຸຈ຺ຉາມີ’’ຕິ ວຸຕ຺ເຕ ‘‘ອາມາ’’ຕິ ພ຺ຍາກາຕພ຺ພໍ. ‘‘ຕໍ ຊີວໍ ຕໍ ສຣີຣ’’ນ຺ຕິອາທີນິ ປຸຏ຺ເຐນ ປນ ‘‘ອພ຺ຍາກຕເມຕໍ ຠຄວຕາ’’ຕິ ຐເປຕພ຺ໂພ, ເອສ ປຎ຺ໂຫ ນ ພ຺ຍາກາຕພ຺ໂພຕິ ເອວໍ ຊານາຕີຕິ ອຕ຺ໂຖ. ອຕ຺ຖສມາຄເມນາຕິ ອຕ຺ຖສ຺ສ ປຏິລາເຠນ ລທ຺ຘພ຺ເພນ. ສມິຕິ ສງ຺ຄຕິ ສໂມຘານນ຺ຕິ ສມໂຍ, ປຏິລາໂຠ. ສມໂຍ ເອວ ອຠິສມໂຍ, ອຠິມຸຂຠາເວນ ວາ ສມໂຍ ອຠິສມໂຍຕິ ເອວເມຕ຺ຖ ປທຕ຺ໂຖ ເວທິຕພ຺ໂພ. ເສສໍ ສຸວິຎ຺ເຎຍ຺ຍເມວ. ຕຕິຍຈຕຸຕ຺ຖານິ ອຸຕ຺ຕານຕ຺ຖາເນວ.

ປຎ຺ຫພ຺ຍາກຣຓສຸຕ຺ຕາທິວຓ຺ຓນາ ນິຏ຺ຐິຕາ.

໕-໖. ໂຣຫິຕສ຺ສສຸຕ຺ຕາທິວຓ຺ຓນາ

໔໕-໔໖. ປຎ຺ຈເມ (ສໍ. ນິ. ຏີ. ໑.໑.໑໐໗) ເອໂກກາເສຕິ ຈກ຺ກວາຬສ຺ສ ປຣິຍນ຺ຕສຎ຺ຎິເຕ ເອກສ຺ມິໍ ໂອກາເສ. ຠຸມ຺ມນ຺ຕິ ‘‘ຍຕ຺ຖາ’’ຕິ ອິທໍ ຠຸມ຺ມວຈນໍ. ສາມຎ຺ຎໂຕ ວຸຕ຺ຕມ຺ປິ ‘‘ໂສ ໂລກສ຺ສ ອນ຺ໂຕ’’ຕິ ວຈນໂຕ ວິສິຏ຺ຐວິສຍເມວ ໂຫຕິ. ‘‘ນ ຊາຍຕິ, ນ ມີຍຕີ’’ຕິ ວຕ຺ວາ ປຸນ ‘‘ນ ຈວຕິ, ນ ອຸປປຊ຺ຊຕີ’’ຕິ ກສ຺ມາ ວຸຕ຺ຕນ຺ຕິ ອາຫ ‘‘ອິທໍ ອປຣາປຣໍ…ເປ… ຄຫິຕ’’ນ຺ຕິ. ປທຄມເນນາຕິ ປທສາ ຄມເນນ. ສຕ຺ຖາ ສງ຺ຂາຣໂລກສ຺ສ ອນ຺ຕໍ ສນ຺ຘາຍ ວທຕິ ອຸປຣິ ສພ຺ພານິ ປກາເສຕຸກາໂມ. ສງ຺ຂາຣໂລກສ຺ສ ຫິ ອນ຺ໂຕ ນິພ຺ພານໍ.

