໑. ສໍຂິຕ຺ຕສຸຕ຺ຕວຓ຺ຓນາ

໒໓໒. ຈຕຸຕ຺ຖສ຺ສ ປຐເມ ກາຬກນ຺ຕິ ມລີນໍ, ຈິຕ຺ຕສ຺ສ ອປ຺ປຠສ຺ສຣຠາວກຣນ຺ຕິ ອຕ຺ໂຖ. ຕໍ ປເນຕ຺ຖ ກມ຺ມປຖປ຺ປຕ຺ຕເມວ ອຘິປ຺ເປຕນ຺ຕິ ອາຫ ‘‘ທສອກຸສລກມ຺ມປຖ’’ນ຺ຕິ. ກຓ຺ຫາຠິຊາຕິເຫຕຸໂຕ ວາ ກຓ຺ຫໍ. ເຕນາຫ ‘‘ກຓ຺ຫວິປາກ’’ນ຺ຕິ. ອປາຍູປປຕ຺ຕິ ມນຸສ຺ເສສຸ ຈ ໂທຠຄ຺ຄິຍໍ ກຓ຺ຫວິປາໂກ, ຍໍ ຕສ຺ສ ຕມຠາໂວ ວຸຕ຺ໂຕ. ນິພ຺ພຕ຺ຕນໂຕຕິ ນິພ຺ພຕ຺ຕາປນໂຕ. ປຓ຺ຑຣກນ຺ຕິ ໂອທາຕໍ, ຈິຕ຺ຕສ຺ສ ປຠສ຺ສຣຠາວກຣນ຺ຕິ ອຕ຺ໂຖ. ສຸກ຺ກາຠິຊາຕິເຫຕຸໂຕ ວາ ສຸກ຺ກໍ. ເຕນາຫ ‘‘ສຸກ຺ກວິປາກ’’ນ຺ຕິ. ສຄ຺ຄູປປຕ຺ຕິ ມນຸສ຺ສໂສຠຄ຺ຄິຍຎ຺ຈ ສຸກ຺ກວິປາໂກ, ຍໍ ຕສ຺ສ ໂຊຕິຠາໂວ ວຸຕ຺ໂຕ. ອຸກ຺ກຏ຺ຐນິທ຺ເທເສນ ປນ ‘‘ສຄ຺ເຄ ນິພ຺ພຕ຺ຕນໂຕ’’ຕິ ວຸຕ຺ຕໍ, ນິພ຺ພຕ຺ຕາປນໂຕຕິ ອຕ຺ໂຖ. ມິສ຺ສກກມ຺ມນ຺ຕິ ກາເລນ ກຓ຺ຫໍ ກາເລນ ສຸກ຺ກນ຺ຕິ ເອວໍ ມິສ຺ສກວເສນ ກຕກມ຺ມໍ. ສຸຂທຸກ຺ຂວິປາກນ຺ຕິ ວຕ຺ວາ ຕຕ຺ຖ ສຸຂທຸກ຺ຂານໍ ປວຕ຺ຕິອາກາຣໍ ທສ຺ເສຕຸໍ ‘‘ມິສ຺ສກກມ຺ມໍ ຫີ’’ຕິອາທິ ວຸຕ຺ຕໍ. ກມ຺ມສ຺ສ ກຓ຺ຫສຸກ຺ກສມຎ຺ຎາ ກຓ຺ຫສຸກ຺ກາຠິຊາຕິເຫຕຸຕາຍາຕິ ອປຈຍຄາມິຕາຍ ຕທຸຠຍວິທ຺ຘໍສກສ຺ສ ກມ຺ມກ຺ຂຍກຣກມ຺ມສ຺ສ ອິຘ ສຸກ຺ກປຣິຍາໂຍປິ ອິຈ຺ຉິໂຕຕິ ອາຫ ‘‘ອຸຠຍ…ເປ… ອຍເມຕ຺ຖ ອຕ຺ໂຖ’’ຕິ. ຕຕ຺ຖ ອຸຠຍວິປາກສ຺ສາຕິ ຍຖາຘິຄຕສ຺ສ ອຸຠຍວິປາກສ຺ສ. ສມ຺ປຕ຺ຕິຠວປຣິຍາປນ຺ໂນ ຫິ ວິປາໂກ ອິຘ ສຸກ຺ກໍ ສຸກ຺ກວິປາໂກຕິ ອຘິປ຺ເປໂຕ, ນ ອຈ຺ຈນ຺ຕປຣິສຸທ຺ໂຘ ອຣິຍຜລວິປາໂກ.

ສໍຂິຕ຺ຕສຸຕ຺ຕວຓ຺ຓນາ ນິຏ຺ຐິຕາ.