ທຬ຺ຫໍ ຖິຣໍ ຘນຸ ເອຕສ຺ສາຕິ ທຬ຺ຫຘນ຺ວາ, ໂສ ເອວ ‘‘ທຬ຺ຫຘມ຺ມາ’’ຕິ ວຸຕ຺ໂຕ. ເຕນາຫ ‘‘ທຬ຺ຫຘນູ’’ຕິ. ອຸຕ຺ຕມປ຺ປມາຓໍ ນາມ ສຫສ຺ສຖາມຘນຸ. ຘນຸຄ຺ຄຓ຺ຫນສິປ຺ປຈິຕ຺ຕກຕາຍ ຘນຸຄ຺ຄໂຫ, ນ ຘນຸຄ຺ຄຫຓມຕ຺ເຕນາຕິ ອາຫ ‘‘ຘນຸຄ຺ຄໂຫຕິ ຘນຸອາຈຣິໂຍ’’ຕິ. ‘‘ຘນຸຄ຺ຄໂຫ’’ຕິ ວຕ຺ວາ ‘‘ສິກ຺ຂິໂຕ’’ຕິ ວຸຕ຺ເຕ ຘນຸສິກ຺ຂາຍ ສິກ຺ຂິໂຕຕິ ວິຎ຺ຎາຍຕິ. ສິກ຺ຂາ ຈ ເອຕ຺ຕເກນ ກາເລນ ສິກ຺ຂນ຺ຕສ຺ສ ອຸກ຺ກໍສຄຕາ ໂຫຕີຕິ ອາຫ ‘‘ທ຺ວາທສ ວສ຺ສານິ ຘນຸສິປ຺ປໍ ສິກ຺ຂິໂຕ’’ຕິ. ອຸສຠປ຺ປມາເຓຕິ ວີສຕິ ຍຏ຺ຐິໂຍ ອຸສຠໍ, ຕສ຺ມິໍ ອຸສຠປ຺ປມາເຓ ປເທເສ. ວາລຄ຺ຄນ຺ຕິ ວາລໂກຏິໍ. ກຕຫຕ຺ໂຖຕິ ປຣິຈິຕຫຕ຺ໂຖ. ກຕສຣກ຺ເຂໂປຕິ ຖິຣລກ຺ເຂ ຈ ຈລລກ຺ເຂ ຈ ປເຣສໍ ທສ຺ສນວເສນ ສຣກ຺ເຂປສ຺ສ ກຕາປີ. ເຕນາຫ ‘‘ທສ຺ສິຕສິປ຺ໂປ’’ຕິ, ‘‘ກຕໂຍຄ຺ໂຄ’’ຕິ ເກຈິ. ອສນ຺ຕິ ເອເຕນາຕິ ອສນໍ, ກຓ຺ໂຑ. ຕາລຈ຺ຉາທິນ຺ຕິ ຕາລຈ຺ຉາຍໍ. ສາ ປນ ຣຕນມຕ຺ຕາ ວິທຕ຺ຖິຈຕຸຣງ຺ຄຸລາ.

ປຸຣຕ຺ຖິມາ ສມຸທ຺ທາຕິ ເອກສ຺ມິໍ ຈກ຺ກວາເຬ ປຸຣຕ຺ຖິມາ ສມຸທ຺ທາ. ສມຸທ຺ທສີເສນ ປຸຣຕ຺ຖິມຈກ຺ກວາຬມຸຂວຏ຺ຏິໍ ວທຕິ. ປຈ຺ຉິມສມຸທ຺ໂທຕິ ເອຕ຺ຖາປິ ເອເສວ ນໂຍ. ນິປ຺ປປຎ຺ຈຕນ຺ຕິ ອທນ຺ຕກາຣິຕໍ. ສມ຺ປຕ຺ເຕຕິ ຕາທິເສນ ຊເວນ ຄຈ຺ຉນ຺ເຕນ ສມ຺ປຕ຺ເຕ. ອໂນຕຕ຺ເຕຕິ ເອຕ຺ຖາປິ ‘‘ສມ຺ປຕ຺ເຕ’’ຕິ ປທໍ ອາເນຕ຺ວາ ສມ຺ພນ຺ໂຘ, ຕຖາ ‘‘ນາຄລຕາທນ຺ຕກຏ຺ຐ’’ນ຺ຕິ ເອຕ຺ຖາປິ. ຕທາຕິ ຍທາ ໂສ ໂລກນ຺ຕຄເວສໂກ ອໂຫສິ, ຕທາ. ທີຆາຍຸກກາໂລຕິ ອເນກວສ຺ສສຫສ຺ສາຍຸກກາໂລ. ຈກ຺ກວາຬໂລກສ຺ສາຕິ ສາມຎ຺ຎວເສນ ເອກວຈນໍ, ຈກ຺ກວາຬໂລການນ຺ຕິ ອຕ຺ໂຖ. ອິມສ຺ມິໍເຍວ ຈກ຺ກວາເຬ ນິພ຺ພຕ຺ຕິປຸພ຺ພປຣິຈຍສິທ຺ຘາຍ ນິກນ຺ຕິຍາ.

ສສຎ຺ຎິມ຺ຫິ ສມນເກຕິ ນ ຣູປຘມ຺ມມຕ຺ຕເກ, ອຖ ໂຂ ປຎ຺ຈກ຺ຂນ຺ຘສມຸທາເຍຕິ ທສ຺ເສຕິ. ສມິຕປາໂປຕິ ສມຸຈ຺ຉິນ຺ນສໍກິເລສຘມ຺ໂມ. ຉຏ຺ຐໍ ອຸຕ຺ຕານເມວ.

ໂຣຫິຕສ຺ສສຸຕ຺ຕາທິວຓ຺ຓນາ ນິຏ຺ຐິຕາ.

໗. ສຸວິທູຣສຸຕ຺ຕວຓ຺ຓນາ

໔໗. ສຕ຺ຕເມ ສຸວິທູຣວິທູຣ-ສທ຺ທານໍ ສມານຕ຺ຖານໍເຍວ ເອກຕ຺ຖ ຄຫຓໍ ອິຘ ນິທ຺ເທໂສ ທູຣາສນ຺ນຠາວສ຺ສ ອເປກ຺ຂາສິທ຺ຘຕ຺ຕາ ອິຘາຘິປ຺ເປຕສ຺ສ ທູຣຠາວສ຺ສ ເກນຈິ ປຣິຍາເຍນ ອນາສນ຺ນຠາວທສ຺ສນຕ຺ຖໍ ກຕນ຺ຕິ ອາຫ ‘‘ເກນຈິ ປຣິຍາເຍນ ອນາສນ຺ນານິ ຫຸຕ຺ວາ’’ຕິອາທິ. ເສສເມຕ຺ຖ ອຸຕ຺ຕານເມວ.

ສຸວິທູຣສຸຕ຺ຕວຓ຺ຓນາ ນິຏ຺ຐິຕາ.

໘. ວິສາຂສຸຕ຺ຕວຓ຺ຓນາ

໔໘. ອຏ຺ຐເມ ວາກ຺ກຣຓຈາຕຸຣິຍໂຕ ວຈນຄຸຓເຫຕູນໍ ປູຣິຍາ ໂປຣີ, ໂປຣິຍໍ ຠວາຕິ ໂປຣີ, ຕາຍ ໂປຣິຍາ. ເຕນາຫ ‘‘ປຣິປຸຓ຺ຓວາຈາຍາ’’ຕິ, ອກ຺ຂຣປທປຣິປຸຓ຺ຓາຍ ວາຈາຍາຕິ ອຕ຺ໂຖ. ອປລິພຸທ຺ຘາຍາຕິ ປິຕ຺ຕາທີຫິ ນ ວິພທ຺ຘາຍ ອນນຸພຸນ຺ຘິຕາຍ. ອເນລຄລາຍາຕິ ອເນລາຍ ອຄລາຍ ນິທ຺ໂທສາຍ ອຄຬິຕປທພ຺ຍຎ຺ຊນາຍ ຈ. ເຖຣສ຺ສ ຫິ ກຖຍໂຕ ປທໍ ວາ ພ຺ຍຎ຺ຊນໍ ວາ ນ ປຣິຫາຍຕິ. ເຕນາຫ ‘‘ອເນລຄລາຍາຕິ ນິທ຺ໂທສາຍ ເຈວ ອຄຬິຕາຍ ຈາ’’ຕິອາທິ. ຕຕ຺ຖ ນິທ຺ໂທສາຍາຕິ ອຕ຺ຖໂຕ ຈ ພ຺ຍຎ຺ຊນໂຕ ຈ ວິຄຕໂທສາຍ. ອປຕິຕປທພ຺ຍຎ຺ຊນາຍາຕິ ອວິຣຫິຕປທພ຺ຍຎ຺ຊນາຍ. ອຖ ວາ ອເນລຄລາຍາຕິ ນ ເອລໍ ໂທສໍ ຄລຕີຕິ ອເນລຄລາ. ອວິຈ຺ຉິນ຺ນວາຈາຍ ອເນລຄລາຍ ຍຖາ ທນ຺ຘມນຸສ຺ສາ ມຸເຂນ ເຂຬໍ ຄຬນ຺ເຕນ ວາຈໍ ຠາສນ຺ຕິ, ນ ເອວຣູປາຍ. ອຖ ໂຂ ນິທ຺ໂທສາຍ ວິສທວາຈາຍາຕິ ອຕ຺ໂຖ. ວິວຏ຺ຏປ຺ປກາສິນີ ວາຈາ ນ ກທາຈິ ວິວຏ຺ຏມຸຕ຺ຕາຕິ ກຕ຺ວາ ອາຫ ‘‘ວິວຏ຺ຏປຣິຍາປນ຺ນາຍາ’’ຕິ, ວິວຏ຺ຏໍ ອມຸຎ຺ຈິຕ຺ວາ ປວຕ຺ຕາຍາຕິ ອຕ຺ໂຖ. ວິວຏ຺ຏປ຺ປກາສິນີ ຫິ ວາຈາ ວິວຏ຺ຏໍ ປຣິຈ຺ຉິຊ຺ຊ ອາປາເທນ຺ຕີ ປວຕ຺ຕຕິ. ນວໂລກຸຕ຺ຕຣຘມ຺ໂມ ສພ຺ພຘມ຺ເມຫິ ສມຸສ຺ສິຕຏ຺ເຐນ ອພ຺ຠຸຄ຺ຄຕຏ຺ເຐນ ຈ ຘໂຊ ນາມາຕິ ອາຫ ‘‘ອພ຺ຠຸຄ຺ຄຕຏ຺ເຐນາ’’ຕິອາທິ. ເສສເມຕ຺ຖ ສຸວິຎ຺ເຎຍ຺ຍເມວ.

ວິສາຂສຸຕ຺ຕວຓ຺ຓນາ ນິຏ຺ຐິຕາ.

໙. ວິປລ຺ລາສສຸຕ຺ຕວຓ຺ຓນາ

໔໙. ນວເມ ອນິຈ຺ຈາທີນິ ວຕ຺ຖູນິ ນິຈ຺ຈນ຺ຕິອາທິນາ ວິປຣີຕໂຕ ອສນ຺ຕີຕິ ວິປລ຺ລາສາ, ສຎ຺ຎາຍ ວິປລ຺ລາໂສ ສຎ຺ຎາວິປລ຺ລາໂສ. ອິຕເຣສຸປິ ຕີສຸ ເອເສວ ນໂຍ. ເອວເມເຕ ຈຕຸນ຺ນໍ ວຕ຺ຖູນໍ ວເສນ ຈຕ຺ຕາໂຣ, ເຕສຸ ວຕ຺ຖູສຸ ສຎ຺ຎາທີນໍ ວເສນ ທ຺ວາທສ ໂຫນ຺ຕິ. ເຕສຸ ອຏ຺ຐ ໂສຕາປຕ຺ຕິມຄ຺ເຄນ ປຫີຍນ຺ຕິ. ອສຸເຠ ສຸຠນ຺ຕິ ສຎ຺ຎາຈິຕ຺ຕວິປລ຺ລາສາ ສກທາຄາມິມຄ຺ເຄນ ຕນຸກາ ໂຫນ຺ຕິ, ອນາຄາມິມຄ຺ເຄນ ປຫີຍນ຺ຕິ. ທຸກ຺ເຂ ສຸຂນ຺ຕິ ສຎ຺ຎາຈິຕ຺ຕວິປລ຺ລາສາ ອຣຫຕ຺ຕມຄ຺ເຄນ ປຫີຍນ຺ຕີຕິ ເວທິຕພ຺ພາ. ເສສເມຕ຺ຖ ອຸຕ຺ຕານເມວ.

ວິປລ຺ລາສສຸຕ຺ຕວຓ຺ຓນາ ນິຏ຺ຐິຕາ.

໑໐. ອຸປກ຺ກິເລສສຸຕ຺ຕວຓ຺ຓນາ

໕໐. ທສເມ ອຸປກ຺ກິລິຏ຺ຐຠາວກຣເຓນາຕິ ມລີນຠາວກຣເຓນ. ປຎ຺ຈວິຘາຍ ສຸຣາຍ ຈຕຸພ຺ພິຘສ຺ສ ຈ ເມຣຍສ຺ສາຕິ ເອຕ຺ຖ ປູວສຸຣາ, ປິຏ຺ຐສຸຣາ, ໂອທນສຸຣາ, ກິຓ຺ຓປກ຺ຂິຕ຺ຕາ, ສມ຺ຠາຣສໍຍຸຕ຺ຕາຕິ ປຎ຺ຈ ສຸຣາ. ປຸປ຺ຜາສໂວ, ຜລາສໂວ, ມຘ຺ວາສໂວ, ຄຸຬາສໂວຕິ ຈຕ຺ຕາໂຣ ອາສວາ, ຈຕຸພ຺ພິຘໍ ເມຣຍໍ ນາມ. ຕຕ຺ຖ ປູເວ ຠາຊເນ ປກ຺ຂິປິຕ຺ວາ ຕຊ຺ຊໍ ອຸທກໍ ທຕ຺ວາ ມທ຺ທິຕ຺ວາ ກຕາ ປູວສຸຣາ. ເອວໍ ເສສສຸຣາປິ. ກິຓ຺ຓາຕິ ປນ ຕສ຺ສາ ສຸຣາຍ ພີຊໍ ວຸຈ຺ຈຕິ. ເຍ ສຸຣາ ‘‘ໂມທກາ’’ຕິປິ ວຸຈ຺ຈນ຺ຕິ, ເຕ ປກ຺ຂິປິຕ຺ວາ ກຕາ ກິຓ຺ຓປກ຺ຂິຕ຺ຕາ. ຘາຕກິອາສວາທິນານາສມ຺ຠາເຣຫິ ສໍໂຍຊິຕາ ສມ຺ຠາຣສໍຍຸຕ຺ຕາ.ມຘຸກຕາລນາຬິເກຣາທິປຸປ຺ຜຣໂສ ຈິຣປຣິວາສິໂຕ ປຸປ຺ຜາສໂວ. ປນສາທິຜລຣໂສ ຜລາສໂວ. ມຸທ຺ທິກາຣໂສ ມຘ຺ວາສໂວ. ອຸຈ຺ຉຸຣໂສ ຄຸຬາສໂວ.

ອຸປກ຺ກິເລສສຸຕ຺ຕວຓ຺ຓນາ ນິຏ຺ຐິຕາ.

ໂຣຫິຕສ຺ສວຄ຺ຄວຓ຺ຓນາ ນິຏ຺ຐິຕາ.

ປຐມປຓ຺ຓາສກໍ ນິຏ຺ຐິຕໍ.